Апостол Павел Фессалоникыште илыше христиан-влаклан возен: «Тиде серышыште возымынам иктаж-кӧ ок колышт гын, тудым шкаланда палемдыза» (2 Фес. 3:14). Ончыч тиде почеламутышто кугурак иза-влаклан виктарымашым возымо манын шоненна. Иктаж-кӧлан икмыняр гана Библий почеш каҥаш пуымо лийын да тудо библийысе принцип-влакым кучылтын огыл гын, кугурак иза-влак погынымаш ончылно шекландарыше ойлымаш дене лектын кертыныт. Тиддеч вара иза-ака-влак саде айдеме дене йолташ семын жапым эртарымым чарненыт.

Но кызыт ме 2 Фессалоникысе-влаклан 3:14 почеламутым вес семын умылена. Павел тӱрлӧ ситуацийыште иза-ака-влакын шке лукмо решенийышт нерген каласен. Сандене кугурак иза-влаклан шекландарыше ойлымаш дене лекман огыл. Молан тыгай вашталтмаш кӱлын? Ончалына, мо нерген Павел тиде ужаште ойлен.

Фессалоникысе погынымаште южышт «шот деч посна иленыт» манын, Павел возен. Нуно Юмын шӱлыш ден кумылаҥдыме кӱштымаш-влакым колыштын огытыл. Фессалоникыште кодшо гана лиймыж годым Павел шӱден: «Кӧ пашам ынеж ыште, тудо ынже коч». Но южыштын садак шке кӱлешлыкым ситарашлан пашам ыштымышт шуын огыл, кеч тидым ыштен кертыныт. Тыгак нуно вес еҥын пашашкыже шӱшкылтыныт. Тыгай-влак дене христиан-влаклан кузе шкем кучаш кӱлын? (2 Фес. 3:6, 10—12).

«Тудым [тыгай айдемым] шкаланда палемдыза», — каласен Павел. «Палемдыза» кусарыме грек мут тыгай айдеме дене тӱткӧ лияш кӱлеш манын ончыктен. Павел тиде кӱштымашым кугурак иза-влаклан гына огыл, а чыла погынымашлан пуэн (2 Фес. 1:1; 3:6). Сандене иктаж-могай христиан Библий почеш пуымо каҥашым огеш колышт да шкенжым кӱлеш семын огеш кучо манын, иза-ака-влак ужыныт гын, нунын гыч кажныже тудын дене кылым кучаш огыл шке решенийым луктын кертын.

Тыгай айдеме погынымаш гыч кораҥдыме айдеме гай лийын манын, тиде ончыктен мо? Уке. Вет Павел ешарен: «Тудым... иза-шольым тӧрлымӧ семын шижтарыза». Сандене иза-ака-влак тудын дене вашлиймаште да таныклыме годым мутланен кертыныт. Но тыгай айдеме дене пырля яра жапым эртараш да пырля канаш огеш кӱл ыле. Молан? Тудым «вожылтараш манын», Павел каласен. Тудын дене йолташ семын нигӧ жапым огеш эртаре манын ужмеке, тыгай христиан шкенжым удан кучымылан кӧра намысым шижын да вашталт кертын (2 Фес. 3:14, 15).

Кызыт христиан-влаклан тиде виктарымашым кузе кучылтман? Эн ончыч пален налман: чынжымак мо айдеме «шот деч посна» ила? Павел тыгай иза-ака-влак нерген ойлен огыл, кӧ совесть почеш але шке кумылжо почеш лукмо решений шотышто мемнан деч ойыртемалтеш. Тыгак, кӧ мыланна шӱм корштымашым конден, нунын нерген Павел ойлен огыл. Павел тыгай иза-ака-влак нерген каласен, кӧ Библий почеш пуымо раш кӱштымаш-влакым колыштын огыл.

Иза але ака Юмын Мутшо гыч каҥаш-влакым огеш колышт a манын ужына гын, мыланна вучаш огеш кӱл, кунам иктаж-кӧ каласа: «Тудын дене пырля яра жапым ит эртаре да ит кане». Тыгай решенийым ме шке луктына. Тиде мемнан гына решений. Тугеже весе-влак дене тидын нерген мутланышаш огынал, шке еш коклаште гына. Но тыгай айдеме дене ме умбакыжат вашлиймаш годым мутланена да пырля таныклаш коштына. А кунам тудо шкенжым вашталта, ме тудын дене ончычсо семынак кылым кучена.