1, 2. Ta ko jej aikuj kõm̦m̦ani bwe Anij en buñbũruon ippãd?

 EKKÃ an armej ro lukkuun kaorõk wãween an armej ro jet l̦õmn̦ak kõn er. Bõtab, kõnke jej Kũrjin, el̦apl̦o̦k ad kaorõk wãween an Jeova l̦õmn̦ak kõn kõj. Unin ej kõnke Jeova eo Eutiejtata im E eo ear letok “mour” ñan kõj.—Sam 36:9, UBS.

² Rijjelõk Piter ear kwal̦o̦k ta eo jen kõm̦m̦ane bwe Jeova en buñbũruon ippãd. Ear ba: “Mour ko ami ren kwõjarjar im kom̦win aji ñan Anij.” (Riit 2 Piter 3:11, UBS.) Bwe ‘mour ko ad ren kwõjarjar,’ aolep men ko jej kõm̦m̦ani rej aikuj kwõjarjar ak erreo. Mel̦el̦ein bwe kõm̦m̦an ko ad, wãween ad l̦õmn̦ak, im ad kabuñ ñan Anij rej aikuj erreo. Bareinwõt, jej aikuj “aji ñan Anij” ak kõm̦m̦ani men ko me rej kaalikkar bwe jej kabuñ ñan Anij wõt kõn aolepen bũruod kõnke jej lukkuun yokwe im kautiej E. Innem, ealikkar bwe Anij ejjab baj buñbũruon wõt el̦aññe em̦m̦an im erreo men ko jej kõm̦m̦ani ilo mour ko ad, ak ej bar buñbũruon ñe ej loe bwe em̦m̦an im erreo bũruod. Jeova ej lale ak “mãlejjoñe bũruon kajjojo” armej. Kõn men in, el̦ap an jel̦ã el̦aññe men ko jej kõm̦m̦ani ilo mour ko ad rerreo im jim̦we, kab el̦aññe jej karejar ñan E wõt kõn aolepen bũruod.—1 Kronikel 29:17.

3. Kajjitõk ta ko jej aikuj kajitũkin kõj kaki?

³ Setan Tepil̦ eo ejjab kõn̦aan bwe jen kõm̦m̦ani men ko me rej kabuñbũruon Anij. Ej kate ñan kõm̦m̦ane jabdewõt men emaroñe bwe en jako jem̦jerã eo ad ippãn Jeova. Jãn iien ñan iien ej m̦on̦e kõj bwe jen bõjrak jãn ad kabuñ ñan Jeova. (Jon 8:44; 2 Korint 11:13-15, UBS) Kõn men in, jej aikuj kajitũkin kõj make, ‘Ewi wãween an Setan m̦on̦e armej ro? Ta ko imaroñ kõm̦m̦ani ñan kõjparok wõt jem̦jerã eo aõ ippãn Jeova?’

4. Ta eo Setan ej kõjjero̦roiki ñan an ko̦kkure jem̦jerã eo ad ippãn Anij im etke?

⁴ Rijjelõk Jemes ear ba: “Kapo ñan juon armej ej itok jãn kõn̦aan ko an renana rej kejebwãbweki im aujiidi. Innem kõn̦aan kein renana rej keotak jerawiwi, im ñe jerawiwi ej ekkeke im l̦ap ej keotak mej.” (Jemes 1:14, 15, UBS) Men eo Setan ej kõjjero̦roik ej bũruod ñan an kajjioñ kapo kõj bwe en jorrããn jem̦jerã eo ad ippãn Anij. Etke? Kõnke kõn̦aan ko ad rej itok jãn bũruod.

5, 6. (1) Ewi wãween an Setan kõjjero̦roik bũruod? (2) Ta ko jilu Setan ej kõjerbali ñan kõm̦m̦an an wõr kõn̦aan ko renana ilo bũruod? (3) Ewi joñan an Setan lukkuun jel̦ã kõjerbali men kein jilu?

⁵ Ewi wãween an Setan kõjjero̦roik bũruod? Baibõl̦ ej ba: “Aolep lal̦ in ej pãd ium̦win pein Ri Nana eo.” (1 Jon 5:19, UBS) Menin kapo ko Setan ej kõjerbali ñan kõjjero̦roik bũruod ej kitibuj “men ko ilo lal̦” in. (Riit 1 Jon 2:15, 16.) Ium̦win elõñ to̦ujin iiõ in an kar Tepil̦ eo kõm̦m̦ani wãween ko im men ko rej wal̦o̦k ilo lal̦ in bwe en kõjerbali ñan kapo armej ro. Kõnke jej mour ilo lal̦ in, jej aikuj kõjparok kõj jãn menin kapo ko an.—Jon 17:15.

⁶ Setan ej kõm̦m̦an an wõr kõn̦aan ko renana ilo bũruod. Ej kõm̦m̦ane men in ilo an kõjerbal men kein jilu: (1) “m̦õm̦ an kanniõk,” (2) “m̦õm̦ an mej ko,” im (3) “wuj waan an mour in,” ak men ko rej kõm̦m̦an an utiej bũruon armej. Men kein jilu Setan ear bar kõjerbali ñan kajjioñ kapo Jijej ilo ãne jem̦aden. Setan elukkuun jel̦ã kilen kõjerbali men kein kõnke elõñ iiõ in an kõjerbali. Ejel̦ã ta iaan men kein jilu emaroñ kõjerbale ñan kapo kajjojo armej. Jenaaj katak kõn ta ko jemaroñ kõm̦m̦ani ñan kõjparok kõj bwe jen jab po. Ak m̦okta jenaaj lale ewi wãween Tepil̦ eo ear maroñ kapo Iv ak ear jab maroñ kapo Nejin Anij.

7. Elemen an kar Setan kapo Iv kõn “m̦õm̦ an kanniõk”?

⁷ Aolep armej rej aikuj m̦õñã bwe ren mour. Ri Kõm̦anm̦an eo ear kõm̦anm̦an lal̦ in bwe jen l̦ak ekkat emaroñ lõñ m̦õñã. Setan emaroñ kõjerbale aikuj in ad ñan m̦õñã bwe en kareel kõj ñan jab pokake Anij. Jen lale elemen an kar kõjerbale men in ñan Iv. (Riit Jenesis 3:1-6.) Setan ear jiroñ Iv bwe eban mej ñe enaaj kañ leen wõjke in “jel̦ã em̦m̦an im nana,” im bwe ñe enaaj kañe enaaj ãinwõt Anij. (Jenesis 2:9) Ej ãinwõt ñe Tepil̦ eo ej ba bwe Iv ejjab aikuj pokake Anij ñan an mour. Mel̦el̦e in ekanooj riab! Ke Tepil̦ eo ear likũt men in ilo l̦õmn̦ak eo an Iv, ear wõr ruo an Iv jokãlõt. Ta jokãlõt ko an? Ej bwe en kajju jol̦o̦k l̦õmn̦ak eo ebõd, ak etal wõt im l̦õmn̦ak kake men eo Setan ear ba im kõtl̦o̦k bwe kõn̦aan  eo an ñan m̦õñã jãn leen wõjke eo en l̦apl̦o̦k wõt. Meñe ebar lõñ wõjke me Iv emaroñ kar m̦õñã jãni, ak ear kããlõt wõjke eo iol̦apen jikin kallib eo im m̦õñã jãn leen wõjke in. Ta in Setan ear kõm̦m̦ane ñan Iv? Eokwe, Setan ear kõm̦m̦an bwe en wõr juon kõn̦aan ilo bũruon Iv ñan kõm̦m̦ane men eo Ri Kõm̦anm̦an eo an ear kamoiki.

8. (1) Elemen an kar Setan kajjioñ kapoik Jijej kõn “m̦õm̦ an kanniõk”? (2) Etke Setan ear jab wiin?

⁸ Men eo Setan ear kapo Iv kake ear bar kõjerbale ñan kajjioñ kapo Jijej. Ke Jijej ear pãd ilo ãne jem̦aden, ear jab m̦õñã ium̦win 40 raan im 40 boñ. Kõn men in, Setan ear kajjioñ kapo Jijej ilo an kõjerbal kõn̦aan eo ñan m̦õñã. Ear ba ñan Jijej: “El̦aññe Kwe Nejin Anij, Kwõn ba ñan dekã in bwe en erom pilawã.” (Luk 4:1-3) Kõn men in, ear wõr ruo an Jijej jokãlõt. Ta jokãlõt ko an? Ej bwe en kõjerbal kajoor eo an bwe en wõr kijen, ak bwe en jab kõm̦m̦ane men in ñan jidik. Jijej ear jel̦ã bwe en jab kõjerbal kajoor eo an ñan kõm̦m̦ane juon men me enaaj kaalikkar an l̦õmn̦ak wõt kõn e make. Meñe ear kwõle ak ear jab l̦õmn̦ak wõt kõn e. El̦apl̦o̦k an Jijej kar l̦õmn̦ak kõn kõtaan eo an ippãn Anij im ear kaorõke men in jãn m̦õñã. Ear uwaake Setan im ba: “Ar jeje, Armej ejãmin mour kõn pilawã wõt, a kõn naan otemjej rej wal̦o̦ktok jãn lo̦ñiin Anij.”​—Matu 4:4.

9. (1) Ta in “m̦õm̦ an mej ko”? (2) Elemen an kar Setan kapo Iv kõn “m̦õm̦ an mej ko”?

⁹ Rijjelõk Jon ear je im kwal̦o̦k aujiid eo juon an Setan, ej “m̦õm̦ an mej ko.” Ta in? Ej ñe juon ej baj kalimjeke juon men im ej oktak im kõn̦aan. Eñin wãween eo Setan ear kapoik Iv kake. Ear ba ñan Iv: “Mejam̦ enaaj pel̦l̦o̦k.” Ke ear tol̦o̦k wõt an Iv kalimjeke leen wõjke eo, ear l̦apl̦o̦k an kõn̦aan kañe. Innem, Iv ear l̦õmn̦ak bwe wõjke eo “eol̦eo̦ ñan mejãn.”

10. (1) Elemen an kar Setan kajjioñ kapo Jijej kõn “m̦õm̦ an mej ko”? (2) Ta uwaak eo an Jijej?

¹⁰ Elemen an kar Setan kajjioñ kapo Jijej kõn “m̦õm̦ an mej ko”? Setan ear “kalwõje E [Jijej] aelõñ in lal̦ otemjej ilo jidik wõt iien. Im tepil̦ ej ba ñan E, ‘Kajoor kein otemjej im aer aiboojoj Inaaj lewaj ñan Eok.’” (Luk 4:5, 6) Ejjab lukkuun aelõñ ak kien men ko Setan ear kalwõje Jijej kaki. Ear kwal̦o̦k juon visõn ñan Jijej kõn aiboojoj ko an aelõñ ko ak kien ko an lal̦ in. Setan emaroñ kar l̦õmn̦ak bwe men in emaroñ kapo Jijej. Ear ba ñan e: “El̦aññe Kwõnaaj kabuñ ñan eõ, enaaj Am̦ men kein otemjej.” (Luk 4:7) Jijej ejjab kõn̦aan kain armej eo me Setan ekõn̦aan bwe en erom. Jijej ear m̦õkaj an uwaake Setan im ba: “Ar je, Kwõn kabuñ ñan Irooj am̦ Anij, im jerbal ñan E wõt.”—Luk 4:8.

11. Ta eo Setan ear kõjerbale ñan kapoik Iv?

¹¹ Rijjelõk Jon ear bar kwal̦o̦k aujiid eo juon an Setan. Ta aujiid in? Ej “wuj waan an mour in,” ak men ko rej kõm̦m̦an an utiej bũruon armej. Adam im Iv rar jab maroñ kõmmejãje im utiej bũrueer kõn men ko ippãer kõnke kar erro wõt armej ijin ioon lal̦. Bõtab, tokãlik rar oktak im utiej bũrueerro. Setan ear kõm̦m̦an bwe Iv en tõmak bwe ewõr juon men em̦m̦an Anij ej dãpiji jãn e. Tepil̦ eo ear ba ñane bwe ñe enaaj m̦õñã jãn “wõjke in jel̦ã em̦m̦an im nana,” innem enaaj ‘ãinwõt anij ran̦ kõn an jel̦ã em̦m̦an im nana.’ (Jenesis 2:17; 3:5) Setan ear kõn̦aan bwe Iv en l̦õmn̦ak bwe ejjab aikuji Jeova ilo mour eo an. Emaroñ bwe utiej bõro ear kõm̦m̦an an Iv po. Ear kañ leen wõjke eo kõn an l̦õmn̦ak bwe eban mej. Elukkuun bõd l̦õmn̦ak in an Iv.

12. (1) Ta wãween eo juon Setan ear kõjerbale bwe en kajjioñ kapoik Jijej? (2) Elemen an kar Jijej uwaake Setan?

¹² Jijej ear jab ãinwõt Iv kõnke ear kwal̦o̦k ettã bõro. Ear likũt juon joñak ekanooj em̦m̦an kõn ettã bõro. Setan ear kajjioñ in kapoiki Jijej bwe en kõm̦m̦ane juon men me enaaj kar mãlejjoñe Anij im kõm̦m̦an an buñbuñ ippãn armej. Kõnke men in ej jerbal in utiej bõro, Jijej ear m̦akoko in roñjake Setan. Jijej ear kajju ba ñan Setan im ba: “Ar ba, Kwõn jab kapo Irooj am̦ Anij.”—Riit Luk 4:9-12.

13, 14. Ewi wãween an Setan kajjioñ in aujiidi kõj ilo raan kein?

¹³ Rainin, Setan ej kõjerbal ejja wõt aujiid ko ear kõjerbali ñan Iv im Jijej. Ej kõjerbal “m̦õm̦ an kanniõk” bwe en kapo armej ñan men ko renana im bwe ren tõr im bũrooklep. Bareinwõt, ej kõjerbal “m̦õm̦ an mej ko” bwe en kapo armej ñan alwõji pija ko rettoon ak nana el̦aptata ilo Internet. Im men eo juon ej kõjerbale ej “wuj waan an mour in” ak men ko rej kõm̦m̦an an utiej bũruon armej im kõn̦aan bwe ren m̦weiie, buñbuñ, im kũbbon̦.

¹⁴ Ri eo̦ñõd ro rej kõjerbal mo̦o̦r ko ñan ko̦jeke ek ko, ãindein bar Setan. “Men ko ilo lal̦” in rej ãinwõt mo̦o̦r eo an Setan. Ej kõjerbali men ko me remaroñ jab  nana bwe en kareel kõj ñan rupe kien ko an Anij. Setan ekõn̦aan bwe jen l̦õmn̦ak bwe eaorõkl̦o̦k aikuj ko ad im an em̦m̦an kõjeied jãn ad kõm̦anm̦an ankilaan Anij. Jab kõtl̦o̦k bwe Setan en m̦on̦e eok!

15. Ewi wãween jemaroñ l̦oore Jijej im jab po ippãn Setan?

¹⁵ Iv ear po ippãn Setan ak Jijej ear jab. Aolepen iien ko me Setan ear kajjioñ in m̦on̦e Jijej, Jijej ear uwaak jãn Jeje ko im ba: “Ar je” ak “Ar ba.” Ñe jej keini ad katak Baibõl̦, innem jenaaj jel̦ã Eoon ko im jenaaj keememeji ilo jabdewõt iien ko jej iioon menin kapo ko. (Sam 1:1, 2) Jen keememej waanjoñak ko an ri karejar ro retiljek an Anij kõnke men in enaaj bar jipañ kõj bwe jen tiljek wõt ãinwõt kar er. (Rom 15:4) Jen kwal̦o̦k ad kautiej Jeova. Mel̦el̦ein men in bwe jen yokwe men ko ej yokwi im dike men ko ej diki. Men in enaaj kõjparok kõj.​—Sam 97:10.

16, 17. Ewi wãween men ko jej l̦õmn̦ak kaki rej jelõt kõj?

¹⁶ Rijjelõk Paul ear rõjañ kõj ñan kõjerbale “maroñ in jel̦ã kajjien em̦m̦an im nana” bwe jen maroñ kain armej eo me ejjab l̦õmn̦ak in ri lal̦ in ak en armej eo me ej l̦õmn̦ak ãinwõt Jeova. (Hibru 5:14) Paul ear ba: “Jolal̦l̦o̦k aolep menin utiej bõro ko rej jutak n̦ae ad jel̦ãl̦o̦kjen̦ kõn Anij; kõmij anjo̦ ioon l̦õmn̦ak otemjej im kõm̦m̦an bwe ren pokake Kũraij.” (2 Korint 10:5, UBS) Naan kein an Paul rej kakeememej kõj bwe jej aikuj lukkuun kõjparok men ko jej l̦õmn̦ak kaki. Men ko jej l̦õmn̦ak kaki rej kaalikkar kain armej rot kõj. Eñin unin jej aikuj kate kõj ñan l̦õmn̦ak kõn men ko rej kabuñbũruon Anij aolep iien.​—Pilippai 4:8.

¹⁷ Ñe jekõn̦aan bwe jen erreo, jej aikuj jol̦o̦k l̦õmn̦ak ko rebõd im kõn̦aan ko rebõd. Jej aikuj yokwe Jeova kõn juon “bõro erreo.” (1 Timote 1:5) Kõnke bõro ej etao, jemaroñ jab kile ewi joñan an “men ko ilo lal̦ in” jelõt kõj. (Jeremaia 17:9) Innem, elukkuun aorõk bwe jen l̦oore kakapilõk in jãn rijjelõk Paul, ej ba: “Kom̦win make mãlejjoñ kom̦ el̦aññe kom̦ pãd ilo tõmak.” Ilo ad katak Baibõl̦, jen kajjitõk ippãd make, ‘L̦õmn̦ak ko aõ im kõn̦aan ko aõ rej ke kabuñbũruon Anij?’​—2 Korint 13:5.

18, 19. Etke jej aikuj kate kõj bwe jen kain armej eo me Jeova ej buñbũruon kake?

¹⁸ Bar juon men me emaroñ jipañ kõj ñan jum̦ae “men ko ilo lal̦” in ej ilo ad keememej naan ko an Jon. Ear ba: “Lal̦ ejakol̦o̦k im m̦õm̦ ko an; a eo ej kõm̦anm̦an ankilaan Anij ej pãdwõt indeeo.” (1 Jon 2:17) Jet remaroñ l̦õmn̦ak bwe jukjukun pãd in an Setan eban jako. Ak ilo m̦ool juon iien enaaj jako. Ñe jej keememej bwe m̦õttan jidik aolep men ko ilo jukjukun pãd in renaaj jako, innem jeban po ilo menin kapo ko an Setan.

¹⁹ Rijjelõk Piter ear ba bwe jen ãinwõt armej eo me Jeova ej m̦õn̦õn̦õ ippãn ke jej kõttar ak “lipjerjer an raan in Irooj itok, kõn eo lañ ko renaaj jako ilo kijeek, im men ko ilowaan renaaj õnl̦o̦k kõn bwil el̦ap.” (2 Piter 3:12) Ejjabto jãn kiiõ raan eo an Jeova enaaj itok, innem Enaaj jol̦o̦k aolep men ko ilo jukjukun pãd in an Setan. Kõn men in, Setan enaaj etal wõt im kõjerbal “men ko ilo lal̦” in ñan m̦on̦e kõj ãinwõt an kar kõm̦m̦ane ñan Iv im Jijej m̦ae iien enaaj jako jukjukun pãd in an. Jen jab ãinwõt Iv im kajjioñ katõpraki kõn̦aan ko ad. El̦aññe jej ãindein ej ãinwõt jej kããlõt Setan bwe en ad anij. Jej aikuj l̦oore joñak eo an Jijej ilo ad jum̦ae menin kapo ko ilo jukjukun pãd in jekdo̦o̦n ewi joñan an Setan kareel kõj kaki. Jen kate kõj bwe jen kain armej eo me Jeova ej buñbũruon kake.