Baibõl̦ ej lukkuun kaalikkar bwe Jijej ear kejerkak armej ro me rar mej bwe ren bar mour. Bwebwenato kein kõn an kar Jijej kejerkak armej ro jãn mej rejjab riabin bwebwenato. Ear m̦ool an wal̦o̦k bwebwenato kein kõnke jikin ko rar wal̦o̦k ie rej m̦oolin jikin, im ear lukkuun alikkar ñããt ko bwebwenato kein rar wal̦o̦k. Ñan waanjoñak, ilo iiõ eo 31, juon jarlepju in armej rar etal ippãn Jijej jãn Kaperneum l̦o̦k ñan Nein. Ke rar tõparl̦o̦k Nein, rar iioone bar juon jarlepju in armej. Kwõmaroñ tõmak bwebwenato in me ej kwal̦o̦k kõn an kar Jijej kejerkak juon eo me ear mej kõnke ej wal̦o̦k ilo Naanin Anij ak Baibõl̦ eo. Kwõmaroñ bar tõmak bwebwenato in kõnke ear wal̦o̦k im̦aan mejãn jarlepju in armej ro me rar loe im kam̦ool an kar wal̦o̦k.​—Riit Luk 7:11-15.

Jijej ear bar kejerkak juon m̦õttan em̦m̦aan etan Lazerõs, eo im ear mej ium̦win 4 raan. Kwõmaroñ tõmak bwebwenato in kõnke ear bar lõñ armej ro rar pãd im loe men eo Jijej ear kõm̦m̦ane ilo iien in.​—Riit Jon 11:39-45.

Jijej ear kejerkak armej ro jãn mej kõnke ear l̦ap an tũriam̦okake er. Ear bar kõm̦m̦ane men in ñan kwal̦o̦k bwe Jemãn, Eo im ear letok mour ñan kõj, ear lel̦o̦k ñan e maroñ ñan kõmour armej ro jãn mej.​—Riit Jon 5:21, 28, 29, UBS.

Bwebwenato kein me rej kwal̦o̦k kõn an kar Jijej kejerkak ro rar mej rej jipañ kõj ñan lukkuun tõmak kallim̦ur ko an kõn ilju im jekl̦aj. Jijej enaaj bar kõmour elõñ armej jãn mej, ekoba rinana ro me rar jab jel̦ã kõn Anij eo em̦ool. Naaj lel̦o̦k iien ñan an rein katak im yokwe Jeova Anij.​—Riit Jerbal 24:15, UBS.