1. Айдемын ӧкынымыжӧ кушеч коеш?

 КУНАМ ме удам ыштена, мыланна ӧкынаш чотак кӱлешан. Библий дене келшышын, ӧкынен, айдеме мом ыштымыжлан чамана, удам ышташ чарна да йоҥылышыжым угыч ыштыме деч кораҥеш. («Словарьыште» «Раскаяние» статьям ончыза.)

2. Молан кажныжлан палаш кӱлеш, мо тыгай ӧкынымаш? (Неемия 8:9—11).

² Кажне айдемылан палаш кӱлеш, мо тыгай ӧкынымаш. Молан? Молан манаш гын, ме чыланат кажне кечын сулыкым ыштена. Ме Адам ден Еван тукымжо улына, да сулык ден колымаш мемнан гыч кажныжлан куснен (Рим. 3:23; 5:12). Апостол Павел гай пеҥгыде ӱшанымашан еҥ-влакат сулык дене кучедалыныт (Рим. 7:21—24). Ончыкта мо тиде, пуйто сулыкна-влак верч ме куанен илен огына керт? Уке. Иегова чаманыше да тудо мемнам пиаланым ужнеже. Неемиян кечылаштыже илыше еврей-влакын примерыштым ончен лектына. (Неемия 8:9—11 лудын лекса.) Нуно ондак ыштыме сулык-влак верч ынышт ойгыро манын, Иегован кумылжо лийын. Тудлан куанен служитлымыштым тудо ужнеже ыле. Иегова пала: ӧкынымаш куанаш полша. Сандене тудо умылтара, мо ӧкынымашыш пура. Сулыкым ыштымылан ӧкынена гын, пеҥгыдын ӱшанен кертына: чаманыше Ачана мемнам проститла.

3. Тиде статьяште мом лончылен налына?

³ Тиде статьяште ме ӧкынымаш нерген шукырак мутланен налына. Эн ончыч ме лончылен налына, Иегова израильтян-влакым ӧкынымаш шотышто мо́лан туныктен. Вара ончалына, кузе Иегова сулыкым ыштыше еҥ-влаклан ӧкынаш полшен.  Эше мутланен налына, Иисус тунемшыж-влакым ӧкынымаш шотышто мо́лан туныктен.

ИЕГОВА ИЗРАИЛЬТЯН-ВЛАКЫМ ӦКЫНЫМАШ ШОТЫШТО МО́ЛАН ТУНЫКТЕН?

4. Иегова Израиль калыкым ӧкынымаш нерген мо́лан туныктен?

⁴ Кунам Иегова Израиль калыкым чумырен, тудо израильтян-влак дене сугыньым ыштен. Нуно Юмын законжо-влакым колыштыт ыле гын, тудо нуным арала да суапландара ыле. Иегова калыкшым ӱшандарен: «Таче пуымо мыйын кӱштымашым тыланда шукташ йӧсӧ огыл» (Втор. 30:11, 16). Но израильтян-влак Юмо ваштареш шогалыт ыле гын, мутлан, моло юмо-влаклан кумалаш тӱҥалыт ыле гын, тудо нуным суапландарымым чарна ыле да нуно орланат ыле. Но тиде огеш ончыкто, пуйто Иегова нунын деч тӱрыснек кораҥын. Нуно Иегова дек пӧртылын да тудым колыштын кертыныт (Втор. 30:1—3, 17—20). Вес семынже, нуно ӧкынен кертыныт. Тунам Иегова нунын дек пӧртылеш ыле да нуным угыч суапландара ыле.

5. Кузе Иегова чытымашым ончыктен, кунам калыкше тудым колыштын огыл? (2 Царей 17:13, 14).

⁵ Иегован калыкше тудын ваштареш шуко гана шогалын. Израильтян-влак идол-влаклан кумалыныт. Но тыгак эше нуно моло шучко пашам ыштеныт. Могай лектышыже лийын? Нуно орланеныт. Но Иегова шке калыкшылан тудлан угыч служитлаш полшен. Тудо израильтян-влак деке пророк-влакым угыч да угыч колтен. Тыге тудо нуным ӧкынаш да тудын деке пӧртылаш таратынеже ыле. (2 Царей 17:13, 14 лудын лекса.)

6. Иегова пророкшо-влак гоч калыкшым ӧкынаш кӱлмӧ нерген кузе туныктен? (Тыгак сӱретым ончыза.)

⁶ Иегова калыкшым шижтараш да тӧрлаташлан чӱчкыдын пророк-влакым колтен. Мутлан, Иеремия возен: «„‚Пӧртыл, изменым ыштыше Израиль‘, — ойла Иегова“. „‚Мый тендан ӱмбак шыдешкен ончаш ом тӱҥал, вет мый ӱшанле улам‘, — ойла Иегова“. „‚Мый курымеш ом шыдешке. Титакан улметым признатле, вет тый Иегова Юмет ваштареш шогалынат‘“» (Иер. 3:12, 13). Иоиль гоч Юмо каласен: «Мый декем уло шӱм  дене пӧртылза» (Иоиль 2:12, 13). Исайя гоч Иегова кумылаҥден: «Эрыкталтса, мый дечем осал пашада-влакым кораҥдыза, осалым ышташ чарныза» (Ис. 1:16—19). А Иезекиильлан Юмо теве мом возаш кӱштен: «„Сулыкан еҥын колымыжо мыйым куандара мо? — ойла Кӱшылсӧ Господь Иегова. — Уке, тудо корныжым кодыжо да илыже манын тыланем!“ „Мыйым иктынат колымыжо огеш куандаре... Сандене сулыкым ышташ чарныза да илыза“» (Иез. 18:23, 32). Еҥ-влакын ӧкынымыштым ужын, Иегова чот куана, вет нуно курымеш илышт манын, тудын кумылжо уло. Тыгела, Юмо сулыкым ыштыше-влаклан полшашлан огеш вучо, кунам нуно ӧкынат. Ончалына эше икмыняр примерым, кудышт тидым пеҥгыдемдат.

7. Иегова шке калыкшым Осия пророкын да тудын ватыжын примерышт гыч мо́лан туныктынеже ыле?

⁷ Ончалза, мо́лан Иегова шке калыкшым Осия пророкын да Гомерь ватыжын примерышт гыч туныктынеже ыле. Гомерь марийжылан ӱшанле лиймым чарнен, вес пӧръеҥ-влак дене яжарланаш тӱҥалын да марийжым коден каен. Тудо вашталтын кертын мо? Айдемын шӱмжым ужын моштышо Иегова Осиялан каласен: «Кузе Иегова шке калыкшым йӧрата, кеч тудо моло юмо-влаклан кумалеш... тыге тый ватетым угыч йӧратен нал, кудыжо тыланет ӱшанле огыл да кудыжым вес айдеме йӧрата» (Ос. 3:1; Прит. 16:2). Ончалза, тунам Осиян ватыже сулыкым ыштымым чарнен огыл. Туге гынат Иегова пророклан тудым проститлаш да мӧҥгеш шкеж дек пурташ каласен a. Тидын семынак Юмо ӱскырт калыкше деч кораҥын огыл. Израильтян-влак шучко языкым ыштеныт гынат, Юмо нуным алят йӧратен. Тудо нунылан ӧкынаш да вашталташ полшашлан пророк-влакым колтеден. Тиде пример ончыкта: Иегова кугу сулыкым ыштен шогышо айдемын шӱмжым шымла да тудлан ӧкынаш полша (Прит. 17:3). Айста тидын нерген шукырак пален налына.

КУЗЕ ИЕГОВА СУЛЫКЫМ ЫШТЫШЕ-ВЛАКЛАН ӦКЫНАШ ПОЛША

8. Каинлан ӧкынаш полшашлан Иегова мом ыштен? (Тӱҥалтыш 4:3—7). (Тыгак сӱретым ончыза.)

⁸ Каин Адам ден Еван эн кугу эргышт лийын. Тудлан ача-аваж деч сулык куснен. Но тудо уда кумылжым чарен огыл да тиде уда паша дек конден (1 Иоан. 3:12). Очыни, теве молан «Каин да тудын надырже... [Иеговалан] келшен огыл». Вашталтме олмеш «Каин тидлан чот шыдешкен, чурийжат вашталтын». Мом Иегова тиде ситуацийыште ыштен? Тудо Каин дене мутланен налын. (Тӱҥалтыш 4:3—7 лудын лекса.) Теве мом шотыш налза: Иегова тудын дене порын мутланен да порым ыштет гын, тыйым суапландарем манын каласен. Тыгак Юмо Каиным сулыкын лектышыже нерген шижтарен. Но чаманаш логалеш, тудын колыштмыжо шуын огыл. Иегова Каинлан ӧкынаш полшаш тыршен. А Каин тудын полшымыжым кораҥден. Шоналтен мо Иегова, пуйто тидын деч вара нигӧланат ӧкынаш полшаш ок тӱҥал? Уке!

9. Кузе Иегова Давидлан ӧкынаш полшен?

⁹ Иегова Давид кугыжам чот йӧратен. Тудо эсогыл Давидым «шӱмемлан келшыше пӧръеҥ» манын (Ап. паш. 13:22). Но Давид кугу сулык-влакым ыштен: яжарланен да еҥым пуштын. Моисейын закон почеш тудым пушташ кӱлын (Лев. 20:10; Чис. 35:31). Но Иегова Давидлан ӧкынаш полшынеже ыле b. Тудо  Давид деке Нафан пророкшым колтен, кеч Давид тунам эше ӧкынен огыл. Кугыжан шӱмжым тарваташлан Нафан туштен каласымашым кучылтын. Давид умылен налын, могай шӱм корштымашым Иеговалан конден, да ӧкынен (2 Сам. 12:1—14). Тудо псаломым возен, кудыж гыч коеш, мыняр чот тудо ыштымыж верч ойгырен (Пс. 50, тӱҥалтыш мут). Тиде псалом сулыкым ыштыше шуко еҥым лыпландарен да ӧкынаш таратен. Иегова Давидым йӧратен да тудлан ӧкынаш полшен. Тидлан ме чот куанена.

10. Иегова мемнан дене чытыше да мемнам проститла манын пален, мом те шижыда?

¹⁰ Иегова кеч-могай сулыкым ужмышудымо (Пс. 5:5, 6). Но Иегова мемнам йӧрата да кунам ме сулыкым ыштена, тудо мыланна полшынеже. Тудо кугу сулыкым ыштыше-влакланат ӧкынаш да тудын йолташыже лияш полшаш эре тырша. Тиде мемнам чот лыпландара. Кунам ме Иегован чытымашыже да проститлымыже нерген шонкалена, ме эше чотрак ӱшанле коднена да, сулыкым ыштена гын, вашкерак ӧкынаш кумылна лектеш. А ындыжым айста ончен лектына, мо́лан Иисус тунемшыж-влакым ӧкынымаш шотышто туныктен.

ИИСУС ТУНЕМШЫЖ-ВЛАКЫМ ӦКЫНЫМАШ ШОТЫШТО МО́ЛАН ТУНЫКТЕН?

11, 12. Ачаже проститлаш йӧрата манын ончыкташлан Иисус могай туштен каласымашым кучылтын? (Сӱретым ончыза.)

¹¹ Мемнан эран икымше курымышто Мессий толшаш ыле. Кузе кодшо статьяште палемдалтын, Иегова тынеш пуртышо Иоаннлан да Иисус Христослан еҥ-влакым туныкташ кӱштен, мыняр чот ӧкынаш кӱлеш (Матф. 3:1, 2; 4:17).

¹² Мландыште илымыж годым Иисус еҥ-влаклан Ачаже проститлаш йӧрата манын каласкален. Моткоч сайын Иисус тидым йомшо эрге нерген туштен каласыме гоч палдарен. Ик самырык пӧръеҥ икмыняр жап яжар илышым вӱден. Но вара тудо йоҥылыш лиймыжым умылен да мӧҥгыш пӧртылын. Кузе ачаже тудым вашлийын? Иисус каласен: «Эше тораште улмыж годымак ачаже тудым ужын да чаманен, ваштарешыже куржын миен, шӱйжӧ гыч ӧндалын да шупшалын». Ачаже тудым проститла манын, эрге шоненат  огыл. Садлан тудын пӧртыштыжӧ пашазе лияш йодын. Но ача тудым «эргым» манын да ешышкыже угыч пуртен да каласен: «[Тудо] йомын ыле, ынде мумо» (Лук. 15:11—32). Мландыш толмо деч ончыч Иисус, мутат уке, шуко гана ужын, кузе тудын Ачаже сулыкым ыштыше, но вара ӧкынышӧ-влакым чаманен. Тиде каласкалымаш мемнам чот лыпландара да ончыкта, мыняр чот чаманыше Иегова Ачана.

13, 14. Ӧкынымаш шотышто апостол Петр мом пален налын да весе-влакым мо́лан туныктен? (Тыгак сӱретым ончыза.)

¹³ Апостол Петр Иисус деч ӧкынымаш да проститлымаш шотышто шукылан тунемын. Петр чӱчкыдын йоҥылышым ыштен, но Иисус тудым уло кумылын проститлен. Мутлан, Петр Иисус нерген тудым ом пале манын кум гана каласен, а тидын деч вара мом ыштымыжлан чот ойгырен (Матф. 26:34, 35, 69—75). Но ылыжмеке, Иисус Петр дене вашлиялтын (Лук. 24:33, 34; 1 Кор. 15:3—5). Мутат уке, ту вашлиймаш годым Иисус ӧкынышӧ апостолжым проститлен да йӧратымаштыже ӱшандарен. (Маркын 16:7 да «Тунемме Библийыште» «И Петру» комментарийым ончыза.)

¹⁴ Петрын ӧкынымаш да прощенийым налме шотышто опытшо лийын. Сандене тудо весе-влакым тидлан туныктен кертын. Икмыняр жап эртымеке, Витлыгече пайрем годым Петр еврей-влак ончылно ойлымаш дене лектын да нуно Мессийым пуштыныт манын умылтарен. Туге гынат тудо нуным порын таратен: «Языкда проститлыме лийже да Иегова тыланда тынысым пуыжо манын, ӧкыныза да вашталтса» (Ап. паш. 3:14, 15, 17, 19, УТ). Тидым каласыме дене Петр палдарен: ӧкынымаш сулыкым ыштыше еҥым вашталташ тарата — вес семынже, уда шонымаш-влакым, паша-влакым кодаш да тыгайым ышташ тӱҥалаш, мо Юмым куандара. Эше апостол теве мом каласен: Иегова сулык-влакым тӱрыснек ӱштеш да нунын  деч нимат огеш код. А шуко ий эртымеке, Петр христиан-влаклан возен: «Господь... мемнан шотышто чытымашым ончыкта. Иктынат пытымыжым Тудо ынеж уж, а чылан языкыштым касарыктышт... манын шона» (2 Пет. 3:9). Сулыкым ыштыше-влакым — эсогыл кугу сулыкым ыштыше-влакым — тиде чот лыпландара!

15, 16. a) Кузе апостол Павел пален налын, мо тыгай проститлымаш? (1 Тимофейлан 1:12—15). б) Мом ме вес статьяште лончылен налына?

¹⁵ Тарс гыч Савл шуко осалым ыштен. Тудо Христосын тунемшыже-влакым чот поктылын. Христиан-влак гыч шукышт, очыни, шоненыт, пуйто тиде айдемым вашталташ уже ок лий да тудо нигунамат огеш ӧкынӧ. Но Иисус пален: Савл вашталтын да ӧкынен кертеш. Тудо да Ачаже Савлын сай койышыж-влакым ужыныт. Иисус каласен: «Тиде айдеме — Мыйын ойырен налме ате» (Ап. паш. 9:15). Тудо Савллан ӧкынаш полшашлан чудымат ыштен (Ап. паш. 7:58—8:3; 9:1—9, 17—20). Христиан лиймеке, Савл — варажым апостол Павел семын палыме — чӱчкыдын ойлен, мыняр чот тудо Иеговалан да Иисуслан тауштышо улеш, вет нуно тудын дене поро да чаманыше лийыныт. (1 Тимофейлан 1:12—15 лудын лекса.) Тауштышо апостол иза-ака-влаклан палдарен: Юмо поро, садлан нунылан ӧкынаш полшынеже (Рим. 2:4).

¹⁶ Коринфысе погынымаште ик яжарланыше христианым тӧрлатен огытыл. Тидын нерген колмеке, Павелын могай реакцийже лийын? Тудо саде погынымашлан кӱштымаш-влакым пуэн, кудышт гыч ме Иегова нерген шуко пален налына. Кунам Юмо наказатла, тидым йӧратымаш дене ышта да, айдеме ӧкына гын, тудлан порылыкым да чаманымашым ончыкта. Мыланнат поро да чаманыше лийман. Вес статьяште ме Коринфысе погынымаште лийше ситуацийым келгынрак лончылен налына.