JET iiõ ko remootl̦o̦k, ekar wõr juon kõmel̦el̦e kar je ilo juon iaan nuujpeba ko ilo Korea, etan Chosun Ilbo. Etan taitõl̦in kõmel̦el̦e in ej ba, “‘Shim Cheong Ear Juon Jiroñ Elukkuun Em̦m̦an.’ Ear Ke Etal ñan El̦ Kõnke Ear Jaje kõn Jijej?”

Kajjitõk in ear kõm̦m̦an bwe elõñ ren bwilõñ im inepata. Etke? Kõnke ekkar ñan bwebwenato ak ino̦ñ kan̦ an Ri Korea, Shim Cheong ear juon jiroñ me el̦ap an aolep yokwe kõnke ear m̦õn̦õn̦õ in mej ñan kõjparok l̦al̦l̦ap eo jemãn me epilo. El̦ap an armej ro nõbare jiroñ in kõn wõt men in ear kõm̦m̦ane. Ilo Korea, el̦ap an armej ro kautiej “Shim Cheong” kõnke elukkuun em̦m̦an joñak eo an ñan jiroñ ro ilo aelõñ en̦.

Jet armej remaroñ kar l̦õmn̦ak bwe jiroñ in ear aikuj etal ñan el̦ kõnke ear jab peptaij im erom juon Kũrjin. Bõtab, elõñ armej rejjab errã ilo men in im rej l̦õmn̦ak bwe ejjab jim̦we bwe armej rot in en etal ñan el̦. Im ekkar ñan bwebwenato, ejjañin kar wal̦o̦k ennaan ko kõn Kũraij ilo bukwõn eo an Shim Cheong.

Ilo kõmel̦el̦e in me ear wal̦o̦k ilo nuujpeba in, kar kajjitõk ippãn juon rũtõl in kabuñ kõn ta eo enaaj wal̦o̦k ñan armej ro me rar jab jel̦ã kõn Jijej. Kar kajjitõk ippãn el̦aññe armej rot rein renaaj bwil ilo el̦ ke ak jaab. Ta kar uwaak eo an rũtõl in kabuñ in? Ear ba: “Jejaje. Ak jejel̦ã bwe Anij ejel̦ã ta eo ejim̦we ñan an kõm̦m̦ane [ñan armej rein].”

Juon bok an Katlik (The New Catholic Encyclopedia) ej ba: “Juon ej aikuj peptaij bwe en maroñ bõk lo̦mo̦o̦r. Jijej ear make ba bwe el̦aññe juon ejjab l̦otak kõn dãn im jetõb kwõjarjar, eban del̦o̦ñ ilo Aelõñ in Anij (Jn 3.5).” Kõn an bok in ba men in, elõñ rej tõmak bwe el̦aññe juon armej ej mej ak ear jab peptaij, enaaj bwil ilo el̦, ñe ejjab, enaaj eñtaan ilo bar juon jikin.

Meñe ãindein, ak ebar lõñ armej ro rej ba bwe ejjab jim̦we tõmak in. Elõñ milien armej ro rar mej ak rar jab jel̦ã kõn katak ko ilo Baibõl̦. Ekkar ke bwe armej rein ren bwil im eñtaan ñan indeeo? Ta eo Baibõl̦ ej kwal̦o̦k kõn men in?

Baibõl̦ ej kwal̦o̦k bwe Anij ejjab kõjekdo̦o̦n armej ro me rar jab jel̦ã kõn E ke rar mour. Bokin Jerbal 17:30 (UBS) ej ba: “Anij ear jab watõk iien ko armej rar jaje.” Kõn men in, ta kallim̦ur ko ilo Baibõl̦ kõn ro me em̦õj aer mej ak rar jab jel̦ã kõn Anij?

Uwaak eo ej alikkar ilo naan ko an Jijej ñan juon iaan rinana ro me ear mej ilo al̦al̦ in eñtaan eo iturin. Em̦m̦aan eo ear kajjitõk ippãn Jijej im ba: “Kwõn keememej eõ ñe Kwõj itok ilo Am̦ aelõñ.” Ta eo Jijej ear ba ñan em̦m̦aan in? Ear ba: “Kwõnaaj pãd ippa ilo Pedetaij.”​—Luk 23:39-43.

Jijej ear ke ba bwe l̦ein enaaj etal ñan lañ? Ear jab. L̦ein ekar jab “l̦otak” ak peptaij kõn dãn im jetõb kwõjarjar ak kajoor eo an Anij. Eñin ej men eo eaorõk juon ej aikuj kõm̦m̦ane bwe en maroñ del̦o̦ñ ilo Aelõñ eo an Anij ilañ. (Jon 3:3-6, UBS) Men eo Jijej ear ba ñan rinana eo ej bwe enaaj bar mour “ilo Pedetaij.” Kõnke rinana eo ear juon Ri Ju, emaroñ kar jel̦ã kõn Pedetaij eo ioon lal̦ in ilo kar jikin kallib in Iden me bokin Jenesis ej kwal̦o̦k kake. (Jenesis 2:8) Kallim̦ur eo an Jijej ñan rinana eo ear kaalikkar bwe ewõr an l̦ein kõjatdikdik ñan bar mour ñe lal̦ in enaaj erom juon Pedetaij.

Baibõl̦ ej kallim̦ur bwe “ro rem̦m̦an im ro renana, renaaj jerkak jãn mej.” (Jerbal 24:15, UBS) “Ro renana” rej ro me rar jab l̦oor kien ko an Anij ke rar mour kõnke rar jab jel̦ã kõn E. Jijej enaaj kõjerkak rinana eo me ear mej iturin. Enaaj bareinwõt kõjerkak elõñ milien ak bilien armej ro me rar jab jel̦ã kõn Anij ke rar mour. Ñe rein renaaj jerkak im mour ilo Pedetaij eo ijin ioon lal̦, renaaj katak kõn kien ko an Anij. Enaaj juon iien epel̦l̦o̦k ñan aer kam̦ool bwe rej yokwe Anij ilo aer pokake kien ko an.

Ñe “ro renana” renaaj jerkak im mour, Anij enaaj ke ekajete er kõn kõm̦m̦an ko aer kar m̦okta? Eban.  Bokin Rom 6:7 (UBS) ej ba: “Ñe juon armej emej, ej anemkwõj jãn kajoor eo an jerawiwi.” Mel̦el̦ein men in bwe ñe juon rinana emej, em̦õj an Anij jol̦o̦k jerawiwi ko an. Kõn men in, ñe “ro renana” renaaj jerkak im mour, naaj ekajet er ekkar ñan kõm̦m̦an ko aer ilo tõre en̦ me renaaj bar mour. Anij eban ekajete er ekkar ñan kõm̦m̦an ko aer kar m̦okta ke rar jaje kõn E. Ta tokjãn ko rein renaaj bũki?

Ãlikin an “ro renana” jerkak im mour, enaaj pel̦l̦o̦k juon iien ñan aer katak kõn kien ko an Anij ilo bok lemlem ko ilo kõkkar. Naaj ekajet er “ekkar ñan kõm̦m̦an ko aer.” Mel̦el̦ein bwe Anij enaaj ekajete er ekkar ñan men ko rej kõm̦m̦ani ãlikin aer katak kõn kien ko an. (Revelesõn 20:12, 13, UBS) Elõñ iaan rein rej kab nãj katak kõn Anij. Ñe renãj katak im kõm̦anm̦an ankilaan Anij, renaaj mour ñan indeeo.

Mel̦el̦e kein jãn Baibõl̦ rar jipañ elõñ armej ñan tõmak ilo Anij. Juon iaan armej rein ej Sug Yeong. Kõrã in ear dik im rũttol̦o̦k ilo kabuñ in Katlik. Ear lukkuun kijejeto ilo kabuñ in an im jet iaan ro ilo baam̦le eo an rar bũrij. Kõrã in ear kõn̦aan bwe en juon nun ak sister ilo kabuñ in an. Kõn men in, ear jokwe ilo juon iaan m̦õko m̦õn nun ak sister in Katlik. Bõtab, tokãlik, ear em̦m̦akũt jãn ijo kõnke ear jab m̦õn̦õn̦õ kõn men ko rej kõm̦m̦ani. Bareinwõt, ear jab tõmak katak eo aer kõn el̦. Ekkar ñan l̦õmn̦ak eo an, ejjab juon men ejim̦we im ejjab juon menin yokwe ñe armej ro rej etal im bwil im eñtaan ilo el̦.

Tokãlik, juon iaan Ri Kõnnaan ro an Jeova ear kwal̦o̦k ñan Sug Yeong naan kein jãn Baibõl̦ ilo bokin Ekklisiastis 9:5 me ej ba: “Ro remour rejel̦ã bwe renaaj mej; a ro remej ejjel̦o̦k aer jel̦ã, im ebar ejjel̦o̦k menin lel̦o̦k ñan er; rejjab ememej er.” Ri kõnnaan in an Jeova ear jipañ Sug Yeong ñan kile bwe ro nukũn me remej rejjab bwil im eñtaan ilo el̦. Ejel̦ã kiiõ bwe rein remej rejjab eñtaan, ak rej kiki m̦ae iien eo me renaaj jerkak im mour.

Sug Yeong ear kile bwe elõñ armej rejjañin jel̦ã kõn katak ko rem̦ool ilo Baibõl̦. El̦ap an em̦m̦an ippãn naan ko an Jijej me rej pãd ilo bokin Matu 24:14. Eoon in ej ba: “Naaj kwal̦o̦k gospel in an aelõñ in lañ iaolepen lal̦ kõn menin kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.” Sug Yeong ej kiiõ bõk kun̦aan ilo an kwal̦o̦k naan im karoñ armej ro jet kõn ennaan ko rem̦m̦an im kallim̦ur ko me rej pãd ilo Baibõl̦.

Baibõl̦ ej ba: “Anij ej kõm̦m̦an ñan armej otemjej ilo ejjel̦o̦k kalijekl̦o̦k. Jabdewõt eo ej kautieje im kõm̦m̦an jim̦we, ej kabuñbũruon, jekdo̦o̦n ri aelõñ et.” (Jerbal 10:34, 35, UBS) Jejel̦ã bwe enaaj em̦m̦an aolep men kõnke ejim̦we an Anij ekajet. Baibõl̦ ej ba bwe Anij “ej yokwe men ko rejejjet im jim̦we.”—Sam 33:5, UBS.