ИЕГОВА мыланна шуко пӧлекым пӧлеклен. Кузе нуным кучылташ ме шке решитлен кертына. Мыланна тыгай правам пуымылан Юмылан тау! Тыгай пӧлек-влак гыч иктыже — тиде йошкар арака. Библийыште эсогыл ойлалтеш: «Кочкыш куандара, да йошкар арака кумылым нӧлта» (Эккл. 10:19; Пс. 103:15). Но улыт тыгай еҥ-влак, кудышт алкогольым утыждене йӱыт. Тыгак тӱрлӧ элыште да культурышто алкогольым йӱмӧ нерген тӱрлӧ семын шонат. Алкогольым йӱмаш шотышто христианлан уш-акылан решенийым лукташ мо полша?

Решенийым лукмо годым мемнан еҥ-влакын огыл, а Юмын шонымыжым шотыш налмына шуэш. Ме палена: Юмо мыланна уда каҥашым огеш пу.

Те ужыда докан: тиде тӱняште шукышт чӱчкыдын да шуко йӱыт. Тыгела иктышт канат, а весышт проблемыштым мондаш тӧчат. А южо элыште шотлат, пуйто чын пӧръеҥ шуко йӱшаш.

Но христиан-влак йӧратыше Юмын каҥашыже-влакым колыштыт. Мутлан, тудо алкогольым утыждене йӱмын уда лектышыже нерген шижтарен. Тидын нерген Притчи 23:29—35 почеламут-влакыште сайын возымо a. Дэ́ниел, Европышто илыше ик кугурак иза, шарналта, могай тудын илышыже Библийым шымлыме деч ончыч лийын: «Ожно мый чот шуко йӱынам. Тидын верч ятыр йоҥылышым ыштенам, да тиде мыланем шуко шӱм-чон корштымашым конден. Южыжо верч чонем алят огеш лыплане».

Христиан-влаклан алкогольым утыждене йӱмӧ деч шекланаш мо полша? Тидлан решенийым лукмо годым Юмын Мутшым шотыш налман.

Айста лончылен налына, мом Библийыште алкоголь нерген ойлалтеш да молан южо еҥ тудым йӱэш.

Юмын Мутшо алкогольым шот дене йӱмым ок чаре. Библий дене келшышын, йошкар аракам йӱмаш ракатланымым конден кертеш. Ме лудына: «Киндым куанен коч да йошкар аракам весела шӱм дене йӱ» (Эккл. 9:7). Иисус да Иегован вес ӱшанле служитлышыже-влак южгунам йошкар аракам йӱыныт (Матф. 26:27—29; Лук. 7:34; 1 Тим. 5:23).

Юмын Мутшо дене келшышын, изиш йӱмӧ ден утыждене йӱмаш коклаште кугу ойыртем уло. Тушто раш каласыме: «Руштмешке ида йӱ» (Еф. 5:18). Тыгак тушто ойлалтеш: «Йӱшат... Юмын Кугыжанышын наследникышт огыт лий» (1 Кор. 6:10). Аракам утыждене йӱмаш Иеговалан чот огеш келше. Сандене вес еҥ-влак семын ышташ огеш кӱл. Лучо решенийым лукмына годым Иегован шонымыжым шотыш налаш.

Улыт тыгай еҥ-влак, кӧ шуко йӱэш да огеш рушт, но тиде лӱдыкшӧ. Библий шижтара: алкогольым утыждене йӱаш гын, кугу йоҥылышым ышташ да Иегова дене лишыл кыл кучымашым йомдараш лиеш (Тит. 2:3; Прит. 20:1). Иисусын каласымыж дене келшышын, алкогольым утыждене йӱына гын, Юмын у тӱняшкыже логалын она керт (Лук. 21:34—36). Кузе ме ужынна, алкоголь проблемым конден кертеш. Тыгай проблеме дене тӱкнаш огыл манын, христианлан мо полшен кертеш?

Кажне калыкыште алкогольым йӱмӧ дене кылдалтше шке йӱлаже уло. Но христиан-влак тидым огыл, а Иегован шижмашыжым шотыш налыт, кунам мом кочкаш да йӱаш решенийым луктыт. Библий мыланна шарныкта: «Те кочкыда але йӱыда, але мом гына ыштеда, чыла тидым Юмын чапше лӱмеш ыштыза» (1 Кор. 10:31). Теве икмыняр йодыш ден библийысе принцип, кудышт нерген шонкален налаш кӱлеш.

Мый весе-влак гай лияшлан йӱам мо? Исход 23:2 почеламутышто ойлалтеш: «Шукышт почеш ида кай». Израильтян-влак Юмылан йӧрдымӧ еҥ-влак деч примерым ынышт нал манын, Иегован кумылжо лийын. Иегован шонымыжо вашталтын огыл. Тиде каҥаш мыланнат пайдале. Алкоголь шотышто шонымашналан влиятлаш весе-влаклан пуэна гын, жап эртымеке, Иегова деч кораҥын да тудын нормыжо почеш илымым чарнен кертына (Рим. 12:2).

Мый виян кояшлан йӱам мо? Южо калыкыште чӱчкыдын да шуко йӱаш — тиде нормо да эсогыл тыгай еҥым моктат (1 Пет. 4:3). Но ончалза, мом 1 Коринфян-влаклан 16:13 почеламутышто возымо: «Шекланен шогыза, ӱшанымаштыда пеҥгыде лийза, лӱддымӧ, виян лийза». Алкоголь айдемылан чынжымак виян лияш полша мо? Уке. Алкоголь раш шонкалаш да сай решенийым лукташ мешая. Лектеш, кӧ шуко йӱэш, виян огыл, а ушдымо. Исайя 28:7 дене келшышын, тыгай еҥ-влак чын корно деч кораҥыныт да шот дене шонкален огыт керт.

Чын вийым Иегова пуа. Тиде вийым ужаш лиеш, кунам айдеме шеклана да ӱшанымаштыже пеҥгыдын шога (Пс. 17:33). Кузе ме тыгай айдеме лийын кертына? Мыланна шекланыман да тыгай решений-влакым лукман, кудышт Иегова дене лишыл кыл кучымашнам огыт пудырто. Иисус чынжымак виян айдеме лийын, молан манаш гын, тудо чын ышташ лӱдын огыл.

Мый проблемым мондашлан йӱам мо? Псаломым мурышо возен: «Шӱмыштем ойгем шукемме годым Тыйын лыпландарымет чонем куандарыш» (Пс. 93:19). Илышыштет чот неле жап гын, тунам алкогольым  йӱмаште огыл, а Иегова деч полышым кычал. Тургыжланымашым сеҥаш сай йӧн — тиде чӱчкыдынрак кумалаш. А эше тургыжланыметым уш-акылан христианлан каласкален пуаш лиеш. Тудо тыланет сай каҥашым пуа докан. Айдеме проблемыжым мондашлан йӱэш гын, тудын Иеговалан йӧрышын илаш кумылжо йомын кертеш да тиде сулыкым ышташ тудым шӱка (Ос. 4:11). Ондак палдарыме Дэниел ойла: «Мый эре стрессыште иленам да шкемым титакленам. Чон корштымашым мондашлан мый йӱынам. Но проблеме-влак шукемыныт веле. Мый йолташем-влакым йомдаренам да шкем пагалымым чарненам». Дэниел проблемыжым кузе сеҥен кертын? «Мый умыленам: проблемым сеҥашлан мыланем алкоголь огыл, а Иегова кӱлеш. Конешне, вигак огыл, но Юмын полшымыж ден мый тиде проблемым сеҥенам». Ме раш палена: Иегова мыланна эре полшаш ямде, кеч тиде ситуаций тӧрлаташ лийдымыла чучеш (Флп. 4:6, 7; 1 Пет. 5:7).

Тый алкогольым йӱат гын, шкендым терген кертат, мыняр чӱчкыдын да мынярым тый йӱат. Тидлан тыланет тыгай йодыш-влак полшен кертыт. Ешем але йолташем-влак ойлат мо: «Мыланем огеш келше, мынярым да мыняр чӱчкыдын тый йӱат»? Тыге ойлат гын, тиде теве мом ончыкта: тыйын шучко привычкет лекташ тӱҥалын, кудыжым тый шкат от шиж. Ондакысе деч шукырак йӱаш тӱҥалынам мо? Тиде, очыни, теве мом умылаш полша: тыйын зависимость лектын кертеш. Икмыняр кече але эше шукырак йӱде илен кертам мо? Уке гын, тиде чот вожаҥше привычкым але зависимостьым палдара. Тыгай случайыште, очыни, тыланет специалист-влакын полышышт кӱлеш лиеш.

Чыла лӱдыкшым шотыш налын, южо христиан-влак алкогольым йӧршеш йӱаш огыл шонен пыштеныт. А весышт алкогольым огыт йӱ, молан манаш гын, нунылан тамже огеш келше. Йолташет-влак гыч иктажше тыгай решенийым луктын гын, кузе лийман? Тудым пагалаш, тудын дене поро лияш  кӱлеш да решенийжым критиковатлаш огеш кӱл.

Мынярым да мыняр чӱчкыдын йӱаш тый, очыни, ончылгочак решитлет. Иктажше арняш ик гана веле але кочмо годым изиш гына йӱэш. А весышт ончылгочак шоналтеныт, могай алкогольым йӱаш, а могайжым уке. Мутлан, изиш гына йошкар аракам але сырам йӱаш решитленыт, но нимогай пеҥгыде напиткым, эсогыл коктейльымат. Айдеме шкаланже раш правилым шынден гын, тунам тудлан тидын почеш илаш куштылгырак лиеш. Духовный христианлан тургыжланаш огеш кӱл, мом тудын решенийже нерген весе-влак шонат.

Мом эше шотыш налман? Весе-влакын шижмашыштым. Римлян-влаклан 14:21 почеламутышто ме лудына: «Лучо шылым кочкаш огыл‚ аракам йӱаш огыл‚ нимомат тугайым ышташ огыл‚ мо иза-шольым шӱртньымашке конда, алгаштара але вийдымым ышта». Кузе тый тиде каҥашым кучылтын кертат? Иза-ака-влакетым йӧрате. Иктаж-кӧм алкогольым йӱмаш шӱртньыктара манын палет гын, лучо тудын ончылно йӱаш огыл. Тыге тый шке нерген огыл, а весе-влак нерген шукырак шонымым да нуным пагалымым ончыктет (1 Кор. 10:24).

А эше христиан-влак илыме элыштын законжо-влакым шуктат. Чӱчкыдын правительстве тыгай закон-влакым луктеш, кудышт палдарат, могай ийгот гыч тӱҥалын йӱаш лиеш. Тыгак правительстве машинам але вес техникым алкогольым йӱмӧ деч вара вӱдаш чара (Рим. 13:1—5).

Иегова мыланна решенийым лукташ правам пуэн, кузе тудын пӧлекше-влакым кучылташ. Нунын гыч иктыже — мом кочкаш да мом йӱаш ойырен налаш эрык. Тек лукмо решенийна-влак тиде эрыкым аклымым ончыктат. Тыге ме кавасе Ачанам куандарена.