1, 2. а) Мо тыгай сулык да кузе ме тудым сеҥен кертына? (Тыгак «Умылтарымашым» ончыза.) б) Тиде журналын статья-влакыште мом лончылен налына? (Тыгак тиде выпускышто «Лудшо-влаклан серышым» ончыза.)

 МЫНЯР чот Иегова тыйым йӧрата манын пален налмет шуэш мо? Вашмутым пален налашлан шымлаш кӱлеш, мом Иегова тыйым сулык да колымаш деч утарашлан уже ыштен. Сулык a — шучко тушман. Мемнан гыч иктат тудым шке вий дене сеҥен огеш керт. Ме кажне кечын сулыкым ыштена да сулыкан улмыналан кӧра колена (Рим. 5:12). Но сай увер уло. Иегован полшымыжлан кӧра ме сулыкым сеҥен кертына. Тиде шотышто Иегова мыланна гарантийым пуа!

² Иегова еҥ-влаклан 6000 ий утла тудлан служитлаш да сулыкышт дене кучедалаш полша. Молан Юмо тидым ышта? Молан манаш гын, тудо нуным йӧрата. Еҥ-влакым ыштыме жап гыч тӱҥалын, тудо нуным йӧрата да нунылан сулык дене кучедалаш полшашлан шуко ыштен. Юмо пала: сулык колымашке конда. Тудо еҥ-влаклан колымашым шонен пыштен огыл — нуно курымеш илышт манын кумылжо лийын (Рим. 6:23). Тыгай илышым тудо тыланетат тылана. Тиде статьяште ме кум йодышым лончылен налына: 1) Могай ӱшаным Иегова сулыкан еҥ-влаклан пуэн? 2) Кузе еҥ-влак Библий жапыште Иеговам куандарен кертыныт? 3) Иисус еҥ-влакым сулык да колымаш деч утарен налашлан мом ыштен?

 МОГАЙ ӰШАНЫМ ИЕГОВА СУЛЫКАН ЕҤ-ВЛАКЛАН ПУЭН?

3. Адам ден Ева кузе сулыкан лийыныт?

³ Кунам Иегова икымше пӧръеҥ ден ӱдырамашым ыштен, тудо нуным пиаланым ужнеже ыле. Тудо нунылан илашлан сылне верым пуэн. Тыгак тудо нунылан икте-весым пӧлеклен. Тидлан кӧра нуно еш илышлан куанен кертыныт. А эше Юмо нунылан оҥай заданийым пуэн — шке тукымышт дене мландым темаш да уло планетым райыш савыраш, кудыжо Эдем сад гай лийшаш ыле. Иегова нунылан ик шижтарымашым гына пуэн да, тиде шижтарымашым ода колышт гын, коледа манын каласен. Ме палена, мо умбакыже лийын. Осал суксо, кудыжо Юмымат, еҥ-влакымат йӧратен огыл, нуным чын огыл ышташ таратен. Адам ден Ева тудын таратымыже почеш ыштеныт. Шке йӧратыше Ачалан, кудыжо нунылан тынар шуко ыштен, ӱшаныме олмеш нуно сулыкым ыштеныт. Юмо ваштареш шогалме кече гыч Адам ден Ева ыштымыштын лектышыжым ужыныт: нуно шоҥгемаш тӱҥалыныт да жап эртымеке коленыт. Чылажат Иегован каласымыже почешак лийын (Тӱҥ. 1:28, 29; 2:8, 9, 16—18; 3:1—6, 17—19, 24; 5:5).

4. Молан Иегова сулыкым ужмышудымо? (Римлян-влаклан 8:20, 21).

⁴ Юмын Мутыштыжо возымо тиде историй мыланна умылаш полша, молан Иегова сулыкым тынар чот ужмышудымо. Сулык кавасе Ачана дене кыл кучымашнам пудырта да колымашке конда (Ис. 59:2). А Сатана, мӧҥгешла, сулыкым йӧрата да Юмо ден еҥ-влакым ужмышудымо. Сандене тудо Адам ден Евам Юмо ваштареш шогалаш таратен да алят еҥ-влакым алгаштара. Кунам Адам ден Ева сулыкым ыштеныт, Сатана, очыни, шонен, пуйто еҥ-влак шотышто Иегован шонен пыштымыжым пудыртен. Но тудо умылен огыл, мыняр чот кугу Иегован йӧратымашыже. Юмо Адам ден Еван тукымышт шотышто шонен пыштымыжым вашталтен огыл. Тудо еҥ-влакым чот йӧрата, сандене нунылан вигак ӱшаным пуэн. (Римлян-влаклан 8:20, 21 лудын лекса.) Иегова пален: Адам ден Еван тукымышт гыч южышт тудым йӧратен налыт да колышташ тӱҥалыт. Садлан тудо — нунын Ачашт да нуным Ыштыше — нунылан тудын йолташыже лияш да сулык ден колымаш деч утлаш йӧным пуэн. Тидлан Юмо мом ыштен?

5. Сулыкан айдеме тукымын ӱшанже кунам лектын? Умылтарыза (Тӱҥалтыш 3:15).

⁵ Тӱҥалтыш 3:15 лудын лекса. Иегова Сатанам пытара манын, вигак каласен да чыла еҥ-влаклан ӱшаным пуэн. Юмо ончылгоч каласен: «тукым» лектеш, кудыжо Сатанам пытара да тудын кондымо чыла эҥгекым кораҥда (1 Иоан. 3:8). Но ончыч Сатана тукымым «чӱҥгалшаш», вес семынже пуштшаш, ыле. Тиде Иеговалан кугу чон корштымашым конда ыле. Туге гынат еҥ-влакым сулык да колымаш деч утарашлан тидым чытен лекташ тудо ямде лийын.

КУЗЕ БИБЛИЙ ЖАПЫШТЕ ЕҤ-ВЛАК ИЕГОВАМ КУАНДАРЕН КЕРТЫНЫТ?

6. Иегован йолташыже лияшлан Авель, Ной да вес ӱшанле служитлышыже-влак мом ыштеныт?

⁶ Жап эртымеке, Иегова эркын-эркын умылтарен, кузе сулыкан еҥ-влак тудын дек лишемын кертыт. Эдемыште ваштареш шогалме деч вара Иеговалан ӱшанле икымше айдеме Авель лийын, Адам ден Еван кокымшо эргышт. Авель Иеговам йӧратен, тудым куандарынеже ыле да тудын йолташыже лийнеже ыле. Тудо кӱтӱчӧ лийын, сандене шке кӱтӱж гыч икмыняр пачам надыреш конден. Тиде Иеговалан келшен мо? Келшен. Тудо «шкежат, тудын надыржат Господьлан келшен» (Тӱҥ. 4:4). Иеговалан тудым йӧратыше  да тудлан ӱшаныше вес еҥ-влакынат надырышт келшен. Тыгай айдеме, мутлан, Ной лийын (Тӱҥ. 8:20, 21). Еҥ-влак деч тыгай надыр-влакым налын, Иегова ончыктен: сулыкан еҥ-влак тудым куандарен кертыт да тудын йолташыже лийын кертыт b.

7. Эргыжым надыреш кондаш Авраамын ямде улмыж гыч мом ме пален налына?

⁷ Авраамын Иеговалан пеҥгыде ӱшанымашыже лийын. Иегова тудлан йӧсӧ заданийым пуэн. Тудо Авраамым Исаак эргыжым надыреш кондаш йодын. Шоналтыза веле, тиде заданий Авраамлан могай чон корштымашым конден. Туге гынат тиде заданийым шукташ тудо келшен. Но кунам Авраам Исаакым теве-теве пуштшаш ыле, Иегова Авраамым тидым ыштыме деч чарен. Исаакым надыреш кондаш Авраамын ямде улмыжо ончыктен, мом Иегова ончыкыжым ышташ шонен — шке йӧратыме Эргыжым надыреш кондаш. Теве мыняр чот Иегова еҥ-влакым йӧрата (Тӱҥ. 22:1—18).

8. Моисейын закон почеш кондышаш надыр-влак мом палдареныт? (Левит 4:27—29; 17:11).

⁸ Икмыняр курым эртымеке, Иегова надыр нерген законым пуэн. Израильтян-влаклан надырым кондаш кӱлын. Тунам веле Юмо нунын сулыкыштым проститлен кертын. (Левит 4:27—29; 17:11 лудын лекса.) Нине надыр-влак кугурак надырым палдареныт, кудыжо айдеме тукымым сулык-влак деч тӱрыснек утара. Юмын кумылаҥдымыже почеш пророк-влак теве мом умылтареныт: сӧрымӧ тукым — ойыртемалтше Юмын Эргыже — орлана да кола. Тудо надыреш кондымо пача семын пуштмо лиеш (Ис. 53:1—12). Шоналте веле: еҥ-влакым — ты шотышто тыйымат — сулык да колымаш деч утарашлан Иегова шке йӧратыме Эргыжымат чаманен огыл!

ИИСУС ЕҤ-ВЛАКЫМ УТАРАШЛАН МОМ ЫШТЕН?

9. Тынеш Пуртышо Иоанн Иисус нерген мом каласен? (Еврей-влаклан 9:22; 10:1—4, 12).

⁹ Мемнан эран икымше курымышто Юмын служитлышыже, Тынеш Пуртышо Иоанн, Назарет гыч Иисусым ужын да каласен: «Теве Юмын Пачаже, Тудо тӱнян языкшым Шке ӱмбакыже налеш!» (Иоан. 1:29). Нине мут-влак палдареныт: Иисус Юмын сӧрымӧ ойыртемалтше тукым лийын. Тудо шке илышыжым надыреш кондышаш ыле. Ындыжым сулыкан айдеме тукымын ӱшанышт эше чотрак пеҥгыдемын — сулык курымешлан пытарыме лиеш. (Еврей-влаклан 9:22; 10:1—4, 12 лудын лекса.)

10. Иисус «языкан-влакым языкыштым касарыкташ... ӱжаш» толын манын, кузе ончыктен?

¹⁰ Иисус эн ончыч тыгай еҥ-влаклан полшаш тыршен, кудышт сулыкан улмыштлан кӧра чот орланеныт. Тудо нуным почешыже каяш ӱжын. Иисус пален: еҥ-влак сулыкан улмыштлан кӧра орланат. Сандене тудо поснак тыгай пӧръеҥ ден ӱдырамаш-влаклан полшен, кӧ ыштыме сулыкыштлан кӧра орланен. Икана тудо каласен: «Таза еҥлан огыл эмлызе кӱлеш, а черлылан» — да ешарен: «Мый чын ыштыше-влакым ӱжаш огыл, а языкан-влакым языкыштым касарыкташ... ӱжаш толынам» (Матф. 9:12, 13). Иисус тидын нерген туныктен гына огыл, шкежат тыге ыштен. Кунам ик ӱдырамаш тудын йолжым шке шинчавӱдшӧ дене мушкын, Иисус тудлан поро мутым каласен да сулыкшым проститлен (Лук. 7:37—50). Иисус Самарий ӱдырамашым кӱлешан чынлан туныктен, кеч пален: ӱдырамаш пӧръеҥ дене ила, кудыжо тудын марийже огыл (Иоан. 4:7, 17—19, 25, 26). Тыгак Юмо Иисуслан сулыкын лектышыжым  — колымашым — кораҥдаш властьым пуэн. Иисус пӧръеҥ, ӱдырамаш ден йоча-влакым ылыжтен (Матф. 11:5).

11. Молан сулыкан еҥ-влаклан Иисус воктен лияш куштылго лийын?

¹¹ Чот сулыкан еҥ-влакланат Иисус воктен лияш куштылго лийын. Тиде мемнам огеш ӧрыктаре, вет Иисус нуным умылен да чаманен. Еҥ-влак Иисус деке толаш лӱдын огытыл (Лук. 15:1, 2). Иисус нуным тудлан ӱшанымыштлан моктен да нунын дене поро лийын (Лук. 19:1—10). Тудо шке примерже дене ончыктен, мыняр чот чаманыше тудын Ачаже (Иоан. 14:9). Юмын Эргыжын мут ден пашаже-влак раш ончыктеныт: чаманыше Ачаже еҥ-влакым йӧрата да кажне айдемылан сулыкым сеҥаш полшынеже. Иисусын порылыкшо еҥ-влакым илышыштым вашталташ да тудын почешыже каяш таратен (Лук. 5:27, 28).

12. Шке колымыжо нерген ойлен, Иисус тунемшыж-влаклан мом палдарынеже ыле?

¹² Иисус пален, мо тудым ончыкыжым вуча. Тудо шке тунемшыж-влаклан икмыняр гана каласен: тудым ужалат да меҥгеш пудален сакат (Матф. 17:22; 20:18, 19). Иисус пален: тудын надырже тӱнян языкшым кораҥда. Тидын нерген Тынеш Пуртышо Иоанн да пророк-влак ойленыт. Тыгак Иисус туныктен: шке колымыж деч вара тудо шкеж дек тӱрлӧ еҥым ӱжын конда (Иоан. 12:32). Сулыкан еҥ-влак Иисуслан ӱшанаш да тудын кышаже почеш каяш тӱҥалыт гын, Иеговам куандарен кертыт. Тунам нуно «язык деч  эрыкыш» лукмо лийыт (Рим. 6:14, 18, 22; Иоан. 8:32). Сандене Иисус лӱддымӧ лийын да мемнам утарашлан орланен колаш ямде лийын (Иоан. 10:17, 18).

13. Иисус кузе колен да Иегова нерген тиде мемнам мо́лан туныкта? (Тыгак сӱретым ончыза.)

¹³ Иисусым ик лишыл йолташыже ужален. Варажым тудын тушманже-влак тудым арестоватленыт, мыскыленыт да тыгай пашаште титакленыт, кудыжым тудо ыштен огыл. Нуно Иисусым пушташ пунчалым луктыныт да тудым индыреныт. Сарзе-влак тудым казнитлыме верыш наҥгаеныт да тудын кид ден йолжым меҥгеш пудаленыт. Иисус чылажымат чытен лектын. Но Иисус дене таҥастарымаште Иегова эше чотрак орланен, вет тудо ужын, кузе Эргыжым чот орландарат. Иегован кугу вийже уло да Эргыжын орланымыжым тудо чарен кертын. Но тидым ыштен огыл. Молан? Ачам тыге ышташ мо таратен? Икманаш — йӧратымаш. Иисус туныктен: «Юмо тӱням туге йӧратен, Ик Шкет Эргыжымат пуэн; Эргыжлан ӱшаныше иктат ынже йом, а курымашлык илышым налже манын, тыге ыштен» (Иоан. 3:16).

14. Иисусын надырже нерген шонкален, мом ме умылена?

¹⁴ Иисусын надырже — тиде пеҥгыде доказательстве: Иегова Адам ден Еван тукымыштым йӧрата. Тиде надыр ончыкта, мыняр чот Иегова лач тыйым йӧрата. Тудо эн шергаканжым пуэн — шке йӧратыме Эргыжым — да тыйым сулык ден колымаш деч утарашлан тудлан кугу чон корштымашым чыташ логалын (1 Иоан. 4:9, 10). Чынак, тудо мемнан гыч кажныжлан сулык дене кучедалаш да тудым сеҥаш полшынеже!

15. Иисусын надыржылан кӧра сулыкна проститлыме лийже манын, мом мыланна ыштыман?

¹⁵ Иегован пӧлекшылан кӧра — тудын Эргыжын надыржылан кӧра — мемнан сулыкна проститлыме лийын кертеш. Но Юмо мемнам проститлыже манын, мом мыланна ыштыман? Тиде йодышлан вашмутым ме Тынеш Пуртышо Иоаннын да Иисус Христосын мутыштышт муына: «Языкым касарыктен [ӧкынен], Юмо деке савырныза: Пылпомыш Кугыжаныш лишемын» (Матф. 3:1, 2; 4:17). Тугеже, сулык дене кучедалаш да йӧратыше Ачана деке лишылрак лияш кумылна уло гын, мыланна ӧкынаш кӱлеш. Но ӧкынымашыш мо пура? Да кузе сулыкан улмынам ончыде ӧкынымашлан кӧра ме Иеговам куандарен кертына? Нине йодыш-влаклан вашмутым ме вес шымлышаш статьяште муына.