Кертеш. Юмо шке черле служитлышыже-влак верч тырша. Юмылан ӱшанле служитлышыже-влак нерген Библийыште ойлалтеш: «Черланен кийыме верыштыже тудлан Юмо полша» (Псалом 40:4). Теат хронический чер дене йӧсланен иледа гын, тыланда тыгай кум каҥаш полшен кертеш:

1.   Вий нерген кумалза. Те «Юмын кеч-могай уш деч кӱшнӧ шогышо тыныслыкшым» налын кертыда. Тудо тыланда чер дене умбакыжат кучедалаш полша да те шагалрак тургыжланаш тӱҥалыда (Филиппысе-влаклан 4:6, 7).

2.   Сай нерген шоныза. Библийыште каласыме: «Куаныше шӱм — сай эм, а волышо кумыл вийым налеш» (Притчи 17:22). Тӱрлӧ ситуацийым юмор дене ончыза. Тиде неле илышдам куштылемдаш полша да тазалыклан пайдам конда.

3.   Юмын сӧрымашын шукталтмыжлан ӱшаным пеҥгыдемдыза. Тендан хронический чер уло гын, пеҥгыде ӱшан тыланда куаным йомдараш огыл полша (Римлян-влаклан 12:12). Библийыште тыгай жап нерген ончылгоч каласымашым возымо, кунам «илыше кокла гыч иктат ок каласе: „Мый черле улам“» (Исаия 33:24). Тугодым Юмо кызытсе кораҥден кертдыме хронический чер-влакым пытара. Мутлан, Библийын каласымыж дене келшышын, шоҥго-влак угыч самырык да таза лийыт: «Тек тудын капше самырык годсо дечынат тазарак лиеш, тек тудо самырык вий жапыш пӧртылеш» (Иов 33:25).

 Примечаний. Иегован Таныкше-влак Юмын полшымыжлан ӱшанат гынат, хронический чер деч эмлалташлан врач-влак деч полышым йодыт (Маркын 2:17). Но тыланда могай эмлымаш методым ойырен налаш ме она темле, вет кажне айдеме тазалык шотышто шке решенийжым лукшаш.