KATAK KO KÕN TAITÕL̦IN BOK IN | WÃWEEN BWE EN DIKL̦O̦K AM̦ INEPATA

Inepata kõn Apañ ko Rej Wal̦o̦k Ikijjeen Jããn

Paul, juon em̦m̦aan me ewõr pãleen im ruo nejin ajri, ej ba: “Ãlikin aer kal̦apl̦o̦k on̦ãn aolep men ilo aelõñ eo am, ear lukkuun jeja aer wiakake m̦õñã im ear lukkuun l̦ap on̦ãn. Ñe kõmij wia, kõmij jutak im l̦ain ium̦win elõñ awa, ak enañin aolep iien ñe kõmij tõparl̦o̦k m̦aan l̦ain eo, em̦õj an maat m̦õñã. Elõñ armej rar lukkuun m̦õ kõn aer kwõle, im jet rej okjak iturin ial̦ ko. An l̦ap on̦ãn menin aikuj ko ear lukkuun jelõt elõñ milien armej ro. Tokãlik, aorõkin jããn eo ilo aelõñ eo ear lukkuun dik im ejjel̦o̦k tokjãn. Ear jako pããñ account eo aõ, insurance eo aõ, im jako an itok kõl̦l̦ã eo aõ.”

Paul ear jel̦ã bwe ñan an baam̦le eo an mour, ear aikuj kwal̦o̦k “mãlõtlõt.” (Jabõn Kõnnaan 3:21, UBS) Ej ba: “Iar juon rũkõm̦m̦an jarom, bõtab ikõn kõm̦m̦ane jabdewõt kain jerbal ko jet, meñe edik on̦ãer. Jet rej kõl̦l̦ã kõn m̦õñã ak men ko ilowaan m̦õko im̦weer. Ñe rej kõl̦l̦ã kõn 4 joob in tutu, ikõn kõjerbal ruo im wiakake ruo. Tokãlik, ear wiaik 40 nejũ tokkwi. Ke rar rũttol̦o̦k iar wiakaki im bar wiaik 300 tokkwi. Tokãlik, ikõn jãnij kõn 50 bao ñan 2 pããk in cornmeal ko me 110 bo̦unier. Iar maroñ naajdik baam̦le eo aõ im baam̦le ko jet kõn cornmeal kein ium̦win juon iien eaetok.”

Paul ear bar jel̦ã bwe men eo em̦m̦antata juon emaroñ kõm̦m̦ane ej lõke Anij. Ñe jej kõm̦m̦ani men ko Anij ej jiroñ kõj kaki, enaaj jipañ kõj. Innem, ñe jej pukot kilen ñan kabwe aikuj ko ad, jen keememej naan ko an Jijej ke ear ba: “Kom̦win jab kobrak iien ko ami kõn inepata . . . Jememi ilañ ejel̦ã kom̦ij aikuji men kein.”​—Luk 12:29-31, UBS.

Ekabũrom̦õjm̦õj bwe Setan, rũkõjdat eo el̦ap an Anij, em̦õj an m̦on̦e enañin aolep armej ro ilo lal̦ in bwe ren likũt bwe men eo m̦oktata ilo mour ko aer ej ñan pukot kilen ñan kabwe aikuj ko aer. Joñan an l̦ap an armej ro inepata kõn aikuj ko aer, reoktak im pukot kilen bwe en wõr aer men ko me rejjab lukkuun aikuji. Elõñ rej oktak im m̦uri. Kõn menin, rej lo bwe  aer m̦uri ej kõm̦m̦an bwe ren ãinwõt juon “rũkõm̦akoko” ñan eo rej m̦uri ñane.​—Jabõn Kõnnaan 22:7, UBS.

Jet armej rej kõm̦m̦ani pepe ko rejjab jim̦we. Paul ej ba: “Elõñ iaan ro rar jokwe iturũ rar etal jãn baam̦le ko aer im ro m̦õttaer bwe ren etal ñan jikin ko me rej l̦õmn̦ak bwe enaaj pidodol̦o̦k mour ie. Jet rar etal meñe ear ejjel̦o̦k aer peba in mãlim ñan aer del̦o̦ñel̦o̦k jikin kein. Kõn men in, rar jab maroñ jerbal. Ekkã aer kũttiliek jãn bwilijmããn̦ im kiki iturin ial̦. Rar jab kõtl̦o̦k an Anij jipañ er. Meñe kõmar iioon apañ kõn jããn, ak ikijjeen jipañ eo jãn Anij, kõmar kate kõm ñan kijenmej ilo apañ in ãinwõt juon baam̦le.”

L̦OORE NAANIN RÕJAÑ EO AN JIJEJ

Paul ear wõnm̦aanl̦o̦k im ba: “Jijej ear ba: ‘Kom̦win jab inepata kõn ilju; bwe ilju ebwe kõn inepata ko ie. Inepata ko an rainin rebwe ñan rainin.’ Innem ñe ij jar kajjojo raan, ij jar bwe Anij en ‘letok ñan kõm kijem rainin’ bwe kõmin maroñ mour wõt. Im ear jipañ kõm, ãinwõt an kar Jijej kallim̦ur. Ejjab aolep iien kõmij bõk men ko kõm lukkuun kõn̦aan. Juon iien, iar l̦ain bwe in wia m̦õñã bõtab iar jab jel̦ã ta ko rar wiakaki. Ke iar tõparl̦o̦k m̦aan, iar loe bwe yogurt wõt men ko. Idike yogurt, bõtab ej bar juon m̦õñã. Kõn men in, iar m̦õñã yogurt boñõn eo. El̦ap aõ kam̦m̦oolol Anij bwe ilo aolepen tõre eo, ejjel̦o̦k juon iien baam̦le e aõ ear kiki ak rekwõle.” *​—Lale kõmel̦el̦e eo itulal̦.

“Ilo tõre in, edikl̦o̦k ammim apañ kõn jããn. Bõtab, jãn men ko kõmar iiooni, kõmar katak bwe men eo eaorõktata jej aikuj kõm̦m̦ane ñe jej iioon apañ im inepata ej lõke Anij. Aolep iien Jeova enaaj jipañ kõj toon wõt ad kate kõj ñan kõm̦anm̦an ankilaan. * (Lale kõmel̦el̦e eo itulal̦.) Kõmij lukkuun lo an m̦ool naan ko ilo Sam 34:8, me ej ba: ‘Kwõn edjoñ im lo bwe Jeova ejouj; em̦õn̦õn̦õ eo ej lõke E.’ Kõn men in, kõmij jab mijak ñe kõm bar iiooni apañ ko rel̦l̦ap kõn jããn.

“Kõm mel̦el̦e kiiõ bwe men eo armej rej aikuji ñan mour ej m̦õñã, ejjab jerbal ak jããn. Kõmij kijoororetok iien eo enaaj jejjet kallim̦ur in an Anij me ej ba: ‘Ãneo en obrak kõn wiit.’ Ilo tõre in, kõmij jokwane wõt kõn ‘m̦õñã im nuknuk ko’ ammim. El̦ap an kakajoor kõm naan kein jãn Baibõl̦ me rej ba: ‘Kom̦win jab arõk tal̦a; kom̦win jokwane kõn men ko ami, bwe Ear ba, “Ijãmin likũt eok, im Ijãmin ilo̦k jãn kwe indeeo.” Innem jej maroñ in peran im ba, “Irooj ej aõ Rijjipañ, Ijãmin mijak.”’” *​—Lale kõmel̦el̦e eo itulal̦.

Bwe jen maroñ ‘etetal ippãn Anij’ ãinwõt Paul im baam̦le eo an, ej aikuj l̦ap ad tõmak. (Jenesis 6:9) Ñe jej iioon apañ kõn jããn kiiõ ak ilju im jekl̦aj, elõñ men ko jemaroñ katak jãn waanjoñak in an Paul kõn wãween an kwal̦o̦k mãlõtlõt im tõmak.

Ak ta ñe apañ ko ilowaan baam̦le eo ad rej kõm̦m̦an ad inepata?

[Kõmel̦el̦e ko itulal̦]

[Naan ko ilo peij 5]

Anij ej kallim̦ur im ba: “Ijãmin likũt eok, im Ijãmin ilo̦k jãn kwe indeeo.”​—Hibru 13:5