Juon leddik jidikdik ej reilo̦k im loe an diwõj nabõjl̦o̦k baat jãn juon jikin jerbal, im ke ej reilo̦k ej loe an baat eo ejaak ãinwõt kõdo̦ ko. Ke ear loe men in, ear bõk l̦õmn̦ak eo bwe jikin jerbal in ej juon jikin kõm̦m̦an kõdo̦. L̦õmn̦ak ak mel̦el̦e in ebõd an ledik in emaroñ kõm̦m̦an ad ettõñ. Bõtab, ewõr mel̦el̦e ko jet rebõd me remaroñ lukkuun jelõt mour ko ad. Ñan waanjoñak, ñe ebõd ad riiti kõmel̦el̦e ko ilo bato in uno ko, men in emaroñ juon men el̦ap an kauwõtata.

El̦apl̦o̦k an kauwõtata ñe mel̦el̦e ko ad reoktak jãn ta ko Baibõl̦ ej ba. Ñan waanjoñak, jet iaan armej ro rar bõk mel̦el̦e ko rebõd kõn katak ko an Jijej. (Jon 6:48-68) Ijello̦kun aer kal̦apl̦o̦k aer mel̦el̦e, rar kõjekdo̦o̦n aolep men ko Jijej ear katakin er. Ilo m̦ool, emaroñ kar juon jeraam̦m̦an el̦ap ñan er ñe renaaj kar roñjake im kajjioñ mel̦el̦e katak ko an Jijej, bõtab rar kõjekdo̦o̦n jeraam̦m̦an in.

Kwõj ke juon eo ej riit Baibõl̦ im kõtl̦o̦k bwe en tõl mour n̦e am̦? Kõmij nõbar eok kõn am̦ kõm̦m̦ane men in. Bõtab, emaroñ ke wõr jet eoon ko ilo Baibõl̦ me ebõd am̦ mel̦el̦e kaki? Men in ear wal̦o̦k ñan elõñ armej. Jen etale jilu men ko ekkã an bõd mel̦el̦e ko an armej ro kaki.

• Ekkã an bõd mel̦el̦e ko an jet armej kõn kien eo ilo Baibõl̦ me ej ba bwe jej aikuj “mijak Anij.” Rej l̦õmn̦ak bwe mijak Anij ej jitõñl̦o̦k ñan mijak en̦ me kwõj lõl̦ño̦ñ kake. (Ekklisiastis 12:13) Bõtab Anij ejjab kõn̦aan bwe rũkarejar ro an ren bõk eñjake ak l̦õmn̦ak rot in kõn e. Ej ba: “Kwõn jab mijak, bwe Ña ippam̦; kwõn jab lõl̦ño̦ñ, bwe Ña am̦ Anij; Inaaj kõkajoor eok, aet, Inaaj jipañ eok.” (Aiseia 41:10) Ad “mijak Anij” ej mel̦el̦ein bwe jej kile joñan an utiej im jej kautieje.

• Jet armej ebõd aer mel̦el̦e kõn eoon kein me rej ba: “Ewõr iien ñan jabdewõt men. . . . Juon iien l̦otak, im juon iien mej.” Rej l̦õmn̦ak bwe em̦õj an Anij karõk iien eo me kajjojo armej renaaj mej. (Ekklisiastis 3:1, 2) Bõtab, ñe jenaaj lale aolepen jebta in, jenaaj loe bwe eoon kein rej kõnnaan kõn men ko rej wal̦o̦k ñan aolep armej im juon iaan men kein ej mej. Bareinwõt, Baibõl̦ ej katakin kõj bwe pepe ko jej kõm̦m̦ani remaroñ jelõt joñan aetokin ad mour. Ñan waanjoñak, Baibõl̦ ej ba: “Kwõn kautiej Irooj im enaaj aetok am̦ mour.” (Jabõn Kõnnaan 10:27, UBS; Sam 90:10, UBS; Aiseia 55:3, UBS) Ewi wãween an naaj aetok ad mour? Ñan waanjoñak, ñe juon ej kaorõk Naanin Anij, men in enaaj kõm̦akũti ñan kõjparoke jãn m̦anit ko remaroñ ko̦kkure, ãinwõt kadek im l̦õñ.​—1 Korint 6:9, 10.

• Jet rej l̦õmn̦ak bwe Anij enaaj ko̦kkure lal̦ in kõnke Baibõl̦ ej ba bwe Anij ej “kakon̦e lañ ko im lal̦ ñan kijeek.” (2 Piter 3:7) Bõtab Anij ear kallim̦ur bwe ejãmin kõtl̦o̦k bwe lal̦ in en jorrããn im jako. Anij ear “likũt l̦oñtak ko an lal̦ bwe en jab m̦akũtkũt ñan indeeo.” (Sam 104:5; Aiseia 45:18, UBS) Kõn men in, lal̦ in eban jako bõtab men eo enaaj jako ej men ko renana ekoba armej ro renana. Renaaj jako ãinwõt an juon men bwil im jako ilo kijeek. Ak ta kõn lañ? Eokwe naan in emaroñ jitõñl̦o̦k ñan lañ eo jej reilõñl̦o̦k im loe, iju ko ilañ, im ijo jikin Anij. Ejjel̦o̦k juon iaan men kein renaaj jako.

Ãinwõt ad kile jãn waanjoñak ko itulõñ, ekkã an bõd mel̦el̦e ko an armej kõn eoon ko rej riiti ilo Baibõl̦. Bõtab etke Anij ej kõtl̦o̦k bwe en ãindein? Jet remaroñ l̦õmn̦ak im ba: ‘El̦aññe el̦ap an Anij mãlõtlõt im ejel̦ã men otemjej, en kar letok ñan kõj juon bok me enaaj kar lukkuun alikkar im pidodo ñan an aolep mel̦el̦e. Etke ear jab kõm̦m̦ane men in?’ Jen etale jilu men ko rej kaalikkar etke ekkã an bõd l̦õmn̦ak ko an armej kõn eoon ko ilo Baibõl̦.

1. Kar kõm̦m̦ane Baibõl̦ eo ñan ro ettã bũrueer im rem̦õn̦õn̦õ in katak. Jijej ear ba ñan  Jemãn: ‘O Jema, Irooj in lañ im lal̦! Ij kam̦m̦oolol eok bwe kwaar kaalikkar ñan ro rejaje; men ko kwaar n̦ooji jãn ro rũmmãlõtlõt im rũjel̦ãl̦o̦kjen̦.’ (Luk 10:21, UBS) Ealikkar bwe kar je Baibõl̦ eo ilo juon wãween me ro wõt im em̦ool bũrueer renaaj mel̦el̦e kõn ennaan eo ie. Ro eutiej bũrueer ekkã aer bũki mel̦el̦e ko rebõd kõn eoon ko ilo Baibõl̦, im utiej bõro ekkã an wal̦o̦k ippãn “ro rũmmãlõtlõt im rũjel̦ãl̦o̦kjen̦.” Bõtab “ro rejaje,” ak ro rej kõttãik bũrueer im rej m̦õn̦õn̦õ in katak, errein armej ro im rej mel̦el̦e kõn ennaan eo an Anij ñe rej riiti Baibõl̦. Ejjab ke kabwilõñlõñ wãween an kar Anij kõm̦m̦ane Baibõl̦ eo?

2. Baibõl̦ ej ñan ro im rekõn̦aan bõk jipañ jãn Anij ñan mel̦el̦e naan ko ie. Jijej ear kaalikkar bwe armej ro renaaj aikuj jipañ ñan aer maroñ mel̦el̦e kõn katak ko an. Ewi wãween aer naaj bõk jipañ? Jijej ear ba: “Rijjipañ eo, Jetõb Kwõjarjar, eo Jema enaaj jilkintok ilo eta, enaaj katakin kom̦ men otemjej.” (Jon 14:26, UBS) Mel̦el̦ein bwe Anij ej lel̦o̦k jetõb kwõjarjar eo an ak kajoor eo an ñan jipañ armej ro bwe ren mel̦el̦e kõn men ko rej riiti ilo Baibõl̦. Bõtab, Anij ejjab lel̦o̦k jetõb kwõjarjar eo an ñan armej ro rejjab atartar ioon bwe en jipañ er. Eñin unin ekkã an pen an armej rein mel̦el̦e kõn eoon ko ilo Baibõl̦. Jetõb kwõjarjar eo an Anij ej bareinwõt kõm̦akũt Kũrjin ro el̦ap aer mel̦el̦e kõn katak ko ilo Baibõl̦ bwe ren jipañ ro rekõn̦aan kal̦apl̦o̦k aer mel̦el̦e kõn katak kein.​—Jerbal 8:26-35, UBS.

3. Jet iaan eoon ko ilo Baibõl̦ rej alikkar ilo iien eo Anij em̦õj an karõk bwe armej ren mel̦el̦e. Ñan waanjoñak, kar jiroñ rũkanaan Daniel bwe en je juon kanaan kõn raan ko repãd im̦aan. Juon enjel̦ ear jiroñe im ba: “Daniel, kwõn n̦ooje naan kein im kiili bok eo m̦ae iien ãliktata.” Ium̦win elõñ bukwi iiõ ko, elõñ armej rar riiti bokin Daniel bõtab rar jab lukkuun mel̦el̦e naan ko ie. Ilo m̦ool, Daniel ear jab bar mel̦el̦e kõn jet iaan men ko ear jei. E make ear ba: “Iar roñjake, ak iar jab mel̦el̦e.” Meñe ãindein, ak em̦õj an kar Anij karõk juon iien bwe armej ren mel̦el̦e kõn kanaan eo an me Daniel ear je. Enjel̦ eo ear ba: “Kwõn etal, Daniel, bwe em̦õj n̦ooje im kiili naan kein m̦ae iien ãliktata.” Innem wõn ro renaaj mel̦el̦e kõn kanaan in? Bokin Daniel ej ba: “Ejjel̦o̦k iaan ro renana renaaj mel̦el̦e. Ak ro ewõr jel̦ãl̦o̦kjen̦ ippãer renaaj mel̦el̦e.” (Daniel 12:4, 8-10) Kõn men in, Anij ejjab kõm̦m̦an bwe en alikkar mel̦el̦ein jet iaan eoon ko ilo Baibõl̦ m̦ae iien ejejjet iien eo ear karõk bwe armej ren mel̦el̦e.

Enañin ke kar wõr iien ear bõd mel̦el̦e ko an Ri Kõnnaan ro an Jeova kõn jet iaan eoon ko ilo Baibõl̦? Aet. Bõtab ke ear jejjet iien eo Anij ear karõk bwe en alikkar mel̦el̦ein eoon kein, Ri Kõnnaan ro an Jeova rar m̦õkaj im kajim̦we mel̦el̦e ko aer rebõd. Rej kõm̦m̦ane men in ñan l̦oore joñak eo an rijjilõk ro an Kũraij. Ilo iien ko Jijej ear kajim̦weik er, rein rar kõttãik bũrueer im kajim̦we l̦õmn̦ak ko aer rebõd.​—Jerbal 1:6, 7, UBS.

Meñe ekar bõd mel̦el̦e eo an leddik jidikdik eo kõn ia eo kõdo̦ ko rej itok jãne, ak ejjab juon bõd el̦ap me enaaj lukkuun jelõte. Bõtab, elukkuun aorõk bwe kwõn mel̦el̦e kõn katak ko ilo Baibõl̦. Joñan an l̦ap an aorõk ennaan eo ilo Baibõl̦, jej aikuj jipañ bwe jen maroñ mel̦el̦e kake. Jejjab maroñ make riit Baibõl̦ im kajju mel̦el̦e ta ko ej ba. Kõn men in, kappok jipañ jãn ro jet bwe kwõn maroñ mel̦el̦e kõn eoon ko ilo Baibõl̦. Kappok jipañ jãn ro ettã bũrueer me rem̦õn̦õn̦õ in katak bwe ren bar mel̦el̦e, ro rej atartar ioon jetõb kwõjarjar eo an Anij, im ro rej tõmak bwe em̦õj an Anij karõk bwe en alikkar mel̦el̦ein jet iaan eoon ko ilo Baibõl̦ ilo raan kein ad. Jouj im jab ãliklik in kepaak Ri Kõnnaan ro an Jeova ak riiti katak ko rej wal̦o̦k ilo weep jait eo aer etan jw.org/mh. Baibõl̦ ej kallim̦ur im ba bwe ñe kwõnaaj kate eok ñan kappukot jel̦ãl̦o̦kjen̦, “kwõnaaj lukkuun jel̦ã kõn Anij.”​—Jabõn Kõnnaan 2:3-5, UBS.