1. Авраамын ӱшанен вучымыжо шукталтын манын, кушеч коеш?

 ИЕГОВА Авраам йолташыжлан сӧрен: тудын тукымжо гоч мландын чыла калык суапландарыме лиеш (Тӱҥ. 15:5; 22:18). Юмын сӧрымашыже чынжымак шукталтеш манын, Авраам пеҥгыдын ӱшанен. Но жап эртен, Авраам уже 100 ияш лийын, ватыже — 90 ияш, а эргышт алят шочын огыл (Тӱҥ. 21:1—7). Туге гынат Библий гыч ме палена: тудо «шуко калыкын ачаже» лиеш манын ӱшанен вучен (Рим. 4:18). Те паледа: Авраамын ӱшанен вучымашыже шукталтын — тудын шуко жап вучымо Исаак эргыже шочын. Иегова шке сӧрымыжым шукта манын, Авраам молан ӱшанен кертын?

2. Иегова сӧрымыжым шукта манын, Авраам молан пеҥгыдын ӱшанен?

² Авраам Иеговам сайын пален, сандене Юмо сӧрымыжым шукта манын пеҥгыдын ӱшанен (Рим. 4:21). Авраам ӱшанымашыжлан кӧра Иеговалан йӧрышӧ лийын, да Юмо тудым чын ыштышылан шотлен (Иак. 2:23). Римлян-влаклан 4:18 дене келшышын, Авраам Юмылан ӱшанен да Юмын сӧрымыжын шукталтмым ӱшанен вучен. Айста ончен лектына, мом апостол Павел ӱшанен вучымаш нерген Римлян-влаклан колтымо серышыште 5-ше ужаште каласен.

3. Павелын мутшо гыч ӱшан нерген мом пален налына?

³ Павел умылтара, молан ӱшанна огеш шӱлыкаҥде (Рим. 5:5, УТ). Тыгак тудо мыланна умылаш полша: сӧрымашын шукталтмыжлан ӱшанна пеҥгыдемын кертеш. Кузе тудо пеҥгыдемеш, Римлян-влаклан 5:1—5 почеламут-влакыште возымо. Нине почеламут-влакым лончылымо годым шоналтыза,  кузе жап эртымеке ончыкылыклан ӱшанда утыр-утыр вияҥын. Те ужыда: тендан ӱшанда кызытсе деч утларак пеҥгыдемын кертеш. Но ончыч айста ончен лектына, могай сылне ӱшан нерген Павел ойлен.

4. Римлян-влаклан 5:1, 2 почеламут-влакыште мо нерген ойлалтеш?

⁴ Римлян-влаклан 5:1, 2 лудын лекса. Тиде мутым Павел римысе иза-ака-влаклан возен. Шке жапыште нуно Иегова ден Иисус нерген пален налыныт, нунылан ӱшанаш тӱҥалыныт да христиан лийыныт. Сандене ӱшанымашыштлан кӧра Юмо нуным чын ыштышылан шотлаш тӱҥалын да святой шӱлыш дене шӱрен. Тидлан кӧра нуно Юмын сӧрымӧ суапшым налыт манын вучаш тӱҥалыныт.

5. Шӱрымӧ христиан-влак мом ӱшанен вучат?

⁵ Варажым Павел Ефесыште илыше шӱрымӧ христиан-влаклан ӱшан нерген возен, кудыжым Юмо нунылан пуэн: нуно святой-влаклан ямдылыме наследствым налыт (Еф. 1:18). А Колоссышто илыше христиан-влаклан тудо каласен, кушто нуно суапыштым налыт. Тудо возен: «Ӱшанен вучымыдам тыланда пылпомышто ямдылыме» (Кол. 1:4, 5). Шӱрымӧ христиан-влак мом ӱшанен вучат? Нуно кавасе курымашлык илышлан ылыжыт да тушто Христос дене пырля вуйлаташ тӱҥалыт (1 Фес. 4:13—17; Почм. 20:6).

6. Ик шӱрымӧ иза ӱшанен вучымыжо нерген мом каласен?

⁶ Шӱрымӧ христиан-влак нунылан пуымо сӧрымашым чот аклат. Шуко лу ий Юмылан ӱшанлын служитлыше Фредерик Френц иза тиде ӱшан нерген теве мом каласен: «Ӱшанен вучымашна чынжымак шукталтеш. 144 000 шӱрымӧ христиан гыч кажныже Юмын сӧрымыжым налеш. Суапна вучымына деч сайрак лиеш». Тидым Фредерик иза 1991 ийыште каласен. Умбакыже тудо ешарен: «Ме... тиде сӧрымашын шергакан улмыжым монден огынал. [...] Тудын шукталтмыжым мыняр шуко жап вучена, тынар шукырак тудым аклена. Шукталтмым миллион ий вучаш логалеш  гынат, тудым вучаш ямде улына. Кызыт мый ӱшанен вучымым молгунамсе деч шукырак аклем».

7, 8. Мемнан гыч шукышт мом ӱшанен вучат? (Римлян-влаклан 8:20, 21).

⁷ Иегова служитлышыже-влак гыч шукыштлан вес сӧрымашым пуэн. Нуно Авраам семынак Юмын Кугыжанышын вуйлатымыж годым мландыште курымеш илаш ӱшанат (Евр. 11:8—10, 13). Павел тиде чапле сӧрымаш нергенат возен. (Римлян-влаклан 8:20, 21 лудын лекса.) Кунам те ончыкылык нерген библийысе сӧрымаш нерген пален налында, мо тыланда эн чот келшен? Те сулыкдымо лийыда да удам ышташ тендан шонымашат огеш лек манын пален налмеке, очыни, те ӧрында. А можыч, тендам тыгай шинчымаш ӧрыктарен: лишылда-влак ылыжыт да те нунын дене рай мландыште илаш тӱҥалыда. Юмын пуымо сӧрымашлан кӧра те шуко чапле суапым вучен кертыда.

⁸ Кеч каваште, кеч мландыште илаш ӱшанена, ме тиде ончыкылык илышым куанен вучена. Мемнан ӱшанна эше пеҥгыдырак лийын кертеш. Павел умылтарен, кузе ӱшанна пеҥгыдемеш. Айста тудын мутшым ончен лектына. Тиде мыланна Юмын сӧрымыжын шукталтмым эше чотрак вучаш полша.

9, 10. Кузе Павелын примерже ончыкта, могай нелылык дене христиан-влак тӱкнен кертыт? (Римлян-влаклан 5:3). (Тыгак сӱрет-влакым ончыза.)

⁹ Римлян-влаклан 5:3 лудын лекса. Павелын ойлымыж дене келшышын, нелылыкна годым Юмын сӧрымыжын шукталтмылан ӱшанна пеҥгыдемын кертеш. Кузе тыге? Чыным каласаш гын, нелылык дене але орланымаш дене кажне христиан тӱкна. Павелын примержым ончен лектына. Тудо фессалоникысе иза-влаклан каласен: «Орланышаш улына манын, тендан дене лиймына годымак тыланда ончылгоч каласенна ыле. Тыгак лийын, тидым те паледа» (1 Фес. 3:4). А коринфысе христиан-влаклан тудо возен: «Ме моткоч чот, вий шутымо деч утларак кугу нелылыкыш логалынна ыле, илен кодашат ӱшаннам йомдаренна» (2 Кор. 1:8; 11:23—27).

 ¹⁰ Христиан-влак тӱрлӧ нелылык дене тӱкнат (2 Тим. 3:12). Иисус почеш кайымылан кӧра иктаж-могай нелылык дене тӱкненда мо? Можыч, йолташ але родыда-влак тендам мыскылен воштылаш тӱҥалыныт? Але нуно тендан дене торжа лийыныт? Але чыла шотыштат честный лияш кумылдалан кӧра пашаште иктаж-могай нелылык лектын? (Евр. 13:18). Але весе-влаклан ӱшанда нерген каласкалымылан кӧра вуйлатыше-влак тендам поктылаш тӱҥалыныт? Ме кеч-могай нелылык дене тӱкнена гынат, мыланна Павелын мутшо почеш куанаш кӱлеш. Молан?

11. Молан кеч-могай нелылыкым сеҥаш кумылаҥдыме лийшаш улына?

¹¹ Ме куанен кертына, вет нелылык мыланна чапле койышым кушташ полша. Римлян-влаклан 5:3 почеламут дене келшышын, орланымаш мемнам пеҥгыдын шогаш туныкта. Чыла христианым нелылык вуча, сандене мемнан гыч кажныжлан тиде койыш кӱлеш. Пеҥгыдын шогымылан кӧра веле ме чылажымат сеҥена да Юмын сӧрымыжын шукталтмыжым ужын кертына. Мемнан тыгай еҥ-влак семын лиймына ок шу, кудышт нерген Иисус ойлен. Тудо кӱан верыш вочшо пырче-влак нерген каласкален. Тыгай пырче семын улшо еҥ-влак шомакым куанен колыштыт, но «нелылык але поктылмаш толмеке», ӱшанымашыштым вигак йомдарат (Матф. 13:5, 6, 20, 21). Мутат уке, поктылмаште але нелылыкыште нимогай куан уке. Но нелылыкым сеҥена гын, тиде пайдам конда. Айста пален налына могайым.

12. Нелылык-влак могай пайдам кондат?

¹² Иаков палемден, могай пайдам нелылык конда. Тудо возен: «Те чыла шотыштат тичмашлыкыш шуза да ситыдымаш деч посна лийза манын, чытымаш [«пеҥгыдын шогымаш», УТ] шке пашажым тичмашлыкыш шуктышаш» (Иак. 1:2—4). Иаковын каласымыж дене келшышын, пеҥгыдын шогымашын пуйто ала-могай пашаже але заданийже уло, кудыжым тудо шуктышаш. Могай тиде заданий? Мыланна чытымашым, ӱшанымашым вияҥдаш да Юмым колышташ полшаш. Но пеҥгыдын шогымаш деч эше вес пайда уло.

13, 14. Пеҥгыдын шогымаш могай пайдам конда, да ӱшанен вучымашналан тиде кузе влиятла? (Римлян-влаклан 5:4, УТ).

¹³ Римлян-влаклан 5:4, УТ лудын лекса. Павел палемден: «Пеҥгыдын шогымылан кӧра Юмылан йӧрышӧ лият». Тиде ончыкта мо, пуйто Иеговалан келша, кунам те нелылык дене тӱкнеда? Конешне, уке. Но кунам те нелылык годым тудлан ӱшанле кодыда, тудо чот куана. Лач тидлан кӧра Юмылан йӧрышӧ лийыда. Пеҥгыдын шогымынам ужын, Иегова мемнан дене кугешна. Тидым палымаш мемнам чотак куандара! (Пс. 5:13).

¹⁴ Авраам нерген шарналтыза. Тудо кугу нелылык-влак дене тӱкнен, но нуным чытен лектын. Сандене Иегова тудым йолташыже манаш тӱҥалын да чын ыштышылан шотлен (Тӱҥ. 15:6; Рим. 4:13, 22). Юмо тендан нергенат тидымак каласен кертеш. Мемнам йӧрышылан шотлашлан Юмо огеш ончо, могай заданийым ме шуктена да служымаште мыняр ыштена. Эн тӱҥжӧ — нелылык годым тудлан ӱшанле кодаш. Кажныже пеҥгыдын шоген кертеш. Кеч-мыняр ияш улына, кеч-могай ситуацийыште улына да кеч-могай моштымашна уло, кажныже пеҥгыдын шоген кертеш. Те кызыт иктаж-могай нелылык дене тӱкнеда гын, палыза: Иегова тендан ӱшанле улмыдам ужеш. Юмылан йӧрышӧ улына манын умылена гын, тунам Юмо деч суапым налына манын ӱшан эше чотрак пеҥгыдемеш.

15. Римлян-влаклан 5:4, 5, УТ почеламут-влакыште Павел мом ойла, да тушто возымыжо молан иктаж-кӧм аптыратен кертеш?

¹⁵ Павел умылтарен: нелылык годым Иеговалан ӱшанле кодына гын, тудлан йӧрышӧ лийына. Ончалза, кузе Павел шонкалымыжым умбакыже шуя: «Юмылан йӧрышӧ лиймаш Юмын сӧрымыжӧ шукталтеш манын ӱшаным пуа, а тиде ӱшан огеш шӱлыкаҥде» (Рим. 5:4, 5, УТ). Тиде шомакым лудын, еҥ-влак аптыранен кертыт. Молан? Молан манаш гын, изиш ондакрак, Римлян-влаклан 5:2 почеламутышто, Павел теве мом палемден: римысе христиан-влак, Юмо нуным чапландара манын, уже ӱшанен вученыт. Молан тугеже Павел угыч ӱшан нерген ойла?

16. Умылтарыза, кузе Юмын сӧрымыжын шукталтмылан ӱшан пеҥгыдемеш. (Тыгак сӱрет-влакым ончыза.)

¹⁶ Кузе ме ончен лекна, Юмын сӧрымыжын шукталтмылан ӱшанна, жап эртымеке, пеҥгыдемын кертеш. Тидым шотыш налаш гын, Павелын мутшым умылаш куштылгырак лиеш. Шарналтыза, кузе те мландын райыш савырнымыже да курымеш илаш йӧн нерген пален налында. Мутат уке, пален налмыда тендам чот куандарен, но тидлан ӱшанаш йӧсӧ лийын. Вара те Иегова нерген да библийысе сӧрымаш-влак нерген шукырак шинчымашым налаш тӱҥалында. Тидлан кӧра те ужында: ӱшанен вучымыда чынжымак шукталтеш.

17. Тынеш пурымеке, Юмын сӧрымыжын шукталтмылан ӱшанда молан кӧра пеҥгыдемын?

¹⁷ Юмылан ӱшанле лияш сӧрымашым пуымеке да тынеш пурымеке, Иегова нерген шинчымашда да тудын дек йӧратымашда умбакыжат кушкын. Тидын дене пырля Юмын сӧрымашыжлан ӱшанда пеҥгыдемын веле (Евр. 5:13—6:1). Очыни, мо нерген Римлян-влаклан 5:2—4 почеламут-влакыште возымо, те шке илышыштыда ужында. Те тӱрлӧ нелылык дене тӱкненда, но нуным сеҥен, Юмылан йӧрышӧ улыда манын шижында. Те паледа: Юмо тендам йӧрата, сандене чыла шке сӧрымыжым шукта. Ӱшанен вучымашда  шукталтеш манын, тендан шуко доказательстве уло. Те Юмын пуымо сӧрымашыжым Библийым шымлаш тӱҥалме годсо деч эше чотрак акледа. Юмын сӧрымашыже-влак шукталтыт манын, пеҥгыде ӱшанымаш илышыштыда раш коеш: родо да лишыл-влак дене шкем кучымаште, решений-влакым лукмаште да жапым кучылтмаште.

18. Иегова могай гарантийым пуа?

¹⁸ Юмылан йӧрышӧ улына манын палена гын, тиде мыланна Юмын сӧрымыжын шукталтмылан пеҥгыдын ӱшанаш полша. Ӱшанен вучымына чынжымак шукталтеш манын, Павел мемнам теве кузе ӱшандара: «Ӱшан огеш шӱлыкаҥде, вет Юмо шке йӧратымашыжым мыланна пуымо святой шӱлыш гоч шӱмышкына опталын» (Рим. 5:5, УТ). Тиде шомак дене Иегова мыланна гарантийым пуа: шке мутшым тудо шукта да чыла ӱшанен вучымына шукталтеш.

19. Ӱшанен вучена гын, мемнам могай суап вуча?

¹⁹ Авраам нерген шоналтыза. Тудо Юмын сӧрымыжын шукталтмым вучен. Юмо тудым чын ыштышылан да шке йолташыжлан шотлен. Авраамын вучымыжо арам лийын огыл. Библийыште ойлалтеш: «Тыгеракын, чытен вучымыж дене Авраам сӧрымым налын» (Евр. 6:15; 11:9, 18; Рим. 4:20—22). Юмо тудым ондален огыл. Иеговалан ӱшанле кодыда гын, теат суапым налыда. Куанашлан тендан шуко амал уло, вет те паледа: ӱшанен вучымыда чынжымак шукталтеш. Те ондалалтме ода лий! (Рим. 12:12). Павел возен: «Ӱшанен вучаш йӧным ыштыше Юмо тендам ӱшанымаштыда тек куан да тыныслык дене тема‚ тунам те Святой Шӱлышын куатше гоч ӱшанен вучымаш дене темыда» (Рим. 15:13).