Juon Jorrããn El̦ap me Ej Wal̦o̦k ñan Ajri Ro
Juon Jorrããn El̦ap me Ej Wal̦o̦k ñan Ajri Ro
Scott im Heather rej ruo rippãlele ro im el̦ap aerro m̦õn̦õn̦õ ippãn doon. Ewõr juon nejierro l̦addik jidikdik me jilu an iiõ. * (Lale kõmel̦el̦e eo itulal̦.) Elukkuun em̦m̦an wãween aerro lale ajri in nejierro. Ilo raan kein, ejjab pidodo ñan lale im kõjparok ajri ro kõnke elõñ men ko rũtto ro rej aikuj kõm̦m̦ani. Rej aikuj bar katakin ajri ro nejier elõñ men ko. Ewõr juon men me el̦ap an Scott im Heather kate erro ñan kõm̦m̦ane. Rej kate erro joñan wõt aerro maroñ ñan kõjparok l̦addik in nejierro bwe ro jet ren jab ko̦kkure im kõm̦m̦ani m̦anit ko rejekkar ñane. Etke?
Heather ej ba: “Jema ekar juon em̦m̦aan eo me ellulu im ekkadekdek. Ekõn m̦an eõ im jibjibwe ijoko ejekkar an jibwi ippa im ippãn leddik ro jatũ kab kõm̦m̦ani m̦anit ko rejekkar ñan kõm.” * (Lale kõmel̦el̦e eo itulal̦.) Ñe ajri ro rej iioon wãween in, epen aer mel̦o̦kl̦o̦ke im enaaj to an men in jelõt l̦õmn̦ak im eñjake ko aer. Eñin unin Heather im Scott rej lukkuun kate er joñan wõt aerro maroñ ñan kõjparoke l̦addik jidikdik eo nejierro.
Elõñ rũtto ro rej lukkuun inepata ñe armej ro renaaj ko̦kkure ajri ro nejier im kõm̦m̦ani m̦anit ko rejekkar ñan er. Bõlen ewõr nejũm̦ ajri im el̦ap am̦ bar inepata kake men in. Bõtab, bõlen kwõjjañin kar iioon wãween in me ej jelõt Heather im Scott. Mekarta, ejjel̦o̦k pere bwe em̦õj am̦ roñ nuuj im bwebwenato ko kõn an armej ro ko̦kkure ajri ro im kõm̦m̦ani m̦anit ko renana im rekajjõjõ ñan er. Ipel̦aakin lal̦ in, aolep ro me elukkuun em̦m̦an aer lale ajri ro nejier rej lukkuun bwilõñ im l̦o̦kjenaer ñe rej roñ kõn men ko renana me armej rej kõm̦m̦ani ñan ajri ro ilo bukwõn ko aer.
Juon eo me ej ekkatak im kõm̦m̦an etale ko kõn jorrããn ko rej wal̦o̦k ñan ajri ro ej ba bwe an armej ro ko̦kkure ajri ro “ej m̦õttan men ko renanatata im rej wal̦o̦k ilo raan kein ad.” Meñe jej lukkuun bũrom̦õj kõn men in enana me ej wal̦o̦k ñan ajri ro, ak ro me rej katak kõn Baibõl̦ rejjab bwilõñ. Etke? Kõnke em̦õj aer katak jãn Naan in Anij bwe jej mour ilo “raan ko ãliktata.” Armej ro ilo raan kein el̦ap aer “lãj,” “yokwe menin kabuñbũrueer,” im “rejjab yokwe ro nukwier.”—2 Timote 3:1-5.
Jorrããn in me ej wal̦o̦k ñan ajri ro ej juon apañ l̦apl̦ap. El̦ap an ro me ewõr nejier inepata ñe rej l̦õmn̦ak kõn rinana ro me rej kappok ajri ñan aer ko̦kkure er. Bõtab, apañ in ej juon men me jemãn im jinen ajri ro remaroñ bõbrae jãn an wal̦o̦k. Ta ko ro ewõr nejier remaroñ kõm̦m̦ani ñan kõjparok ajri ro nejier bwe armej ro ren jab ko̦kkure er im kõm̦m̦ani m̦anit ko rejekkar ñan er? Eokwe, jenaaj etale men in ilo katak in tok juon.
[Kõmel̦el̦e ko itulal̦]
^ Em̦õj ukot ãt ko etan armej ro ilo katak in.
^ Men ko jej pojak in kõnnaan kaki kiiõ remaroñ kajjookok im jab ekkar ñan m̦anit kein ad, bõtab jej aikuj lukkuun tipdiki mel̦el̦e kein kõnke aolep ren maroñ jel̦ã kilen kõjparok ajri ro nejier jãn ro renana. Ñe juon rũtto ej ko̦kkure ak kõm̦m̦ani men ko rejekkar ñan ajri ro, armej in ej kõjerbale ajri in ñan kõm̦m̦an bwe en tõprak kõn̦aan ko an rettoon im renana. Ekkã an rũtto rein kõm̦m̦ani men ko renana me ilo kajin Grik ej mel̦el̦ein por·neiʹa. Naan in por·neiʹa ej kitibuj an ruo armej me rejjañin m̦are babu ippãn doon, im an juon jibjibwe m̦õttan ko rejekkar ilo ãnbwinnin bar juon eo ejjab pãleen. Ej bar kitibuj an armej ro kõjerbale lo̦ñier ak jikin kõppojak bwidej ko aer ñan babu ak pãd ippãn bar juon. Jet rũtto rej kõm̦m̦ani men ko rejekkar ñan ajri ro ilo aer iukkure kake ittin ajri ro, kwal̦o̦k naan ko relukkuun nana im ettoon, kaalwõje ajri ro pija ko renana, kõjjaade ajri ro, im ilo aer utũki nuknuk ko aer im keelwaan im̦aan mejãn ajri ro. M̦anit kein im men kein me rũtto rein rej kõm̦m̦ani ñan ajri ro relukkuun jekkar im rej itok jãn “m̦õm̦ in kanniõk.” Armej rein “rekajjõjõ im ejjel̦o̦k aer kõmmaanwa.”—Galetia 5:19-21; Epesõs 4:19, UBS.
