El̦aññe aolep armej ro ilo juon jukjukun pãd ejjab m̦ool aer jerbal, mel̦el̦ein bwe rũtõl ro ilo kien eo aer eban m̦ool aer jerbal. El̦aññe ãindein, innem renaaj aikuji juon rũtõl jãn juon kien me armej rar jab kajutake. Baibõl̦ ej kwal̦o̦k bwe kien in ej Aelõñ ak kien eo an Anij me Jijej ear katakin rũkal̦oor ro an bwe ren jar kake.​—Matu 6:9, 10.

Kien eo an Anij ej pãd ilañ. Enaaj jol̦o̦k aolep kien ko an armej ijin ioon lal̦. (Sam 2:8, 9; Revelesõn 16:14; 19:19-21) Elõñ jeraam̦m̦an ko Kien eo an Anij enaaj bũktoki ñan armej ro. Juon iaan jeraam̦m̦an kein ej ñan jol̦o̦k jerbal ko renana ilo kien ko an armej. Jen kiiõ lale wãween ko 6 me rej kam̦ool bwe Kien eo an Anij enaaj kajejjet men in.

APAÑ EO: Jããn ko an kien rej itok jãn an armej ro jerbal im kõl̦l̦ãl̦o̦k owõj. Jããn kein rel̦ak del̦o̦ñl̦o̦k ñan kien eo, eitok wõt bwe rijerbal ro ie ren kõn̦aan ko̦o̦ti. Bareinwõt, jet armej rej wiaik bũruon jet iaan rijerbal ro ilo kien bwe en dikl̦o̦k aer kõl̦l̦ã owõj im m̦uri ko jet aer ñan kien. Kõn an jab m̦ool an armej ro ilo kien jerbal ekõm̦m̦an an jorrããn jããn eo an kien. Innem kiiõ, kien eo eoktak im bar kal̦apl̦o̦k joñan owõj ko an armej. Kõn men in, el̦ak l̦apl̦o̦k an armej kõl̦l̦ãl̦o̦k owõj, ej kab baj l̦apl̦o̦k wõt an jab jim̦we im m̦ool an ro ilo kien jerbal. Jerbal nana kein el̦apl̦o̦k aer kaeñtaan im ko̦kkure ro em̦ool im jim̦we aer jerbal.

KILEN N̦AMEJAL̦AN: Aelõñ ak kien eo an Anij ej bõk an maroñ jãn Jeova. * (Lale kõmel̦el̦e eo itulal̦.) (Revelesõn 11:15) Kien eo an Jeova ejjab tõltõl owõj bwe en wõr an maroñ ñan tõl armej. Bõtab, kõn an l̦ap an Anij jouj im tũriam̦o im an lukkuun “kajoor,” Kien eo an enaaj kabwe aolep aikuj ko an armej ro.​—Aiseia 40:26, UBS; Sam 145:16.

APAÑ EO: Ilo kar katak eo m̦oktal̦o̦k jãn katak in, kar kwal̦o̦k kõn Susan Rose Ackerman, juon eo me ej kõm̦m̦an jerbalin etale ko. Liin ej ba bwe “ro reutiejtata ilo kien” ej er eo m̦oktata ej aikuj in jim̦we im m̦ool aer jerbal bwe en em̦m̦an aolep men. Ro ilo kien rej kajjioñ in kabõjrak jerbal ko renana ilo jikin jerbal ko jet an kien ak epen aer lo tõprak. Etke? Kõnke rej kõtl̦o̦k an rijerbal in kien ro reutiejl̦o̦k kõm̦m̦ani jerbal ko rejjab m̦ool im jim̦we. Bareinwõt, ruutiej ro rejjab bar weeppãn. Baibõl̦ ej ba: “Ejjel̦o̦k juon armej rũwãnõk ioon lal̦, eo ej kõm̦m̦an em̦m̦an.”​—Ekklisiastis 7:20.

KILEN N̦AMEJAL̦AN: Anij ear kããlõt Jijej Kũraij bwe en Rũtõl ilo Kien eo An. Jijej elukkuun oktak jãn rũtõl ro an kien kõnke eban kõm̦m̦ani jerbal ko rejjab m̦ool. Ñan waanjoñak, ke Setan ear kajjioñ in kapoik Jijej im wiaik bũruon ilo an kaalwõje “kõn aolep aelõñ ko ioon lal̦ im aiboojoj ko aer,” Jijej ekar jab po. Tepil̦ eo me ej irooj in lal̦ in ear ba ñan Jijej bwe enaaj lel̦o̦k men kein ñane el̦aññe enaaj buñpedo im kabuñ ñane. (Matu 4:8-10, UBS; Jon 14:30, UBS) Bareinwõt, ilo iien eo Jijej ear ettoto ilo al̦al̦ in eñtaan eo, ear kate wõt e im tiljek wõt. Rar kajjioñ lel̦o̦k ñane juon uno ñan kõm̦m̦an bwe en jab eñjake an metak ñe enaaj ettoto ilo al̦al̦ in eñtaan eo. Bõtab, Jijej ear m̦akoko in bõke. (Matu 27:34, UBS) Anij ear kõmouri Jijej im ear jepl̦aak ñan lañ. Jijej ear kam̦ool bwe epojak in tõl ilo Kien eo an Anij.​—Pilippai 2:8-11.

APAÑ EO: Enañin aolep iien, aelõñ ko rej kõm̦m̦an iien ekkããlel ko ñan jol̦o̦k ro ejjab m̦ool aer jerbal ilo kien. Meñe rej kõm̦m̦ane wãween in, ak ej lõñ wõt jerbal ko rejjab jim̦we rej wal̦o̦k ilo kien. Men in ej bar wal̦o̦k ilo aelõñ ko me elõñ wõnm̦aanl̦o̦k ko rej kõm̦m̦ani. Aolep iien ekkããlel ej wal̦o̦k jerbal ko rejjab jim̦we.  Etke? Kõnke ro rem̦weiie rej kõjerbale jããn ko aer ñan jipañ rũtõl ro me rekõn̦aan bwe ren wiin wõt im jijet ilo jea ko ilo kien.

Etan juon iaan riekajet ro jãn Im̦õn Ekajet eo El̦ap ilo Amedka ej John Paul Stevens. L̦ein ear kwal̦o̦k bwe jerbal ko rejjab m̦ool “ejjab jelõt wõt jim̦we im maroñ eo an Kien eo ak ebar jelõt armej ro.” Eñin unin armej ro ipel̦aakin lal̦ in rej ba bwe iaan aolep doulul ko ilo lal̦ in, bade ko ilo kien rej make wõt l̦aptata aer jab jim̦we aer jerbal.

KILEN N̦AMEJAL̦AN: Kien eo wõt an Anij enaaj pãd ñan indeeo. Mel̦el̦ein bwe enaaj jem̦l̦o̦k an armej ro ekkããlel aer rũtõl. (Daniel 7:13, 14) Innem, kõnke Anij wõt enaaj kããlõt ro im renaaj tõl ilo Kien eo an, armej reban bar aikuj ekkããlel im ejjol̦o̦k aer rũtõl. Men in ej kaalikkar bwe Kien eo an Anij enaaj pãd ñan indeeo im enaaj kabwe aikuj ko an armej ro.

APAÑ EO: Bõlen kwõmaroñ l̦õmn̦ak bwe ñe ewõr kakien ko rekããl, men in enaaj kõm̦m̦an bwe en em̦m̦anl̦o̦k aolep men. Bõtab, rũmmãlõtlõt ro rej kwal̦o̦k bwe el̦ak lõñl̦o̦k wõt kakien ko, enañin aolep iien men in ekõm̦m̦an an l̦apl̦o̦k wõt jerbal ko rejjab m̦ool. Innem, meñe ro rej kõm̦m̦an kakien rej kajjioñ kõm̦m̦an bwe en dikl̦o̦k jerbal ko rejjab m̦ool ak rejjab lo tõprak.

KILEN N̦AMEJAL̦AN: Kakien ko an Kien eo an Anij rej make wõt em̦m̦antata. Rem̦m̦an jãn kakien ko an kien ko an armej. Ñan waanjoñak, ijello̦kun an Kien eo an Anij letok elõñ kakien ko, Jijej ear kwal̦o̦k kõn kien eo eaorõk. Ear ba: “Kom̦win kõm̦m̦an ñan ro jet men ko kom̦ kõn̦aan bwe ren bareinwõt kõm̦m̦an ñan kom̦.” (Matu 7:12, UBS) Ilo m̦ool, unleplepin kakien ko an Kien eo an Anij ej ñan jipañ armej bwe en em̦m̦an l̦õmn̦ak im kõm̦m̦an ko aer. Jijej ear ba: “Kwõn yokwe rũturum̦ im ãinwõt kwe.” (Matu 22:39) Alikkar bwe Anij ej lo bũruon armej ro im emaroñ lo wõn ro rej m̦õn̦õn̦õ in l̦oori ta ko ej ba.​—1 Samuel 16:7.

APAÑ EO: Unin an wal̦o̦k jerbal ko rejjab jim̦we im m̦ool ilo kien ej kõn wõt an armej ro kũbbon̦ im l̦õmn̦ak wõt kõn er make. Ekkã an wal̦o̦k wãween kein ippãn armej ro im rũtõl ro aer. Ilo katak eo l̦o̦k, ear kwal̦o̦k bwe unin an kar okjak juon m̦õn wia kileplep ilo Seoul, kiãptõl̦ eo an aelõñin Korea, ej kõnke rũkkal ro rar wiaik bũruon ruutiej ro bwe ren kõtl̦o̦k aer jab  l̦oori kakien ko an jerbalin ekkal. Rũkkal ro rar jel̦ã bwe edikl̦o̦k on̦ãn aer wiaik bũruon ruutiej ro jãn aer wiaik kõbwebwein m̦wiin.

Bwe en jako jerbal ko rejjab jim̦we im m̦ool, armej ro rej aikuj in katak ñan jol̦o̦k aer kũbbon̦ im jab l̦õmn̦ak wõt kõn er make. Bõtab, kien ko an armej rejjab kõn̦aan jol̦o̦k iien ko aer ñan jipañ armej ro. Bareinwõt, rejaje kilen ak ejjel̦o̦k aer maroñ ñan jipañ armej ro ñan jol̦o̦k aer kũbbon̦ im l̦õmn̦ak kõn er make.

KILEN N̦AMEJAL̦AN: Kien eo an Anij ej katakin armej ro bwe ren jol̦o̦k l̦õmn̦ak kein rejjab jim̦we im em̦m̦an. * (Lale kõmel̦el̦e eo itulal̦.) An armej ro katak ej jipañ er bwe ‘bũrueer im l̦õmn̦ak ko aer ren lukkuun kããl.’ (Epesõs 4:23, UBS) Bareinwõt, ej jipañ er bwe ren jol̦o̦k aer kũbbon̦ im jab l̦õmn̦ak wõt kõn er make. Kõn men in, rej kwal̦o̦k aer m̦õn̦õn̦õ in l̦õmn̦ak kõn ro jet.​—Pilippai 2:4, UBS; 1 Timote 6:6.

APAÑ EO: Meñe kwõmaroñ pãd ilo juon jukjukun pãd eaenõm̦m̦an im em̦m̦an armej ro ie, ak enaaj wõr wõt armej ro me renaaj kõm̦m̦ani jerbal ko rejjab jim̦we im remaroñ jab kwal̦o̦k m̦ool. Rũmmãlõtlõt ro rej ba bwe eñin unin epen an kien ko an armej maroñ jol̦o̦k jerbal ko rejjab jim̦we im m̦ool. Rũtõl ro an kien rej l̦õmn̦ak bwe remaroñ kadikl̦o̦k an wal̦o̦k jerbal ko rejjab jim̦we im m̦ool. Rej bar l̦õmn̦ak bwe remaroñ kadikl̦o̦k jorrããn ko rej wal̦o̦k kõn wõt jerbal kein renana.

KILEN N̦AMEJAL̦AN: United Nations ear kõm̦m̦an juon aer kweilo̦k ñan pukot kilen aer jol̦o̦k jerbal ko rejjab jim̦we im m̦ool. Im kar kwal̦o̦k bwe kien ko rej aikuj em̦m̦akũt im jipañ ro jet bwe ren kwal̦o̦k aer “tiljek, m̦ool, im kajejjet eddo ko aer.” Eñin kõttõpar ko me kien ko an lal̦ in rej kate er ñan katõpraki. Bõtab, Kien eo wõt an Anij enaaj katõprak men in. Im Kien eo wõt an Anij ej jipañ armej ro bwe ren kile bwe rej aikuj in kwal̦o̦k “tiljek, m̦ool, im kajejjet eddo ko aer.” Baibõl̦ ej ba bwe “rukowadoñ” ro im “ro reriab,” reban mour ium̦win Kien eo an Anij.​—1 Korint 6:9-11; Revelesõn 21:8.

Ewõr an armej maroñ ñan jerbal ilo jim̦we im m̦ool ãinwõt kar Kũrjin ro ilo iien ko an rijjilõk ro. Ñan waanjoñak, rũkal̦oor eo etan Saimõn ear kajjioñ wiaik bũruon rijjilõk ro bwe ren lel̦o̦k ñane maroñ eo Jeova ear lel̦o̦k ñan er ñan kõm̦m̦an menin bwilõñ ko. Bõtab, rar jab. Rar jiroñl̦o̦ke im ba: “Kwõn ukel̦o̦k jãn l̦õmn̦ak in am̦ enana.” Innem, ke Saimõn ear kile bwe ebõd kõn̦aan eo an, ear kajjitõk ippãn rijjilõk ro bwe ren jar kõn e bwe en jol̦o̦k kõn̦aan eo an ebõd.​—Jerbal 8:18-24, UBS.

Jekdo̦o̦n kwe ria, ak kwõmaroñ erom ro doon Kien eo an Anij. (Jerbal 10:34, 35) Ewi wãween bwe kwõn maroñ erom ro doon Kien eo an Anij? Eokwe, ewõr juon bũrookraam̦ in ekkatak Baibõl̦ ej wal̦o̦k ipel̦aakin lal̦ in me emaroñ jipañ eok ñan jel̦ã. Ri Kõnnaan ro an Jeova renaaj m̦õn̦õn̦õ in kwal̦o̦k waj kilen ekkatak Baibõl̦, im emaroñ bõk wõt 10 minit kajjojo wiik. Ejjel̦o̦k on̦ãn ekkatak. Elõñ men ko kwõnaaj ekkatak kaki ekoba am̦ nãj bar kal̦apl̦o̦k am̦ jel̦ã kõn ‘ennaan ko rem̦m̦an kõn aelõñin Anij.’ (Luk 4:43) Kõmij rõjañ eok ñan pukot juon iaan Ri Kõnnaan ro an Jeova ilo bukwõn eo kwõj jokwe ie, ak ñe ejjab kwõmaroñ lale Weep jait eo ammim etan jw.org/mh.