Jeova Anij ekõn̦aan bwe jen kõnnaan ippãn aolep iien im kwal̦o̦k kõn jabdewõt men jej inepata kake. (Luk 18:1-7, UBS) Ej roñjake kõj ñe jej jar kõnke ej yokwe kõj. Kõnke Jemãdwõj ilañ ekõn̦aan bwe jen jar, ej juon jeraam̦m̦an ñan kõj bwe jen jar ñane.​—Riit Pilippai 4:6.

Jar ejjab jipañ wõt kõj ñan kajjitõk jipañ ippãn Anij. Ej bar jipañ kõj ñan ejaake juon jem̦jerã epaak ippãn Anij. (Sam 8:3, 4) El̦aññe eokkutkut ad kwal̦o̦k bũruod ñan Anij, enaaj kajoorl̦o̦k wõt jem̦jerã eo ad ippãn.​—Riit Jemes 4:8.

Ñe jej jar ñan Anij, ejjab kõn̦aan bwe jen ãliji jar ko me jaar kakkilõklõki ak kõjerbal naan ko me rej kabwilõñ armej kõn joñan an em̦m̦an ad jar. Bareinwõt, ejjab aikuj wõr juon wãween ejej uwaan me jej aikuj l̦oore ñe jej jar. Ñan waanjoñak, ejjab menin aikuj bwe jen bukwelõlõ, jillo̦k, ak kõm̦m̦ani men ko ãierl̦o̦kwõt ñe jej jar. Men eo eaorõk ippãn Jeova ej bwe jen jar jãn bũruod. (Matu 6:7) Ñan waanjoñak, ilo kar aelõñ in Israel, Hanna ear jar ñan Anij jãn aolepen bũruon kõn juon apañ me ear wal̦o̦k ilo baam̦le eo an. Tokãlik, ke Anij ear uwaake men eo ear abn̦õn̦õ im bũrom̦õj kake, ear kam̦m̦oolole Anij kõn an kar uwaake jar eo an.​—Riit 1 Samuel 1:10, 12, 13, 26, 27, UBS; 2:1, UBS.

Jelukkuun jeraam̦m̦an kõnke jemaroñ kepaake Rũkõm̦anm̦an eo ilo ad jar im kwal̦o̦k ñane kõn jabdewõt men jej inepata kake! Bareinwõt, ñe jej jar jemaroñ nõbare im kam̦m̦oolole kõn men ko ej kõm̦m̦ani. Kõn men in, jen jab kõjekdo̦o̦n jeraam̦m̦an in me em̦õj an Jeova letok ñan kõj.​—Riit Sam 145:14-16.