Anij ear kallim̦uri Ebream bwe ‘ine’ eo me ear kanaan kake, enaaj itok jãn baam̦le eo an. Ikijjeen ‘ine’ ak armej in, armej ro jãn “aelõñ otemjej” renaaj jeraam̦m̦an. (Jenesis 22:18) Tokãlik, l̦eo jibwin Ebream etan Jekõb ear em̦m̦akũt ñan Ijipt. Im ilo ijin ear orl̦o̦k baam̦le eo an im rar erom Ri Israel ro.

Elõñ iiõ ko tokãlik, Pero ak irooj eo enana an Ijipt ear kam̦akokoik Ri Israel ro. Ak Anij ear jilkinl̦o̦k juon ri kanaan etan Moses ñan lo̦mo̦o̦ren er. Kõn men in, ilo juon wãween ekabwilõñlõñ, Moses ear maroñ kõjepel Lom̦al̦o Ekilmir im Ri Israel ro rar diwõjl̦o̦k jãn aelõñ in Ijipt. Ãlikin an men in wal̦o̦k, Anij ear lel̦o̦k elõñ kien ko ñan Ri Israel ro ekoba Kien ko Joñoul bwe en tõl im kõjparok er. Kien kein rar kaalikkar bwe rar aikuj lel̦o̦k menin katok ko bwe Anij en jol̦o̦k aer bõd. Anij ear bar kõjerbal Moses ñan jiroñ Ri Israel ro bwe enaaj jilkinl̦o̦k bar juon ri kanaan ñan er. Ri kanaan in enaaj ‘ine’ eo ak armej eo me Anij ear kallim̦ur kake.

Elõñl̦o̦k jãn 400 iiõ ko tokãlik, Anij ear kwal̦o̦k juon kallim̦ur ñan Kiiñ Devid. Ear kallim̦uri bwe ‘ine’ eo ak armej eo me ear kanaan kake ilo jikin kallib in Iden, enaaj kiiñ im aelõñ eo an enaaj pãdwõt ñan indeeo. Armej in enaaj Messaia eo ak Ri Lo̦mo̦o̦r eo me Anij enaaj jitõñe bwe en lo̦mo̦o̦ren aolep armej im kõkããle lal̦ in bwe en juon Pedetaij.

Jidik kõn jidik Anij ear kwal̦o̦k men ko jet kõn Messaia eo. Ear kõjerbal Devid im ri kanaan ro jet ñan kwal̦o̦k bwe Messaia eo enaaj ettã bõro im jouj. Rar bar kanaan bwe armej ro reban bar kwõle, im enaaj ejjel̦o̦k tarin̦ae. Im reban bar kõm̦m̦ani men ko renana ñan ro jet ñe rej pãd ium̦win tõl eo an Messaia eo. Ilo iien in, aolep armej ro renaaj aenõm̦m̦an ippãn doon im ippãn menninmour ko. Men ko me rejjab ankilaan Anij ãinwõt nañinmej, eñtaan, im mej renaaj jako. Im armej ro me rar mej renaaj bar mour ilo lal̦ in.

Anij ear kõjerbal ri kanaan Maika ñan kwal̦o̦k bwe Messaia eo enaaj l̦otak ilo Betleem. Im ikijjeen ri kanaan Daniel, Anij ear kõjerbale ñan kwal̦o̦k bwe tokãlik ri kõjdat ro renaaj m̦an Messaia eo ñan mej. Bõtab, Anij enaaj kajerkakpejeik e im lel̦o̦k maroñ ñan e bwe en juon Kiiñ ilañ. Daniel ear bar jel̦ã bwe Aelõñ ak kien eo an Messaia eo enaaj jol̦o̦k aolep kien ko jet im enaaj pãdwõt ñan indeeo. Ear ke jejjet kanaan kein kõn Messaia eo? Ear ke itok? Eokwe, jen lale.

​—Bwebwenato kein rej itok jãn Jenesis, jebta ko 22-50, im Exodus, Duteronomi, 2 Samuel, Sam, Aiseia, Daniel, Maika, im Zekaraia 9:9.