Anthony: Yokwe eok Tim. Ejet mour?

Tim: Yokwe yokwe. Em̦m̦an mour, ak ijen̦e?

Anthony: Ebar em̦m̦an. Iar itõn baj bõktok am̦ Naan in Keeañ kããl ñan am̦ riit. Ñaij lukkuun tõmak bwe enaaj em̦m̦an ippam̦ katak kã ilo bok e.

Tim: Kom̦m̦ool. L̦eiõ, em̦m̦an bwe kweitok rainin bwe ewõr juon aõ kajjitõk kõn kabuñ n̦e am̦.

Anthony: Em̦m̦an. Kajjitõk ta n̦e kiiõ?

Tim: Kwõn ba, inne iar kõnnaan ippãn juon iaan rijerbal ran̦ m̦õtta. Iar ba ñane kõn bok kã me kwokõn letok im kõn an lukkuun em̦m̦an mel̦el̦e kã ie. Ak eba in jab riiti bok kã kõnke ej ba bwe Jeova Witness rejjab tõmak ilo Jijej. Ta l̦e m̦ool ke men in? Iar ba ñane bwe inaaj kajjitõk ippam̦ im lale ñe em̦ool men in.

Anthony: Eokwe, em̦m̦an bwe kwõ kajjitõk ippa. Kab ke ñe kokõn̦aan jel̦ã kõn tõmak e aõ, kwõban kar kepaake ro ilo kabuñ ko jet ak kwõn kar itok im kajjitõk ippa ak ippãn Jeova Witness ro jet.

Tim: Aet, kwõj m̦ool.

Anthony: Men eo kwaar roñ ejjab m̦ool. Kõm Ri Kõnnaan ro an Jeova kõmij tõmak ilo Jijej. Ilo m̦ool, kõmij tõmak bwe ro me rejjab tõmak ilo Jijej reban bõk lo̦mo̦o̦r.

Tim: Ke iar l̦õmn̦ak bwe kom̦ij tõmak ilo Jijej, ak l̦eo el̦ak ba kabuñ n̦e ejjab tõmak ilo Jijej, ãinwõt ijaje kiiõ. Bõlen kõnke kõjro ejjañin kar bwebwenato kõn men in.

Anthony: Aet, kwõj m̦ool. Eokwe, imaroñ ke kwal̦o̦k ñan kwe jet eoon im rej kaalikkar joñan aorõkin ad aikuj tõmak ilo Jijej? Ekkã ammim kõjerbal eoon kein ñe kõmij kwal̦o̦k naan.

Tim: Em̦m̦an.

Anthony: Eoon eo m̦oktata ej pãd ilo Jon 14:6. Ilo eoon in, Jijej ej kõnnaan ñan rũkal̦oor ro an. Ej ba: “Ña ial̦, im m̦ool, im mour. Ejjel̦o̦k armej ej itok ñan Jema, el̦aññe jab kõn eõ.” Ekkar ñan eoon in, jemaroñ ke kepaake Anij el̦aññe ejjab kõn Jijej?

Tim: Jejjab maroñ.

Anthony: Aet. Im kõm Ri Kõnnaan ro an Jeova kõmij errã ilo men in. Im kõmij bar tõmak bwe ñe juon armej ej jar, ej aikuj jar ilo etan Jijej. Eñin unin ñe ij jar, aolep iien ij jar ilo etan Jijej. Bar ãindein aolep Ri Kõnnaan ro an Jeova ñe rej jar.

Tim: Oo, ña l̦e ij kab jel̦ã.

Anthony: Kõjro bar lale juon eoon. Epãd ilo bok in Jon 3:16 (UBS). M̦õttan eoon ko kein ilo Baibõl̦ me relukkuun aorõk. Elukkuun jejjet an eoon in kwal̦o̦k kõn unin an kar Jijej itok ñan lal̦ in. Kwõmaroñ ke riiti?

Tim: Em̦m̦an. Ej ba: “Bwe joñan an Anij yokwe lal̦, ear letok Nejin eo ej make wõt, bwe  jabdewõt eo ej tõmak ilo e en jab jako, ak en mour indeeo.”

Anthony: Kom̦m̦ool. Em̦õj ke am̦ kar roñ kõn eoon in kar m̦okta?

Tim: Aet, elõñ kõttan aõ roñ ilo im̦õn jar en̦ aõ.

Anthony: M̦õttan eoon ko kein me emmakijkij an armej kõjerbali. Ak kõjro bar lukkuun etale. Ekkar ñan eoon in, unin ad maroñ bõk jeraam̦m̦an eo ñan mour indeeo ej kõnke Anij ej yokwe kõj. Bõtab, ta eo jej aikuj kõm̦m̦ane m̦okta?

Tim: Jej aikuj kwal̦o̦k ad tõmak.

Anthony: Ejim̦we. Tõmak ilo Nejin Anij, Jijej Kũraij. Im men in eaorõk, kõnke ñe jej tõmak ilo Jijej, jenaaj maroñ mour ñan indeeo. Im men in ebar pãd ilo peij 2 ilo Naan in Keeañ in iar bõktok. Lale m̦õk, ej kwal̦o̦k bwe unin kar kõm̦m̦ane Naan in Keeañ in ej ñan “kal̦apl̦o̦k ad tõmak ilo Jijej Kũraij, eo ear mej kõn kõj bwe jen maroñ mour ñan indeeo im ej irooj ãinwõt Kiiñ kiiõ ilo Aelõñ eo an Anij.”

Tim: Eo l̦e elukkuun alikkar kiiõ. Bok kã ami make rej kwal̦o̦k bwe kabuñ n̦e ej tõmak ilo Jijej.

Anthony: Aet, kõmij tõmak ilo Jijej.

Tim: Ak armej rej bõk jãn ia ke kom̦ij jab tõmak ilo Jijej?

Anthony: Ña l̦e ijjab lukkuun jel̦ã. Bõlen jet armej rej baj roñ wõt an ro jet kõnnaan im jujen wõt tõmak er. Ak bõlen rej bõk mel̦el̦e in jãn rũkaki in kabuñ kan̦ aer.

Tim: Bõlen unin an armej ba bwe kom̦ij jab tõmak ilo Jijej kõn wõt ãt n̦e etan kabuñ n̦e ami. Kõn ami ba Ri Kõnnaan ro an Jeova, ak kom̦ij jab ba Ri Kõnnaan ro an Jijej.

Anthony: Aet, emaroñ.

Tim: Ak etke enañin baj l̦ap wõt ami kõnnaan kõn Jeova?

Anthony: Eokwe, kõmij tõmak bwe elukkuun aorõk ñan kõjerbale etan Anij, Jeova, ãinwõt an Jijej kar kõm̦m̦ane. Kõjro m̦õk lale ta eo Jijej ear ba ke ear jar ñan Anij. Epãd ilo bok in Jon 17:26. Kwõmaroñ ke bar riiti tok ñan kõjro?

Tim: Em̦m̦an. Ej ba: “Iar kwal̦o̦k Etam̦ ñan er, im inaaj kwal̦o̦k e, bwe yokwe eo Kwaar yokwe eõ kake, en pãd ilo er, im ña ilo er.”

Anthony: Kom̦m̦ool. Ekkar ñan eoon n̦e, Jijej ej ba bwe ear kwal̦o̦k etan Anij ñan armej ro. Etke Jijej ekar kõm̦m̦ane men in?

Tim: Ãinwõt, ña l̦e ijjab lukkuun jel̦ã.

Anthony: Eokwe, kõjro bar lale juon eoon. Epãd ilo bok in Joel 2:32. Ej ba: “Innem aolep ro rej kũr ñan etan Jeova, naaj lo̦mo̦o̦ren er.” Ekkar ñan eoon in, jej aikuj kũr etan Jeova bwe jen maroñ bõk lo̦mo̦o̦r. Kwõl̦ak lale Jijej ear ke jel̦ã bwe ej menin aikuj ñan an armej ro kũr ñan etan Jeova?

Tim: Aet, joñan in ekar jel̦ã.

Anthony: Ejim̦we. Jijej ekar kõn̦aan bwe armej ro ren jel̦ã kõn etan Anij im kõjerbale bwe ren maroñ bõk lo̦mo̦o̦r. Eñin ej juon iaan un ko rel̦aptata unin an l̦ap ammim kõnnaan kõn Jeova. Kõmij tõmak bwe eaorõk ñan kwal̦o̦ke ãt in etan Anij ñan armej ro bwe ren maroñ bõk lo̦mo̦o̦r.

Tim: Iññã ak jekdo̦o̦n ñe jejjab jel̦ã ak jejjab kõjerbale etan Anij, jejel̦ã kadede wõn eo jej jar ñane ñe jej ba “Anij” ak “Irooj.”

Anthony: Eokwe, kwõj m̦ool. Ak ewõr unin an kar Anij kõn̦aan bwe jen jel̦ã kõn ãt eo etan. Jel̦ak jel̦ã kõn etan Anij, epidodo ad maroñ jel̦ã kajjien.

Tim: Kwõjaam̦ ba men in?

Anthony: Eokwe, baj l̦õmn̦ak m̦õk kõn men in. Anij ejjab kar aikuj likũt etan Moses ilo Baibõl̦.  Ñe en kar ejjel̦o̦k etan Moses, jen kar jaje wõn eo ear kõjepel Lom̦al̦o Ekilmir ak wõn em̦m̦aan eo me Anij ear lel̦o̦k Kien ko Joñoul ñane. Bar Noa. Ñe Anij en kar jol̦o̦k etan Noa jãn Baibõl̦, jen kar jaje wõn eo ear jek wa eo im lo̦mo̦o̦ren baam̦le eo an kab menninmour ko. Bar Jijej Kũraij. Ñe en kar ejjel̦o̦k ãt in Jijej ilo Baibõl̦, jeban kar lukkuun jel̦ã wõn eo ear itok jãn lañ im mej kõn jerawiwi ko ad.

Tim: Ak Anij ejaam̦ likũt ãt kan̦e ilo Baibõl̦?

Anthony: Anij ear likũti ãt kein ilo Baibõl̦ bwe jen maroñ jel̦ã kajjien armej rein. Kwõmaroñ ke ba kwõjel̦ã kajjien juon armej ñe kwõjaje etan? Kwõban. Meñe jejjañin kar iioone Moses, Noa, im Jijej, ak el̦ak pãd etaer ilo Baibõl̦, jejel̦ã bwe rar mour im pãd ijin ioon lal̦.

Tim: Eo l̦e kwõj m̦ool. Ij kab l̦õmn̦ak kõn men in!

Anthony: Eñin bar juon iaan un ko unin an l̦ap ammim kõjerbale etan Anij. Kõm kõn̦aan bwe armej ro ren jel̦ã kõn etan Anij, im ren kõjerbale. Ilo wãween in, enaaj l̦apl̦o̦k wõt aer tõmak ilo E im jel̦ãl̦o̦k kajjien. Bõtab, kõmij bar kwal̦o̦k ñan armej ro bwe ej menin aikuj ñan aer tõmak ilo Jijej. Kõjro bar riiti juon eoon bwe en alikkarl̦o̦k men in kõjro ej kõnnaan kake.

Tim: Em̦m̦an.

Anthony: M̦oktal̦o̦k, kõjro ar riiti Jon 14:6. Kwõj keememej wõt ke bwe ilo eoon in Jijej ear ba bwe e eo ej “ial̦, im m̦ool, im mour?” M̦okta jãn an kar Jijej ba naan kein, ear bar ba juon men. Jouj im m̦õk riiti tok ñan kõjro Jon 14:1.

Tim: Em̦m̦an. Ej ba: “Kom̦win lõke Anij, kom̦win bareinwõt lõke eõ.”

Anthony: Kom̦m̦ool. Ekkar ñan eoon in, wõn eo Jijej ear ba jen lõke ak tõmake? Jeova wõt ke? Ke ta, Jijej wõt?

Tim: Ejjab. Jijej ear ba aolepeerro.

Anthony: Ejim̦we. Ak ejab kwõjel̦ã kadede bwe ejabwe ñan baj ba wõt bwe jej tõmak ilo Anij im tõmak ilo Jijej? Jej aikuj kaalikkare men in ilo kõm̦m̦an ko ad.

Tim: Aet. Lukkuun jim̦we in n̦e.

Anthony: Eokwe, kajjitõk eo in kiiõ. Ta ko jej aikuj kõm̦m̦ani bwe jen kaalikkar bwe jej tõmak ilo Anij im ilo Jijej? Bõlen kõjro naaj bar bwebwenato kake men in bar juon iien. *

Tim: Aet, em̦m̦an.