Naan in Anij ejejuwaan. Etke jejel̦ã men in? Eokwe, ewõr bilien Baibõl̦ ko ilo elõñ buki kajin ko. Jel̦ãl̦o̦kjen̦ eo jej bõke ilo bok in emaroñ ukot armej ro bwe ren kõm̦m̦an oktak ko ilo mour ko aer. Baibõl̦ eo juon bok ejejuwaan.​—Riit 1 Tessalonika 2:13; 2 Timote 3:16.

Jejel̦ã bwe Baibõl̦ eo ej jãn Anij kõnke ejim̦we im jejjet an kanaan kõn men ko renaaj wal̦o̦k im̦aan. Ejjel̦o̦k juon emaroñ make kõm̦m̦ane men in. Ñan waanjoñak, kar kõm̦m̦an copy in bok in Aiseia elõñl̦o̦k jãn jibukwi iiõ m̦okta jãn an Jijej l̦otak. Jet rar loe bok in ilowaan juon tol̦ epaake Lom̦al̦o Ekilmir. Bok in Aiseia ear kanaan bwe Babil̦on ejãmin bar juon jikin jokwe. Ear jejjet kitien men in elõñ iiõ ko ãlikin an kar Jijej kõm̦m̦ane jerbal in kwal̦o̦k naan eo an ioon lal̦.​—Riit Aiseia 13:19, 20; 2 Piter 1:20, 21.

Ear bõk enañin 1,600 iiõ ko ñan aer kadedel̦o̦k aolep bok ko me rej pãd ilo Baibõl̦. Enañin 40 armej rar je Baibõl̦ eo. Men ko rar jeje kaki rar jab idaaptõk ippãn doon. Etke ear maroñ ãindein? Kõnke Anij ear tõl er.​—Riit 2 Samuel 23:2.

Jet iien Anij ear kõnono ñan ri jeje Baibõl̦ ro ikijjeen enjel̦ ro, ilo visõn ko, ak ilo tõn̦ak ko. Ekkã an kar Anij likũt l̦õmn̦ak ko An ilo l̦õmn̦ak ko an ri jeje ro. Innem, Anij ear kõtl̦o̦k bwe ri jeje ro ren kããlõt naan ko aer make ñan kwal̦o̦k l̦õmn̦ak ko An.​—Riit Revelesõn 1:1; 21:3-5.