Betani ej juon bukwõn edik me ruo m̦ail̦ ettol̦o̦kin jãn Jerusalem. (Jon 11:18) Jejjo wiik m̦okta jãn an kar Jijej mej, ear wal̦o̦k juon men ekabũrom̦õjm̦õj ilo bukwõn in. Juon iaan ro m̦õttan Jijej me el̦ap an epaake ear nañinmej ilo jidimkij im mej, etan in Lazerõs.

Ilo iien eo me Jijej ear roñ kõn ta eo ear wal̦o̦k, ear ba ñan rũkal̦oor ro an bwe Lazerõs ekiki ak ej etal bwe en ko̦ruji. (Jon 11:11) Bõtab, rũkal̦oor rein an Jijej rar jab mel̦el̦e, eñin unin Jijej ear ba l̦o̦k ñan er ilo alikkar im ba: “Lazerõs emej.”​—Jon 11:14.

Ãlikin aer kar kalibwin Lazerõs im emootl̦o̦k emãn raan, Jijej ej tõpartok Betani bwe en kaenõm̦m̦an Marta, lio jein ak jatin Lazerõs. Liin ear ba ñan Jijej: “El̦aññe Kwaar pãd ijin, jeiũ ak jatũ m̦aan ejãmin kar mej.” (Jon 11:17, 21) Im Jijej ear ba: “Ña jerkakpeje eo im mour eo. Eo ej lõke Eõ, meñe emej, enaaj bar mour.”​—Jon 11:25.

Jijej ear kam̦ool naan ko an ke ear kepaakl̦o̦k lõb eo im lam̦õj im ba: “Lazerõs, kwõn itok!” (Jon 11:43) Innem, armej ro ijo rar bwilõñ ke l̦eo ear mej ej diwõjtok.

M̦oktal̦o̦k jãn kar iien in, Jijej ear bar kõmour ruo ri mej. Juon iaaer ej leddik eo nejin em̦m̦aan eo etan Jairõs. Im ilo iien eo leddik in ear mej, Jijej ear bar ba bwe ej kiki.​—Luk 8:52.

Ke Lazerõs ear mej, Jijej ear ba bwe mej ej ãinwõt ñe juon ej kiki. Ear bar ba ejja men in wõt ke leddik eo nejin Jairõs ear mej. Elukkuun jejjet an kar Jijej ba bwe mej ej ãinwõt ñe juon ej kiki. Etke? Kõnke ñe juon ej kiki ejajel̦o̦kjen̦ im ejjel̦o̦k men en̦ ej eñjake. Ej kakkije wõt im ejjab eñtaan. (Ekklisiastis 9:5; lale bo̦o̦k eo etan,  “Mej Ej Ãinwõt Ñe Juon Ej Kiki im Ettoñ.”) Rũkal̦oor ro an Jijej ilo iien ko etto rar mel̦el̦e kõn ta eo ej wal̦o̦k ñan juon eo emej. Ekkar ñan juon bok (Encyclopedia of Religion and Ethics) ej ba: “Ippãn rũkal̦oor ro an Jijej, mej ej  ãinwõt kiki, im lõb ej ãinwõt juon jikin kakkije ñan aolep ro im rar tiljek ilo tõmak m̦ae iien remej.” *—Lale kõmel̦el̦e eo itulal̦.

Ad jel̦ã bwe ro remej rejjab eñtaan ak rej kiki ilo lõb ko libwier el̦ap an kaenõm̦m̦an kõj. Kiiõ jejjab aikuj mijak kõnke jejel̦ã kõn ta eo ej wal̦o̦k ñe jej mej.

Em̦m̦an ippãd kiki kõnke jej kakkije, ak ejjel̦o̦k en̦ ekõn̦aan kiki ñan indeeo. Ewõr ke kõjatdikdik bwe ro rej kiki ilo lõb renaaj bar mour ãinwõt kar Lazerõs im leddik eo nejin Jairõs?

Em̦m̦aan eo ilo Baibõl̦ etan in Job ear kwal̦o̦k kajjitõk in ke ear epaak an mej. Ear ba: “El̦aññe juon armej emej, enaaj bar mour ke?”​—Job 14:14.

Job ear make uwaake kajjitõk eo an ilo an kar ba naan kein kõn Jeova Anij, ear ba: “El̦aññe Kwõnaaj kũr, innem inaaj uwaak Eok; Kwõnaaj kõn̦aan men in kõm̦m̦an an Peim̦.” (Job 14:15) Job ear lukkuun jel̦ã bwe Jeova el̦ap an kõn̦aan im ekijoorore tok raan eo ñe Enaaj kõmour ri karejar ro an retiljek. Men in Job ear jel̦ã kake ear ke juon ettõn̦ak bajjek? Jaab.

Ke Jijej ear kõmour ro rar mej, men in ej kam̦ool bwe Anij ear lel̦o̦k ñan e maroñ ioon mej. Ilo m̦ool, Baibõl̦ ej ba kõn Jijej bwe ‘ewõr an maroñ ioon mej.’ (Revelesõn 1:18, UBS) Jijej ear maroñ kõmour Lazerõs, im ebar wõr an maroñ ñan kõmour armej otemjej jãn mej ilo naaj raan ko im̦aan.

Elõñ alen an Baibõl̦ kwal̦o̦k bwe ro remej renaaj jerkak jãn mej. Juon enjel̦ ear ba ñan Daniel: “Kwõnaaj bar jerkak im bõk jinõkjeej eo am̦ ilo iien eo ãliktata.” (Daniel 12:13, UBS) Saddusi ro ak ri tõl in kabuñ eo an Ri Ju ro rar jab tõmak bwe ro remej renaaj bar jerkak jãn mej. Kõn men in, Jijej ear ba ñan er: “Kom̦ij bõd kõn ami jaje Jeje ko im an Anij kajoor.” (Matu 22:23, 29) Rijjilõk Paul ear ba: “Kõjatdikdik eo aõ ilo Anij, . . . bwe armej otemjej, ro rem̦m̦an im ro renana, renaaj jerkak jãn mej.”​—Jerbal 24:15, UBS.

Ñããt eo ro renana im ro rem̦m̦an me rar mej renaaj bar mour? Enjel̦ eo ear ba ñan Daniel bwe enaaj jerkak “ilo iien eo ãliktata.” Marta ear bar tõmak bwe Lazerõs enaaj jerkak im mour ‘ilo raan eo ãliktata.’​—Jon 11:24.

Baibõl̦ eo ej ba bwe iien ak ‘raan eo ãliktata’ enaaj wal̦o̦k ilo iien eo ñe Kũraij enaaj irooj ilo Aelõñ eo. Paul ear je: “Bwe em̦m̦an [Kũraij] En Irooj ñan tõr eo em̦õj An likũt ro otemjej rej kõjdat E ium̦win neen. Ri kõjdat ãliktata im enaaj jako, mej.” (1 Korint 15:25, 26) Eñin unin jej aikuj in jar bwe Aelõñ ak Kien eo an Anij en itok im bwe ankilaan Anij en jejjet ijin ioon lal̦. *—Lale kõmel̦el̦e eo itulal̦.

Job ear lukkuun jel̦ã bwe kõn̦aan eo an Anij ej ñan kõmour ro rar mej. Ñe enaaj jejjet men in, eban bar wõr mej. Innem, armej reban bar l̦õmn̦ak im ba, ‘Mej ej ke jem̦l̦o̦kin men otemjej?’