UNIN AN ARMEJ JAB TÕMAK BWE ANIJ EJ KAENÕM̦M̦AN ER: Ñe armej ro rebũrom̦õj, rej aikuji juon bwe en jipañ im kaenõm̦m̦an er. Meñe ãindein, ak jet armej rejjab jar ñan Anij im kajjitõk bwe en jipañ er. Etke? Kõnke rej ba bwe el̦ap ad l̦õmn̦ak kõn kõj make ñe jej kajjitõk jipañ jãn Anij. Eñin kar l̦õmn̦ak eo an juon kõrã etan Raquel. Ej ba: “Elukkuun lõñ armej ro ipel̦aakin lal̦ me rej iiooni apañ ko rel̦l̦ap. Ñe ij keidi apañ ko aer ñan apañ ko aõ, ãinwõt ejjab l̦ap apañ ko ij iiooni im ijook in kajjitõk jipañ jãn Anij.”

KÕMEL̦EL̦E KO ILO BAIBÕL̦: Aolep armej ilo raan kein rej rijjerawiwi. Mel̦el̦ein bwe jekdo̦o̦n ewi joñan aer kate er, rejjab maroñ weeppãn im pokake kien ko an Anij aolep iien. Bõtab, Anij ear kõm̦m̦ane juon men ñan jipañ im kaenõm̦m̦an armej otemjej. Ta in? Ear “yokwe kõj, im jilkintok Nejin [Jijej Kũraij], bwe En kein medek kõn jerawiwi ko ad.” (1 Jon 4:10) Kõnke Jijej ear mej kõn kõj, Anij emaroñ jol̦o̦k ad bõd, im emaroñ em̦m̦an ad mour ke jejel̦ã bwe Anij em̦õn̦õn̦õ ippãd. Bareinwõt, jemaroñ mour indeeo ijin ioon lal̦ ñe enaaj erom juon pedetaij. * (Lale kõmel̦el̦e eo itulal̦.) Jeraam̦m̦an kein rej ñan aolep armej. Ak men in ej ke kam̦ool bwe Anij ej yokwe im kaorõk eok?

Naan ko an rijjilõk Paul rej uwaake kajjitõk in. Joñan an kar Paul kam̦m̦oolol kõn mej eo an Jijej, ear ba: “Ij mour kõn tõmak ilo Nejin Anij, eo ear yokwe eõ im ear lel̦o̦k mour eo an kõn eõ.” (Galetia 2:20, UBS) Jijej ear mej m̦okta jãn an kar Paul oktak im Kũrjin. Meñe ãindein, ak Paul ear watõk mej eo an Jijej ãinwõt juon menin lel̦o̦k ñan e make jãn Anij.

Katok in mour eo an Jijej ej bar menin lewaj ñan kwe. Menin letok in jãn Anij ej kam̦ool bwe ej yokwe im kaorõk eok. Ñe kwõj kõl̦mãnl̦o̦kjen̦ kõn menin letok in, men in emaroñ kaenõm̦m̦an eok im lewaj “kõjatdikdik em̦m̦an.” Im emaroñ ‘kakajoor eok ñan kwal̦o̦k im kõm̦m̦ani aolep men ko rem̦m̦an.’​—2 Tessalonika 2:16, 17, UBS.