Aelõñ eo an Anij ej juon kien ilañ. Jijej ear jiroñ rũkal̦oor ro an ñan jar bwe en itok Aelõñ in. Etke? Kõnke Aelõñ ak kien in an Anij enaaj kõm̦m̦an bwe aolep armej ro ren wãnõk im aenõm̦m̦an ilo lal̦ in. Ejjel̦o̦k juon kien ilo lal̦ in emaroñ jol̦o̦k kowadoñ, lãj, jerbal ko renana kab nañinmej ko. Aelõñ eo wõt an Anij enaaj jol̦o̦k men kein kõnke ewõr an maroñ ñan kõm̦m̦ane men in. Em̦õj an Anij kããlõt Nejin, Jijej, bwe en Kiiñ in Aelõñ ak kien eo an. Bareinwõt, em̦õj an Jeova kããlõt juon kumi in rũkarejar ro an Jijej bwe ren tõl ippãn Jijej ilo Aelõñ ak kien eo an.​—Riit Luk 11:2; 22:28-30.

M̦õttan jidik, Aelõñ eo an Anij enaaj jol̦o̦k aolep ro rej jum̦ae Anij im rejjab kõn̦aan bwe en tõl er. Kõn men in, ñe jej jar bwe en itok Aelõñ eo an Anij, ej mel̦el̦ein bwe jej kajjitõk bwe Aelõñ ak kien in an en bõk jikin aolep kien ko an lal̦ in.​—Riit Daniel 7:13, 14; Revelesõn 11:15, 18, UBS.

Jijej ej juon Kiiñ em̦m̦an kõnke el̦ap an tũriam̦o. Im kõnke ej Nejin Anij, ewõr an bar maroñ ñan jipañ aolep ro rej akwel̦ap im kajjitõk jipañ ippãn Anij.​—Riit Sam 72:8, 12-14, UBS.

Aelõñ eo an Anij enaaj jipañ ro me rej m̦ool ilo aer kajjitõk bwe Aelõñ ak kien in en itok. Bareinwõt, enaaj jipañ ro me rej kõm̦m̦ani men ko Anij ekõn̦aan bwe ren kõm̦m̦ani. Ñe kwõnaaj katak kõn ta eo Baibõl̦ ej ba kõn Aelõñ eo an Anij, kwõban ajl̦o̦k kõn am̦ kar katak im jel̦ã kake.​—Riit Luk 18:16, 17; Jon 4:23.