1, 2. а) Тыгай еҥ-влакым, кӧ сулыкым лӱмын ышта да огеш ӧкынӧ, Иегова кузе онча? б) Иегова сулыкым ыштыше еҥ-влак деч мом ыштымым вуча?

 МОМ ме ыштена, Иеговалан садиктак огыл. Тудо кеч-могай сулыкым ужмышудымо (Пс. 5:5—7). Тудо мемнан деч Мутыштыжо возымо нормо-влак почеш илымынам вуча. Мутат уке, Иегова сулыкан еҥ-влак деч сулыкдымо улмым ок вучо (Пс. 129:3). Тунамак тудо йӧрдымӧ еҥ-влаклан шке «порылыкшым пужлен илаш йӧным пуышо амалыш савыраш» ок пу (Иуд. 4). Тыгай еҥ-влакым Юмын Армагеддон сарыште пытарымаш вуча манын, Библийыште возымо (2 Пет. 3:7; Почм. 16:16).

² Но иктаж-кӧ колыжо манын Иегован кумылжо уке. Кузе тиде теме почеш кодшо статья-влакыште шымленна, Библий раш ойла: Юмо «чылан языкыштым касарыктышт» манын шона (2 Пет. 3:9). Кугурак иза-влак Юмо деч примерым налыт да сулыкым ыштыше-влаклан ӧкынаш да Иегова дек пӧртылаш чытымаш дене полшат. Но чылан огыл тиде полышым налыт (Ис. 6:9). Южышт кугурак иза-влакын полшаш тыршымыштым ончыде умбакыжат сулыкым ыштат. Тыгай годым мом ышташ?

 «ОСАЛЛАНЫШЫМ ШКЕНДАН КОКЛА ГЫЧ КОРАҤДЫЗА»

3. а) Библий дене келшышын, сулыкым ыштыше айдеме дене, кӧ огеш ӧкынӧ, мом ыштыман? б) Кунам айдемым погынымаш гыч кораҥдат, тудо шке тидым ойырен налын манын, молан каласаш лиеш?

³ Сулыкым ыштыше огеш ӧкынӧ гын, кугурак иза-влак иктым гына ыштен кертыт — 1 Коринфян-влаклан 5:13 гыч кӱштымашым шукташ: «Осалланышым шкендан кокла гыч кораҥдыза». Нуно тыгай айдемым погынымаш гыч кораҥдаш решенийым луктыт. Но каласаш лиеш, сулыкым ыштыше шке тидым ойырен налын. Тудо шке мом ӱден, тудымак тӱредеш (Гал. 6:7). Вет кугурак иза-влак тудлан шуко гана полшаш тыршеныт, но тудо полышыштым налын огыл (2 Цар. 17:12—15). Шке пашаж дене тудо ончыктен: Иеговам колыштмыжо да законжо почеш илымыже ок шу (Втор. 30:19, 20).

4. Сулыкым ыштыше еҥ, кудыжо огеш ӧкынӧ, погынымаш гыч кораҥдыме лийын манын, молан увертаралтеш?

⁴ Кунам сулыкым ыштыше еҥым, кудыжо огеш ӧкынӧ, погынымаш гыч кораҥдат, тидын нерген увертарымашым ыштат. Тиде увертарымаш айдемым мыскылашлан огыл ышталтеш. Тудо погынымашлан Библий гыч кӱштымашым шукташ полша: саде еҥ дене мутланашат, кочкашат огыл (1 Кор. 5:9—11). Иегова тиде кӱштымашым арам огыл пуэн. Апостол Павел возен: «Ру падыраш уло руашым шукта» (1 Кор. 5:6). Сулыкым ыштыше еҥ, кудыжо огеш ӧкынӧ, погынымаште кодеш гын, иза-ака-влакын Иегован законжо почеш илаш кумылышт лушкыдемын кертеш (Прит. 13:20; 1 Кор. 15:33).

5. Погынымаш гыч кораҥдыме еҥ шотышто могай ончалтышна лийшаш да молан?

⁵ Погынымаш гыч кораҥдыме айдеме дене шкем кузе кучышаш улына? Конешне, ындыжым тудын ден пырля жапым она эртаре. Но мыланна шарныман: тиде айдеме йомшо шорык гай улеш гынат, тудо нимогай ӱшан деч посна кодын манын, тиде огеш ончыкто. Кӱтӱ деч кораҥше шорык мӧҥгеш пӧртылын кертеш. Тиде айдеме Иеговалан ӱшанле лияш сӧрымашым пуэн манын шарныман. Чаманаш логалеш, тудо ынде сӧрымыжӧ почеш огеш иле да тидлан кӧра эҥгекыш логалын кертеш (Иез. 18:31). Но кызыт жап эше уло да Иегова порылыкшым ончыкташ ямде. Сандене айдеме пӧртылеш манын ӱшанена. Погынымаш гыч кораҥдыме айдемылан полшашлан кугурак иза-влак мом ыштат?

КУГУРАК ИЗА-ВЛАК МОГАЙ ПОЛЫШЫМ ПУАТ?

6. Айдемылан погынымашыш пӧртылаш полшашлан кугурак иза-влак мом ышташ тӱҥалыт?

⁶ Айдеме погынымаш гыч кораҥдыме лийын гын, тудо ындыжым шкет гына кодын да кугурак иза-влак тудлан Иегова дек пӧртылаш огыт полшо манын, тиде ончыкта мо? Уке. Кугурак иза-влакын комитетышт айдемылан, кудыжо сулыкым ыштен да ӧкынен огыл, тый ынде погынымаш гыч кораҥдыме лият манын увертарат. Тунамак нуно умылтарат, погынымашке пӧртылашлан мом тудлан ыштыман. Но тиде эше чыла огыл. Шукыж годым кугурак иза-влак тудлан каласат: «Тый денет икмыняр тылзе гыч вашлиялтнена» — да тудын кумылжо вашталтын мо, пален налыт. Айдеме вашлиялташ келша гын, кугурак иза-влак тыгай вашлиймаште тудым ӧкынаш да пӧртылаш порын кумылаҥдат. Тиде жапыште айдемын кумылжо да пашаже вашталтын огыл гынат, кугурак иза-влак садак тудден южгунам вашлиялташ да тудым ӧкынаш кумылаҥдаш тыршат.

7. Иегова деч примерым налын, кугурак иза-влак погынымаш гыч кораҥдыме еҥ дек чаманымашым кузе ончыктат? (Иеремия 3:12).

⁷ Кугурак иза-влак Иегова деч примерым налаш тыршат, вет тудо погынымаш  гыч кораҥдыме айдеме дек чаманымашым ончыкта. Мутлан, ожно Юмо чын корно гыч кораҥше шке калык деч вучен огыл, кунам нуно шке титакыштым умылат да тудын дек пӧртылыт. Икымше ошкылым тудо шке ыштен. Тудо израильтян-влак дек шке пророк-влакым колтен, кеч калык тунам эше ӧкынен огыл. Тыгак тиде журнал гыч кокымшо шымлышаш статьяште ме Осия пророк нерген лудынна. Тудын ватыже сулыкым ыштен шоген гынат, Иегова Осиялан тудым проститлаш да шке дек мӧҥгеш налаш каласен (Ос. 3:1). Тыге Юмо шке калыкшылан кугу чаманымашым ончыктен (Мал. 3:7). Сулыкым ыштыше еҥ мӧҥгеш пӧртылжӧ манын, кугурак иза-влакын Иегован семынак кугу кумылышт уло, да тидым ышташ нуно нимогай чаракым огыт ыште. (Иеремия 3:12 лудын лекса.)

8. Йомшо эрге нерген Иисусын туштен каласымашыже погынымаш гыч кораҥдыме-влак деке Иегован шижмашыжым умылаш кузе полша? (Лукан 15:7).

⁸ Йомшо эрге нерген Иисусын туштен ойлымашыжым шарналтыза. Тудым ме кокымшо шымлышаш статьяште шымленна. Мӧҥгыш эргын пӧртылмыжым умбачын ужмеке, «ачаже... ваштарешыже куржын миен, шӱйжӧ гыч ӧндалын да шупшалын» (Лук. 15:20). Ончалза, ача вучен огыл, кунам эргыже тудын дек лишемеш да проститлымаш нерген сӧрвалаш тӱҥалеш. Тидын олмеш тудо сай ача семын эргыже ваштареш лекташ вашкен, вет тудым чот йӧратен. Тиде туштен ойлымаш ончыкта, мом Иегова чын корно гыч кораҥше-влак деке шижеш. Кугурак иза-влакат шкеныштым нунын дене Юмо семынак кучаш тыршат. Кажне йомшо шорык «мӧҥгыш пӧртылжӧ» манын, нунын кумылышт уло (Лук. 15:22—24, 32). Кунам сулыкым ыштыше еҥ пӧртылеш, каваштат, мландыштат чылан куанат: Иегова, Иисус, суксо-влак да уло погынымаш! (Лукан 15:7 лудын лекса.)

9. Иегова сулыкым ыштыше-влакым мо шотышто ӱшандара?

⁹ Тугеже ме пален налынна: Иегова тыгай еҥ-влаклан, кӧ сулыкым ышта да огеш ӧкынӧ, погынымаште кодаш огеш пу. Но тудо тыгай еҥ-влак деч кораҥеш да нунылан полшаш огеш тырше манын, тиде огеш ончыкто. Тудын дек пӧртылмыштым Юмо вуча. Теве кузе тудо шке шижмашыже нерген Осия 14:4 почеламутышто каласен: «Мый нуным ӱшанле огыл улмышт деч паремдем, нуным уло шӱм дене йӧраташ тӱҥалам, вет мый нунылан ынде ом шыдешке». Могай виян мут-влак! Кугурак иза-влак Иегован шижмашыжым умылат да, айдеме изиш гына ӧкынымашым ончыкта гын, тидым ужаш тыршат. А сулыкым ыштыше еҥым нине мут-влак ӱшандарат: Иегова тудым йӧрата да пӧртылмыжым вуча.

10, 11. Шукертак погынымаш гыч кораҥдыме-влаклан кугурак иза-влак кузе полшаш тыршат?

¹⁰ А мом каласаш лиеш тыгай еҥ-влак нерген, кӧ уже шуко ий ончыч погынымаш гыч кораҥдыме лийын? Очыни, тудо уже шукертак сулыкым огеш ыште але огешат шарне, могай сулыкым ыштен. Кеч-мыняр жап эртен гынат, кугурак иза-влак кажне тыгай айдемым муаш да тудын ден вашлиялташ тыршат. Вашлиялтме годым нуно айдемылан пырля кумалаш темлат, тудым ӧкынаш да погынымашке пӧртылаш таратат. Мутат уке, айдеме погынымаште шуко жап лийын огыл гын, духовный шотышто тудо чот лушкен. Сандене пӧртылмыжӧ шуэш гын, кугурак иза-влак тудлан Библий шымлымашым темлат, кеч тудо погынымашыш угыч эше пуртымо лийын огыл. Тудо келша гын, кугурак иза-влак шымлымашым эртарашлан келшен толшо изам але акам ойырен налыт.

¹¹ Иегова еҥ-влакым чот йӧрата. Кугурак иза-влак тудын деч примерым налнешт. Сандене, кӧ Иегова деч торлен, чылаштымат нуно  кычал муаш да ӱшандараш тыршат: омса эше почмо, нуно пӧртылын кертыт. Кунам айдеме ӧкына да йоҥылыш пашам кода, тунам тудо вигак угыч Иегован Таныкше лийын кертеш (2 Кор. 2:6—8).

12. а) Кугурак иза-влаклан могай ситуацийыште поснак тӱткӧ лийман? б) Чот кугу сулыкым ыштыше еҥ-влакым Иегова огеш проститле манын, молан мыланна шонаш огеш кӱл? (Тыгак сноскым ончыза.)

¹² Южо ситуацийыште айдемым погынымашыш угыч ушаш але уке шонкалыме годым кугурак иза-влаклан чот тӱткӧ лийман. Мутлан, айдеме йоча-влак дене шкем чот торжан кучен, отступник лийын але шке пелашыж дене ойырлашлан шоя амалым кучылтын гын, тиде айдеме чынжымак ӧкына манын, кугурак иза-влаклан раш пален налман (Мал. 2:14; 2 Тим. 3:6). Кугурак иза-влак погынымаште иза-ака-влакым аралышаш улыт. Тунамак нунылан сайын умылаш  кӱлеш: айдеме кеч-могай сулыкым ыштен, но ӧкына да сулык ыштымым чарна гын, тудым Иегова шкеж дек мӧҥгеш пурта. Мутат уке, айдеме весе-влак дене торжа да чоя лийын гын, кугурак иза-влак тудын пашажым чот тӱткын ончаш тӱҥалыт. Но тыгай айдеме дек Иегова нигунамат порылыкым огеш ончыкто манын, нунылан шоныман огыл (1 Пет. 2:10) a.

МОГАЙ ПОЛЫШЫМ ПОГЫНЫМАШ ПУЭН КЕРТЕШ?

13. Кӧлан погынымаште шылталымаш лукмо лийын да кӧм погынымаш гыч кораҥденыт, нунын дене ме шкем кузе кучена?

¹³ Кодшо статьяште ме ойленна: южгунам погынымаште айдемылан шылталымаш (порицаний) лукмо нерген увертарымаш ышталтеш. Тунам палена: тиде еҥ ӧкынен да сулыкым ышташ чарнен — да тудын ден умбакыжат кылым кучена (1 Тим. 5:20). Тудо садак погынымаште улеш да тудлан иза-ака-влакын полышышт кӱлеш (Евр. 10:24, 25). Но кунам иктаж-кӧ погынымаш гыч кораҥдыме лийын манын увертарыме, тиде йӧршеш вес ситуаций. Тыгай айдеме дене ме кылым она кучо, тудын дене огынат коч (1 Кор. 5:11).

14. Иза але ака, Библий дене туныктымо совестьшым шотыш налын, погынымаш гыч кораҥдыме айдеме дене шкем кузе куча? (Тыгак сӱретым ончыза.)

¹⁴ Тугеже ме погынымаш гыч кораҥдыме еҥ дене йӧршеш она мутлане манын, тиде ончыкта мо? Уке, огеш ончыкто. Мутат уке, ме тудын ден кылым она кучо да жапым она эртаре. Но погынымаш гыч кораҥдыме айдеме мемнан родо улеш але ончыч лишыл йолташ лийын гын, ме Библий дене туныктымо совестьнам шотыш налын, тудым вашлиймашке ӱжаш шонен кертына. Тудо вашлиймашке толеш гын, кузе мыланна шкем кучыман? Ончыч ме тудын дене она саламлалт ыле. Но тыште адакат мыланна Библий дене туныктымо совестьна почеш ыштыман. Южышт тыгай айдеме дене кӱчыкын саламлалташ да тудлан икмыняр поро мутым каласаш решитлен кертыт. Но тудден кужун мутланаш але вес семын пырля жапым эртараш ме она тӱҥал.

15. 2 Иоаннын 9—11 почеламут-влакыште могай сулыкым ыштыше-влак нерген каласыме? (Тыгак « Иоанн ден Павел ик сулык нерген возеныт мо?» рамкым ончыза.)

 ¹⁵ Но южышт йодын кертыт: «Тыгай айдеме дене саламлалтше христиан тудын осал пашашкыже ушна манын, Библийыште возымо огыл мо?» (2 Иоаннын 9—11 лудын лекса.) 2 Иоаннын 9—11 почеламут-влакын контекстше ончыкта: тыште отступник-влак нерген да, кӧ весе-влакым Юмылан йӧрдымӧ пашам ышташ кумылаҥда, нунын нерген ойлалтеш (Почм. 2:20). Сандене айдеме отступник-влакын туныктымыштым але Библий ваштареш улшо вес шонымаш-влакым шаркалаш тырша гын, кугурак иза-влак тудден огыт вашлиялт. Конешне, тыгай айдеме ӧкына манын ӱшан уло. Но кызыт эше тыге лийын огыл гын, тудын дене она саламлалт да вашлиймашкына тудым она ӱж.

ЧАМАНЫМАШ ДА ПОРЫЛЫК ШОТЫШТО ИЕГОВА ДЕЧ ПРИМЕРЫМ НАЛЫНА

16, 17. а) Иегова сулыкым ыштыше еҥ-влакым мом ышташ ӱжеш? (Иезекииль 18:32). б) Кугурак иза-влак Иегова дене пырля могай пашаште тыршат?

¹⁶ Нине вич статьям шымлымеке, мом ме пален налынна? Иктаж-кӧ колыжо манын, Иегован кумылжо уке! (Иезекииль 18:32 лудын лекса.) Сулыкым ыштыше-влак тудын ден сӧрасышт манын Иегова вуча (2 Кор. 5:20). Теве молан историй мучко Иегова тудын деч кораҥше служитлыше-влакым ӧкынаш да тудын дек пӧртылаш кумылаҥден. Кугурак иза-влаклан Иегова ден пырля ик пашам ышташ чап пуалтын — сулыкым ыштыше-влаклан ӧкынаш полшаш (Рим. 2:4; 1 Кор. 3:9).

¹⁷ Шоналтыза, каваште чылан мыняр чот куанат, кунам сулыкым ыштыше ӧкына! Кажне гана, кунам йомшо шорык погынымашке пӧртылеш, Иегован шӱмжӧ куан дене темеш. Кавасе Ачанан чаманымашыже, порылыкшо да йӧратымашыже нерген шонкалена гын, тудым эше чотрак йӧратена (Лук. 1:78).