JEJ mour ilo iien kein relukkuun nanal̦o̦k jãn kar iien ko m̦okta. (2 Timote 3:1-5) Aolep iien jej iioone menin mãlejjoñ ko im jej kate wõt kõj bwe jen maroñ kaalikkar bwe jej yokwe Jeova, im bwe jej pokake kien ko an. Jijej ear jel̦ã kõn raan kein bwe renaaj nana. Kõn men in, ear kallim̦uri rũkal̦oor ro an bwe enaaj jipañ er ñan aer maroñ kijenmej ñan jem̦l̦o̦kin. (Matu 24:3, 13, UBS; 28:20) Ewi wãween an Jijej naaj maroñ jipañ er? Eokwe, ear jitõñ juon rũkarejar etiljek im mãlõtlõt bwe en naajdik er ak lel̦o̦k katak ko ñan er ilo iien ko rejejjet.​—Matu 24:45, 46, UBS.

Kar jitõñe rũkarejar in etiljek im mãlõtlõt ilo kar iiõ eo 1919. Jãn iien in ñan kiiõ ej wõnm̦aanl̦o̦k wõt im letok bok im katak ko ñan armej ro an Anij ilo elõñ kajin ko. (Matu 24:14; Revelesõn 22:17) Meñe ej litok bok ko me rej pedped ioon Baibõl̦ ñan er ak ejjab aolep bok kein rej wal̦o̦k ilo aolep kajin. Im ejjab aolep ewõr aer Internet ñan aer lale katak ko im pija ko me rej wal̦o̦k ilo jw.org. Ej ke mel̦el̦ein bwe rejjab bõk aolep ekkan ko ak katak ko me rej aikuji bwe ren maroñ karejar ñan Jeova? Ñan jel̦ã uwaak eo, jen etale 4 kajjitõk ko im uwaakier.

Ke Setan ear kajjioñ kapo Jijej bwe en ukot dekã ko ñan pilawã, Jijej ear jiroñl̦o̦ke im ba: “Armej ejãmin mour kõn pilawã wõt, a kõn naan otemjej rej wal̦o̦ktok jãn lo̦ñiin Anij.” (Matu 4:3, 4) Naan ko an Jeova rej pãd ilo Baibõl̦. (2 Piter 1:20, 21, UBS) Innem, Baibõl̦ ej men eo eaorõktata iaan aolep bok ko jej bũki.​—2 Timote 3:16, 17.

Em̦õj an doulul eo an Jeova kõm̦m̦ane juon Baibõl̦ ilo kajin pãlle (New World Translation of the Holy Scriptures). Im kar ukote jimattanin Baibõl̦ in ak aolepen Baibõl̦ in ñan elõñl̦o̦k jãn 120 kajin ko. Im kajjojo iiõ ej lõñl̦o̦k wõt kajin ko rej ukote Baibõl̦ in ñane. Bareinwõt, ebar wõr ukok in Baibõl̦ ko jet im ewõr ilo elõñ to̦ujin kajin ko. Joñan tõprak in ej jejjet ñan ankilaan Anij ke ej ba “ekõn̦aan lo̦mo̦o̦ren armej otemjej, im bwe ren item jel̦ã m̦ool.” (1 Timote 2:3, 4) Jejel̦ã bwe Jeova ej lo bũruon aolep armej ro. Innem, jemaroñ kõtmãne bwe enaaj jipañ armej ro rem̦õn̦õn̦õ in ‘eo̦roñ naan ko an’ bwe ren pãd ilowaan doulul eo an im enaaj lel̦o̦k wõt katak ko ñan er.​—Luk 11:28; Matu 5:6, UBS; Jon 6:65, UBS; 10:14; Hibru 4:13, UBS.

Enaaj pen tõmak eo an juon armej ñe ej riit Baibõl̦, mel̦el̦e kake, im l̦oori katak ko ie. (Jemes 1:22-25, UBS) Eñin men eo ear wal̦o̦k ñan juon RiItiopia ilo iien ko etto. Ke Pilip ear lo an riiti Naan in Anij, ear kajjitõk ippãn im ba: “Kwõj mel̦el̦e ke men eo kwõj kõnono kake?” RiItiopia eo ear uwaak im ba: “Ekõjkan aõ maroñ, el̦aññe ejjel̦o̦k en̦ ej tõl eõ?” (Jerbal 8:26-31) Kõn men in, Pilip ear jipañe bwe en mel̦el̦e kõn men ko ej riiti. Joñan an kar katak ko jelõt bũruon l̦ein, ear peptaij. (Jerbal 8:32-38) Men in ej bar wal̦o̦k ñan kõj raan kein. Bok ko ad rej jipañ kõj ñan mel̦el̦e kõn katak ko rem̦ool ilo Baibõl̦. Ñe jej riiti bok kein, katak ko ie rej jelõt bũruod im kõm̦akũt kõj ñan l̦oori ilo mour ko ad.​—Kolosse 1:9, 10, UBS.

Kõj ro rũkarejeran Jeova jej bõk elõñ katak ko jãn bok ko ad ñan ad maroñ “m̦õñã” im “idaak” ilo kõkkar. (Aiseia 65:13) Ñan waanjoñak, kar ukote bok eo Naan in Keeañ ilo elõñl̦o̦k jãn 210 kajin ko. Bok in ej kõmel̦el̦e kõn kanaan ko ilo Baibõl̦. Ej jipañ kõj ñan mel̦el̦e kõn katak ko rem̦ool, im ej bar kõm̦akũt kõj ñan pokaki naan in kakapilõk ko jãn Baibõl̦ ilo mour ko ad. Ewõr bar juon bok etan Awake! im ewõr bok in ilo enañin 100 kajin ko. Katak ko rej wal̦o̦k ilo bok in rej katakin kõj kõn menin kõm̦anm̦an ko raiboojoj an Jeova. Ej bar jipañ kõj bwe jen l̦oori naan in kakapilõk ko ilo Baibõl̦. (Jabõn Kõnnaan 3:21-23, UBS; Rom 1:20, UBS) Rũkarejar eo etiljek im mãlõtlõt ej kõm̦m̦an elõñ bok ko im rej pedped wõt ioon Naan in Anij. Im bok kein rej wal̦o̦k ilo elõñl̦o̦k jãn 680 kajin ko! Kwõj ke bõk iien im riit Baibõl̦ kajjojo raan? Ñe ej wõr Naan in Keeañ ekããl, kwõj ke riiti aolepen? Im ñe ej wõr bok ko rekããl ilo kajin eo am̦, kwõj ke riiti?

Doulul eo an Jeova ej bar kõm̦m̦ani outline ko me em̦m̦aan ro rej kõjerbali ñan kõm̦m̦an katak ko ilo kweilo̦k ko ad ekoba kweilo̦k ko rel̦l̦ap. Kwõj ke m̦õn̦õn̦õ kõn katak kein, tieta ko, waanjoñak ko kõn kilen kwal̦o̦k naan im interview ko me rej wal̦o̦k ilo kweilo̦k ko rel̦l̦ap? Elukkuun l̦ap an Jeova letok ekkan ko ilo kõkkar ñan naajdik kõj!—Aiseia 25:6, UBS.

Ejjab. Jen jab bwilõñ el̦aññe jet Ri Kõnnaan ro an Jeova elõñl̦o̦k bok ko ilo kajin ko aer jãn ro jet. Etke? Eokwe, l̦õmn̦ak m̦õk kõn rijjilõk ro an Jijej. Ke Jijej ear pãd ioon lal̦ in, elõñl̦o̦k katak ko rijjilõk ro an rar bũki jãn kar rũkal̦oor ro an tokãlik. (Mark 4:10; 9:35-37) Mekarta ak rũkal̦oor rein rar bũki katak ko me rar aikuji bwe en kajoor wõt tõmak ko aer.​—Epesõs 4:20-24; 1 Piter 1:8.

Ebar aorõk ñan jel̦ã bwe enañin aolep men ko Jijej ear ba im kõm̦m̦ani ijin ioon lal̦ rejjab wal̦o̦k ilo Baibõl̦. Rijjilõk Jon ear ba: “Ebar lõñ men ko Jijej ear kõm̦m̦ani. El̦aññe renaaj kar jeje kajjojo men kein otemjej, ij l̦õmn̦ak edik lal̦ in ñan an ãti aolep bok ko joñan aer lõñ.” (Jon 21:25, UBS) El̦apl̦o̦k an Kũrjin ro jinoin jel̦ã kõn Jijej jãn kõj raan kein. Bõtab, ejjab mel̦el̦ein bwe ejabwe katak ko jej bũki kõn Jijej. Etke? Kõnke kõmel̦el̦e ko me Jeova ear litok ñan kõj kõn Jijej rebwe ñan ad maroñ l̦oore joñak eo an.​—1 Piter 2:21.

Bar l̦õmn̦ak m̦õk kõn lõta ko an rijjilõk ro me kar jilkinl̦o̦k ñan eklejia ko. Juon iaan lõta ko an Paul kar jab likũti ilo Baibõl̦. (Kolosse 4:16, UBS) Innem, kõnke ejjab wal̦o̦k ilo Baibõl̦, mel̦el̦ein ke bwe ejabwe katak ko jej bũki? Jaab. Jeova ejel̦ã ta ko jej aikuji im ej litok katak ko me rej jipañ kõj bwe jen maroñ tiljek wõt ñane.​—Matu 6:8.

Jet Ri Kõnnaan ro an Jeova elukkuun lõñl̦o̦k katak ko rej wal̦o̦k ilo kajin ko aer. Ak bõlen ilo kajin eo am̦ ejjab lukkuun lõñ katak ko ie. Jekdo̦o̦n ak Jeova ej kaorõk eok. Wõnm̦aanl̦o̦k wõt im katak bok ko me ewõr ilo kajin eo am̦, im pãd ilo kweilo̦k ko me rej wal̦o̦k ilo bar kajin eo am̦. El̦aññe kwõj kõm̦m̦ane men kein, komiro Jeova naaj epaake wõt doon.​—Sam 1:2; Hibru 10:24, 25.

Aolep katak ko ilo bok ko ad rej likũti ilo Internet ilo Weep jait eo ad. Ebar wal̦o̦k katak ko me rej ñan jipañ ro ewõr nejier, rippãlele ro, jo̦dikdik ro im ro reddik. El̦ap an baam̦le ko bõk tokjãn ñe rej kõjerbali katak kein ilo Iien Kabuñ an Baam̦le ko aer. Rej bar likũt mel̦el̦e ko kõn bũrookraam̦ ko rel̦l̦ap. Jet iaan bũrookraam̦ kein ej kweilo̦k eo me ej wal̦o̦k kajjojo iiõ (annual meeting), im ñe ewõr kadiwõjl̦o̦k jãn jikuul̦ in Giliad. Bareinwõt, jãn iien ñan iien rej likũt ripoot ko ñe ej wõr keej n̦ae Ri Kõnnaan ro an Jeova, im ñe ej wal̦o̦k l̦añ ko me rej jelõt er. (1 Piter 5:8, 9) Weep jait in elukkuun bar em̦m̦an ñan jerbal in kwal̦o̦k naan kõnke armej ro me emo kwal̦o̦k naan ilo ijoko jikier remaroñ lale katak ko ilo Weep jait in.

Meñe kwõjjab maroñ kõjerbal Internet ñan lale Weep jait in ak ewõr am̦ maroñ ñan epaake wõt Jeova im tiljek ñane. Em̦õj an rũkarejar eo kabwe katak ko me jej aikuji im litok ñan kõj. Kõn men in, ejjab menin aikuj ñan wia jabdewõt men ko me kwõj kõjerbali ñan Internet bwe kwõn lale Weep jait in jw.org. Jet rekõn karõk bwe jet ren bũriini jet katak ilo Weep jait in ñan ro me ejjel̦o̦k aer Internet. Bõtab, ejjab menin aikuj bwe eklejia ko ren kõm̦m̦an karõk rot in.

El̦ap ad kam̦m̦oolol Jijej kõn an kajejjet kallim̦ur eo an. Ej kajejjete ilo an jab bõjrak in letok katak ko jej aikuji bwe jen maroñ epaake wõt Jeova. Jej tõmak bwe Jeova enaaj wõnm̦aanl̦o̦k im letok katak ko ñan kõj ilo iien ko rejejjet m̦ae jem̦l̦o̦kin jukjukun pãd in enana.