1, 2. (1) Ta eo Jijej ear kwal̦o̦k kake kõn raan ko ãliktata? (2) Ta kajjitõk ko jenaaj etali?

 PIJAIKL̦O̦K m̦õk an Jijej jijet ioon Tol̦ Olive im jitl̦o̦k ñan tampel̦ eo ilo Jerusalem. Ej pãd ippãn emãn iaan rijjilõk ro an. Rijjilõk rein rej Piter, Andru, Jemes, im Jon. Rej lukkuun roñjake Jijej ilo an kwal̦o̦k ñan er kõn juon kanaan ekãitoktoklimo kõn ilju im jekl̦aj. Kanaan eo ej kwal̦o̦k kõn men ko renaaj wal̦o̦k ilo raan ko ãliktata an jukjukun pãd in enana ñe Jijej enaaj tõl ilo Aelõñ eo an Anij. Jijej ej ba ñan er bwe ilo naaj raan ko ãliktata, “rũkarejar eo etiljek im mãlõtlõt” enaaj jutak kõn etan ilo lal̦ in im lel̦o̦k ekkan ko ilo kõkkar ak katak ko jãn Baibõl̦ ñan rũkal̦oor ro an ilo iien eo ekkar.​—Matu 24:45-47, UBS.

² Ilo ejja kanaan in wõt, Jijej ear kwal̦o̦k bũrabõl̦ eo kõn bõjin ro 10. (Riit Matu 25:1-13.) Ilo katak in, jenaaj etali kajjitõk kein jilu: (1) Ta mel̦el̦e eo eaorõk jej bõke jãn bũrabõl̦ in? (2) Ewi wãween an rũkkapit ro l̦oore naanin tõl eo an Jijej jãn  bũrabõl̦ in, im ta tokjãn ko rej wal̦o̦k? (3) Ewi wãween an bũrabõl̦ in maroñ jipañ kõj kajjojo ilo raan kein?

3. Ilo kar m̦okta, ewi wãween an kar bok ko ad kõmel̦el̦eik bũrabõl̦ eo kõn bõjin ro 10, im ta eo emaroñ kar wal̦o̦k jãn kõmel̦el̦e kein?

³ Ilo katak eo l̦o̦k, jaar katak bwe jãn iiõ ko m̦aantak ñan kiiõ, rũkarejar eo etiljek im mãlõtlõt ear kakõm̦anm̦anl̦o̦k kõmel̦el̦e ko ad kõn mel̦el̦ein jet iaan bwebwenato ko ilo Baibõl̦. El̦apl̦o̦k an kiiõ rũkarejar eo etiljek im mãlõtlõt kwal̦o̦k ta ko jemaroñ katak jãn bwebwenato ko, im edikl̦o̦k aer kwal̦o̦k ta ko bwebwenato ko im armej ro ie rej kõkkar kaki. Ñan waanjoñak, ilo kar jinoin ñe bok ko ad rej kõmel̦el̦e kõn bũrabõl̦ eo an Jijej kõn bõjin ro 10, rekõn ba bwe ewõr mel̦el̦ein l̦aam̦ ko, weil̦ eo, im nien weil̦ ko. Bõtab, ñe el̦ap wõt ad l̦õmn̦ak kõn aolep mel̦el̦e jiddik ko ilo bũrabõl̦ in, jemaroñ ke oktak im jab l̦õmn̦ak kõn mel̦el̦e eo eaorõk jen kar aikuj bõke? Uwaak eo ñan kajjitõk in el̦ap an aorõk.

4. Ilo bũrabõl̦ eo, ewi wãween ad jel̦ã (1) wõn eo ej l̦eo pãlele? (2) wõn bõjin ro?

⁴ Jen etale mel̦el̦e eo an Jijej kõn bũrabõl̦ in kõn bõjin ro 10. M̦oktata, l̦õmn̦ak kõn armej ro ilo bũrabõl̦ in. Wõn eo ej l̦eo pãlele? Jijej. Jejel̦ã men in kõnke m̦oktal̦o̦k, Jijej ear kwal̦o̦k kõn e make bwe ej l̦eo pãlele. (Luk 5:34, 35, UBS) Wõn bõjin ro? Rein rej ‘bwij eo edik’ ak rũkkapit ro. Etke jejel̦ã men in? Eokwe, ilo bũrabõl̦ in, bõjin ro rej aikuj pojak im l̦aam̦ ko aer rej aikuj urur ñe l̦eo pãlele ej itok. Men in bõjin ro rar aikuj kõm̦m̦ane ej ãinl̦o̦kwõt men eo Jijej ear jiroñ rũkal̦oor ro an bwe ren kõm̦m̦ane, im rein rar rũkkapit. Ear ba: “Kom̦win lukwõj ami kañũr, im kaurur wõt l̦aam̦ ko ami; Im kom̦win ãinwõt armej ro rej kõttar aer irooj, m̦ae iien eo enaaj jepl̦aak jãn kwõjkwõj in pãlele.” (Luk 12:32, 35, 36) Bareinwõt, rijjilõk Paul im rijjilõk Jon rar jim̦or kwal̦o̦k bwe rũkkapit ro rej ãinwõt bõjin ro rerreo. (2 Korint 11:2; Revelesõn 14:4) Ealikkar bwe naanin tõl im kakkõl eo ñan bõjin ro 10 me ej wal̦o̦k ilo bokin Matu 25:1-13 ej ñan rũkkapit ro.

5. Ewi wãween an naan ko an Jijej jipañ kõj ñan jel̦ã kõn iien eo me bũrabõl̦ eo an ej jitõñl̦o̦k ñane?

⁵ Kein karuo, jen l̦õmn̦ak kõn iien eo bũrabõl̦ in an Jijej ej jitõñl̦o̦k ñane. Men eo Jijej ear ba ilo jem̦l̦o̦kinl̦o̦k bũrabõl̦ in ej jipañ kõj ñan jel̦ã. Ear ba: “Ke rar ilen wiaik, l̦eo pãlele ej itok.” (Matu 25:10) Ilo Naan in Keeañ eo an Jul̦ae 1, 2013, kar kwal̦o̦k bwe ilo kanaan eo an Jijej ilo Matu jebta 24 im 25, ralitõk alen an kar Jijej ba bwe enaaj “itok” ak “jepl̦aaktok.” Ilo aolep iien kein ralitõk, naan kein “itok” ak “jepl̦aaktok” rej itok jãn juon wõt naan ilo kajin Grik. Innem ke Jijej ear ba bwe enaaj “itok,” ear jitõñl̦o̦k ñan iien eñtaan eo el̦ap ñe enaaj itok ilo kõkkar bwe en ekajete armej ro im jol̦o̦k jukjukun pãd in enana. Kõn men in, jemaroñ ba bwe bũrabõl̦ in an Jijej kõn bõjin ro 10 ej jitõñl̦o̦k ñan raan ko ãliktata im enaaj jem̦l̦o̦k ilo iien eñtaan eo el̦ap.

6. Ta mel̦el̦e eo eaorõk jej bõke jãn bũrabõl̦ in kõn bõjin ro 10?

⁶ Ta mel̦el̦e eo eaorõk jej bõke jãn bũrabõl̦ in kõn bõjin ro 10? Eokwe, jen l̦õmn̦ak kõn ta eo eoon in ej kõnnaan kake. Ilo Matu jebta 24, Jijej ear kõnnaan kõn “rũkarejar eo etiljek im mãlõtlõt.” Rũkarejar in etiljek im mãlõtlõt ej juon kumi edik in em̦m̦aan ro me rej rũkkapit im kar jitõñ er ñan lale rũkarejar ro jet an Kũraij ilo raan ko ãliktata. Jijej ear kakkõl em̦m̦aan rein bwe ren tiljek wõt. Innem ilo jebta 25, Jijej  ear kõjerbal bũrabõl̦ eo kõn bõjin ro 10 ñan rõjañ im kakkõl aolep rũkkapit ro ilo raan ko ãliktata. Mel̦el̦e eo eaorõk ilo bũrabõl̦ in ej bwe rũkkapit ro rej aikuj ekkõl wõt bwe ren jab luuji jinõkjeej eo aer ñan mour ilañ. (Matu 25:13) Jen kiiõ etale bũrabõl̦ in im lale ewi wãween an rũkkapit ro l̦oore naanin tõl in an Jijej.

7, 8. (1) Etke bõjin ro remãlõtlõt rar pojak? (2) Ewi wãween an rũkkapit ro kwal̦o̦k bwe repojak?

⁷ Ilo bũrabõl̦ in, Jijej ear kaalikkar bwe bõjin ro remãlõtlõt rar oktak jãn bõjin ro rebwebwe. Ear kwal̦o̦k bwe ilo iien eo l̦eo pãlele ear itok bõjin ro remãlõtlõt rar pojak. Etke rar pojak? Kõnke rar kõppojakl̦o̦k im̦aan im ekkõl wõt. Aolep bõjin ro 10 rar aikuj in ekkõl wõt im lale bwe l̦aam̦ ko aer ren urur wõt ilo boñõn eo. Bõjin ro 5 remãlõtlõt rar oktak jãn bõjin ro rebwebwe kõnke rar jab baj teiñ wõt l̦aam̦ ko aer kõn weil̦ ak rar bar ebbõk ilo nien weil̦ ko aer. Ewi wãween an rũkkapit ro kwal̦o̦k bwe repojak ñan iien eo Jijej enaaj itok?

⁸ Rũkkapit ro repojak in kajejjet jerbal eo aer ñan jem̦l̦o̦kin. Rein rejel̦ã bwe ilo aer jerbal ñan Anij rej aikuj in kaarmejjeteik m̦weiuk ko im men ko ilo jukjukun pãd in an Setan. Rein rej m̦õn̦õn̦õ in kõm̦m̦ane men in. Rej kate er ñan tiljek wõt ñan Jeova ejjab kõnke jem̦l̦o̦kin ej epaaktok, ak kõnke rej yokwe E im Nejin. Rej dãpij wõt aer tiljek im jab kõtl̦o̦k bwe m̦weiuk ko an lal̦ in, mour ettoon, im kũbbon̦ ren jelõt er. Ãinwõt bõjin ro remãlõtlõt me rar pojak kõn l̦aam̦ ko aer, rũkkapit rein rej wõnm̦aanl̦o̦k wõt im romaak ilo kõkkar im kõttar wõt itok eo an L̦eo Pãlele. Rej kijenmej wõt meñe emaroñ rum̦wij an itok.​—Pilippai 2:15, UBS.

9. (1) Ta naanin kakkõl eo an Jijej ke ear kwal̦o̦k kõn an kar bõjin ro mejki im kiki? (2) Ewi wãween an rũkkapit ro kwal̦o̦k bwe em̦õj aer roñ ainikien ikkũr eo me ej ba, “Lo, l̦eo pãlele”? (Lale kõmel̦el̦e eo itulal̦.)

⁹ Bõjin ro remãlõtlõt rar pojak ñan itok eo an l̦eo pãlele kõnke rar jab baj kõppojak wõt ak rar bar ekkõl. Ilo bũrabõl̦ in, ke l̦eo pãlele ear rum̦wij an itok, aolep bõjin ro 10 rar “mejki im kiki” ke rar kõttare wõt e. Emaroñ ke bar wal̦o̦k men in ñan rũkkapit ro ilo raan kein? Aet emaroñ. Jijej ear jel̦ã bwe meñe juon armej elukkuun kõn̦aan kõttar itok eo an im elukkuun kijoororetok, ak emaroñ jino m̦õjn̦o̦ im m̦ad ñe ejjab kõjparok. Kõn men in, rũkkapit ro retiljek rej kate er joñan wõt aer maroñ bwe ren kal̦apl̦o̦k wõt aer ekkõl. Ewi wãween aer kõm̦m̦ane men in? Ilo bũrabõl̦ in, aolep bõjin rein 10 rar roñ juon ainikien ikkũr im ej ba: “Lo, l̦eo pãlele!” Bõtab, bõjin ro wõt remãlõtlõt rar pojak. (Matu 25:5, 6; 26:41) Ejjel̦o̦k oktak ñan raan kein ãliktata kõnke em̦õj an rũkkapit ro roñ ainikien ikkũr in ilo kõkkar me ej ba, “Lo, l̦eo pãlele!” Mel̦el̦ein men in bwe em̦õj aer lo menin kam̦ool ko bwe Jijej ej pojak in itok, im rej lukkuun tõmak men in. Bareinwõt rej pojak ñan itok in an. * (Lale kõmel̦el̦e eo itulal̦.) Jen kiiõ lale jem̦l̦o̦kin bũrabõl̦ eo an Jijej im iien eo me ej jitõñl̦o̦k ñane.

10. Ta kajjitõk eo jemaroñ bõklõñtak ke bõjin ro rebwebwe rar kajjitõk aer weil̦ ippãn bõjin ro remãlõtlõt?

¹⁰ Ilo jem̦l̦o̦kinl̦o̦k bũrabõl̦ in, bõjin ro  rebwebwe rar kajjitõk weil̦ in l̦aam̦ ko aer ippãn bõjin ro remãlõtlõt. Bõtab, bõjin ro remãlõtlõt rar m̦akoko in jipañ er. (Riit Matu 25:8, 9.) Men in emaroñ kõm̦m̦an bwe jen bõklõñtak kajjitõk in, ewõr ke iien en̦ me rũkkapit ro retiljek rar m̦akoko in jipañ juon eo ewõr an aikuj? Eokwe, jej aikuj l̦õmn̦ak kõn iien eo me bũrabõl̦ in ej jitõñl̦o̦k ñane. Keememej bwe Jijej, L̦eo Pãlele, ej itok im ekajete armej ro ilo jem̦l̦o̦kinl̦o̦k eñtaan eo el̦ap. Kõn men in, iien in me bõjin ro rebwebwe rej kajjitõk aer weil̦ ippãn bõjin ro remãlõtlõt enaaj wal̦o̦k m̦okta wõt jãn an jem̦l̦o̦k iien eñtaan eo el̦ap. Etke jej ba men in? Kõnke ilo naaj eñtaan eo el̦ap, enaaj dedel̦o̦k an rũkkapit ro bõk sil eo aer ãliktata.

11. (1) Ta eo enaaj wal̦o̦k m̦okta wõt jãn an jinoe eñtaan eo el̦ap? (2) Ke bõjin ro remãlõtlõt rar jiroñ bõjin ro rebwebwe bwe ren etal im wia aer weil̦, ta eo men in ej kaalikkare?

¹¹ M̦okta jãn an naaj jino eñtaan eo el̦ap, enaaj m̦õj an aolep rũkkapit ro retiljek ilo lal̦ in bõk sil eo aer ãliktata. (Revelesõn 7:1-4) Innem jãn iien in m̦aanl̦o̦k, elukkuun alikkar bwe rein renaaj etal ñan lañ. Bõtab, l̦õmn̦ak m̦õk kõn iiõ ko m̦okta jãn an eñtaan eo el̦ap jinoe. Ta eo enaaj wal̦o̦k ñan rũkkapit ro me rar jab ekkõl wõt im rar jino kwal̦o̦k aer jab tiljek ñan Anij? Rein reban bõk jinõkjeej eo aer ilañ. Ilo naaj iien en̦, Anij enaaj kããlõt Kũrjin ro jet me rej tiljek ñane bwe ren bõk jikin rũkkapit rein me rar jab tiljek. Im ñe ejino iien eñtaan eo el̦ap, ro rebwebwe ak ro rar jab tiljek ñan Anij renaaj ilbõk ñe reloe aer ko̦kkure Babil̦on El̦ap. Ilo naaj iien en̦, remaroñ naaj kile bwe rejjab pojak ñan itok eo an Jijej. Ak ta eo enaaj wal̦o̦k ñe rõkajjitõk jipañ ilo tõre en̦? Uwaak eo epãd ilo bũrabõl̦ in. Bõjin ro remãlõtlõt rar jab kõn̦aan lel̦o̦k weil̦ ko aer ñan bõjin ro rebwebwe im rar jiroñ bõjin ro rebwebwe bwe ren etal im wia aer weil̦. Kõnke ear “lukkuun boñ” ak lukwõn boñ, ealikkar bwe reban ellolo weil̦ im ejjel̦o̦k jikin en̦ epel̦l̦o̦k ñan aer wia. Em̦õj an kõptata!

12. (1) Ilo naaj eñtaan eo el̦ap, ta eo enaaj wal̦o̦k ñan ro me rar rũkkapit bõtab rar jab tiljek wõt ñan Anij m̦okta jãn iien sil eo ãliktata? (2) Ta eo enaaj wal̦o̦k ñan ro me rej ãinwõt bõjin ro rebwebwe?

¹² Ilo naaj eñtaan eo el̦ap, rũkkapit ro retiljek reban maroñ jipañ jabdewõt ro me rar jab tiljek ñan Anij. Em̦õj an kõptata. Kõn men in, ta eo enaaj wal̦o̦k ñan ro me rar jab tiljek? Eokwe, ta eo ear wal̦o̦k ke bõjin ro rebwebwe rar etal im wia weil̦? Ke rej etal, “l̦eo pãlele ej itok.” Im bõjin ro rar pojak rar etal ippãn ñan kwõjkwõj in pãlele eo, im aor eo ear kilõk. Ñe Jijej enaaj itok ilo wõj eo an ilo jem̦l̦o̦kin eñtaan eo el̦ap, enaaj ain rũkkapit ro retiljek ñan lañ. (Matu 24:31; 25:10; Jon 14:1-3, UBS; 1 Tessalonika 4:17) Bõtab, Jijej enaaj kõjekdo̦o̦n ro me rar jab tiljek. Ãinwõt bõjin ro rebwebwe, rein remaroñ ba: “Irooj, Irooj, kwõn kõpel̦l̦o̦k ñan kõm.” Bõtab, uwaak eo an Jijej ñan er enaaj ãinwõt bar uwaak eo an ñan armej ro me renaaj ãinwõt koot. Enaaj ba: “Em̦ool Ij ba ñan kom̦, Ijaje kom̦.”​—Matu 7:21-23; 25:11, 12.

13. (1) Etke jejjab aikuj l̦õmn̦ak bwe elõñ iaan rũkkapit ro reban tiljek ñan Anij? (2) Etke jemaroñ ba bwe naanin kakkõl eo an Jijej ikijjeen bũrabõl̦ eo ej bar kaalikkar bwe ej lõke rũkkapit ro? (Lale pija eo ilo jinoin katak in.)

¹³ Jijej ear ke kwal̦o̦k bũrabõl̦ in ñan kaalikkar bwe elõñ iaan rũkkapit ro reban tiljek wõt ñan Anij im naaj aikuj bar kããlõt ro jet bwe ren rũkkapit? Ejjab. Keememej bwe ilo Matu 24 jebta, Jijej ear kakkõl rũkarejar eo etiljek im mãlõtlõt bwe en jab oktak im juon rũkarejar eo  enana. Bõtab, ejjab mel̦el̦ein bwe ear kõtmãne an men in wal̦o̦k. Ejjel̦o̦k oktak jãn bũrabõl̦ in kõn bõjin ro 10. Bũrabõl̦ in ear bar juon kein kakkõl. Kõnke ear wõr 5 bõjin bwebwe im 5 bõjin mãlõtlõt ilo bũrabõl̦ eo, men in ej kaalikkar bwe kajjojo iaan rũkkapit ro rej aikuj pojak im ekkõl wõt. Ñe rejjab, remaroñ jino aer jab tiljek ñan Anij im renaaj ãinwõt bõjin ro rebwebwe. Paul ear bar kwal̦o̦k juon naanin kakkõl me ãinl̦o̦kwõt men in ñan em̦m̦aan im kõrã ro me rar rũkkapit. (Riit Hibru 10:29, 39, UBS; bar lale Duteronomi 30:19.) Naanin kakkõl in an ear kajju, bõtab ear bar kwal̦o̦k an lõke bwe rũkkapit rein jein im jatin renaaj bõk jinõkjeej eo aer. Naanin kakkõl eo an Jijej ikijjeen bũrabõl̦ in kõn bõjin ro 10 ej bar kaalikkar an lõke rũkkapit ro bwe renaaj tiljek wõt. Ear jel̦ã bwe kajjojo iaan rũkkapit ro remaroñ tiljek wõt im bõk jinõkjeej eo aer em̦m̦an!

14. Etke ‘jiip ro jet’ remaroñ bar bõk tokjãn jãn bũrabõl̦ eo kõn bõjin ro 10?

¹⁴ Bũrabõl̦ in an Jijej ej ñan rũkkapit ro. Ak ‘jiip ro jet’ remaroñ ke bar bõk tokjãn jãn bũrabõl̦ in? (Jon 10:16) Aet! Naanin tõl eo jãn bũrabõl̦ in ejjab pen. Naanin tõl in ej bwe jen “ekkõl” wõt. Jijej ear ba: “Men eo ij ba ñan kom̦, ij bareinwõt ba ñan aolep: Kom̦win ekkõl!” (Mark 13:37, UBS) Jijej ej jiroñ aolep rũkal̦oor ro an bwe ren pojak im ekkõl wõt. Aolep Kũrjin ro remaroñ l̦oore joñak eo em̦m̦an an rũkkapit ro me rej likũt jerbalin kwal̦o̦k naan bwe en men eo m̦oktata ilo mour ko aer. Keememej bwe ilo bũrabõl̦ in, bõjin ro rebwebwe rar kajjitõk weil̦ in l̦aam̦ ko aer ippãn bõjin ro remãlõtlõt. Men in ej kakeememej kõj bwe ej kun̦aan juon make ñan tiljek wõt ñan Anij, pojak, im ekkõl wõt. Ejjel̦o̦k bar juon emaroñ kõm̦m̦ani men kein ñan kõj. Kõj kajjojo jenaaj make uwaak ñan Riekajet eo ewãnõk, Jijej Kũraij, eo me m̦õttan jidik enaaj itok. Kõn men in, jej aikuj in pojak!

15. Etke el̦ap an aolep Kũrjin ro m̦õn̦õn̦õ kõn iien kwõjkwõj in pãlele eo an Kũraij im lio pãleen?

¹⁵ El̦ap an aolep Kũrjin ro m̦õn̦õn̦õ kõn kwõjkwõj in pãlele eo me Jijej ear kwal̦o̦k kake ilo bũrabõl̦ in. Ãlikin naaj tarin̦ae in Armagedon, rũkkapit ro renaaj erom lio pãleen Kũraij. (Revelesõn 19:7-9, UBS) Ilo naaj tõre en̦, aolep armej ro ilo lal̦ in renaaj bõk tokjãn jãn kwõjkwõj in pãlele in me enaaj kõm̦m̦an ilañ. Etke? Kõnke kwõjkwõj in pãlele in ej kaalikkar bwe enaaj kiiõ wõr juon kien em̦m̦an ñan tõl aolep armej ro ilo lal̦ in. Kõn men in, meñe kõjatdikdik eo ad ej ñan mour ilañ ak ijin ioon lal̦, jej aikuj in kate kõj bwe jen pojak im ekkõl wõt. El̦aññe jenaaj kõm̦m̦ane men in, jenaaj bõk tokjãn aolep kallim̦ur ko rem̦m̦an an Jeova ñan kõj kõn ilju im jekl̦aj!