Мый 1955 ийыште шочынам да кум эрге гыч эн изиже лийынам. Ме Финляндийын кечывалвел могырышто кушкынна. Тушто кызыт Ва́нтаа ола верланен.

Шочмем деч икмыняр ий ончыч авам тынеш пурен да Иегован Таныкше лийын. Но ачамлан тиде чотак келшен огыл. Тудо авамлан мемнан дене пырля шымлаш да мемнам вашлиймашыш налаш чарен. Сандене авай мемнам Библийлан тунам туныктен, кунам ачана воктенна лийын огыл.

Мый изинекак Иеговам колышташ шонен пыштенам. Мутлан, икана 7 ияш годым мый школышто ве́рилятютым (вӱр дене ыштыме мелнам) ынем коч ыле. Туныктышем тидлан чотак шыдешкен да мыйым вийын пукшынеже ыле. Умшамым почашлан тудо ик кидше дене шӱргемым кучен, а вес кидыштыже мелна дене вилкым кучен. Но мый кидше гыч вилкыжым перен шуэн кертынам.

12 ияш лиймем годым ачам колен. Тидын деч вара мый вашлиймашыш коштын кертынам. Погынымаш гыч иза-влак мыланем шуко вниманийым ойыреныт. Тиде мыланем Иегова деке лишемаш полшен. Мый Библийым кажне кечын лудаш да публикацийна-влакым тыршен шымлаш тӱҥалынам. Йӧра мый тиде сай привычке-влакым куштенам. Тидлан кӧра мыйын тынеш  пураш кумылем лектын, да мый тидым 1969 ийын 8 августышто ыштенам. Тунам мый 14 ияш лийынам.

Школым тунем лекме деч вара вашке мый эрелык пионер семын служитлаш тӱҥалынам да икмыняр арня гыч Финляндийын Пи́елавеси олашке служитлаш кусненам. Тушто уверзе-влакын полышышт кӱлын.

Пиелавесиште мый шергакан Си́рккам вашлийынам. Мый вигак тудын тыматле улмыжым да Иеговам чот йӧратымыжым ужынам. Тудо шкаланже чапым да поянлыкым кычалын огыл. Мемнан когыньнан, кеч-кушто да кеч-могай заданийым шуктен, Иеговалан уло вийын служитлымына шуын. 1974 ийын 23 мартыште ме мужыраҥынна. Сӱан деч вара пырля каныме олмеш ме Ка́рттула изи олаш служитлаш куснышна. Тушто эше шукырак уверзе кӱлын.

Иегова сӱан деч вара вигак ончыктен: ме тудын Кугыжанышыжым икымше верыш шындена гын, тунам илышлан чыла кӱлешан лиеш (Матф. 6:33). Мутлан, Карттулаште мемнан машина лийын огыл. Эн ончыч ме велосипед ден коштынна, но телым тушто чотак йӱштӧ. Погынымашын кумда территорийыштыже таныклашлан мыланна машина кӱлын. Но тудым налашлан мемнан окса лийын огыл.

Вучыдымын мемнан дек мыйын изам толын да мыланна машинажым коден. Страховко уже тӱлымӧ лийын. Мыланна топливым гына налаш кӱлын. Ындыжым мемнан машина лийын.

Иегова раш ончыктен: тудо мыланна материальный шотышто полшаш тӱҥалеш. А мыланна тудын Кугыжаныш пашажым икымше верыш шындаш кӱлын.

Кунам 1978 ийыште ме Пионер-влаклан школышто тунемынна, ик туныктышо, Ра́ймо Куо́кканен a, Галаад школышто тунемашлан заявленийым возаш мемнам таратен. Сандене ме англичан йылмым тунемаш тӱҥалынна. Но 1980 ийыште, анкетым эше возымо деч ончыч, мемнам финн филиалыште служитлаш ӱжыныт. Ту жапыште Вефильыште служышо-влакым Галаадыш ӱжын огытыл. Но ме Иеговалан ӱшаным пыштенна: тек тудо решитла, кушто ме чотрак кӱлына. Сандене ме Вефильыш кусненна. Но тунамак англичан йылмым тунеммым чарнен  огынал. Ме шоненна: трук мемнан ончыкыжым Галаадыште тунемаш йӧн лектеш.

Икмыняр ий гыч Вуйлатыше совет Вефильыште служышо-влаклан Галаадыште тунемаш йӧным почын. Ме вигак анкетым возенна. Но тиде ончыктен огыл, пуйто мыланна Вефильыште служитлаш келшен огыл. Уке, чотак келшен! Иеговалан тушто служитлымына шуын, кушто мемнан деч шукырак пайда лиеш ыле. Мемнам Галаадын 79-ше классышкыже ӱжыныт. 1985 ийын сентябрьыште ме тунем лектынна, да мемнам Колумбийыш колтеныт.

Колумбийыште ме эн ончыч Вефильыште служитленна. Мый заданийым уло вийын шукташ тыршенам. Но ик ий гыч назначенийнам алмашташ йодынам. Тыгайым мый иза-влак деч илышыштем ик гана веле йодынам. Мемнам Уи́ла регионысо Не́йва олашке миссионер семын колтеныт.

Мыланем таныклаш эре келшен. Финляндийыште пионер лийме годым мый южгунам эр гыч тӱҥалын пычкемыш кас марте служитленам. Сиркка дене мужыраҥме деч вара ме тыгак кечыгут служитленна. Торасе территорийыште служитлыме годым южгунам ме машинаштак маленна. Тунам вес кечын корнышто жапым эртараш кӱлын огыл да ме эр гыч тӱҥалын служитлен кертынна.

Миссионер служитлымаш Иеговалан служитлаш кумылым угыч ылыжтен, кудыжо кӧргыштына пионер лийме годым тул семын йӱлен. Погынымашна кушкын, да иза-ака-влак коклаште пагалымаш, йӧратымаш да тауштымаш лийын.

Нейва воктенысе ола-влакыште ик Таныкат лийын огыл. Мый чот тургыжланенам, кузе тиде кундемыште еҥ-влак поро уверым колыт. Партизан-влак верч тышке толшо-влаклан лӱдыкшӧ лийын. Сандене тушто илыше-влак гыч иктаж-кӧжӧ Иегован Таныкше лийже манын кумалынам. Мый шоненам: чыным пален налашлан тыгай айдеме Нейвыште илышаш. Тудо тынеш пурымо деч вара духовный шотышто пеҥгыде лийже да шочмо олашкыже таныклаш пӧртылжӧ манын кумалынам. Но Иегован сайрак решенийже лийын улмаш.

Шукат эртен огыл, мый Ферна́ндо Гонса́лес лӱман ик рвезе дене Библийым шымлаш тӱҥалынам. Тудо Альхеси́расыште илен, кушто Танык-влак лийын огытыл. Фернандолан пашашке Нейва олаш 50 километрым кудалышташ логалын. Тудо кажне шымлымашлан сайын ямдылалтын да кажне вашлиймашыш вигак кошташ тӱҥалын. Шымлаш тӱҥалме икымше арня гыч Фернандо шочмо олаште илыше-влакым пырля поген да, мо́лан тудо шкеже тунемын, тидлан нуным туныктен.

Шымлаш тӱҥалме деч вара куд тылзе эртымеке, Фернандо 1990 ийын январьыште тынеш пурен. Вара тудо эрелык пионер семын служитлаш тӱҥалын. Тыге Альхеси́расыште верысе Танык лийын. Сандене тушко спецпионер-влакым колташ лӱдыкшӧ лийын огыл да филиал тидымак ыштен. 1992 ийын февральыште ту олаште погынымаш чумырымо лийын.

Фернандо шочмо олаштыже гына таныклен мо? Уке. Ӱдырым налме деч вара тудо Ольга лӱман ватыж дене Сан-Висе́нте-дель-Кагуа́ныш, кушто ик Таныкат лийын огыл, служитлаш  куснен. Тушто нуно погынымашым чумыраш полшеныт. 2002 ийыште Фернандом районым эскерыше изалан шогалтеныт, да тудо ватыж дене районым эскерымаш пашаште кызытат тырша.

Фернандо дене лийше случай мыйым шукылан туныктен. Мый умылен налынам, мыняр чот кӱлешан Иеговам полыш нерген раш йодаш. Иегова тыгайым ыштен кертеш, мом ме шке вийна дене ыштен она сеҥе, вет лектышын Озаже ме огыл, а тудо (Матф. 9:38).

1990 ийын мыланна районым эскерымаш пашам ӱшанен пуэныт. Икымше районна Богота́ рӱдӧ олаште лийын. Ме тиде заданийым шуктен она керт манын лӱдынна, вет ме ватем дене проста айдеме улына — ала-могай ойыртемалтше талантан огынал да кугу олаште илаш тунем огынал. Но Иегова Филиппысе-влаклан 2:13, УТ почеламутышто возымо сӧрымашым шуктен. Тушто возымо: «Юмо — тыланда вийым пуышо памаш, тудо тыланда ышташ кумылымат, вийымат пуа, тидым тудо шке кумылжо почеш ышта».

Варажым служымаш территорийна Медельин ола лийын. Лачак тиде ола нерген мый ончычрак ойленам. Тусо еҥ-влакым уремыште лийше преступность йӧршынак ӧрыктарен огыл. Икана Библий шымлымым эртарыме годым пӧрт воктене лӱйкалымаш тӱҥалын. Мый уже кӱварыш возаш ямде лийынам, но шымлыше пӧръеҥ лӱдын колтенат огыл да абзац лудмым умбакыже шуен. Лудын пытарымекыже, тудо нелеш ида нал манын каласен да уремыш лектын. Ик жап гыч тудо кок изи эргыж дене пӧртылын да тыматлын каласен: «Вуеш ида нал, мыланем йоча-влакемым пӧртыш пурташ кӱлын».

Мемнан вес лӱдыкшӧ ситуаций-влакат лийыныт. Икана ме пӧрт еда таныкленна. Трук Сиркка мый декем лӱдшӧ чурий дене куржын толын. Мыйым кызыт гына лӱяш тӧченыт манын каласен. Мый чот лӱдын колтенам. Но вара ме пален налынна: Сирккам огыл, а тудын воктене кайыше пӧръеҥым пуштнешт ыле улмаш.

Жап эртымеке, ме тыгай илышлан тунемынна. Мемнам чот кумылаҥден верысе Танык-влакын лӱддымылыкышт, кудышт эше ударак ситуаций-влак дене тӱкненыт. Ме тыге шоненна: Иегова нунылан полша гын, мыланнат полшаш тӱҥалеш. Ме эре верысе кугурак иза-влакын каҥашышт почеш ыштенна, тӱткӧ лийынна, а молыжым Иегован кидышкыже пуэнна.

Таныклыме годым оҥай случай-влакат лийыныт. Мутлан, икана мый колынам, кузе урем гыч кычкырыме йӱк шоктыш. Кок ӱдырамаш вурседылеш манын шоненам. Тидым йӧршынак ончымем шуын огыл. Но озавате мыйым кудывечыш лекташ таратен. Тиде «вурседылмашым» кок попугай тарватен улмаш, кудышт пошкудо ӱдырамаш-влакын йӱкышт дене кычкыреныт.

1997 ийыште мыйым Служенийым саемдымашлан школышто туныктышылан шогалтеныт b. Мыланем тӱрлӧ теократический  школышто тунемаш эре келшен. Но иктаж-кунам ик тыгай школышто туныктышо лиям манын шоненат омыл.

Вара мыланем областной пашам ӱшанен пуэныт. Кунам тиде паша чарыме лийын, мый районым эскерымаш паша дек пӧртылынам. Лектеш, мый туныктышо да районым эскерыше иза семын 30 ий утла служитлем. Тиде жапыште мыйын шуко суапландарымаш лийын. Но тиде корнышто эре куштылго лийын огыл. Мый кызыт умылтарем, мом каласынем.

Мый шкеже пеҥгыде койышан айдеме улам. Тиде мыланем нелылыкым чыташ полша. Но южгунам погынымаш-влакыште весе-влакым тӧрлатымаште мый утыждене тыршенам. Шарнем, кузе икана иза-влакым йӧратыше да лывырге лияш чот таратенам. Но ту жапыште вес айдемын шинчаж дене шке ӱмбак ончалам ыле гын, умылем ыле: кӧлан йӧратымаш чынжымак ситен огыл — тиде мыланем (Рим. 7:21—23).

Южгунам йоҥылыш-влак верч кумылем чотак волен (Рим. 7:24). Икана мый Иеговалан каласенамак: «Мыланем лучо миссионер служымашым кошарташ да Финляндийыш пӧртылаш». Ту кастене вашлиймаш лийын. Мый шке верыштак улам манын, Иегова тиде вашлиймаш гоч мыйым ӱшандарен: мыланем кодаш да койышым умбакыжат вашталташ тыршаш кӱлеш. Мыйын шӱмемым чот тарватен, кузе Иегова кумалмемлан раш вашмутым пуэн. Мый тидым але марте шарнем. Иеговалан кугу тау, вет тудо порын да чытышын мыланем уда койыш-влак дене кучедалаш полша.

Ме Сиркка дене Иеговалан чот тауштышо улына, вет тудо мыланна кечыгут служымаште шуко ий тыршаш йӧным пуэн. Тыгак мый Иеговалан кугу таум ойлем йӧратыше да ӱшанле ватемлан, кудыжо мыланем ӱмыр мучко полшен шога.

Вашке мый 70 ийым темем, сандене туныктышо да районым эскерыше иза семын служитлымым чарнем. Но мый тидын верч ом тургыжлане. Молан манаш гын, пеҥгыдын ӱшанем: Иегова ӱҥышын да уло шӱмын служитлымынам чот акла. Тудын шӱмжӧ чот куана, кунам тудо йӧратымашнам да тауштымашнам ужеш (Мих. 6:8; Мар. 12:32—34). Назначенийым шуктымо деч поснат Иеговам чапландараш лиеш.

Илышемым шарналтен, мый умылем: весе-влак деч сайрак улмемлан кӧра огыл да ала-могай ойыртемалтше моштымашлан кӧра огыл мый тӱрлӧ заданийым налынам. Иегова мыланем чыла тиде заданийым ӱшанен пуэн, молан манаш гын, тудо пеш поро Юмо. Тудо мыланем, уда койышем-влакым ончыде, чыла тидым ӱшанен пуэн. Мый палем: заданием-влакым Иегован полшымыж дене гына шуктен кертам. Вес семынже, кунам мый вийдыме улам, тунам Юмын вийже пашажым шукта (2 Кор. 12:9).