1. Христос деч примерым налше кажне пӧръеҥ мом ыштышаш?

 АПОСТОЛ Павел коринфян-влаклан каласен: «Иза-шольо-влак, ушда дене йоча гай ида лий... кушкын шушо [лийза]» (1 Кор. 14:20). Тиде шомакым Христос деч примерым налше чыла пӧръеҥ илышыш пуртышаш. Тидлан нуно Юмын законжым колыштшаш да чыла шотыштат библийысе принципым кучылтшаш улыт (Лук. 2:52). Молан христиан рвезе-влаклан лач тыгай лияш тыршаш кӱлеш?

2, 3. Молан рвезылан сай христиан лияш тыршыман?

² Пӧръеҥлан ешыште да погынымаште кугу рольым пуымо. Христиан рвезе, тый ончыкылык илышет нерген шонет докан. Очыни, тый шкаланет тыгай цельым шынденат: пионер семын служитлаш, погынымаште служебный полышкалыше, а вара кугурак иза лияш. Можыч, тый ӱдырым налнет да ача лийнет (Еф. 6:4; 1 Тим. 3:1). Чыла нине цельыш шуашлан да шке рольым сайын шукташлан тыланет сай христиан лияш кӱлеш b.

³ Сай христиан лияшлан мом тыланет ышташ кӱлеш? Тидлан кӱлешан койыш ден моштымаш-влакым куштыман. Айста тидын нерген шукырак мутланен налына.

4. Кӧ деч тый сай примерым налын кертат? (Тыгак сӱретым ончыза.)

⁴ Шкаланет сай пример-влакым кычал. Библий Иеговам йӧратыше да тудын калыкше верч тыршыше шуко пӧръеҥ  нерген каласкала. Нуно мыланна сай пример улыт. Тыгак тый погынымаште да родет-влак коклаште сай христиан-влак деч примерым налын кертат (Евр. 13:7). А эн сай пример — тиде Иисус Христос (1 Пет. 2:21). Чыла нине пӧръеҥ-влакын сай койышышт нерген шонкале да нунын семын ышташ тырше (Евр. 12:1, 2).

5. Иегова семын шонаш тыланет мо полша да молан тиде кӱлешан? (Псалом 118:9).

⁵ Шонкалаш тунем (Прит. 3:21). Шонкален моштышо айдеме решенийым лукмыж деч ончыч чыла вариантым сайын шымла. Рвезе-влак, шонкален моштышо лияш тыршыза! Молан? Молан манаш гын, тиде тӱняште рвезе-влак эре шке кумылышт почеш да эмоцийышт почеш ыштат (Прит. 7:7; 29:11). Тыгак шонымаш ден ыштымашетлан интернет да соцсеть-влак чот влиятлен кертыт. Но кузе шонкален моштышо лияш? Решенийым лукмо деч ончыч Иегован шонымыжым пален нал да шоналте, молан тудын ойлымыжо тыланет пайдам гына конда. А вара пален налмым кучылт. Тунам решениет-влак Иеговам куандараш тӱҥалыт. (Псалом 118:9 лудын лекса.) Иегова семын шонаш тунемын, сай христиан лияшлан кугу ошкылым ыштет (Прит. 2:11, 12; Евр. 5:14). Ончалына, кузе чыла тиде тыланет полша: 1) ака-влак дене шкем чын кучаш да 2) тӱжвал тӱс ден вургем шотышто сай решенийым лукташ.

6. Христиан рвезе христианке-влакым пагала манын, кузе ончыктен кертеш?

⁶ Иегова семын шонаш тунемше иза ӱдырамаш-влакым пагала. Мутлан, христиан рвезын ӱдырым налаш кумылжо уло гын, тыште нимо удаже уке. Но Иегова семын шонаш тунемше рвезе кызыт ӱдырым марлан налаш огеш шоно гын, тудлан эскераш кӱлеш, кузе тудо христиан ӱдыр-влак дене шкенжым куча. Мутлан, тудо нимом тыгайым ойлаш, возаш але ышташ ок тӱҥал, мо верч ӱдыр шонен кертеш, пуйто тудо рвезылан чот келша (1 Тим. 5:1, 2). Ӱдыр ден рвезе таҥ улыт гын, рвезе тудын репутацийжым аралаш тырша. Коктын кодаш огыл манын, тиде иза иктаж-могай вес сай христианым  нунын дене жапым эртараш ӱжеш (1 Кор. 6:18).

7. Рвезылан вургем да тӱжвал тӱс шотышто решенийым лукташ мо полшен кертеш?

⁷ Иегова гай шонаш рвезе тунемын гын, тидым вургемже да тӱжвал тӱсшӧ ончыкта. Чӱчкыдын модный вургемым шонен луктыт тыгай еҥ-влак, кӧ яжарланен ила да Иеговам огеш пагале. Пужлышо шонымаш дене еҥ-влак тыгай вургемым шонен луктыт, кудыжо чык пижын шога але кудыжлан кӧра пӧръеҥ ӱдырамаш гай коеш. Мом чияш шонымо годым рвезе библийысе принцип-влакым кучылташ да погынымаште сай христиан-влак деч примерым налаш тӱҥалеш. Тудо шкеж деч йодын кертеш: «Чияш шонымо вургем христианлан келшен толеш мо? Тӱжвал тӱсем дене весе-влакым пагалем мо? Тӱжвал тӱсем Юмылан служитлымым ончыкта мо?» (1 Кор. 10:31—33; Тит. 2:6). Иегован шонымаш ден шижмашыже нерген шонышо рвезым иза-ака-влак гына огыл, тыгак кавасе Ачанат пагала.

8. Кузе рвезе ӱшанле лияш тунемын кертеш?

⁸ Ӱшанле лий. Ӱшанле айдеме тудлан ӱшанен пуымо чыла пашажым тыршен ышта (Лук. 16:10). Иисусын примержым ончалына. Иисус Иегован чыла кӱштымӧ пашажым, тудлан йӧсӧ лийын гынат, эре шуктен. Айда-лийже манын ыштен огыл, а тыршен ыштен. Тудо еҥ-влакым, поснак тунемшыж-влакым, йӧратен да нунын верч илышыжым пуэн (Иоан. 13:1). Иисус деч примерым нал. Тыланет ӱшанен пуымо кажне пашам уло кумылын шукто. А кузе тиде пашам шукташ от пале гын, ӱҥышӧ лий да опытанрак иза-влак деч полышым йод. Улыт тыгай еҥ-влак, кӧ ышта тынарым гына, мынярым нунылан ышташ кӱштымӧ лийын. Шукырак ышташ ит лӱд! (Рим. 12:11). Кажне пашам еҥ-влаклан гай огыл, а Иеговалан ыштыме гай ыште да тӱҥалме пашатым мучаш марте шукто (Кол. 3:23). Мутат уке, тый языкан улат, сандене ӱҥышӧ лий да шке йоҥылышетым умыло (Прит. 11:2).

9. Молан рвезылан илышлан кӱлешан моштымашлан тунемаш кӱлеш?

⁹ Сай христиан лияшлан тыланет илышлан кӱлешан моштымашлан тунемаш кӱлеш. Нине моштымаш-влак погынымаште заданийым шукташ, шкем да ешетым ончаш полшышо пашам муаш да весе-влак дене келшен илаш полшат. Теве икмыняр тыгай моштымаш.

10, 11. Молан рвезылан сайын лудаш да возаш тунемаш кӱлеш? (Псалом 1:1—3). (Тыгак сӱретым ончыза.)

¹⁰ Сайын лудаш да возаш тунем. Библийыште возымо дене келшышын, айдеме, кудыжо кажне кечын Юмын Мутшым лудеш да лудмо нерген шонкала, пиалан лиеш. (Псалом 1:1—3 лудын лекса.) Тый кажне кечын Библийым лудат гын, тиде тыланет Иегова семын шонаш полша. Тунам тый шке  шонымашетым огыл, а библийысе принцип-влакым шотыш налын, решенийым луктат (Прит. 1:3, 4). Тыгай пӧръеҥ-влак погынымаште чот кӱлыт. Молан?

¹¹ Иза-ака-влаклан Библиеш негызлыме туныктымаш ден каҥаш-влак кӱлыт (Тит. 1:9). Сайын лудын да возен моштет гын, тунам сай комментарий-влакым да ойлымаш-влакым ямдылен кертат, кудышт весе-влаклан пайдам кондат да ӱшанымашыштым пеҥгыдемдат. Тыгак тый шкевуя шымлымашым эртарымет годым да погынымаште але конгрессыште ойлымаш-влак гыч пайдале шонымаш-влакым возен кертат. Нине шонымаш-влак ӱшанымашетым пеҥгыдемдаш да весе-влакым кумылаҥдаш полшат.

12. Кузе мутланен моштымашым саемдаш?

¹² Мутланен моштымашым саемде. Христиан сайын мутланен моштышаш. Тудо весе-влакым колышташ да нунын шонымаш ден шижмашыштым умылаш тӱҥалеш (Прит. 20:5). А тидлан рвезылан шотыш налаш кӱлеш, могай йӱк да позо дене тудын дене мутланат да могай чурий дене ӱмбакыже ончат. Лектеш, еҥ-влак дене пырля жапым эртараш кӱлеш. Тый сообщений-влак гоч гына мутланет гын, тунам тыланет вашлийын мутланаш йӧсӧ лиеш. Сандене еҥ-влак дене вашлиялташ йӧным кычал (2 Иоан. 12).

13. Рвезылан мо́лан эше тунемаш кӱлеш? (1 Тимофейлан 5:8). (Тыгак сӱретым ончыза.)

¹³ Кӱлешлыкым ситарашлан оксам ышташ тунем. Сай христиан шкенжын да ешыжын кӱлешлыкшым ситарен моштышаш. (1 Тимофейлан 5:8 лудын лекса.) Южо эллаште рвезе-влак иктаж-могай моштымашлан ачашт деч але вес родо деч тунемын кертыт. А вес эллаште школышто тунемме годымак профессийым налаш лиеш. Самырык лиймет годым иктаж-мом ыштен мошташ тунемат гын, ончыкыжым келшен толшо пашам муын кертат (Ап. паш. 18:2, 3; 20:34; Еф. 4:28). Пашам йӧратыше лий да тӱҥалме пашам эре мучаш марте шукто. Тунам тыйын сай репутациет лиеш да еҥ-влак тыйым мут кучышо айдеме семын палат. А тыгай пашаче-влак чыла вере кӱлыт! Лончылен лекме койыш ден моштымаш-влак тыланет ончыкыжым лекше рольлан ямдылалташ полшат.

14. Кузе христиан рвезе кечыгут служитлымылан ямдылалтын кертеш?

¹⁴ Кечыгут служитлыше. Шуко христиан кечыгут служитлаш самырык годым тӱҥалын. Пионер семын служитлымаш христиан  рвезым тӱрлӧ еҥ дене кылым кучаш туныкта. Тыгак тыгай служитлымаш оксам шот дене кучылташ тудлан полша (Флп. 4:11—13). Эрелык пионер семын служитлымым тӱҥалаш полышкалыше пионер семын служитлымаш полша. Шукышт лач тыгай служитлымаш гыч тӱҥалыныт. Варажым эрелык пионер лийыныт. Тыгела нунын ончылно тӱрлӧ семын служитлаш йӧн почылтын, мутлан, чоҥымаш проектыште тыршаш але Вефильыште служитлаш.

15, 16. Тынеш пурышо рвезылан служебный полышкалыше але кугурак иза лияшлан мом ыштыман?

¹⁵ Служебный полышкалыше але кугурак иза. Чыла иза-влак кугурак иза лияш цельым шындышаш улыт. Кугурак иза лияшлан нунылан библийысе йодмылан келшен толаш кӱлеш. Библийыште возымо дене келшышын, тыгай цельым шынден, пӧръеҥ поро пашам ыштынеже (1 Тим. 3:1). Кугурак иза семын служитлыме деч ончыч иза икмыняр жап служебный полышкалыше семын служитлышаш. Служебный полышкалыше-влак кугурак иза-влаклан погынымаш верч тыршаш полшат. Кугурак иза-влакат, служебный полышкалыше-влакат — тиде ӱҥышӧ иза-влак, кудышт погынымаш гыч иза-ака-влак верч тыршат да уло кумылын таныклат. Тынеш пурышо рвезе 17 ияш годым служебный полышкалыше лийын кертеш. А служебный полышкалыше шке пашажым сайын шукта гын, тунам уже 20 ияш годым кугурак иза лийын кертеш.

¹⁶ Служебный полышкалыше але кугурак иза лияшлан мом ыштыман? Тидын нерген Библийыште возымо. Тушто кондымо чыла йодмашым иктешлаш гын, Иеговам, ешым да погынымашым йӧраташ кӱлеш (1 Тим. 3:1—13; Тит. 1:6—9; 1 Пет. 5:2, 3). Тиде абзацыште кондымо почеламут-влакым лудын лек да умылен налаш тырше, мом Юмо тый дечет вуча. Кӱлешан койыш-влакым кушташлан Иегова деч полышым йод c.

17. Марий да еш вуй лияшлан рвезе кузе ямдылалтын кертеш? (Тыгак сӱретым ончыза.)

¹⁷ Марий да еш вуй. Кузе Иисус каласен, христиан-влак гыч чылашт огыл мужыраҥыт (Матф. 19:12). Но тый ӱдырым налаш решенийым луктат гын, тыйын у обязанность лектеш: тый марий да еш вуй лият (1 Кор. 11:3). Иегова марий деч шке ватым йӧратымыжым да материальный шотышто тудын верч тыршымыжым вуча. Тыгак марий шке ватыжлан лишыл йолташ лийшаш да тудлан Иегова дене лишыл кыл кучымашым пеҥгыдемдаш полшышаш (Еф. 5:28,  29). Тиде статьяште возымо дене келшышын, рвезылан Иегова семын шонкален мошташ, ӱдырамаш-влакым пагалаш да ӱшанле лияш кӱлеш. Чыла тиде тыланет сай марий да еш вуй лияш полша.

18. Ача рольлан рвезе кузе ямдылалтын кертеш?

¹⁸ Ача. Мужыраҥме деч вара тый ача лийын кертат. Сай ача лияшлан Иегова деч тунемаш лиеш. Тиде шотышто Иегова шукылан туныкта (Еф. 6:4). Иегова Иисус Эргыжым йӧрата да тудым йӧрышылан шотла. Тидын нерген Иисуслан ойлаш тудо вожылын огыл (Матф. 3:17). Ача лият гын, икшывет-влаклан нуным йӧратет манын, чӱчкыдынрак ойлаш ит мондо. Нуным чыла поро пашаштлан, эсогыл изи пашаштланат, мокто. Иегова деч примерым налше ача-влак шке йочашт-влаклан сай христиан лияш полшат. Тиде рольлан тый уже кызытак ямдылалт кертат. Ешет верч да погынымаш гыч иза-ака-влак верч тырше. Тый нуным йӧратет да аклет манын, нунылан ойлаш тунем (Иоан. 15:9). Тыге тый марий да ача рольлан тунемат да уже кызытак Иеговам, ешетым да иза-ака-влакым куандараш тӱҥалат.

19, 20. Сай христиан лияш рвезе-влаклан мо полшен кертеш? (Тыгак журнал комышто сӱретым ончыза.)

¹⁹ Сай христиан лияшлан вийым пыштыман. Рвезе-влак, тыланда сай примерым кычалаш, Иегова семын шонаш тунемаш, ӱшанле лияш, илышлан кӱлешан моштымашлан тунемаш да лийын кертше рольлан ямдылалташ кӱлеш.

²⁰ Тынар шукым ышташ кӱлмӧ нерген шонымо годым тыйым, очыни, лӱдмаш авалта. Но тый чылажымат ыштен кертат! Иегова тыланет полшаш сӧра (Ис. 41:10, 13). Погынымаште иза-ака-влакат тыланет полшаш тӱҥалыт. Иегова тыйын сай христиан лийметым ужнеже. Тудо пала: тунам тыйын илышет эше пиаланрак лиеш. Христиан рвезе-влак, ме тендам чот йӧратена! Сай христиан лияш тыршыза, да Иегова тендам суапландара (Прит. 22:4).