Ilo naan ko jinoin ilo bok in Jenesis ak bok eo jinointata ilo Baibõl̦, ej ba: “Ilo jinoin Anij ear kõm̦anm̦an lañ im lal̦.” (Jenesis 1:1) Ãlikin an Anij kar kõm̦anm̦an menin eddek ko im menninmour ko, ear kõm̦anm̦an armej ro ruo m̦oktata, Adam im Iv. Erro ar oktak jãn menninmour ko kõnke Anij ear kõm̦anm̦an erro bwe ren maroñ kwal̦o̦k yokwe im lañlõñ, kõm̦m̦ani men ko rejim̦we, im bar wãween ko jet. Ear bar lel̦o̦k ñan erro anemkwõj in kããlõt. Kõn men in, jabdewõt pepe rar kõm̦m̦ani rar aikuj uwaak ñan Anij kõn men kein. El̦aññe erro en kar pokake kien ko an Anij, ren kar maroñ kobrak lal̦ in kõn ro nejierro im renaaj kar m̦õn̦õn̦õ im aenõm̦m̦an im mour ñan indeeo. Eñin kar kõn̦aan eo an Anij ñan erro.

Bõtab, juon enjel̦ ear kapo armej rein ñan katõprak kõn̦aan ko an rekũbbon̦. Kõn an kar ãindein, enjel̦ in ear oktak im erom Setan, mel̦el̦ein “Ri Jum̦ae.” Kõn an etao, ear kõm̦m̦an bwe juon jedpãnit ak snake en kõnono ñan Iv. Im ear m̦on̦e Iv bwe enaaj em̦m̦anl̦o̦k mour eo an ñe ejjab pãd ium̦win tõl eo an Anij. Innem, Adam im Iv rar l̦oore Setan im ko̦kkure kõtaan eo aer ippãn Ri Kõm̦anm̦an eo aer. Kõn jokãlõt in enana me erro ar kõm̦m̦ane, erro ar luuji mour indeeo im rar lel̦o̦k jerawiwi ñan aolep ro nejierro. Tokjãn men in, jej jolõt jab weeppãn im jej rũttol̦o̦k im mej.

Ilo iien eo wõt me Adam im Iv rar rupe kien eo an Anij, Anij ear kwal̦o̦k ta eo enaaj kõm̦m̦ane ñan kõm̦adm̦õde apañ in ekabũrom̦õjm̦õj me ear wal̦o̦k. Men in enaaj jipañ aolep ro nejin Adam ñan bõk mour indeeo. Anij ear kanaan bwe ikijjeen ‘ine’ eo ak juon armej, enaaj ko̦kkure Setan im jol̦o̦k eñtaan im apañ ko jej iiooni kõn wõt men eo me Setan, kab Adam im Iv rar kõm̦m̦ane. (Jenesis 3:15) Wõn ‘ine’ ak armej in? Eokwe, tokãlik enaaj alikkar wõn in.

Jãn iien in, Setan ear kate aolep iien bwe en jab tõprak kõn̦aan in an Anij. Ear lõñl̦o̦k wõt armej ro renana ilo lal̦ in. Kõn men in, Anij ear pepe bwe enaaj bõktok juon ibwijleplep im ko̦kkure armej ro renana. Ear jiroñ armej eo ewãnõk etan Noa bwe en jek juon wa kileplep me jekjekin ãinl̦o̦k wõt juon bo̦o̦k. Ear kõm̦m̦ane wa in ñan lo̦mo̦o̦ren e im baam̦le eo an ekoba menninmour ko me Anij ear jiroñe ñan kadel̦o̦ñi ilowaan wa eo.

Juon iiõ ãlikin Ibwijleplep eo, Noa im baam̦le eo an rar diwõj jãn wã eo im jokwe ilo lal̦ in im ejjel̦o̦k kar ri nana. Bõtab, ejjañisn iien an wal̦o̦k ‘ine’ eo ak armej eo Anij ear kallim̦ur kake.

​—Bwebwenato kein rej itok jãn Jenesis, jebta 1-11; Jud 6, 14, 15; im Revelesõn 12:9.