Baibõl̦ ej kwal̦o̦k bwe enaaj l̦ap jorrããn ko renaaj wal̦o̦k ilo iien eo ãliktata ak jem̦l̦o̦kin. Ej ba: “Enaaj el̦ap eñtaan, eo ejjañin ãinwõt jãn jinoin lal̦ ñan iien in . . . Im el̦aññe ar jab kãietl̦o̦k raan ko, ejjel̦o̦k kanniõk enaaj kar mour.” (Matu 24:21, 22) Bõtab, Anij ej kallim̦ur bwe elõñ armej renaaj el̦l̦ã im mour. Baibõl̦ ej ba: “Lal̦ ejakol̦o̦k . . . , a eo ej kõm̦anm̦an ankilaan Anij ej pãdwõt indeeo.”—1 Jon 2:17.

El̦aññe kokõn̦aan bwe kwõn el̦l̦ã im mour ilo naaj jem̦l̦o̦kin jukjukun pãd in im mour ñan indeeo, ta eo kwõj aikuj kõm̦m̦ane? Kwõj aikuj ke jino kõppopo ak kakkon̦ men ko kwõnaaj aikuji? Jaab. Baibõl̦ ej lukkuun jiroñ kõj bwe jen kããlõt men ko me raorõk. Ej ba: “Enaaj ãindein an men kein otemjej õnl̦o̦k, en ãin de et ami mour ilo kõm̦m̦an wãnõk im m̦wilin kwõjarjar, Ke kom̦ij kõtmãne im lipjerjer an raan in Irooj itok.” (2 Piter 3:10-12) Eoon ko jet ilo jebta in rej kwal̦o̦k bwe “men kein otemjej” me naaj ko̦kkuri rekitibuj kien ko an armej ilo jukjukun pãd in enana. Ebar kitibuj aolep ro rej kããlõt bwe kien kein an armej ren tõl er ijello̦kun aer kããlõt Anij. Elukkuun alikkar bwe ejjel̦o̦k tokjãn ñan kakkon̦ m̦weiuk kõnke men kein reban lo̦mo̦o̦ren kõj ñe enaaj itok jem̦l̦o̦kin.

Ad el̦l̦ã im mour ej kitibuj ad ajel̦o̦k mour ko ad ñan Jeova Anij im katak ñan kõm̦m̦ani men ko rej kam̦õn̦õn̦õiki. (Zepanaia 2:3, UBS) Jen jab anõk armej ro rainin me rej kõjekdo̦o̦n kakõl̦l̦e ko bwe jej mour ilo raan ko ãliktata. Jej aikuj “lipjerjer an raan in Irooj itok.” Ri Kõnnaan ro an Jeova remaroñ kwal̦o̦k ñan kwe ewi wãween bwe kwõn el̦l̦ã im mour jãn iien in.