1. Мом Иегова мемнан деч вуча?

 АЧА-АВАН илышыштышт кугу событий-влак гыч иктыже — тиде йочаштын шочмыжо. Нуно азаштым чот йӧратат гынат, тудо тугаяк изи кодшо манын да ынже куш манын, нунын шонымашыштат уке. Азашт огеш куш гын, тидын верч ача-ава чот тургыжланаш тӱҥалыт. Иеговат чот куана, кунам ме христиан корныштына икымше ошкылым ыштена. Тудын кумылжо почеш ме духовный шотышто аза семын кодшаш огынал. Тудо мемнам кушкын шушо лияш тарата (1 Кор. 3:1; 14:20).

2. Мом ме тиде статьяште лончылен налына?

² Христианын духовный шотышто кушкын шумыжо кушеч коеш? Кузе кушкын шушо христиан лияш? Духовный кушмаште пешкыде духовный кочкыш мыняр чот кӱлешан? Молан мыланна шке вийлан гына ӱшанаш огеш кӱл? Айста нине йодыш-влаклан вашмутым пален налына.

ХРИСТИАНЫН ДУХОВНЫЙ ШОТЫШТО КУШКЫН ШУМЫЖО КУШЕЧ КОЕШ?

3. Духовный шотышто кушкын шуаш мо полша?

³ Библийыште «кушкын шушо» грек мут кугу лиймым ончыкта (1 Кор. 2:6) a. Аза кугу айдеме лиймешке кушкеш. Тидын семынак мыланнат Иегова дене лишыл кыл кучымаште кушкаш  кӱлеш. Тыге ме духовный шотышто кушкын шушо лийына. Но тиде цельыш шуына гынат, мыланна саеммым чарнаш огеш кӱл (1 Тим. 4:15). Духовный шотышто кушкын шушо чылаштат, пеш самырык-влакат, лийын кертыт. Тыгай еҥ-влакым могай паша-влак палдарат?

4. Христианын духовный шотышто кушкын шумыжо кушеч коеш?

⁴ Духовный шотышто кушкын шушо христиан Юмын чыла законжым йӧрата да огеш ойыркале, могайжым шукташ, а могайжым уке. Мутат уке, тудо сулыкан улеш да йоҥылыш-влакым ышта. Туге гынат Юмым куандарашлан тудо кажне кечын шонымаш ден пашажым эскера. Тудо у айдемыш вӱдылалтын да шке шонымашыжым Юмын шонымашыжлан келыштараш тырша (Еф. 4:22—24). Решений-влакым лукмо годым тудо Иегован закон ден принципше-влакым шотыш налеш. Сандене тудлан шуко правил огеш кӱл. Лукмо решенийже почеш ышташлан тудо уло вийым пышта (1 Кор. 9:26, 27).

5. Духовный шотышто кушкын шудымо христиан дене мо лийын кертеш? (Ефесян-влаклан 4:14, 15).

⁵ Христиан духовный шотышто кушкын шуын огыл гын, тудым ондалаш йӧсӧ огыл. Тудо шоя уверлан, манеш-манешлан да отступник-влакын ойлымыштлан ӱшана b. (Ефесян-влаклан 4:14, 15 лудын лекса.) Тудо кӧрана, весе-влак дене тынысыште илен огеш мошто, ӧпкем куча, да тудлан алгаштарымашлан ваштареш шогаш йӧсӧ (1 Кор. 3:3).

6. Тыглай да духовный кушмаш мо дене икгай улыт? (Тыгак сӱретым ончыза.)

⁶ Кузе уже палдарыме лийын, Библий духовный кушмым тыглай кушмо дене таҥастара. Йочалан илыш опыт огеш сите. Сандене ача-аваже тудым аралышаш да мом тудлан ышташ ойлышаш улыт. Мутлан, корным вончымо годым ава изи ӱдыржым кидше гыч куча. Ӱдырын кугурак лиймекыже, ава тудым шкет колташ тӱҥалеш, но тунамак тӱткӧ лияш кӱлмӧ нерген шарныкта. Кушкын шумеке, ӱдыр уже шкеже пала, кузе эҥгекыш логалде корным вончаш. Духовный шотышто кушкын шудымо христиан-влак йоча-влакым шарныктат. Нунылан чӱчкыдын Юмын кушкын шушо служитлышыже-влакын полышышт кӱлеш. Тыгай полшымо деч посна нунылан духовный лӱдыкшӧ деч кораҥаш да уш-акылан решений-влакым лукташ йӧсӧ.  Нине христиан-влак дене таҥастарымаште кушкын шушо христиан-влак библийысе принцип-влак нерген шонат, Иегован шонымыжым палаш тыршат, а вара, чыла тидым шотыш налын, решений-влакым луктыт.

7. Духовный шотышто кушкын шушо христиан-влаклан весе-влакын полышышт кӱлеш мо?

⁷ Ончыкта мо тиде, пуйто духовный шотышто кушкын шушо христианлан полыш йӧршынак огеш кӱл? Уке. Тудат каҥашым йодын кертеш, но весе-влак тудлан мом ыштышашым ойлаш да тудын олмеш решенийым лукташ тӱҥалыт манын огеш вучо. Духовный шотышто кушкын шушо христиан умыла: лукмо решенийжылан тудо шке мутым куча да «шке нумалтышыжым» наҥгая (Гал. 6:5).

8. Духовный шотышто кушкын шушо христиан-влак чылаштат икгай лийшаш улыт мо? Умылтарыза.

⁸ Кушкын шушо еҥ-влак тӱжвал тӱсышт дене икгай лийын огыт керт. Духовный шотыштат ме тӱрлӧ улына. Мемнан гыч южышт уш-акылан улыт, а весышт лӱддымӧ. Иктаж-кӧжӧ эре чаманыде пуаш ямде улеш, а иктаж-кӧжӧ весын шижмашыжым сайын умыла. Тыгак икгаяк ситуацийыште духовный шотышто кушкын шушо кок христиан тӱрлӧ решенийым луктын кертеш. Когыньыштынат решенийышт Библийлан келшен толын кертеш. Чӱчкыдын тыге лиеда, кунам христиан-влаклан совесть почеш решенийым лукташ кӱлеш. Тидым умылен, ме весе-влакым она судитле, кунам нунын лукмо решенийышт мемнан дечын ойыртемалтеш. Тидын олмеш ме шонаш тӱҥалына, мо мемнам иктеш уша (Рим. 14:10; 1 Кор. 1:10).

КУЗЕ ДУХОВНЫЙ ШОТЫШТО КУШКЫН ШУШО АЙДЕМЕ ЛИЯШ?

9. Духовный шотышто айдеме вийым пыштыде кушкын кертеш мо? Умылтарыза.

⁹ Айдемылан капын кушмыжлан вийым пышташ огеш кӱл. А теве духовный шотышто кушкашлан вийым пыштыман. Мутлан, коринфян-влак поро уверым колыныт, тынеш пуреныт да святой шӱлышым налыныт. Нуным апостол Павел туныктен (Ап. паш. 18:8—11). Туге гынат тынеш пурымышт деч вара икмыняр ий эртымеке, нунын гыч шукышт духовный шотышто кушкын огытыл (1 Кор. 3:2). Духовный кушмаште нуно шкаланышт шке чаракым шынденыт. Кузе нунын семын йоҥылышым ышташ огыл?

10. Духовный шотышто кушкын шуашлан мо кӱлеш? (Иудан 20).

¹⁰ Духовный шотышто кушкын шушо лияшлан мыланна эн ончыч тидым ышташ кумыл кӱлеш. Кӧлан опытдымо лияш келша, нуно духовный аза семын кодыт (Прит. 1:22). Ме ынена лий тыгай айдеме семын, кудыжо кушкын шумеке, алят ача-аваж деч тудын олмеш решенийым лукмым вуча. Духовный шотышто кушкашлан мемнан шкенан вийым пыштымына шуэш. (Иудан 20, 21 лудын лекса.) Мо шотышто мыланна саемаш кӱлеш умыленна гын, Иегова «кумылымат, вийымат» пуыжо манын, айста кумалына (Флп. 2:13, УТ).

11. Кузе Иегова мыланна духовный шотышто кушкаш полша? (Ефесян-влаклан 4:11—13).

¹¹ Мутат уке, духовный кушмаште ме шке гына вийым пышташ тӱҥалына манын, Иегова огеш вучо. Тидлан тудо мыланна христиан погынымаште кӱтӱчӧ ден туныктышо-влакым пуэн. Нине иза-влак мыланна «Христосын тичмашлыкше дене келшыше кӱкшытыш» шуаш полшат. (Ефесян-влаклан 4:11—13 лудын лекса.) Мемнанат Христосын гаяк ушна лийже манын, Иегова святой шӱлышым пуа (1 Кор. 2:14—16). А эше мемнан ныл Евангелий уло, кудышт гыч ме шинчымашым налына: Иисус мландыште илымыж годым кузе шонен, ойлен да ыштен. Иисус семын шонаш да ышташ тыршена гын, духовный шотышто кушкын шушо христиан лийына.

 ПЕШКЫДЕ ДУХОВНЫЙ КОЧКЫШЫН РОЛЬЖО

12. Мо тыгай «Христос нерген тӱҥалтыш шинчымаш»?

¹² Духовный шотышто кушкын шуашлан «Христос нерген тӱҥалтыш шинчымаш» дене веле, вес семынже тӱҥ христиан туныктымаш дене, серлагаш огеш кӱл. Мутлан, тыгай туныктымашыш ӧкынымаш, ӱшанымаш, тынеш пурымаш да ылыжмаш пурат (Евр. 6:1, 2, УТ). Тиде тӱҥ туныктымаш-влак гыч южышт веле, кудыштлан чыла христиан ӱшана. Теве молан апостол Петр нине туныктымаш-влак нерген ойлен, кунам Витлыгече пайрем годым таныклен (Ап. паш. 2:32—35, 38). Христосын тунемшыже лияшлан мыланна нине тӱҥалтыш туныктымаш-влаклан ӱшанаш кӱлеш. Мутлан, Павел раш умылаш полшен: ылыжмашлан она ӱшане гын, чын христиан маналтын она керт (1 Кор. 15:12—14). Духовный шотышто кушкын шумына шуэш гын, мыланна тӱҥ туныктымаш деч шукырак палаш кӱлеш.

13. Еврей-влаклан 5:14 почеламутышто палдарыме пешкыде духовный кочкыш пайдам кондыжо манын, мыланна мом ышташ кӱлеш? (Тыгак сӱретым ончыза.)

¹³ Тӱҥалтыш туныктымаш дене таҥастарымаште пешкыде духовный кочкышыш Иегован законжо-влак гына огыл, тыгак тудын шонымашыжым умылаш полшышо принцип-влакат пурат. Тыгай кочкыш мыланна пайдале лийже манын, мыланна Библийым шымлаш, лудмо нерген шонкалаш да пален налмым илышыш пурташ тыршыман. Тунам Иеговам куандарыше решений-влакым лукташ тунемына c. (Еврей-влаклан 5:14 лудын лекса.)

14. Кузе Павел коринфян-влаклан духовный шотышто кушкаш полшен?

¹⁴ Кушкын шудымо христианлан решенийым лукташ йӧсӧ лийын кертеш, кунам закон уке, а принцип-влак веле улыт. Южышт шотлат, пуйто тыгай годым шке семын ышташ лиеш. А весышт правил-влакым шындымым вучат, кеч нине правил-влак огытат кӱл. Икана Коринфысе христиан-влак Павел деч шоя юмо-влаклан надыреш пуымо кочкышым кочкаш лиеш але уке манын йодыныт. Нуно тудын деч правилым вученыт. Тидын олмеш Павел нунылан совестьын рольжо нерген да кажне айдемын эрыкше уло манын шарныктен. Тудо нунын дене икмыняр принципым лончылен налын да ончыктен, кузе, решений-влакым луктын, совесть ваштареш каяш огыл да весе-влаклан шӱртньымӧ кӱ лияш огыл (1 Кор. 8:4, 7—9). Павел  коринфян-влакым решенийым лукмо годым еҥ-влакын шонымыштым пален налме але правилым кычалме олмеш Священный Возымашым кучылташ туныктен. Тыге тудо нунылан духовный шотышто кушкын шушо христиан лияш полшен.

15. Кузе Павел еврей христиан-влаклан духовный шотышто кушкаш полшен?

¹⁵ Еврей христиан-влаклан возымо Павелын серышыштыже ме эше ик кӱлешан урокым муына. Нунын гыч южышт духовный шотышто кушмым чарненыт. Павел каласен: «Угычын... тыланда шӧр кӱлеш лийын, а пешкыде [духовный] кочкыш огыл» (Евр. 5:12). Иегова нунылан погынымаш гоч эркын-эркын у умылымашым пуэн. Но нуно тиде умылымашым илышыш пуртен огытыл (Прит. 4:18). Мутлан, еврей христиан-влак гыч шукышт Моисейын законым алят кучылтыныт, кеч Иисусын колымыж деч да законым кораҥдымыж деч вара 30 ий наре эртен (Рим. 10:4; Тит. 1:10). Келшеда докан, 30 ий жапыште умылаш лиеш ыле: закон почеш ындыжым илаш огеш кӱл! Сандене Павел иза-акаж-влаклан келге шинчымаш-влакым, кудыж нерген тудо нунылан возен, умылаш полшынеже ыле. Лач тиде саде христиан-влаклан кӱлын. Тидлан кӧра нуно умылен кертыныт: кызытсе кумалмаш ондакысе деч сайрак. Тиде нунылан, иудей-влакын шыгыремдымыштым ончыде, лӱдде таныклаш полшен (Евр. 10:19—23).

ДУХОВНЫЙ ШОТЫШТО КУШКЫН ШУШО КОДАШЛАН ВИЙЫМ ПЫШТЫЗА

16. Духовный шотышто кушкын шумеке, христианлан мом ышташ кӱлеш?

¹⁶ Мыланна духовный шотышто кушкын шушо христиан лияш гына огыл, но эше тыгаяк кодаш кӱлеш. Шонаш огеш кӱл, пуйто ме духовный шотышто уже кушкын шуынна да Иегова дене кыл кучымашым пеҥгыдемдаш огеш кӱл (1 Кор. 10:12). Мыланна эре шкенам тергаш кӱлеш, духовный шотышто ме кушкына але ик верыште шогена (2 Кор. 13:5).

17. Колоссян-влаклан возымо серыш духовный шотышто кушкын шушо кодаш кӱлмӧ нерген мом ойла?

¹⁷ Колоссян-влаклан возымо серышыште Павел угыч ойла, мыняр чот духовный шотышто кушкын шушо кодаш кӱлеш. Колоссышто христиан-влак духовный шотышто аза лийын огытыл гынат, Павел нуным тӱткӧ лияш таратен. Тидлан кӧра нуно тиде тӱнясе философий дене ондалалтдыме кодын кертыныт (Кол. 2:6—10). Епафрас ту погынымаш  гыч иза-ака-влакым, очыни, сайын пален. Нуно духовный шотышто кушкын шушо кодышт манын, тудо эре кумалын (Кол. 4:12, УТ). Кузе ме ужынна, Павел ден Епафрас умыленыт: духовный шотышто кушкын шушо лияшлан вийым пыштыме деч да Юмын полшымо деч посна ок лий. Колоссышто илыше христиан-влак, кеч-могай нелылыкым ончыде, духовный шотышто кушкын шушо кодышт манын, тиде кок изан кумылжо лийын.

18. Духовный шотышто кушкын шушо христиан дене мо лийын кертеш? (Тыгак сӱретым ончыза.)

¹⁸ Павел еврей иза-ака-влакым шижтарен: кушкын шушо христианат Иегова дене кыл кучымашым эрелан йомдарен кертеш. Айдемын Юмым колыштмыжо огеш шу гын, тудо Юмо деч тынар чот торлен кертеш, ӧкынаш тудын кумылжат огеш лий да Юмо тудым уже нигунамат огеш проститле. Но еврей-влак тыгай состоянийыш шуын огытыл (Евр. 6:4—9). А мемнан кече-влак нерген мом каласаш лиеш? Мом Иегова шона тыгай иза-ака-влак нерген, кӧ вашлиймашыш коштмым чарнен але кӧ погынымаш гыч кораҥдыме лийын, но варажым ӧкынен? Уло кумылын ӧкынымышт ончыкта: нуно ойыртемалтыт тыгай христиан-влак деч, кӧ нерген Павел возен. Но кунам тыгай еҥ-влак Иегова дек пӧртылыт, нунылан тудын полшымыжо кӱлеш (Иез. 34:15, 16). Кугурак иза-влак ӱшанымыштым пеҥгыдемдашлан опытан изам але акам нунылан полшаш йодын кертыт.

19. Могай цель-влакым мыланна шындаш кӱлеш?

¹⁹ Духовный шотышто кушкын шуашлан вийым пыштыза, тунам те цельышкыда шуыда. Пешкыде духовный кочкышым кочса да шонымашдам Иегован шонымашыжлан келыштараш тыршыза. А духовный шотышто те уже кушкын шуында гын, тыгаяк кодаш вийым пыштыза.