1. Кугу сулыкым ыштыше-влакын могай ӱшан уло?

 КОДШО статьяште ме ужынна, могай кӱштымашым апостол Павел пуэн, кунам Коринфыште ик христиан кугу сулыкым ыштен. Тиде пӧръеҥ ӧкынен огыл, сандене погынымаште тудо кодын огеш керт ыле. Но тиде статьян тӱҥ почеламут дене келшышын, Юмо айдемылан ӧкынаш полшен кертеш (Рим. 2:4). Тиде пашаште кугурак иза-влакын могай рольышт?

2, 3. Изан але акан кугу сулыкым ыштымыже нерген пален налына гын, мом мыланна ыштыман да молан?

² Погынымаште иктаж-кӧ сулыкым ыштен манын кугурак иза-влак огыт пале гын, нуно тудлан полшен огыт керт. Тугеже, изан але акан сулыкым ыштымыже нерген пален налына гын, мом ыштышаш улына? Кугурак иза-влаклан чылажымат каласкалаш тудым кумылаҥдаш кӱлеш (Ис. 1:18; Ап. паш. 20:28; 1 Пет. 5:2).

³ Но изан але акан кугурак иза-влак дене мутланымыже ок шу гын, тунам мом ышташ? Сулыкым ыштыше еҥ кӱлешан полышым налже манын, ме шке кугурак иза-влак дек каена. Тыге ме йӧратымашым ончыктена, вет духовный изам але акам йомдарымына ок шу. Айдеме йоҥылыш пашам ышташ ок чарне гын, тунам Иегова дене кыл кучымашыже эше чотрак локтылалтеш. Тыгак тидлан кӧра Иегован калыкшын уда репутацийже лийын кертеш. Йӧсӧ лиеш гынат, ме лӱдде кугурак иза-влак дене мутланена, вет Иеговам да изам але акам чот йӧратена (Пс. 26:14).

 КУЗЕ КУГУРАК ИЗА-ВЛАК КУГУ СУЛЫКЫМ ЫШТЫШЕ АЙДЕМЫЛАН ПОЛШАТ

4. Кугурак иза-влак сулыкым ыштыше айдеме дене могай цель дене вашлиялтыт?

⁴ Погынымаште иктаж-кӧ кугу сулыкым ыштен гын, кугурак иза-влакын советышт комитетым a чумыра. Тиде комитет кум кугурак иза гыч шога. Нине иза-влак ӱҥышӧ да тыматле лийшаш улыт. Иза-влак сулыкым ыштышылан ӧкынаш полшаш тыршат гынат, нуно умылат: айдемым нуно виеш вашталтен огыт керт (Втор. 30:19). Сулыкым ыштыше-влак чыланат Давид кугыжа семын ӧкынаш огыт тӱҥал манын, нуно умылат (2 Сам. 12:13). Южышт Иегован туныктымашыжым огыт колышт (Тӱҥ. 4:6—8). Туге гынат, кугурак иза-влакын цельышт — сулыкым ыштыше айдеме ӧкыныжӧ манын, чыла кертмым ышташ. Сулыкым ыштыше айдеме дене вашлиялтме годым кугурак иза-влаклан мо нерген шарныман?

5. Сулыкым ыштыше еҥ дене вашлиялтме годым кугурак иза-влак мо нерген шарнат? (2 Тимофейлан 2:24—26) (Тыгак сӱретым ончыза.)

⁵ Кугурак иза-влак палат: айдеме сулыкым ыштен гынат, тудо умбакыжат Иегован шергакан изи шорыкшо кодеш (Лук. 15:4, 6). Сандене айдеме дене вашлиялтын, нуно шкем торжан огыт кучо да шыдешкен огыт мутлане. Тыгак айдемылан йодыш-влакым пуаш да чыла факт-влакым пален налаш гына кӱлеш манын, кугурак иза-влак огыт шоно. Нуно тыгай койыш-влакым ончыкташ тыршат, кудышт нерген 2 Тимофейлан 2:24—26 почеламутлаште возымо (лудын лекса). Кугурак иза-влак поро да ныжылге улыт, сулыкым ыштыше айдемын шижмашыжым шотыш налыт да тудын шӱмжым тарваташ тыршат.

6. Кугурак иза-влак сулыкым ыштыше дене вашлиялтме деч ончыч кузе ямдылалтыт? (Римлян-влаклан 2:4).

⁶ Кугурак иза-влак Иегова семын шонаш тыршат. Сулыкым ыштыше еҥ дене нуно Иегован примерже почеш шкем кучат. Теве мом Павел Иегова нерген каласен: «Юмын порылыкшо тыйым... Юмо деке савырынеже». (Римлян-влаклан 2:4 лудын лекса.) Кугурак иза-влаклан шарнаш кӱлеш: нуно погынымаште кӱтӱчӧ улыт да нунылан Христосын кӱштымашыже да примерже почеш ыштыман (Ис. 11:3, 4; Матф. 18:18—20). Сулыкым ыштыше дене вашлиялтме деч ончыч нуно шке цельышт нерген кумалыт — айдемылан ӧкынаш полшаш. Нуно Библийым да публикацийна-влакым тӱткын шымлат да Иегова айдемым умылаш да тудын ситуацийжым пален налаш полшыжо манын  кумалыт. Нунылан шонкалаш кӱлеш: айдеме нерген нуно чылажымат палат мо да тудын шонымыжлан, кумылжылан да ыштымыжлан мо влиятлен кертын? (Прит. 20:5).

7, 8. Сулыкым ыштыше дене вашлийме годым кузе кугурак иза-влак Иегован примерже почеш чытымашым ончыктен кертыт?

⁷ Кугурак иза-влак Иегова гай чытыше лияш тыршат. Нуно шарнат, кузе ожно Иегова сулыкым ыштыше-влак дене шкем кучен. Мутлан, Юмо Каин дене чытыше лийын. Тудо Каиным шижтарен, могай лектышым сулыкым ыштымаш конда. Тыгак, тудо мут колыштшо лиеш гын, тудым суапландараш сӧрен (Тӱҥ. 4:6, 7). Давид дек Иегова Нафаным колтен да тудыжо, туштен каласымашым ойлен, кугыжалан ӧкынаш полшен (2 Сам. 12:1—7). А эше Юмо угыч да угыч колыштдымо израильтян калык дек пророк-влакым колтен (Иер. 7:24, 25). Языкым ыштыше-влак шке ӧкынат манын, Иегова вучен огыл. Еҥ-влаклан полшашлан тудо икымше ошкылым ыштен да тыге нуным ӧкынаш таратен.

⁸ Иегова деч примерым налын, кугурак иза-влак сулыкым ыштыше айдемылан полшаш тыршат. 2 Тимофейлан 4:2 почеламут дене келшышын, тыгодым нуно чытыше лийшаш улыт. Сандене кугурак изалан шкем кидыште кучаш да сулыкым ыштыше айдеме дене чытымаш дене мутланаш кӱлеш. Тидлан кӧра айдемын чын ышташ кумылжо лектын кертеш. Кугурак иза сыраш але шыдешкаш тӱҥалеш гын, тиде айдемылан каҥашым колышташ да ӧкынаш мешаен кертеш.

9, 10. Кузе кугурак иза-влак айдемылан умылаш полшат, мо тудым Иегова деч торлен да сулыкым ыштымашке конден?

⁹ Кугурак иза-влак умылаш тыршат, мо сулыкым ыштымашке конден. Молан иза але ака духовный шотышто лушкыдемын? Ала тудо Библийым эре шымлымым але служымашке коштмым чарнен? Але тудо шагалрак Иеговалан кумалаш тӱҥалын да уло шӱм дене кумалын огыл? А можыч тудо уда кумылжо почеш ышташ тӱҥалын? Яра жапым тудо кӧ дене эртара да кузе кана? Тыгай йолташ-влак да канымаш тудын шӱмжым вашталтеныт мо? Шке паша ден решенийже-влак дене тудо Иегова Ачажлан чон корштымашым конден манын умыла мо?

¹⁰ Сай йодыш-влакым пуэн, кугурак иза-влак сулыкым ыштышылан шонкалаш полшат, молан кӧра тудо Иегова деч торлен да сулыкым ыштен (Прит. 20:5). Тунамак нуно поро кумылан лийшаш улыт да утыжден тудым йодыштшаш огытыл. А эше нуно Нафан семын ыштен кертыт. Тудо Давид ден мутланымыж годым примерым кучылтын. Тидын семынак кугурак иза-влак примерым конден кертыт. Тыгай пример сулыкым ыштышылан умылаш полшен кертеш, могай уда пашам тудо ыштен. Очыни, уже икымше вашлийме годымак айдеме шке ыштымылан чаманаш тӱҥалеш. Тудо ӧкыненат кертеш.

11. Иисус могай примерым ончыктен?

¹¹ Кугурак иза-влак Иисус деч примерым налаш тыршат. Ылыжше Иисус Тарс гыч Савллан шонкалаш таратыше йодышым пуэн: «Савл, Савл! Молан тый Мыйым поктылат?» Тыге тудо Савллан йоҥылыш ыштымыжым умылаш полшен (Ап. паш. 9:3—6). А теве мом Иисус «Иезавель ӱдырамаш» нерген каласен: «Мый тиде ӱдырамашлан яжарланымыж деч кораҥаш жапым пуэнам» (Почм. 2:20, 21).

12, 13. Сулыкым ыштыше еҥын ӧкынаш жап лийже манын, кугурак иза-влак мом ыштен кертыт? (Тыгак сӱретым ончыза.)

¹² Иисус деч примерым налын, кугурак иза-влак шонаш огыт тӱҥал, пуйто айдеме нигунамат огеш ӧкынӧ. Южышт комитет дене  икымше гана вашлиялтме годымак ӧкынат. А весыштлан шукырак жап кӱлеш. Сандене кугурак иза-влак тиде айдеме дене эше икмыняр гана вашлиялтын кертыт. Очыни, икымше вашлиймаш деч вара сулыкым ыштыше иза але ака пуымо каҥаш-влак нерген шонкалаш тӱҥалеш. Ала тудо ӱҥышын Иегова деч проститлымашым йодеш (Пс. 31:5; 37:19). Тунам вес гана тудын йӧршеш вес кумылжо лийын кертеш.

¹³ Сулыкым ыштышылан полшаш тыршен, кугурак иза-влак чаманымашым да порылыкым ончыктат. Иегова тыршымыштым суапландарыже манын, нуно кумалыт да иза але ака чылажымат умыла да ӧкына манын ӱшанат (2 Тим. 2:25, 26).

14. Кунам сулыкым ыштыше еҥ ӧкына, тидлан кӧ чапландарыме лийшаш? Умылтарыза.

¹⁴ Кунам сулыкым ыштыше еҥ ӧкына, тиде чылаштлан кугу куаным конда! (Лук. 15:7, 10). Тидлан кӧм моктыман? Кугурак иза-влакым мо? Шарналтыза, сулыкым ыштыше-влак нерген Павел мом возен: «Юмо нунылан языкыштым касарыкташ... ала йӧным пуа» (2 Тим. 2:25). «Тунемме Библийыште» тиде почеламутлан комментарий уло: «Айдеме шке шонымашым да кумылжым вашталтен. Тидлан уло чап еҥ-влаклан огыл, а Иеговалан пуымо лийшаш, кудыжо чын корно гыч кораҥше христианлан кӱлешан вашталтышым ышташ полша. Вара Павел палемда, могай чапле саскам тыгай ӧкынымаш конда. Тудо сулыкым ыштыше еҥлан чыным сайрак умылаш, угыч айык шонымашан лияш да Диаволын вапшыж гыч утлаш полша (2Тм 2:26)».

15. Айдемын ӧкынымыж деч вара кугурак иза-влак тудлан могай полышым пуат?

¹⁵ Айдемын ӧкынымыж деч вара комитет эше икмыняр вашлиймаш нерген тудден кутырен келша, кушто кугурак иза-влак тудлан кӱтӱчӧ семын полшат. Тыгай полыш айдемым чын корно дене каяш да алгаштарымаш деч кораҥаш тарата (Евр. 12:12, 13). Мутат уке, кугурак иза-влак айдемын сулыкшо нерген нигӧлан огыт каласе. Но лийын  кертеш, южо информацийым погынымашлан увертараш кӱлеш.

«ЧЫЛАШТЫН ОНЧЫЛНО ШЫЛТАЛЕ»

16. Кӧ нерген Павел ойлен, кунам 1 Тимофейлан 5:20 почеламутышто «чылашт» мутым кучылтын?

¹⁶ 1 Тимофейлан 5:20 лудын лекса. Павел нине мут-влакым вес кугурак изалан, Тимофейлан, возен. Апостол каласен, «языкым ыштен шогышо-влак» дене мом ышташ кӱлеш. Мом тудо каласынеже ыле? Сулыкым ыштыше-влакым уло погынымаш ончылно шылталаш кӱлеш мо? Эре огыл. Очыни, «чылашт» мутым кучылтын, тудо сулык нерген пален налше-влакым палемден. Тиде шке шинча дене чылажымат ужшо-влак лийын кертыныт. Але нуно, кӧлан сулыкым ыштыше шке чыла каласкален. Тыгай еҥ-влаклан гына кугурак иза-влак каласышаш ыльыч: нуно тиде случайым ончен лектыныт да айдемылан кӱлешан наказаний пуымо лийын.

17. Погынымаште шукышт сулык нерген уже палат але вара пален налыт гын, тунам могай увертарымаш ышталтеш да молан?

¹⁷ Южо ситуацийыште погынымаште шукышт сулык нерген уже палат але вара пален налыт. Тунам «чылашт» — тиде уло погынымаш. Сандене кугурак иза-влак гыч иктыже увертарымашым ышта: тыгай иза але акалан шылталымашым (порицанийым) лукмо. Молан тыгай увертарымаш ышталтеш? Павел вашешта: «Молат лӱдышт манын», вес семынже погынымашым сулыкым ыштыме деч шижтарашлан.

18. Тынеш пурышо христиан, кудыжлан эше 18 ий темын огыл, сулыкым ыштен гын, кугурак иза-влак мом ыштат? (Тыгак сӱретым ончыза.)

¹⁸ Но тынеш пурышо христиан, кудыжлан эше 18 ий темын огыл, кугу сулыкым ыштен  гын, тунам кузе лияш? Кугурак иза-влакын советышт тиде самырык христиан ден Танык улшо ача-аваж дене вашлиялташ кок кугурак изам йодеш b. Нуно пален налыт: ача-ава шке йочаштлан ӧкынаш полшашлан мом уже ыштеныт. Йочан сай кумылжо уло да тудо ача-аваж деч полышым налеш гын, кок кугурак иза умылен кертыт: умбакыжат нимомат утыжым ышташ огеш кӱл. Вет кугурак иза-влак умылат: Иегова лачак ача-авалан шке йочаштым йӧратымаш дене туныкташ ӱшанен пуэн (Втор. 6:6, 7; Прит. 6:20; 22:6; Еф. 6:2—4). Жапын-жапын кугурак иза-влак ача-ава деч пален налыт, йочалан кӱлеш полыш пуалтеш але уке. Но тынеш пурышо самырык христиан огеш ӧкынӧ да умбакыжат сулыкым ышта гын, мом ышташ? Тунам тудын дене да ача-аваж дене кугурак иза-влакын комитетышт вашлиялтеш.

ИЕГОВА «ЧОТ ЧАМАНЫШЕ ДА ПОРО»

19. Кугу сулыкым ыштыше дене вашлийын, кузе кугурак иза-влак Иегова деч примерым налаш тыршат?

¹⁹ Комитетыште служитлыше кугурак иза-влак умылат: нуно погынымашым тыгай еҥ-влак деч аралышаш улыт, кӧ Иегован законжо почеш ынеж иле. Тиде шотышто нуно Иегова ончылно мутым кучат (1 Кор. 5:7). Тыгак сулыкым ыштышылан ӧкынаш полшашлан нуно уло вийым пыштат. Айдеме вашталтеш да нунын тыршымышт арам огеш лий манын ӱшанат. Тыге нуно Иегова деч примерым налыт. Вет тудо «чот чаманыше да поро» (Иак. 5:11). Илалше апостол Иоанн шке иза-ака-влак дене лачак тыге шкем кучен. Тудо возен: «Икшывем-влак, те языкым ида ыште манын, тидым тыланда возем. А иктаж-кӧ языкым ышта гын, Ача ончылно арален ойлышына уло: чын ыштыше Иисус Христос» (1 Иоан. 2:1).

20. Пытартыш статьяште мом шымлена?

²⁰ Чаманаш логалеш, но южгунам христиан огеш ӧкынӧ. Тунам тудо погынымаште кодын огеш керт. Тыгай ситуацийыште кугурак иза-влак мом ыштат? Тидын нерген пытартыш статьяште мутланена.