KATAK KO KÕN TAITÕL̦IN BOK IN | WÕN REIN RI KÕNNAAN RO AN JEOVA?
Etke Kõmij Kwal̦o̦k Naan?
Ejjel̦o̦k pere bwe men eo jinointata kwõj kile kõn kõm ej bwe aolep iien kõmij kwal̦o̦k naan. Bõlen kwõj lo am itoitak im kwal̦o̦k naan ilo m̦õko im̦õn armej, ilo̦bwilej, ak jabdewõt jikin kõmij iioon armej ie. Kajjitõk eo in, etke kõmij kõm̦m̦ane jerbal in?
Ri Kõnnaan ro an Jeova rej kwal̦o̦k naan ñan bõktok nõbar ñan Anij im rej kwal̦o̦k kõn ãt eo etan. (Hibru 13:15) Bareinwõt, kõm kõn̦aan pokake naanin jiroñ eo an Jijej Kũraij ke ear ba: “Kom̦win ilo̦k, im kõm̦m̦an riaelõñ ko otemjej bwe ren rũkal̦oora, . . . im katakin er bwe ren pokake naan ko otemjej Iar jiroñ kom̦.”—Matu 28:19, 20.
Bareinwõt, kõmij kea im yokwe armej ro. (Matu 22:39) El̦ap ammim jel̦ã im mel̦el̦e bwe enañin aolep armej im wõr aer make kabuñ im ejjab aolep renaaj m̦õn̦õn̦õ in roñjake ennaan eo kõmij bõkl̦o̦k ñan er. Jekdo̦o̦n ak kõmij kile bwe el̦ap an aorõk katak ko jãn Baibõl̦ kõnke wãween eo in ñan bõk lo̦mo̦o̦r. Eñin unin kõmij jab bõjrak jãn am “katakin . . . im kwal̦o̦k kõn Ennaan eo Em̦m̦an kõn Jijej Messaia eo.” Ãindein kar bar Kũrjin ro m̦okta ilo tõre ko an rijjilõk ro.—Jerbal 5:41, 42, UBS.
Juon em̦m̦aan etan Antonio Cova Maduro me ej ekkatak kõn wãween mour an armej ear je im ba: “Ri Kõnnaan ro an Jeova rej kate er joñan wõt aer maroñ meñe rej iioon apañ ko im mãlejjoñ ko . . . , bwe ennaan eo jãn Baibõl̦ eo en tõpar ijo ettol̦o̦ktata ilo lal̦ in.”—Juon nuujpeba (El Universal) jãn Venezuela
Enañin aolep armej ro rej riiti bok kein am rejjab Ri Kõnnaan ro an Jeova. Im elõñ milien armej ro kõmij katak Baibõl̦ ippãer ewõr kadede aer make kabuñ. Bõtab, rein rej kwal̦o̦k aer kam̦m̦oolol kõn ammim lol̦o̦k er im katak ippãer.
Joñan in ej wõr wõt am̦ kajjitõk kõn kõm. Eokwe, kwõmaroñ lo uwaakin kajjitõk ko am̦ ilo am̦
-
Kepaak jabdewõt Ri Kõnnaan ro an Jeova.
-
Etal ñan Weep jait eo ammim, www.pr418.com/mh.
-
Itok ñan kweilo̦k ko ammim me ejjel̦o̦k on̦ãn del̦o̦ñ im epel̦l̦o̦k ñan aolep.
