Kwõj ke l̦õmn̦ak bwe riit Baibõl̦ ej juon men ejãlimo? Ke ta, ej ke juon men elimo im ekaenõm̦m̦an ñan kwe? Eokwe, uwaak eo ej wawa wõt ioon men ko kwõj kõm̦m̦ani ñe kwõj riit. Jen lale ta ko kwõmaroñ kõm̦m̦ani bwe en l̦apl̦o̦k am̦ m̦õn̦õn̦õ im itoklimo ilo am̦ riiti Baibõl̦.

Kããlõt juon ukokin Baibõl̦ kwõj lõke im epidodo ñan am̦ mel̦el̦e. El̦aññe kwõj riiti juon bok elukkuun lõñ naan ko rekkillep im naanin etto ko ejako ad kõjerbali ilo raan kein im kwõjaje mel̦el̦eier, ejjel̦o̦k pere bwe kwõban lukkuun itoklimo in riiti. Kõn men in, em̦m̦an ñe kwõj pukot juon Baibõl̦ me naan ko ie repidodo ñan mel̦el̦e im rej kõm̦akũt bũruom̦. Bõtab ebar aorõk bwe ukokin Baibõl̦ eo kwõj riiti en jim̦we. *​—Lale kõmel̦el̦e eo itulal̦.

Kõjerbal kampiutõr im men ko ãierl̦o̦kwõt. Rainin jejjab riiti wõt Baibõl̦ ilo bok. Ewõr jet Baibõl̦ ko jemaroñ riiti ilo Internet ak taunl̦outi ñan kampiutõr, tablet, ak jeel̦boon ko nejid. Ilo jet iaan Baibõl̦ kein me jemaroñ taunl̦outi, em̦õj kobaik bũrookraam̦ ko ie bwe en pidodo ad lali eoon in jipañ ko jet ak keidi ukokin Baibõl̦ ko jet. El̦aññe kokõn̦aan roñjake im jab riit, ewõr Baibõl̦ ko em̦õj rekoote an juon riiti. Elõñ armej rekõn̦aan roñjake rekoot kein ñe rej uwe ilo wa ko, kwal̦kol̦ nuknuk, ak kõm̦m̦ani m̦akũtkũt ko jet. Ewi iaan men kein em̦m̦an ippam̦ im kokõn̦aan kajjioñe?

Kõjerbal kein jipañ ko ñan katak im etali mel̦el̦e ko. Ewõr kein jipañ ko ñan kal̦apl̦o̦k am̦ mel̦el̦e kõn men ko kwõj riiti ilo Baibõl̦. Elõñ mab ko kõn jikin ko rej wal̦o̦k ilo Baibõl̦. Mab kein remaroñ jipañ eok ñan jel̦ã ia ko jikin ko kwõj riit kaki rej pãd ie, im bwe en pidodo am̦ mel̦el̦e kõn men ko rar wal̦o̦k ilo bwebwenato ko. Ebar lõñ katak ko ãinwõt katak ko ilo bok in ak ilo weep jait eo  jw.org/mh me remaroñ jipañ eok ñan mel̦el̦e kõn eoon ko ilo Baibõl̦.

Kajjioñe wãween ko roktak jãn doon. El̦aññe kwõj loe bwe epen am̦ naaj riiti Baibõl̦ jãn jinoin ñan jem̦l̦o̦kin, kwõmaroñ jino kõm̦m̦an bwe kwõn itoklimo in riit ilo am̦ jino riiti bok ak jebta ko rem̦m̦an ippam̦. El̦aññe kokõn̦aan katak kõn armej ro ilo Baibõl̦ me elõñ rejel̦ã kake er, kwõmaroñ jinoe ilo am̦ riit kake er. Ewõr ruo waanjoñak ilo bo̦o̦k eo etan “ Kal̦apl̦o̦k Am̦ Jel̦ã Kobban Baibõl̦ ilo Am̦ Riit kõn Armej ro Ie.” Ñe ejjab, kwõmaroñ riit ekkar ñan men ko kokõn̦aan riiti ak riit ekkar ñan laajrakin men ko rar wal̦o̦k. Kwõmaroñ kajjioñe juon iaan wãween kein.