1. Сай христиан лияшлан мыланна мом ыштыман?

 ӦРАТ веле, мыняр чот вашке йоча-влак кушкыт. Чучеш, пуйто нуно вийым пыштыде кушкыт. Но духовный шотышто кушмо дене тыге огыл. Сай христиан лийнена гын, вийым пыштыман (1 Кор. 13:11; Евр. 6:1) b. Мыланна Иегова дене кыл кучымашнам пеҥгыдемдаш кӱлеш. Тыгак мыланна Юмо деч святой шӱлышым йодаш кӱлеш. Тудын полшымыж дене ме христиан койыш-влакым куштена, кӱлешан моштымашлан тунемына да ончыкыжым лийын кертше рольлан ямдылалтына (Прит. 1:5).

2. Тӱҥалтыш 1:27 гыч ме мом пален налына да тиде статьяште мом лончылен лектына?

² Иегова пӧръеҥ ден ӱдырамашым ыштен. (Тӱҥалтыш 1:27 лудын лекса.) Мутат уке, тӱжвал тӱсышт дене нуно тӱрлӧ улыт. Но тыгак нуно вес шотыштат ойыртемалтыт. Мутлан, Иегова пӧръеҥ ден ӱдырамашлан тӱрлӧ рольым шукташ пуэн. Нуным шукташлан пӧръеҥ ден ӱдырамашлан келшен толшо койыш ден моштымаш кӱлыт (Тӱҥ. 2:18). Тиде статьяште ме ончен лектына, мом тынеш пурышо ӱдыр-влак сай христианке лияшлан ыштен кертыт. Вес статьяште ончен лектына, мом тынеш пурышо рвезе-влак ыштен кертыт.

3, 4. Христиан ӱдыр-влак шкаланышт сай примерым кушто муын кертыт? (Тыгак сӱретым ончыза.)

³ Библий шуко сай ӱдырамаш нерген каласкала, кудышт Иеговам йӧратеныт да тудлан служитленыт. Ме нунын деч шукылан тунемын кертына. (jw.org сайтыште «Женщины в Библии: чему учит их пример?» статьям ончыза.) Нуно тиде статьян тӱҥ почеламутышто палемдыме койыш-влакым ончыктеныт: шкем кучен моштымым да ӱшанле лиймым. Эше ака-влак погынымашышт гыч тыгай христианке-влак деч примерым налын кертыт, кӧ Иеговам чынжымак йӧрата да кӧ деч нуно шукылан тунемын кертыт.

⁴ Ӱдыр-влак, те тыгай ака-влакым паледа мо? Нунын сылне койышыштым ужаш тыршыза, а вара шоналтыза, кузе те нунын семын ыштен кертыда. Вес абзац-влакыште ме сай христиан лияш полшышо кум кӱлешан койышым лончылен налына.

5. Сай христианке лияшлан молан ӱҥышӧ лийман?

⁵ Сай христиан лияшлан мыланна ӱҥышӧ лийман. Ӱҥышӧ христианке Иегова дене да весе-влак дене сай кылым куча (Иак. 4:6). Мутлан, Иеговам йӧратыше ӱдырамаш кавасе Ачажын пуымо вуйлатымаш принципым ӱҥышын шукта (1 Кор. 11:3). Тиде принципым погынымаштат, ешыштат шуктыман c.

6. Ревеккан ӱҥышӧ лиймыж гыч ӱдыр-влак мо́лан тунемын кертыт?

⁶ Ревекка нерген мутланен налына. Тудо уш-акылан ӱдырамаш лийын. Ӱмыр мучкыжо тудо лӱддымын решений-влакым луктын да пален, кунам да мом ыштыман (Тӱҥ. 24:58; 27:5—17). Тунамак тудо весе-влакым пагален да мут колыштшо лияш ямде лийын (Тӱҥ. 24:17, 18, 65). Тыят ӱҥышӧ лийын кертат да, кӧлан Иегова властьым пуэн, нуным колыштын да нунылан полшен кертат.  Тунам тый ешыштат, погынымашыштат сай пример лият.

7. Кузе ӱдыр-влак Эсфирь гай тыматле лийын кертыт?

⁷ Сай христиан лияшлан эше тыматле лийман. Библийыште возымо: «Уш-акыл тыматле еҥ-влак коклаште» (Прит. 11:2). Эсфирьын примержым лончылен лектына. Тудо тыматле да Юмылан ӱшанле лийын. Ӱдырамаш кугыжа лиймыж годымат тудо шкеж нерген утыждене шонен огыл. Тудо Мардохей двоюродный изажын каҥашыже-влакым колыштын (Эсф. 2:10, 20, 22). Кузе тый Эсфирь гаяк лийын кертат? Весе-влак деч каҥашым кычал да пален налмым кучылт (Тит. 2:3—5).

8. 1 Тимофейлан 2:9, 10 дене келшышын, кузе тыматле лиймаш акалан тӱжвал тӱс шотышто уш-акылан решенийым лукташ полша?

⁸ Эсфирьын тыматле лиймыже кушеч эше койын? Тудо пеш мотор лийын гынат, моторлыкшо дене моктанен огыл (Эсф. 2:7, 15). Кузе христианке Эсфирь деч примерым налын кертеш? Айста 1 Тимофейлан 2:9, 10 возымым ончалына (лудын лекса). Апостол Павел ӱдырамаш-влакым «шинчаш перныдыме да шотан вургемым» чияш таратен. Нине почеламут-влакыште кучылтмо грек мут-влак ончыктат: христиан ӱдырамаш шот дене чийышаш да весе-влакын шижмаш ден шонымыштым шотыш налшаш. Тиде каҥаш почеш ыштыше ака-влак дене ме чот кугешнена!

9. Авигея деч мо́лан тунемын кертына?

⁹ Сай христиан лияш полшышо эше ик койыш — тиде уш-акыл. Мо тыгай уш-акыл? Тиде уда деч сайым ойырен моштымаш да тидын дене келшышын чын решенийым лукмаш. Авигеям шарналтена. Марийжын уда решенийже уло ешыжлан чуч гына шуко ойгым конден огыл. Авигея жапым шуйкален огыл. Тудын уш-акылже шуко айдемын илышыжым утарен (1 Сам. 25:14—23, 32—35). Тыгак тиде койыш мыланна умылаш полша, кунам ойлаш, а кунам шып лияш. А эше уш-акыллан кӧра ме весе-влак дене мутланыме годым нуным йодышна-влак дене она вожылтаре (1 Фес. 4:11).

10, 11. Сайын лудаш да возаш тунемат гын, тиде тыланет да весе-влаклан могай пайдам конда? (Тыгак сӱретым ончыза.)

¹⁰ Йоча лийме годым ӱдыр тӱрлӧ моштымашлан тунемеш гын, тиде тудлан кугу лиймыж годымат пайдам конда. Икмыняр примерым ончалына.

¹¹ Сайын лудаш да возаш тунем. Южо калыкыште шотлат, пуйто ӱдырамашлан лудаш да возаш огеш кӱл. Но нине моштымаш-влак чыла христианлан чот кӱлыт (1 Тим. 4:13) d. Сандене лудаш да возаш тунемаш  тырше, кеч тидым ышташ куштылго огыл. Тиде тыланет могай пайдам конда? Тидлан кӧра тыланет пашам муаш куштылгырак лиеш. Юмын Мутшым келгынрак шымлен да весе-влакым сайрак туныктен кертат. А эн тӱҥжӧ, Библийым лудын да лудмо нерген келгын шонкален, тый Иегова деке эше лишылрак лият (Иис. Н. 1:8; 1 Тим. 4:15).

12. Притчи 31:26 гыч тый мо́лан тунемат?

¹² Мутланен моштымашым саемде. Кажне христианлан тӱткын колышташ да порын мутланаш кӱлеш. Теве могай каҥашым Иаковын серышыштыже муына: «Тек кажне айдеме колышташ писе, ойлаш вашкыдыме... лиеш» (Иак. 1:19). Кунам тый весе-влакым тӱткын колыштат, тунам нуно тыланет садиктак огытыл манын ончыктет (1 Пет. 3:8). Тый тӱрыснек от умыло гын, мом айдеме каласынеже але могай шижмаш тидым ойлаш тудым тарата, тунам рашемдыше йодыш-влакым пу. А кунам ойлаш тыйын черет шуэш, эн ончыч мом каласаш шоналте, вара иже ойло (Прит. 15:28). Шке дечет йод: «Мом мый каласаш шонем, тиде чын мо? Тиде весе-влакым пеҥгыдемда мо? Каласымем пагалымашым да порылыкым ончыкта мо?» Тӱткын колыштшо да порын мутланыше ака-влак деч тунем. (Притчи 31:26 лудын лекса.) Ончо, мом да кузе нуно ойлат. Мутланен моштымашым саемдет гын, тунам тыйын весе-влак дене кыл кучымашет сайрак лиеш.

13. Ӱдырлан сомылым сайын шукташ да весе-влакым уло кумылын унам пурташ мо полшен кертеш? (Тыгак сӱретым ончыза.)

¹³ Мӧҥгысӧ сомылым ышташ да уло кумылын унам пурташ тунем. Шуко элыште мӧҥгысӧ сомылым лач ӱдырамаш шукта. Тый шукылан ават деч але погынымаш гыч вес ака-влак деч тунемын кертат. Теве мом Си́нди ака каласкала: «Авам пала, кузе паша деч куаным налаш да тудо мыйымат тидлан туныктен. Сандене мый кочкышым ышташ, пӧртым эрыкташ, ургаш да оксам шот дене кучылташ тунемынам. Чыла тиде мыланем илышыштат, Иеговалан служымаштат полша. А эше авам мыйым уло кумылын унам пурташ туныктен. Тидлан кӧра мый шуко сай иза да ака дене палыме лийынам» (Прит. 31:15, 21, 22). Пашам ышташ йӧратыше да уло кумылын унам пуртышо ӱдырамаш, кудыжо мӧҥгысӧ сомылым сайын ышта, — ешыжлан да погынымашлан чынжымак сылне пӧлек (Прит. 31:13, 17, 27; Ап. паш. 16:15).

14. Кристал акан историйже гыч тый мо́лан тунемат да могай цель-влакым шынден кертат?

¹⁴ Материальный кӱлешлыкетым ситараш тунем. Кажне христиан шкенжын материальный кӱлешлыкшым ситарен моштышаш (Флп. 4:11). Кри́стал лӱман ака манеш: «Кунам мый кугурак классыште тунемынам, ача-авам мылам каласеныт, школым тунем пытарыме деч ончыч могай курсым эртен кертам. Тидлан кӧра мый илышлан кӱлешан моштымашлан тунем кертам ыле. Ачай  мыланем бухгалтерский курсым эрташ темлен, да тиде курс мыланем пайдам конден». Но оксам ышташ гына огыл, тыгак тудым шот дене кучылташ тунемман (Прит. 31:16, 18). Духовный цель-влакым шынде, а нуным шукташлан парымыш ит пуро да кӱлдымӧ арверым ит нал (1 Тим. 6:8).

15, 16. Марлан лекдыме ака-влак погынымашлан могай пайдам кондат? (Маркын 10:29, 30.)

¹⁵ Кунам тый Юмылан келшыше койыш-влакым куштет да кӱлешан моштымашлан тунемат, тиде тыланет ончыкыжым лийын кертше рольлан ямдылалташ полша. Ончалына икмыняр примерым, могай решенийым луктын кертат.

¹⁶ Тый икмыняр жап марлан лекде илен кертат. Иисусын мутшо дене келшышын, южо христиан ӱдырамаш-влак лӱмын марлан огыт лек, кеч нунын калыкыште тыге илаш ок йӧрӧ (Матф. 19:12). Весышт марлан лекнешт, но южо амаллан кӧра шкетын кодыт. Пеҥгыдын ӱшаныза: Иегова ден Иисус огыт шоно, пуйто тый марлан лектын отыл гын, пайдам конден от керт. Уло тӱня мучко марлан лекдыме ака-влак погынымашлан шуко поро пашам ыштат. Нуно весе-влакым йӧратат да нунын верч тыршат. Тидлан кӧра нине христианке-влак весе-влаклан духовный ака ден ава улыт (Маркын 10:29, 30 лудын лекса; 1 Тим. 5:2).

17. Христиан ӱдыр кечыгут служитлымылан кузе ямдылалтын кертеш?

¹⁷ Тый кечыгут служитлыше лийын кертат. Уло тӱня мучко эртаралтше таныклымаш пашаште шукыжым христианке-влак ыштат (Пс. 67:12). Уже кызытак шоналтен кертат мо, кунам кечыгут служитлымым тӱҥалат? Тый пионер лийын, чоҥымаш пашаште тыршен але Вефильыште служитлен кертат. Тиде цель нерген кумал. Тыгай иза-ака-влак дене мутланен нал, кӧ уже пионер улеш, чоҥышо семын служитла але Вефильыште тырша. Нунын деч йод, кузе тиде служитлымашлан ямдылалташ лиеш. А вара цельыш шуаш полшышо планым ыште. Кечыгут служитлымым тӱҥалат гын, тиде решений лукмылан нигунамат от ӧкынӧ. Тунам Иеговалан служымаште тыйын шуко чапле йӧн лектеш.

18. Молан акалан сайын шоналтыман, кӧлан марлан лекташ? (Тыгак сӱретым ончыза.)

¹⁸ Очыни, тый марлан лекташ шонен пыштет. Тиде статьяште лончылымо койыш ден  моштымаш-влак тыланет сай вате лияш полшат. Мутат уке, кӧлан марлан лекташ тылат сайын шоналтыман. Илышыштет тиде эн кугу решений-влак гыч иктыже. Шарне: ойырен налме таҥет тыланет вуй лиеш да тый тудым колыштшаш улат (Рим. 7:2; Еф. 5:23, 33, УТ). Шке дечет йод: «Тудо Христос семын шонаш да ышташ тырша мо? Тудо Иеговам илышыштыже икымше верыш шында мо? Уш-акылан решений-влакым луктеш мо? Йоҥылыш лиймыжым умыла да тидын нерген ойла мо? Ӱдырамаш-влакым пагала мо? Мыланем Иегова дене лишылрак йолташ лияш полшен кертеш мо? Мыйын верч материальный шотышто тыршен кертеш мо? Тудо мылам сай йолташ лиеш мо? Мутым кучен мошта мо? Мутлан, погынымаште тудын могай заданий-влак улыт да кузе тудо нуным шукта?» (Лук. 16:10; 1 Тим. 5:8). Мутат уке, сай марийым муашлан тыланетат сай вате лияш тунемман.

19. Молан полышкалышын рольжо пеш почётан?

¹⁹ Библийыште возымо дене келшышын, сай вате марийжылан «полышкалыше» улеш (Тӱҥ. 2:18). Ӱдырамашын чапшым тиде волта мо? Уке! Полышкалышын рольжо чот почётан. Чынже денак Иеговамат Библийыште чӱчкыдын «полшышо» манме (Пс. 53:6, У Сугынь, 1986; Евр. 13:6). Ватын полышкалыше улмыжо теве кушеч коеш: марийже еш дене кылдалтше решений-влакым луктеш гын, вате нуным илышыш пурташ полша, вет нуно ик команде улыт. Вате Иеговам чот йӧрата, сандене марийжын репутацийже верч тырша да тудын нерген эре сайым ойла (Прит. 31:11, 12; 1 Тим. 3:11). Кузе тыгай вате лияш? Уже кызыт Иегова деке йӧратымашетым вияҥде да ешыште лишылет-влаклан да погынымаште иза-ака-влаклан сай полышкалыше лияш тырше.

20. Ава ешыштыже могай рольым шукта?

²⁰ Очыни, тый ава лият. Марлан лекмеке, тый ава лийын кертат (Пс. 126:3). Сандене сай ава лияш мо полша, ончылгочак шоналташ пайдале лиеш. Мом ме тиде статьяште лончыленна, тыланет сай вате да ава лияш полша. Йӧратымашет, порылыкет да чытымашет ешетлан пиалан лияш полшат да йочада-влак аралымым да йӧратымым шижыт (Прит. 24:3).

21. Каласкален пуыза, молан те христиан ӱдыр-влакым акледа. (Журнал комышто сӱретым ончыза.)

²¹ Христиан ӱдыр-влак, ме тендам йӧратена, вет те Иеговалан да калыкшылан тынар шукым ыштеда! (Евр. 6:10). Те, уло вийым пыштен, шкаланда да весе-влаклан пиалан лияш полшышо койыш ден моштымашым куштеда да тыгак ончыкыжым лийын кертше рольлан ямдылалтыда. Иегован организацийже тендам чот акла!