KATAK KO KÕN TAITÕL̦IN BOK IN | WÃWEEN BWE EN DIKL̦O̦K AM̦ INEPATA

INEPATA KÕN MEN KO REKAUWÕTATA

Alona ej ba: “Ñe ij roñ ainikien jaidiñ, ijino ikkũm̦kũm̦ im ij ettõrl̦o̦k ñan jikin ko rej kõjparok kõj jãn baam̦ ko. Bõtab, meñe ij pãd ijin ak ejjab jako aõ kor. Enanal̦o̦k ñe ij pãd inabõj im ejjel̦o̦k jikin ñan kũttiliek. Juon iien ke iar etetal ilo m̦aan ial̦ eo, iar jino jañ im jaje emmenono. Ekar bõk elõñ awa bwe en em̦m̦anl̦o̦k. Ak ke ej em̦m̦anl̦o̦k, ear bar jo̦ ainikien jaidiñ eo.”

Tarin̦ae ej juon iaan men ko rej kõm̦m̦an bwe armej ro ren mijak. Elõñ armej rej bar mijak im inepata ñe rej loe juon nañinmej ekauwõtata ippãer ak ippãn ro rejitõnbõro ippãer. Im ñan ro jet, kõn an l̦ap aer mijak kõn ta eo enaaj wal̦o̦k ilju im jekl̦aj, ekõm̦m̦an bwe ren inepata. Rej inepata im ba, ‘Ajri ro nejid, ak ajri ro jibwid, renaaj ke jokwe ilo juon jikin me el̦ap tarin̦ae, lãj, ettoon, nañinmej, im eoktakl̦o̦k mejatoto?’ Ta eo jemaroñ kõm̦m̦ane bwe en dikl̦o̦k ad inepata kõn men kein?

Kõnke jejel̦ã bwe elõñ men ko renana rej wal̦o̦k, jej kwal̦o̦k ad mãlõtlõt ilo ad ‘lo nana eo im tilekek.’ (Jabõn Kõnnaan 27:12) Im ãinwõt ad kõjparok ãnbwinnid, jemaroñ bar kõjparok l̦õmn̦ak im eñjake ko ad. Kein kam̦õn̦õn̦õ ko me el̦ap lãj ie im nuuj ko renana im kabũrom̦õjm̦õj remaroñ kõm̦m̦an bwe kõj im ajri ro nejid jen inepata. Jejel̦ã bwe jeban ko jãn an wal̦o̦k men kein, bõtab jemaroñ kõjparok kõj jãni. Anij ear jab kõm̦anm̦an kõj  bwe jen l̦õmn̦aki wõt men ko renana. Eñin unin, jej aikuj kobrak l̦õmn̦ak ko ad kõn “jabdewõt men ko rem̦ool, . . . rejim̦we, . . . rewãnõk, . . . rekkwõjarjar.” El̦aññe jenaaj kõm̦m̦ane men in, “Anij in aenõm̦m̦an” enaaj kõm̦m̦an bwe en aenõm̦m̦an bũruod im l̦õmn̦ak ko ad.​—Pilippai 4:8, 9.

AORÕKIN AD JAR

Ñe em̦ool ad tõmak, men in enaaj jipañ kõj bwe en dikl̦o̦k ad inepata. Baibõl̦ ej ba bwe jen ‘ekkõl bwe jen maroñ in jar.’ (1 Piter 4:7, UBS) Jemaroñ kajjitõk ippãn Anij bwe en jipañ kõj im letok mãlõtlõt im peran bwe jen jel̦ã ta ko jen kõm̦m̦ani ñe jej iioon apañ im inepata. Jen lõke bwe ej “roñjake kõj kõn jabdewõt ad kajjitõk.”​—1 Jon 5:15.

Baibõl̦ ej kwal̦o̦k bwe Setan eo ej “irooj in lal̦ in,” ejjab Anij. Ej bar kwal̦o̦k bwe “lal̦ in ej pãd ium̦win pein Rinana eo.” (Jon 12:31; 1 Jon 5:19, UBS) Eñin unin an kar Jijej katakin kõj bwe jen jar im ba: “Lo̦mo̦o̦ren kõm jãn eo enana.” (Matu 6:13) Alona ej ba: “Aolep iien ñe ej jañ ainikien jaidiñ eo, ij kajjitõk jipañ ippãn Jeova bwe en jab l̦ap aõ kor im ikkũm̦kũm̦. Bareinwõt, l̦eo ippa ej jar ippa. Jar elukkuun l̦ap an jipañ.” Em̦ool an Baibõl̦ ba: “Jeova ej epaak ñan er otemjej rej kũr ñan E, ñan ro otemjej rej kũr ñan E ilo m̦ool.”​—Sam 145:18.

KÕJATDIKDIK EO AD KÕN ILJU IM JEKL̦AJ

Ilo Katak eo an Jijej ioon Tol̦ eo, ear katakin rũkal̦oor ro an ñan jar im ba: “En itok Am̦ aelõñ.” (Matu 6:10) Aelõñ eo an Anij enaaj jol̦o̦k aolep men ko jej inepata kaki ñan indeeo. Anij enaaj kõjerbal Jijej, eo ej “Irooj in Aenõm̦m̦an,” bwe en “kabõjrak tarin̦ae ko ioon aolepen lal̦.” (Aiseia 9:6; Sam 46:9, UBS) Anij “enaaj ekajet elõñ armej . . . Im ro riaelõñ rejãmin bar kotak jãje n̦ae ro riaelõñ, im reban bar katak tarin̦ae. . . . Ejjel̦o̦k enaaj kaamijak bar juon.” (Maika 4:3, 4) Baam̦le ko “renaaj kalõk m̦õko, im jokwe ilo er; im renaaj kallib jikin kallib in kũreep, im m̦õñã jãn leen.” (Aiseia 65:21) Bareinwõt, “rũjokwe ie ejãmin ba, ‘inañinmej.’”​—Aiseia 33:24.

Meñe jej kõjparok kõj jãn men ko rekauwõtata, ak ejjab aolep iien jemaroñ bõbraik ak kõjparok kõj make jãn men ko rej wal̦o̦k ilo idiñ. (Ekklisiastis 9:11) Elõñ bukwi iiõ in an wal̦o̦k tarin̦ae, lãj, im nañinmej ko me rej m̦an elõñ armej ro rem̦m̦an. Ewõr ke an armej rein rem̦m̦an kõjatdikdik?

Anij ejel̦ã kõn milien ro rar mej me renaaj bar mour. Kiiõ, rej kiki im kakkije ak Anij ej keememej wõt er m̦ae tõre en̦ “rimej otemjej ilo lõb . . . renaaj wal̦o̦k jãn libwier.” (Jon 5:28, 29, UBS) Baibõl̦ ej kwal̦o̦k kõn kõjatdikdik in ilo an ba: “Kõjatdikdik in ad ej ãinwõt juon añkõ ñan bũruod. Ej tõt im pen.” (Hibru 6:19, UBS) Anij “ear lel̦o̦k juon menin kam̦ool ñan armej otemjej ilo an kar kajerkakpeje armej eo [Jijej]!”​—Jerbal 17:31, UBS.

Ilo tõre in, aolep rej iioon inepata, meñe ro me rej kate er ñan kabuñbũruon Anij. Bõtab emaroñ dikl̦o̦k aer inepata ñe renaaj kwal̦o̦k wõt mãlõtlõt, kate er ñan epaakel̦o̦k wõt Anij ilo aer jar, im tõmak ilo kallim̦ur ko ilo Baibõl̦ kõn kõjatdikdik eo kõn ilju im jekl̦aj ãinwõt kar Paul, Janet, im Alona. “Anij, eo ej unin kõjatdikdik, en kobrak kom̦ kõn lañlõñ im aenõm̦m̦an otemjej kõn ami tõmak ilo e,” ãinwõt an kar kõm̦m̦ane ñan rein.​—Rom 15:13, UBS.

[Bo̦o̦k eo ilo peij 9]

Bõk Jipañ jãn Jikin Taktõ Ko

El̦aññe elõñ men ko kwõj kõm̦m̦ani ñan kajjioñ kadikl̦o̦k am̦ inepata, bõtab kwõj lo bwe ejjab bõjrak am̦ inepata, em̦m̦anl̦o̦k ñe kwõj etal im taktõ. Ñe ej l̦ap im ejjab bõjrak am̦ inepata kõn apañ ko rej wal̦o̦k ñan kwe, men in emaroñ kaalikkar bwe ewõr am̦ nañinmej. Taktõ ro remaroñ m̦okta jããke ãnbwinnũm̦, kõnke jet iien inepata ko ad rej itok jãn an wõr juon ad nañinmej me jejaje kake. Im ãlikin, taktõ ro remaroñ jipañ eok ñan kããlõt wãween kõm̦adm̦õd ko jet me rem̦m̦an ñan kwe. *​—Lale kõmel̦el̦e eo itulal̦.

[Kõmel̦el̦e eo itulal̦]