1. Икымше курымышто Иегован служитлышыже-влак кузе виктарыме лийыныт?

 КУНАМ Иегова шке служитлышыже-влаклан заданийым пуа, тудо нунын деч тидым шот дене ыштымым вуча (1 Кор. 14:33). Мутлан, поро увер мланде мучко шарлыже манын, Юмын кумылжо уло (Матф. 24:14). Иегова Иисусым тиде пашам виктараш шогалтен. Тиде паша радам почеш да сайын шукталтше манын, Иисус эскерен шога. Кунам икымше курымышто тӱрлӧ вере погынымаш-влак чумыралтыныт, тушто кугурак иза-влак шогалтыме лийыныт. Нуно служитлымаш пашам виктарышаш улыт ыле (Ап. паш. 14:23). Иерусалимысе вуйлатыше советыш апостол ден кугурак иза-влак пуреныт. Нунын лукмо решенийышт-влакым чыла погынымаш-влак шуктышаш улыт ыле (Ап. паш. 15:2; 16:4). Кунам погынымаш-влак чыла кӱштымашым уло кумылын шуктеныт, нуно «ӱшанымаште пеҥгыдемыныт, да еҥышт кече еда ешаралтыныт» (Ап. паш. 16:5).

2. Кузе Иегова 1919 ий гыч шке калыкшым виктара да тудлан духовный кочкышым пуа?

² Иегован калыкше мемнан жапыштат радам почеш служитлыже манын, Иегова чылажымат ышта. 1919 ий гычын Иисус шӱрымӧ пӧръеҥ-влак гыч шогышо кугу огыл группым кучылтеш. Тиде группо таныклымаш пашам виктара да Иисус почеш кайыше-влаклан духовный кочкышым  пуа (Лук. 12:42) a. Мутат уке, Иегова тиде кугу огыл группын тыршымыжым суапландара (Ис. 60:22; 65:13, 14).

3, 4. а) Служитлымашнам виктарымаш могай пайдам конда? б) Тиде статьяште ме мом ончен лектына?

³ Ме сайын виктарыме она лий гын, Иисусын пуымо заданийжым шуктен она керт (Матф. 28:19, 20). Таныклашлан лӱмын ойырымо территорий-влак огыт лий гын да кажныже кушто шона, тушто таныклаш тӱҥалеш гын, мо лиеш? Южо участокыш уверзе-влак угыч да угыч толыт, а весышт логалде кодыт. Таныклымаш пашам виктарыме деч могай эше пайдам те ужыда?

⁴ Таче Иисус почеш кайыше-влак тидымак ыштат, мом Иисус мландыште илымыж годым ыштен. Тиде статьяште ме ончен лектына, могай примерым Иисус коден да кузе мемнан организацийна тудын примерже почеш ышта. Тыгак ме мутланен налына, кузе ме Иегован организацийжылан ӱшанымынам ончыктен кертына.

ОРГАНИЗАЦИЙНА ИИСУС ДЕЧ ПРИМЕРЫМ НАЛЕШ

5. Мо шотышто мемнан организацийна Иисус деч примерым налеш? (Иоаннын 8:28).

⁵ Иисус Ачажын туныктымыжо почеш ыштен да ойлен. Кузе Иегован организацийже Иисусын примерже почеш ышта? Кунам тудо мемнам виктара да туныкта, мо чын, а мо уке, тудо шке ойлымыжым Юмын Мутшо дене негызла (Иоаннын 8:28 лудын лекса; 2 Тим. 3:16, 17). Мыланна Библийым шымлаш кӱлмӧ нерген чӱчкыдын шарныктат. Тиде каҥаш почеш ыштена гын, могай пайдам налына?

6. Кузе Библийым шымлымаш мыланна Иегован организацийжылан эше чотрак ӱшанаш полша?

⁶ Библийым публикацийна-влакым кучылтын шымлена гын, тиде мыланна шуко пайдам конден кертеш. Мутлан, ме библийысе туныктымаш-влакым организацийна деч налме кӱштымаш-влак дене таҥастарен кертына. Кунам ме кӱштымаш-влак Священный Возымаш дене негызлыме улыт манын ужына, тунам Иегован организацийжылан эше чотрак ӱшанаш тӱҥалына (Рим. 12:2).

7. Иисус могай уверым каласкален, да Иегован организацийже могай примерым тудын деч налеш?

⁷ Иисус «Юмын Кугыжаныш нерген Поро Уверым» каласкален (Лук. 4:43, 44). Тудо шке тунемшыж-влаклан тидымак ышташ кӱштен (Лук. 9:1, 2; 10:8, 9). Таче Иегован чыла служитлышыже-влак кеч-кушто илат гынат да организацийыште кеч-могай пашам шуктат гынат, Юмын Кугыжаныш нерген уверым таныклат.

8. Могай чап мыланна пуалтын?

⁸ Еҥ-влаклан Юмын Кугыжаныш нерген каласкалаш — кугу чап. Но тиде заданий кажныжлан пуалтын огыл. Мутлан, Иисус мландыште илымыж годым осал шӱлыш-влаклан тудын нерген каласкалаш пуэн огыл (Лук. 4:41). Таче айдеме Иегован калыкше дене пырля таныклынеже гын, тудо Юмын нормыж дене келшышын илаш тӱҥалшаш. Таныклашлан кеч-могай йӧным кучылтына гын, тыге ме ончыктена: Юмын Кугыжаныш нерген уверым каласкалаш йӧным аклена. Иисус деч примерым налын, ме еҥ-влакын шӱмышкышт Юмын Кугыжаныш нерген чынын пырчыжым ӱдаш да вӱдым опташ тыршена (Матф. 13:3, 23; 1 Кор. 3:6).

9. Еҥ-влак Юмын лӱмжым пален налышт манын, организацийна мом ышта?

⁹ Иисус еҥ-влаклан Юмын лӱмжым пален налаш полшен. Кавасе Ачажлан кумалме годым тудо каласен: «Тыйын лӱметым палдаренам» (Иоан. 17:26). Иисус деч примерым налын, Иегован организацийже еҥ-влаклан Юмын лӱмжым пален налаш полшашлан  шуко вийым пышта. Тиде пашаште «У тӱня» кусарымаш кугу рольым модеш. Тиде кусарымаште Юмын лӱмжым пуртымо тушко, кушто тудо лийшаш. Мемнан жапыште тиде кусарымаш тӱрыснек але ужашын 270 утла йылме дене уло. Тиде кусарымашын A4 да A5 Приложений-влакыште ешартыш информацийым муаш лиеш, молан да кузе Юмын лӱмжӧ Библийыш угыч пуртымо лийын. Англичан йылме дене «Тунемме Библийын» ик приложенийыштыже (Appendix C) ешартыш доказательстве-влакым кондымо, молан Юмын лӱмжӧ Грек йылме дене христиан Возымаште 237 гана вашлиялтшаш.

10. Юмын лӱмжым пален налмеке, Мьянма гыч ӱдырамаш мом каласен, да тиде мемнам мо́лан туныкта?

¹⁰ Шукырак еҥ Юмын лӱмжым пален налже манын, мемнан Иисусын гаяк кумылна уло. Юмын лӱмжым пален налмеке, Мьянма гыч 67 ияш ӱдырамаш шорташ тӱҥалын. Тудлан Библийым шымлаш полшышо акалан тудо каласен: «Юмын лӱмжӧ Иегова манын мый нигунамат колын омыл... Тый мыланем эн кӱлешан чыным почын пуэнат». Тиде случай ончыкта: кунам еҥ-влак Юмын лӱмжым пален налыт, тиде нунын илышыштым чот вашталтен кертеш.

ИЕГОВАН ОРГАНИЗАЦИЙЖЫЛАН ӰШАНЫЗА

11. Кугурак иза-влак Иегован организацийжылан ӱшанат манын, кузе ончыктен кертыт? (Тыгак сӱретым ончыза.)

¹¹ Кугурак иза-влак Иегован организацийжылан ӱшанат манын, кузе ончыктен кертыт? Кунам у инструкций-влак толыт, иза-влаклан нуным тӱткын лудын лекташ да варажым тыршен шукташ кӱлеш. Мутлан, нуно кӱштымаш-влакым налыт, кузе вашлиймашнам эртараш, погынымаш верч кумалаш да Христосын тунемшыже-влак верч тыршаш. Кунам кугурак иза-влак организацийын кӱштымыжӧ почеш ыштат, иза-ака-влак Иегован йӧратымыжым да азапланымыжым шижыт.

12. а) Молан мыланна виктарымаш пашам шуктышо иза-влакым колышташ кӱлеш? (Еврей-влаклан 13:7, 17). б) Молан мыланна кугурак иза-влакын сай койышыштым ужаш тыршыман?

¹² Кунам ме кугурак иза-влак деч кӱштымаш-влакым налына, нуным вигак кучылташ тыршыман. Тыге ыштена гын, нине иза-влаклан ӱшанен пуымо пашаштым шукташ куштылгырак лиеш. Библий мемнам виктарымаш пашам шуктышо иза-влакым колышташ тарата. (Еврей-влаклан 13:7, 17, УТ лудын лекса.) Южгунам тидым ышташ йӧсӧ лийын кертеш, вет нине пӧръеҥ-влак сулыкан улыт. Но ме нунын сай огыл, а уда койышыштым гына ужаш тӱҥалына гын, тушманна-влаклан полшена. Молан тыге каласаш лиеш? Молан манаш гын, тиде Иегован организацийжылан ӱшанымашнам лушкыдемда. Лач тидым тушманна-влак вучат. Тушман-влакын ойлымышт шоя манын умылаш да тидлан ӱшанаш огыл мо полша?

ЮМЫН ОРГАНИЗАЦИЙЖЫЛАН ӰШАНЫМАШДАМ ЛУШКЫДЕМДАШ ВЕСЕ-ВЛАКЛАН ИДА ПУ

13. Кузе Юмын тушманже-влак тудын организацийын репутацийжым амырташ тыршат?

¹³ Юмын тушманже-влак тудын организацийын репутацийжым амырташ тыршат да шоякым шаркалат. Мутлан, Библий гыч ме палена: Иегова шке служитлышыже-влак деч физический, нравственный да духовный шотышто ару лиймыштым вуча. Юмын ойлымыжо почеш, кӧ сулыкым ышта да шкенжым огеш вашталте, погынымаш гыч кораҥдыме лиеш (1 Кор. 5:11—13; 6:9, 10). Ме тиде библийысе кӱштымаш дене келшышын ыштена. Но тушманна-влак мемнам титаклаш тыршат, пуйто ме еҥ-влакым она йӧрате да мемнан деч ойыртемалтше еҥ-влакым ужмышудымо улына.

14. Кӧ чынжымак Иегован организацийже нерген шоякым шаркала?

 ¹⁴ Умылыза, кӧ чынжымак мемнан ӱмбак кержалтеш. Тиде Сатана Диавол. Тудым Библийыште «шоякын ачаже» манме (Иоан. 8:44; Тӱҥ. 3:1—5). Сандене ме она ӧр, кунам тудо Иегован организацийже нерген шоякым шаркалашлан тушманна-влакым кучылтеш. Тыге икымше курымыштат лийын.

15. Иисусын да тудын тунемшыж-влакын репутацийыштым амырташлан религиозный вуйлатыше-влак мом ыштеныт?

¹⁵ Юмын Эргыже, Иисус, сулыкдымо лийын да шуко чудым ыштен гынат, Сатана тудын нерген еҥ-влак гоч шоякым шаркален. Мутлан, религиозный вуйлатыше-влак ойленыт, пуйто демон-влакым поктен лукташ вийым Иисуслан демон-влакын «тӧрашт» пуэн (Мар. 3:22). Кунам Иисус судышто лийын, религиозный вуйлатыше-влак тудым Юмым шӱктарымаште титакленыт да калыкым Иисусым пуштмым йодаш таратеныт (Матф. 27:20). Варажым, кунам Христос почеш кайыше-влак поро уверым каласкаленыт, тушман-влак «Юмым палыдыме-влакым... сырыктеныт» да ту христиан-влак ваштареш шогалаш нуным таратеныт (Ап. паш. 14:2, 19). Теве мом Апостол-влакын пашашт 14:2 почеламут нерген 1998 ийысе 1 декабрьын «Орол башньыште» возымо лийын: «Христианстве ваштареш шогышо иудей-влак поро уверлан ӱшанен огытыл. Тыгак нуно шоям шаркаленыт. Тидлан кӧра еҥ-влак христиан-влаклан ӱшанен огытыл да нуным ужмышудымо лийыныт».

16. Иегован организацийже нерген шоям колына гын, мо нерген шарныман?

¹⁶ Сатана тачат шоям шаркала. Тудо алят «уло сандалыкым» ондала (Почм. 12:9).  Сандене ме колына, кузе тӱрлӧ вере Иегован организацийжым да виктарымаш пашам шуктышо иза-влакым титаклат. Тунам шарныза, кузе икымше курымышто Юмын тушманже-влак Иисус ден тунемшыж-влакым поктылыныт да шӱктареныт. Тачат Иегован служитлышыже-влак тидын дене тӱкнат. Но тиде мемнам огеш ӧрыктаре, вет лач тидын нерген Библийыште ончылгоч каласыме лийын (Матф. 5:11, 12). Шояклымаш кӧ деч лектеш умылена гын да ӱшанымашнам аралашлан вигак вийым пыштена гын, тунам шояклымаш вапшыш она логал. Кузе ме шкенам арален кертына?

17. Ондалалтме лияш огыл мо полша? (2 Тимофейлан 1:13). (Тыгак  «Шоя информацийым колына гын, кузе лияш?» рамкым ончыза.)

¹⁷ Шоя информацийым кораҥдыза. Апостол Павел раш кӱштымашым пуэн, мом ышташ, кунам ме шоям колына. Павелын каласымыже почеш Тимофей Юмым шӱктарыше «шонен лукмо тӱрлӧ ойлыштмаш деч» кораҥшаш да весе-влаклан тидым ышташ каласышаш ыле (1 Тим. 1:3, 4; 4:7). Ме ынена лий изи йоча-влак гай, кудышт кӱварыште иктаж-мом муыт гын, вигак умшаш чыкат. Кушкын шушо-влак тыге огыт ыште. Ме шоя деч кораҥына, молан манаш гын, умылена, кӧ деч шоя лектеш. Ме «яндар туныктымашым» колыштына. (2 Тимофейлан 1:13 лудын лекса.)

18. Иегован организацийжылан ӱшанена манын, кузе ончыктен кертына?

¹⁸ Ме кум йӧным ончен лекна, кузе Юмын организацийже Иисус деч примерым налмым ончыкта. Организацийна тудын деч примерым налеш манын, вес доказательстве-влакымат Библийым шымлыме годым муаш тыршыза. Погынымаш гыч иза-ака-влаклан организацийлан ӱшанаш полшыза. Иеговалан ӱшанлын служитлен да организацийже дене пырля тудын эрыкшым шуктен, шкат ӱшанымашдам ончыктыза (Пс. 36:28). Айста Иегован калыкше дене пырля служитлаш чапым умбакыжат аклена.