Kajjitõk ko Baibõl̦ Ej Uwaaki
Wõn ro renaaj wanlõñl̦o̦k ñan lañ, im etke?
Elõñ milien armej ro rej kõjatdikdik bwe ñe remej renaaj etal ñan lañ. Jijej ear ba bwe rijjilõk ro an retiljek renaaj mour ilañ. M̦okta jãn an kar mej, ear kallim̦uri er bwe ej ilen kõpooj ijo jikier ilañ ippãn Jemãn.—Riit Jon 14:2.
Etke armej ro rej jerkakpeje ilo lañ? Ta eo renaaj kõm̦m̦ane ilañ? Jijej ear jiroñ rijjilõk ro an bwe renaaj irooj im tõl aolepen lal̦.—Riit Luk 22:28-30; Revelesõn 5:10.
Aolep ro rem̦m̦an rej ke wanlõñl̦o̦k ñan lañ?
Ilo enañin aolep aelõñ ko, ewõr jet wõt rej irooj ak tõl aelõñ ko aer. Ãindeinl̦o̦k wõt, jejjo wõt armej ro Jijej ej kajerkakpejeik er ñan lañ bwe ren irooj ioon lal̦ in. (Luk 12:32) Baibõl̦ eo ej kwal̦o̦k oran armej ro renaaj irooj ippãn Jijej ilañ.—Riit Revelesõn 14:1.
Jijej ear ba bwe jet iaan rũkal̦oor ro an renaaj pãd ippãn ilañ. Kwõjel̦ã ke ta eo renaaj kõm̦m̦ane ilañ?
Bõtab, ejjab ro wõt rej wanlõñl̦o̦k ñan lañ renaaj bõk juon jinõkjeej em̦m̦an. Armej ro jet retiljek an Jijej me rej mour ium̦win Kien eo an renaaj m̦õn̦õn̦õ im mour indeeo ilo juon pedetaij eaiboojoj ioon lal̦. (Jon 3:16) Jet iaaer renaaj el̦l̦ã im mour jãn iien eo naaj ko̦kkure jukjukun pãd in enana. Im ro jet ej ro me rar mej im renaaj bar mour.—Riit Jabõn Kõnnaan 2:21; Jon 5:28, 29, UBS.
