KATAK KO KÕN TAITÕL̦IN BOK IN | EWÕOR KE UNIN AD MOUR?
2 Kõnke Kwõmaroñ Bõk Jipañ
“Kom̦win likũt ami inepata otemjej n̦a Ippãn, bwe kwõaorõk Ippãn.”—1 PITER 5:7.
Jet armej remaroñ l̦õmn̦ak bwe em̦m̦anl̦o̦k ñe remej kõnke eñin ej wãween eo wõt ñan kõm̦adm̦õd apañ ko rej iiooni. Bõtab, ewõr wãween ko jet ñan jipañ armej ro kõm̦adm̦õd apañ ko aer.
Jar. Jar ejjab baj juon wãween ñan kõm̦m̦an bwe en em̦m̦an am̦ mour. Im ejjab juon men jej kõm̦m̦ane ilo iien ko wõt me jej inepata im bũrom̦õj. Ñe kwõj jar, ej ãinwõt ñe kwõj bwebwenato ippãn Jeova Anij, eo me el̦ap an kea kõn kwe. Jeova ekõn̦aan bwe kwõn kwal̦o̦k aolep inepata ko am̦ ñane. Baibõl̦ ej ba: “Kwõn jol̦o̦k menin eddo ko am̦ ioon Jeova, im Enaaj bo̦ur eok.”—Sam 55:22.
Etke kwõjjab kajjioñ jar ñan Anij rainin? Ñe kwõj jar, kwõn kõjerbal etan, Jeova, im kwal̦o̦k aolepen bũruom̦ ñane. (Sam 62:8) Jeova ekõn̦aan bwe kwõn jel̦ã kajjien im watõke ãinwõt juon eo kwepaake. (Aiseia 55:6; Jemes 2:23) Kwõmaroñ jar im kõnnaan ippãn Anij aolep iien im aolep jikin.
Ekkar ñan juon doulul me ej jipañ kabõjrak an armej ro m̦an er make (American Foundation for Suicide Prevention), ej ba bwe “elõñ alen aer kõm̦m̦an etale im loe bwe 90 bõjjããn in armej ro rar mej jãn aer kar m̦an er make, ewõr aer nañinmej in kõmãlij ilo iien eo rar mej. Elõñ iaaer rar jab jel̦ã im kile bwe ewõr aer nañinmej rot kein, im ebar lõñ iaaer rar jab bõk jipañ ilo jikin taktõ ko ak jikin jipañ ko jet”
Armej ro rej yokwe im kaorõk eok. El̦ap an ro jet yokwe im kaorõk eok. Rein ej kitibuj ro uwaan baam̦le eo am̦ ak ro m̦õttam̦ me bõlen rej kile joñan am̦ bũrom̦õj im rekõn̦aan jipañ eok. Ebar wõr ro rej yokwe eok me kwõjjañin iioone er. Ñan waanjoñak, jet iien Ri Kõnnaan ro an Jeova rej iioone armej ro me relukkuun bũrom̦õj im inepata. Im armej rein rej kwal̦o̦k ñan er kõn inepata ko aer im ba bwe em̦õj aer kar l̦õmn̦ak in m̦an er make. Kõn wõt an Ri Kõnnaan rein an Jeova kwal̦o̦k naan jãn em̦ ñan em̦, rekar maroñ iioon im jipañ armej rein me el̦ap aer inepata im bũrom̦õj. Ri Kõnnaan ro an Jeova rej l̦oore joñak eo an Jijej ilo aer kwal̦o̦k aer yokwe ro jet. Rein rej bar yokwe im kea kõn kwe.—Jon 13:35.
Jikin taktõ ak jikin bõk jipañ ko. Enañin aolep iien, unin an armej ro l̦õmn̦ak in m̦an er make ej kõnke ewõr aer nañinmej in kõmãlij. Juon iaan nañinmej kein ej bũrom̦õj lowa. Jejjab aikuj jook ñe jej bõk nañinmej rot kein kõnke ejjel̦o̦k oktak nañinmej kein jãn nañinmej in ãnbwin ko jet. Ilo m̦ool, jet rũmmãlõtlõt rej ba bwe nañinmej in bũrom̦õj lowa ej ãinwõt mejin (bũl̦u) kõnke jabdewõt armej emaroñ bõke, im ewõr unokan. *—Lale kõmel̦el̦e eo itulal̦.
KEEMEMEJ MEN IN: Ñe ewõr am̦ nañinmej in bũrom̦õj lowa, enaaj pen am̦ make jol̦o̦k nañinmej in. Bõtab, ñe kwõnaaj kappok jipañ ak kõtl̦o̦k bwe ro jet ren jipañ eok, kwõmaroñ lo tõprak.
MEN EO KWÕMAROÑ KÕM̦M̦ANE KIIÕ: Pukot juon taktõ in nañinmej in kõmãlij me ejel̦ã kilen kõm̦adm̦õd im jipañ ro me ewõr aer nañinmej ko ãinwõt bũrom̦õj lowa.
^ Ñe ekajoor kõn̦aan eo ippam̦ ñan m̦an eok make, ak eokkutkut am̦ kõn̦aan m̦an eok make, m̦õkaj im etal ñan emergency ilo aujpitõl̦ im kappok jipañ. Rijerbal ro ilo emergency rej jet ro me em̦õj katakin er kilen jipañ armej ro ilo iien ko rej aikuj jipañ.
