Jerkakpeje eo an Jijej ear lukkuun kakajoor tõmak eo an ro rũkal̦ooran im kõm̦m̦an bwe ren kijejeto. Juon iaaer ej rijjelõk Paul. Joñan an kar kijejeto ear itoitak ñan aolep jikin ko ilo Esia Minor im Mediterranean bwe en kajutak elõñ eklejia ko ie. Im ear kakajoor tõmak eo an kar Kũrjin ro bwe ren maroñ jutak pen n̦ae menin kapo ko im n̦ae ro rar matõrtõr im jum̦ae er. Kõn men in, meñe ear wal̦o̦k mãlejjoñ kein ak ear lõñl̦o̦k wõt oran Kũrjin ro ilo tõre in.

Tokãlik, kar kalbuuji Paul. Bõtab, jekdo̦o̦n ñe ear pãd ilowaan kalbuuj ak ear je lõta ko ñan lel̦o̦k naan in rõjañ im kauwe ko ñan eklejia ko an Kũrjin ro. Ear kakkõl er bwe ren kõjparok er jãn katak ko an ri kanaan ro reriab. Kajoor eo an Anij ear pãd ippãn Paul im ear kamaroñe ñan lo l̦o̦k im̦aan ta ko renaaj wal̦o̦k ñan eklejia ko. Ear maroñ lo bwe tokãlik enaaj wal̦o̦k “armej ro ãierwõt ol̦ip ko rellãj” im renaaj “kwal̦o̦k naan ko reriab.” Rein renaaj del̦o̦ñ ilowaan eklejia ko im “kareel ro ri tõmak bwe ren l̦oor er.”​—Jerbal 20:29, 30, UBS.

Ilo jem̦l̦o̦kin kar epepen eo an Kũrjin ro jinoin, ear jino wal̦o̦k ri kanaan ro reriab. Ilo iien in, Jijej ear kwal̦o̦k ñan rijjelõk Jon visõn ko me rej pãd ilo bok in Revelesõn. Visõn kein rej kõkkar kõn men ko renaaj wal̦o̦k ilju im jekl̦aj. Jon ear je im ba bwe ejjel̦o̦k juon iaan ri jum̦ae ro ak ri kaki ro reriab rar maroñ bõbraik an Anij kajejjet kitien karõk eo an kõn lal̦ in im armej ro. “Aolep kain armej, bwij, kajin, im aelõñ” renaaj roñ nuuj eo em̦m̦an kõn Aelõñ eo an Anij. (Revelesõn 14:6) Lal̦ in enaaj oktak im erom juon pedetaij, im jabdewõt armej eo ekõn̦aan kõm̦anm̦an ankilaan Anij emaroñ mour ilo jikin in eaiboojoj!

Kwõj ke errã bwe mel̦el̦e kein rej nuuj ko rem̦m̦an? El̦aññe aet, eokwe wõnm̦aanl̦o̦k im katak kõn naan ko an Anij ilo Baibõl̦ ñan armej otemjej. Bareinwõt, katak kõn wãween emaroñ jipañ eok kiiõ im ilo raan ko rej pãd im̦aan.

Kwõmaroñ riit Baibõl̦ ilo online im ej pãd ilo Web site in www.pr418.com. Ewõr tarrin in 50 kajin ko me em̦õj ukote Baibõl̦ eo ñani. Im ilo ejja Web site in wõt kwõmaroñ riiti bok kein etaer ej, Juon Ennaan Em̦m̦an Jãn Anij! im Katak ko Rem̦ool jãn Baibõl̦ Eo ilo kajin M̦ajel̦. Ebar wõr bok ko jet kwõmaroñ loi ilo kajin eo ad me rej kwal̦o̦k kõn etke jej aikuj lõke im tõmak Baibõl̦. Im rej bar kwal̦o̦k kõn wãween ko jemaroñ l̦oori katak ko ie me rejejjet im ekkar ñan mour in baam̦le im ñan mour ko ad make. Ak kwõmaroñ bõk mel̦el̦e ko jet ippãn Ri Kõnnaan ro an Jeova.

​—Bwebwenato kein rej itok jãn bok in Jerbal, Epesõs, Pilippai, Kolosse, Pailimõn, 1 Jon, im Revelesõn.