Iar l̦otak ilo Paddington, juon bukwõn elõñ armej ie im ej pãd ilo London, Iñlen. Iar mour ippãn jinõ im ledik ro jilu jeiũ. Ekkã an jema jako jãn kõm kõnke ear juon eo ekkadekdek.

Ke iar dik, jinõ ear katakin eõ ñan jar aolep boñ. Ear wõr juon aõ Baibõl̦ jidikdik in bokin Sam im ikõn make ekkõn aõ ton̦ bwe in al kaki naan ko ilo bok in. Ij keememej aõ kar riiti jet naan ilo juon iaan bok ko aõ me rej ba bwe juon iien kõj aolep jenaaj jako. Eto an naan kein pãd ilo l̦õmn̦ak eo aõ. Aolep boñ ikõn babu im lukkuun l̦õmn̦ak kõn ilju im jekl̦aj. Iar l̦õmn̦ak ippa make bwe ej aikuj wõr unin ad pãd im mour ijin ioon lal̦. El̦ap aõ kar l̦õmn̦ak kõn men in kõnke iar jab kõn̦aan mej.

Iar jino itoklimo ilo men ko ewõr kajjetõbtõb ie. Kõn men in, ikõn kajjioñ kõnnaan ippãn ro remej im etal ñan wũliej ko ippãn rijikuul̦ ro m̦õtta. Ikõn bar alwõji pija ko rekaamijak ippãer. Kõmar l̦õmn̦ak bwe men kein relukkuun limo kõn aer kakkũm̦kũm̦.

Ear jino lukkuun nana m̦wilũ ke ear 10 aõ iiõ. Iar jino kõbaatat im ear m̦õkaj aõ añũri. Tokãlik, iar jino kõbaatat marijuana. Ke ear 11 aõ iiõ, iar jino idaak arkool̦. Meñe ikar dike nemãn arkool̦ ak ikar idaak kõnke iar kõn̦aan bwe in kadek. Ekar bar em̦m̦an ippa roñjaki al ko im tuuj, im ikõn etal ñan jikin bade ko im baar ko. Ikõn kũttiliek im ko jãn m̦weo in boñ im bar m̦õkaj im ro̦o̦l m̦okta jãn an raan. Kõn aõ kõn m̦õk ilo raan eo tok juon, ekkã aõ jab etal im jikuul̦. Bõtab ñe ij pãd ilo jikuul̦, ekkã aõ idaak arkool̦ m̦okta jãn aõ etal ñan kilaaj eo aõ juon.

Ear lukkuun nana kũreet ko aõ ilo iiõ in jikuul̦ eo aõ ãliktata. Jinõ ear lukkuun inepata im illu ippa, bõtab ear jab jel̦ã kõn aolep men ko jet renana iar kõm̦m̦ani. Kõm̦ro kar akwããl im iar illu im etal jãn m̦weo. Iar etal im jokwe ium̦win jidik iien ippãn l̦eo jera etan Tony me ekar uwaan juon kumi in kabuñ an RiJamaica etan Rastafarian. Ekar juon eo ekõn kõm̦m̦ani men ko rar n̦ae kien im ear wiakake uno ko rekkajjoor. Bareinwõt elõñ rar jel̦ã bwe ear juon eo elukkuun lãj. Ejjabto tokãlik, ikar bõro̦ro im ke ear 16 aõ iiõ, ekar l̦otak l̦adik eo nejũm̦ro.

Kien eo ear kõtl̦o̦k aõ jokwe ilo juon em̦ ñan jiroñ ro ewõr nejier ak ejjel̦o̦k pãleer. Ilo kar tõre in, ij kab iioone Ri Kõnnaan  ro an Jeova. Ekkã an kar ruo kõrã me rej Ri Kõnnaan ro an Jeova itok im lotok jet iaan jiroñ ro ilo ijin. Juon raan, iar kobal̦o̦k im roñjake aer bwebwenato kõn Baibõl̦. Kõttõpar eo aõ ear ñan kariab men ko rar ba. Bõtab ilo jouj, kõrã rein rar uwaake kajjojo iaan kajjitõk ko aõ im ear lukkuun alikkar aer uwaaki jãn Baibõl̦. Ear lukkuun em̦m̦an ippa wãween aer kar kwal̦o̦k ineem̦m̦an im jouj. Kõn men in, iar m̦õn̦õn̦õ in jino katak Baibõl̦ ippãer.

Ewõr juon men iar katak jãn Baibõl̦ me ear ukot mour e aõ. Jãn ke iar dik, iar mijak ñe juon iien inaaj mej. Bõtab, em̦õj aõ katak im jel̦ã kõn katak eo an Jijej bwe ro remej renaaj bar mour. (Jon 5:28, 29) Bareinwõt, iar katak bwe el̦ap an Anij kea kake eõ im kaorõke eõ. (1 Piter 5:7) El̦aptata an kar naan ko ilo Jeremaia 29:11 kõm̦akũt bũruõ. Eoon in ej ba: “‘Bwe Ña, Ijel̦ã kõttõpar ko Aõ kõn kom̦,’ Jeova ej ba, ‘kõttõpar in aenõm̦m̦an im jab ñan jorrããn, bwe In lewaj juon kõtmãne im kõjatdikdik.’” Iar jino tõmak bwe ewõr aõ kõjatdikdik ñan mour indeeo ilo Pedetaij eo ijin ioon lal̦.​—Sam 37:29.

Ri Kõnnaan ro an Jeova rar lukkuun kwal̦o̦k aer yokwe eõ. Ilo iien eo kein kajuon in aõ kar etal ñan juon iaan kweilo̦k ko aer, aolep rar karwaineneik ña im kwal̦o̦k jouj. (Jon 13:34, 35) Ear lukkuun oktak wãween aer kõm̦m̦an ñan ña ke iar keidi ippãn wãween an kar ro ilo juon im̦õn jar kõm̦m̦an ñan ña. Ri Kõnnaan ro an Jeova rar karwaineneik eõ meñe ear jab em̦m̦an wãween mour eo aõ. Rar kwal̦o̦k aer kea kake ña ilo aer kõm̦m̦an iien ippa im jipañ eõ kõn elõñ men ko. Ear ãinwõt ñe iar uwaan juon baam̦le el̦ap me rej kwal̦o̦k aer yokwe doon.

Kõn aõ kar katak Baibõl̦, iar kile bwe ij aikuj kõm̦m̦an oktak ko ilo mour eo aõ bwe in maroñ l̦oori kien ko an Anij kõn mour erreo. Iar bõjrak jãn aõ kõbaatat meñe ekar jab pidodo. Ilo ejja iien eo wõt, iar bar kile bwe ewõr jet al ko iar roñjaki me rar kal̦apl̦o̦k aõ kõn̦aan kõbaatat marijuana. Kõn men in, iar bõjrak jãn aõ roñjaki al kein. Kõnke iar kõn̦aan bõjrak jãn aõ kadek, ekar bõjrak aõ etal ñan jikin bade ko im baar ko kõnke renaaj kõm̦m̦an bwe in bar kõn̦aan kadek. Bareinwõt iar jino m̦õttãik ro renaaj kar jipañ eõ ñan kõm̦m̦ani men ko rem̦m̦an ilo mour e aõ.​—Jabõn Kõnnaan 13:20.

Ilo ejja iien eo wõt, Tony ear jino katak Baibõl̦ ippãn Ri Kõnnaan ro an Jeova. Ke Ri Kõnnaan ro an Jeova rar uwaaki kajjitõk ko an jãn Baibõl̦, ear jino kile bwe em̦ool men ko ear katak. Kõn men in, ear kõm̦m̦an oktak ko rel̦l̦ap ilo mour eo an. Ear bõjrak jãn an kobal̦o̦k ippãn ro m̦õttan me relãj im bõjrak jãn an kõm̦m̦ani men ko rej n̦ae kien. Bareinwõt ear jol̦o̦k an kõbaatat marijuana. Kõm̦ro kar kile bwe el̦aññe kõm̦ro kõn̦aan kabuñbũruon Jeova, kõm̦ro ej aikuj bõjrak jãn m̦anit ko rettoon im kõm̦m̦an bwe mourin baam̦le eo am̦ro en em̦m̦an ñan l̦adik eo nejũm̦ro. Kõn men in, kõm̦ro kar m̦are ilo iiõ eo 1982.

Ij keememej aõ kõn pukoti katak ko jãn Naan in keeañ ko im Awake! ko me rej kwal̦o̦k kõn bwebwenatoun armej ro rar lo tõprak ilo aer kar kõm̦m̦ani oktak ko iar bar kõn̦aan kõm̦m̦ani. * (Lale kõmel̦el̦e eo itulal̦.) Ear l̦ap an bwebwenato kein aer kar kõkajoor eõ! Rar kõkajoor eõ bwe in kate wõt eõ im jab ebbeer. Iar jar wõt ñan Jeova bwe en jipañ eõ. Im ilo kar Jul̦ae 1982 eo, kõm̦ro kar Tony peptaij.

Ilo aõ kar ejaake juon jem̦jerã epaak ippãn Jeova Anij, men in ear lo̦mo̦o̦ren mour e aõ. Bareinwõt, kõm̦ro Tony ear loe an Jeova jipañ kõm̦ro ilo iien ko reppen. Kõm̦ro kar katak ñan lõke Anij ilo iien kein ear pen ñan kõm̦ro, im kõm̦ro ej kile bwe aolep iien ej jipañ im kõkajoor baam̦le e am̦ro.​—Sam 55:22.

El̦ap aõ m̦õn̦õn̦õ bwe iar maroñ jipañ l̦adik eo nejũm̦ro im ledik eo nejũm̦ro ñan bar jel̦ã kajjien Jeova. Kiiõ el̦ap aõ bar lañlõñ in loe an ajri ro nejier bar jel̦ã kajjien Anij.

Ñe ij babu in boñ, ejako aõ inepata kõn ilju im jekl̦aj ak inepata kõn aõ naaj mej. Kõm̦ro Tony ej kiiõ poub ilo am̦ro lol̦o̦k eklejia ko an Ri Kõnnaan ro an Jeova kajjojo wiik ñan rõjañ er. Kõmij kobal̦o̦k ippãer im katakin ro jet bwe el̦aññe renaaj kwal̦o̦k aer tõmak ilo Jijej, er bareinwõt renaaj bõk mour indeeo.