JUON Ri Korea etan in Jonathan me ear l̦otak im rũttol̦o̦k ilo Amedka, ear l̦ap an kar iioon kalijekl̦o̦k jãn ro jet. Ilo an kar rũtto m̦aantak, ear jino pukot juon jikin me eban iioon kalijekl̦o̦k kõn an oktak turin mejãn im aelõñ eo an. Ke ear erom juon taktõ, ear etal im jerbal ilo juon bukwõn ej pãd turõk ilo Alaska. Enañin aolep armej in bukwõn in rar ãinl̦o̦k wõt mejãn Ri Korea, innem ear kõjatdikdik bwe ilo jikin in eban bar iioon kalijekl̦o̦k.

Bõtab, juon iien ke ear jipañe juon jiroñ 25 an iiõ ilo jikin in, juon men ear wal̦o̦k im ear jako an kõjatdikdik bwe eban bar iioon kalijekl̦o̦k. Ke liin ej rujtok jãn an kar coma, ej reilok im lo Jonathan. Im ke ej loe mejãn, ej ba naan ko reddo im nana ñan Jonathan. Ej kwal̦o̦k an akõjdate kõnke jãn ke ear jodrikdrik, kar katakin e ñan dike armej in Korea. Jonathan ear lukkuun metak. Men in ear kaalikkar ñan e bwe jekdo̦o̦n ewi joñan an kar lukkuun kate ñan pukot juon jikin me emaroñ kon̦ ie ak ej naaj baj iioon wõt kalijekl̦o̦k.

Men in Jonathan ear iioone, ekabũrom̦õjm̦õj im ej kaalikkar bwe kalijekl̦o̦k ej wal̦o̦k ipel̦aakin lal̦ in. Ijoko ewõr armej ie, ewõr kalijekl̦o̦k ie.

 Meñe el̦ap an wal̦o̦k kalijekl̦o̦k ipel̦aakin lal̦ in, ak enañin aolep armej ro rej m̦õkaj im ba bwe rej dike kalijekl̦o̦k. Rej baj ba wõt ilo naan ak ilo kõm̦m̦an ko aer eoktak. Kajjitõk eo in kiiõ: El̦aññe enañin aolep armej rej ba bwe rej dike kalijekl̦o̦k, etke el̦ap an wal̦o̦k ipel̦aakin lal̦ in? Bõlen ej kõnke elõñ iaan armej rein me rej ba bwe rej dike kalijekl̦o̦k rejjab kile bwe er make rej kalijekl̦o̦k. Ak ta kõn kwe, kwõj ke kwal̦o̦k kalijekl̦o̦k?

Meñe jej ba bwe jejjab kalijekl̦o̦k, ak keememej bwe ejjab juon men epidodo ñan kile el̦aññe ewõr jidik kalijekl̦o̦k ilo bũruod. Etke? Baibõl̦ ej letok uwaak eo. Ej ba: “Bõro ej jel̦ã m̦on̦ jãn men otemjej.” (Jeremaia 17:9) Kõn men in, bõlen jej m̦on̦e kõj make im l̦õmn̦ak bwe jej kwal̦o̦k jouj ñan aolep armej jekdo̦o̦n ia eo rej itok jãne. Ak bõlen jej m̦on̦e kõj make im jekpen im ba bwe ewõr un ko rem̦m̦an unin ad dike jet kain armej.

Jenaaj kiiõ kwal̦o̦k juon waanjoñak ñan jipañ kõj mel̦el̦e kõn joñan an pen ad kile el̦aññe ewõr jidik kalijekl̦o̦k ilo bũruod. Eñin ej waanjoñak eo: Kwõj make iaam̦ im kwõj etetal in boñ. Ruo likao me kwõjaje kajjier rej jibadek waj eok. Reaitok im peñpeñ im kwõl̦ak lale likao eo juon ej jibwe juon men ilo pein.

Kwõj ke kajju l̦õmn̦ak bwe likao rein rej iten kaamijak eok? Bõlen kwõj ekkõl kõn wõt am̦ kar iioon jorrããn ko kar m̦okta. Ak mel̦el̦ein ke men in bwe l̦õm̦arein relãj im nana? Ak ta eo ear jiktok ilo l̦õmn̦ak eo am̦ ke kwaar lo l̦õm̦arein? Kwaar ke l̦õmn̦ak er ri ia? Uwaak eo am̦ emaroñ jipañ eok ñan kile bwe ewõr jidik kalijekl̦o̦k ilo bũruom̦.

El̦aññe jej m̦ool ñan kõj make jenaaj kile bwe jet iien jej kwal̦o̦k kalijekl̦o̦k. Baibõl̦ ej kwal̦o̦k kõn men eo me ekkã an kõm̦m̦an bwe armej ren kwal̦o̦k kalijekl̦o̦k. Ej ba: “Armej ej kalimjek tulik.” Mel̦el̦ein rej ekajete armej ekkar ñan paotokier. (1 Samuel 16:7, UBS) Ealikkar bwe aolep armej ewõr jidik kalijekl̦o̦k ilo bũrueer im ekkã an wal̦o̦k jorrããn ko kõn wõt kalijekl̦o̦k. Kajjitõk eo in kiiõ: Armej ro remaroñ ke jol̦o̦k kalijekl̦o̦k jãn bũrueer? Enaaj ke wõr juon iien ñe ejjel̦o̦k armej ilo lal̦ in ej kalijekl̦o̦k?