Ewõr ke juon m̦õttam̦ eo kwõlukkuun epaake bõtab kwõjaje etan? Ealikkar bwe ejjel̦o̦k. Juon kõrã in Bulgaria etan Irina ear kwal̦o̦k l̦õmn̦ak eo an ilo an ba bwe “jejjab maroñ epaake Anij ñe jejaje etan.” Jaar etale ilo katak eo l̦o̦k im̦aan bwe Anij ekõn̦aan bwe kwõn epaake E. Anij ej kõjerbal Baibõl̦ bwe en kwal̦o̦k kajjien ñan kwe. Ej ba: “Ña Jeova, eñin Eta.”​—Aiseia 42:8.

Eaorõk ke ippãn Jeova ñe jejel̦ã kõn etan im jej kõjerbale? L̦õmn̦ak m̦õk kõn men in: Ewõr 4 lõta (Tetragrammaton) in etan Anij ilo kajin Hibru. Im ilo Jeje ko m̦oktata ilo kajin Hibru, ear wal̦o̦k ãt in etan Anij enañin 7,000 alen. Elõñl̦o̦k alen an kar wal̦o̦k etan Anij jãn etan armej ro jet ilo Baibõl̦. Men in ej kam̦ool bwe Jeova ekõn̦aan bwe jen jel̦ã kõn etan im kõjerbale. *—Lale kõmel̦el̦e eo itulal̦.

Jet armej rej l̦õmn̦ak bwe jejjab kwal̦o̦k kautiej ñe jej kõjerbal etan Anij, kõnke Anij eokkwõjarjar im utiej. M̦ool bwe ejjab jim̦we ñan kõjerbal etan Anij ilo wãween ko renana. Ejja ãindein wõt, kwõban kar kõjerbal etan juon eo kwepaake ilo juon wãween enana. Bõtab, ej ankilaan Jeova bwe ro rej yokwe E ren nõbar etan im kwal̦o̦k kake ñan ro jet bwe ren bar jel̦ã. (Sam 69:30, 31; 96:2, 8) Kwõj ke keememej jar eo Jijej ear katakin rũkal̦oor ro an kake? Ear ba: “Jememwõj ilañ, En Kwõjarjar Etam̦.” Ewõr kun̦aad ñan kokkwõjarjar etan Anij ilo ad jipañ ro jet bwe ren jel̦ã kake. Ñe jenãj kõm̦m̦ane men in, jenaaj epaakel̦o̦k wõt Anij.​—Matu 6:9.

Baibõl̦ ej kwal̦o̦k bwe Anij ej lukkuun lale ro rej “l̦õmn̦ak kõn [ak emaroñ bar mel̦el̦ein, “kaorõk”] Etan.” (Malakai 3:16) Jeova ej kallim̦uri ro rej kaorõke ãt eo etan ilo an ba: “Inaaj lo̦mo̦o̦rene; Inaaj kautieje bwe ear jel̦ã eta. Enaaj kũr ñan Eõ, im Inaaj uwaake, Inaaj pãd ippãn ilo jorrããn.” (Sam 91:14, 15) Ñe jekõn̦aan epaake Jeova, eaorõk bwe jen jel̦ã etan im kõjerbale.