1, 2. Мом ме Библий гыч южо Израильысе кугыжа-влак нерген пален налына?

 БИБЛИЙЫШТЕ 40 утла Израильысе кугыжа нерген ойлалтеш a. Юмын Мутшо почын палдара, могай паша-влакым нунын гыч южышт ыштеныт. Сай кугыжа-влакат южгунам уда пашам ыштеныт. Мутлан Давид кугыжам налына. Иегова тудын нерген каласен: «Давид служитлышем... чыным гына ыштен, уло шӱмжӧ дене мыланем служитлен» (1 Цар. 14:8). Но тугодымак Давид вес пӧръеҥын ватыж дене мален да тудын марийже сарыште колыжо манын, чылажымат ыштен (2 Сам. 11:4, 14, 15).

² Тугодымак ӱшанле огыл кугыжа-влак гыч шукышт южгунам чын ыштеныт. Нунын коклаште Ровоам лийын. Тудо осалым ыштен манын, Иегова каласен (2 Лет. 12:14). Туге гынат, кунам Израильысе 10 тукым ойырлаш да шкаланышт у кугыжам сайлен налаш шонен пыштен, Ровоам Иеговам колыштын да калыкше дене кредалаш каен огыл. Тыгак тудо Иудейысе ола-влакым пеҥгыдемден, да тидлан кӧра тушто илыше-влак нуно аралыме улыт манын шижыныт (1 Цар. 12:21—24; 2 Лет. 11:5—12).

3. Могай йодыш лектеш да мом ме тиде статьяште ончен лектына?

³ Тыгай йодыш лектеш: Израильысе кугыжа-влак сай паша-влакымат, уда паша-влакымат ыштеныт гын, молан тугеже Иегова иктыштым ӱшанлылан шотлен, а весыштым ӱшанле огыллан? Тиде йодышлан вашмут мыланна умылаш полша,  мом Юмо мемнан деч вуча. Могай кугыжам сайлан шотлаш, а могайжым — удалан, Иегова мом шотыш налын? Нунын шӱмыштым, ӧкынымыштым да чын кумалмаш дек отношенийыштым. Нине кум факторым ме тиде статьяште лончылен налына.

НУНО УЛО ШӰМ ДЕНЕ СЛУЖИТЛЕНЫТ

4. Ӱшанле кугыжа ден ӱшанле огыл кугыжа-влак коклаште ойыртем-влак гыч иктыже могай лийын?

⁴ Иеговалан келшыше кугыжа-влак тудлан уло шӱм b дене служитленыт. Сай Иосафат кугыжа нерген тудо Иеговалан уло шӱмжӧ дене служитлен манын, Библийыште возымо (2 Лет. 22:9). Иосия нерген Библийыште ойлалтеш: «Иосия Иегова дек пӧртылын да... тудлан уло шӱм... дене служитлен. Тыгай кугыжа туддеч ончычат, туддеч варажымат лийын огыл» (2 Цар. 23:25). А мом ме Соломон нерген палена, кудыжо илышын мучаштыже уда кугыжаш савырнен? Тудын шӱмжӧ Иегова Юмыжлан тӱрыснек ӱшанле уже лийын огыл манын, Библийыште возымо (1 Цар. 11:4). Вес ӱшанле огыл Авиям лӱман кугыжа нерген ме лудына: «Тудо... Иегова Юмыжлан уло шӱмжӧ дене ӱшанле лийын огыл» (1 Цар. 15:3).

5. Иеговалан уло шӱм дене служитлымаш мом ончыкта? Умылтарыза.

⁵ Иеговалан уло шӱм дене служитлымаш мом ончыкта? Тиде теве мом ончыкта: айдеме Юмылан служитлышаш улам манме шонымаш дене гына огеш служитле. Тудо Юмым йӧрата да келгын пагала. Ӱмыр мучкыжо тудо Юмылан ӱшанле кодеш, да тудым йӧратымашыже нигунамат огеш йӱкшӧ.

6. Кузе ме шӱмнам арален кертына? (Притчи 4:23; Матфейын 5:29, 30).

⁶ Кузе ме сай кугыжа-влак деч примерым налын да Иеговам уло шӱм дене йӧратен кертына? Мо шӱмнам пужен кертеш, чылаж дечат шкенам аралыман. Мутлан, мыланна эскераш кӱлеш, мом ончена але яра жапым эртарыме годым мом ыштена. Тыгак йолташ-влакым ойырен налме годым мыланна тӱткӧ лийман. А эше шонымашна-влак окса ден арвер-влак нерген гына лийшаш огытыл. Иеговам йӧратымашна йӱкша манын шижына гын, чылаж дечынат, мо тудын дене кыл кучымашнам пудырта, вигак утлаш кӱлеш. (Притчи 4:23; Матфейын 5:29, 30 лудын лекса.)

7. Молан шкенам аралаш кӱлеш чылаж дечат, мо Иеговам йӧратымынам йӱкшемден кертеш?

⁷ Шӱмнам молан аралаш кӱлеш? Иктаж-кӧ шонен кертеш, пуйто шуко духовный пашам ыштет гын, тиде тӱнян уда влиянийже эҥгекым тыланет огеш кондо. Но тиде тыге огыл. Примерым кондена. Мутлан, те йӱштӧ кечын мардежыште кылменда. Мӧҥгыш толын, те отопленийым чӱктеда. Но омсам ода петыре гын, пӧртда ыра мо? Конешне, уке. Вет урем гыч пӧртышкыда йӱштӧ пура. Тыгакак Иегова дене кыл кучымашна ынже йӱкшӧ манын, духовный шотышто кочкаш гына огеш сите. Тыгак тиде тӱнян уда влиянийже мыланна эҥгекым ынже кондо манын, «омсам петыраш» кӱлеш. Уке гын, йӱштӧ мардеж семын тиде тӱнян шонымашыже-влак шӱмышкына пурен, Иеговам йӧратымынам йӱкшемден кертыт (Еф. 2:2).

НУНО СУЛЫКЫМ ЫШТЫМАШТЕ ӦКЫНЕНЫТ

8, 9. Кунам Давид ден Езекиям тӧрлатеныт, нуно мом ыштеныт? (Сӱретым ончыза.)

⁸ Кузе ме уже ойленна, Давид кугыжа кугу сулыкым ыштен. Но кунам Нафан пророклан кӧра тудо умылен налын, могай шӱм-чон корштымашым Иеговалан конден, тудо уло шӱм дене ӧкынен (2 Сам. 12:13). Юмо тудым ынже наказатле манын, Давид Нафаным ондалаш да ӧкынышыла кояш тӧчен огыл. 50-ше Псалом гыч пален налына: тудо чынжымак ӧкынен (Пс. 50:5, 6, 19, тӱҥалтыш мут).

 ⁹ Езекия кугыжат Иегова ваштареш сулыкым ыштен. Библийыште каласыме: «Езеки́ян шӱмжӧ кугешнен... Тидлан верч Юмын тудлан да Иудея ден Иерусалимлан шыдыже лектын» (2 Лет. 32:25). Молан Езекия кугешнаш тӱҥалын? Очыни, поянлыкшылан кӧра, ассирий еҥ-влакым сеҥен налмылан кӧра але Иегован тудым ӧрыктарышын паремдымыжлан кӧра. Векат, тудо лач уло пого дене кугешнымыжлан кӧра вавилонян-влак ончылно моктанаш тӱҥалын. Исайя пророк Езекиялан Иегова тудлан сырен манын каласен (2 Цар. 20:12—18). Но Давид семынак Езекия уло шӱм дене ӧкынен (2 Лет. 32:26). Юмо тиде кугыжам сай але уда кугыжалан шотлен? Иегова Езекиям ӱшанлылан шотлен да тудо чыным ыштен манын каласен (2 Цар. 18:3).

10. Амация кугыжа, пророкын шомакшым колмеке, мом ыштен?

¹⁰ Давид да Езекия дене таҥастарымаште Амация лӱман Иудейысе кугыжа Иегован шинча ончылныжо чыным ыштен, но уло шӱмжӧ дене огыл (2 Лет. 25:2). Могай йоҥылышым тудо ыштен? Иегова Амациялан эдомитян-влакым сеҥен налаш полшен. Тидын деч вара Амация нунын юмышт-влаклан кумалаш тӱҥалын c. Тунам Иегова тудын дек пророкшым колтен. Но кугыжалан пророкын шомакше келшен огыл. Амация тудым поктен колтен, эсогыл пророклан ойлен пытарашат пуэн огыл (2 Лет. 25:14—16).

11. 2 Коринфян-влаклан 7:9, 11 дене келшышын, Иегова мемнам проститлыже манын, мом ыштыман? (Тыгак сӱрет-влакым ончыза.)

¹¹ Нине пример-влак мемнам мо́лан туныктат? Сулыкым ыштымаштына ӧкынаш да нуным угыч ышташ огыл тыршаш кӱлеш. Кугурак иза-влак мыланна каҥашым пуэныт гын, а мыланна чучеш, пуйто ме пешыжак кугу йоҥылышым ыштен огынал, тунам мом ыштыман? Шонаш ида вашке, пуйто те кугурак иза-влаклан ода келша але Иегова тендам огеш йӧрате. Вет Израильын сай кугыжаж-влакымат Иегова южгунам тӧрлатен (Евр. 12:6). Кунам мемнам тӧрлатат, мыланна кӱлеш: 1) каҥашым пуышо айдемым ӱҥышын колышташ; 2) кӱлешан вашталтышым ышташ да 3) Иеговалан уло шӱм дене умбакыжат служитлаш. Сулыкым ыштымаштына ӧкынена гын, Юмо мемнам проститла. (2 Коринфян-влаклан 7:9, 11 лудын лекса.)

НУНО ИЕГОВАЛАН КЕЛШЫШЫН СЛУЖИТЛЕНЫТ

12. Ӱшанле кугыжа-влак ӱшанле огыл кугыжа-влак деч мо дене ойыртемалтыныт?

¹² Ӱшанле кугыжа-влак Иеговалан келшышын кумалыныт да тидлан Юмын калыкшым туныктеныт. Мутат уке, нине кугыжа-влак идеальный лийын огытыл да йоҥылышым ыштеныт. Но нуно Иеговалан тӱрыснек ӱшанле лийыныт да шке кундемыштым шоя юмо-влаклан кумалмаш деч лӱдде эрыктеныт d.

13. Молан Иегова Ахавым чын огыл кугыжалан шотлен?

¹³ А мом ӱшанле огыл кугыжа-влак нерген каласаш лиеш? Нуно удам гына ыштен иленыт мо? Уке. Мутлан, кунам осал Ахав кугыжа тудын верч Навотым пуштыныт манын колын, тудын кумылжо чот волен да тудо шкенжым Иегова ончылно изишак ӱҥышемден (1 Цар. 21:27—29). Тыгак тиде кугыжа ола-влакым чоҥен да Израильын тушманже-влак дене кредалын (1 Цар. 20:21, 29; 22:39). Но тудо Иегован шинча ончылныжо осалым ыштен. Ватыжым колыштын, тудо Израиль кундемыште шоя юмо-влаклан кумалмым вияҥден  да тидым ыштымаште нигунамат ӧкынен огыл (1 Цар. 21:25, 26).

14. a) Молан Иегова Ровоам кугыжам ӱшанле огыллан шотлен? б) Чыла ӱшанле огыл кугыжа-влак мо шотышто икгай лийыныт?

¹⁴ Эше ик ӱшанле огыл Ровоам лӱман кугыжа нерген мутланен налына. Кузе 2-шо абзацыште палдарыме лийын, Ровоам вуйлатымыж годым шуко сай пашам ыштен. Но кунам тудын властьше пеҥгыдемын, тудо Иегован законжым коден да шоя юмо-влаклан кумалаш тӱҥалын (2 Лет. 12:1). Ту жап гыч тудо эре то Иеговалан, то шоя юмо-влаклан кумалын (1 Цар. 14:21—24). Ровоам ден Ахав гына огыл, моло-влакат Иеговалан ӱшанле лийын огытыл. Израильыште ӱшанле огыл кугыжа-влак гыч шукышт шоя юмо-влаклан кумалыныт да калыкымат тидым ышташ таратеныт. Лектеш, Иегова кугыжам сайлан але удалан шотлаш решенийым лукмыж годым тиде кугыжан чын кумалмаш дек отношенийжым шотыш налын.

15. Молан Иеговалан садиктак огыл, кузе айдеме Юмылан кумалеш?

¹⁵ Молан кумалмаш Иеговалан кугу значениян лийын? Икымше, кугыжа-влак калыклан примерым ончыктышаш ыльыч, кузе Юмылан кумалаш. Кокымшо, шоя юмо-влаклан кумалмаш уда лектышым конда: еҥ-влак вес кугу сулык-влакымат ышташ да лишылышт дене несправедливый лияш тӱҥалыт (Ос. 4:1, 2). Кумшо, уло калык, ты шотыштак кугыжа-влак, Иеговалан ойырен налме лийын. Сандене Библий нунын шоя юмылан кумалмыштым пелаш деч ӧрдыж коштмо дене таҥастара (Иер. 3:8, 9). Айдеме, кудыжо пелашыжлан ӱшанле огыл, тудлан кугу шӱм-чон корштымашым конда. Тидымак Иегова  шижеш, кунам тудын служитлышыже тудым кода да иктаж-кӧлан але иктаж-молан кумалаш тӱҥалеш (Втор. 4:23, 24) e.

16. Иегован шонымаштыже, чын ыштыше еҥ осалым ыштыше деч мо дене ойыртемалтеш?

¹⁶ Могай урок-влакым ме налнена? Мо шоя кумалмаш дене кылдалтын, чылаж дечынат мыланна кораҥаш кӱлеш. Но эше мыланна Юмылан тыге кумалман, кузе тудо мемнан деч вуча, да умбакыжат служымаште тыршыман. Малахия пророк раш ончыктен, мо дене, Иегован шонымаштыже, сай айдеме уда айдеме деч ойыртемалтеш. Тудо возен: «Чын ыштыше да осалым ыштыше коклаште, Юмылан служитлыше-влак да тудлан служитлыше огыл коклаште ойыртемым те угыч ужыда» (Мал. 3:18). Сандене Юмылан служитлымашналан нимо ынже мешае манын вийым пыштыман. Мутлан, южгунам ситыдымашна-влак але йоҥылышна-влак мемнам чот шӱлыкаҥден кертыт. Садлан кидым волташ кумылна лектын кертеш. Но мыланна служитлымынам чарнаш огеш кӱл, вет тиде кугу сулыклан шотлалтеш.

17. Пелашым ойырен налме годым молан тӱткӧ лийман?

¹⁷ Те ешым чумыраш шонеда гын, келшен толшо пелашым муаш тыланда Малахиян шомакше полшен кертеш. Мутлан, айдемын сай койышыж-влак улыт. Но тудо Иеговалан огеш служитле. Тунам Иегова тыгай айдемым чын ыштышылан шотлаш тӱҥалеш мо? (2 Кор. 6:14). Те тыгай айдеме дене мужыраҥыда гын, тудо тыланда Иегова дек лишемаш полшен кертеш мо? Шоналтыза теве мо нерген: Соломонын ватыже-влакын тӱрлӧ сай койышышт лийын докан. Но нуно Иеговалан служитлен огытыл да шоя юмо-влаклан кумалмаште тудым  шке могырышкышт савыреныт (1 Цар. 11:1, 4).

18. Мо́лан ача-ава-влак йочаштым туныктышаш улыт?

¹⁸ Ача-ава-влак, икшывыда-влаклан Иеговалан служитлаш кумылым ылыжташлан тиде статья гыч шонымаш-влакым кучылтса. Нунылан умылаш полшыза, молан Юмо ик кугыжа-влакым сайлан шотлен, а весыштым удалан. Юмо теве мом шотыш налын: нине кугыжа-влак тудлан гына кумалыныт але уке да тидлан весе-влакым туныктеныт але уке. Икшывыда-влакым мут ден примерда дене туныктыза: духовный паша-влак, мутлан, Библийым шымлымаш, вашлиймашыш коштмаш, служитлымаш, илышыште икымше верыште лийшаш улыт (Матф. 6:33). Икшывыда умылышаш: тудлан шкаланже Иегова дене лишыл кыл кучымашым вияҥдаш кӱлеш. Тудо шонышаш огыл: Иегован Таныкше-влакын ешыштышт кушкын гын, тиде амаллан кӧра тудат Танык лийшаш. Уке гын, тудо Иеговалан кумалмашым илышыштыже кокымшо верыш шынден але пӱтынек Иегова деч кораҥын кертеш.

19. Иегова дек пӧртылаш шонышо-влаклан мом ыштыман? (Тыгак « Те Иегова дек пӧртылын кертыда!» рамкым ончыза.)

¹⁹ Иктаж-кӧ Иеговалан служитлымым чарнен гын, тиде ончыкта мо, пуйто уже нигунамат Иегован йолташыже лийын огеш керт? Уке. Вет тудо ӧкынен да Юмо дек пӧртылын кертеш. Тидлан тыгай айдемылан ӱҥышӧ лийман да кугурак иза-влак деч полышым налман (Иак. 5:14). Тиде куштылго огыл лийын кертеш. Но Иегова дене угыч йолташ лиймаш моткоч шуко пайдам конда.

20. Ӱшанле кугыжа-влак деч примерым налына гын, Иегован шонымаштыже, могай айдеме лийына?

²⁰ Мом ме тиде статья гыч пален налынна? Мыланна ӱшанле кугыжа-влак деч примерым налман. А тидлан шӱмнам аралыман да Иеговалан тӱрыснек ӱшанле лийман. Айста йоҥылышна гыч урокым налына, сулыкым ыштымаште уло шӱм дене ӧкынена да каҥаш-влакым колыштына. Тыгак шарнаш тӱҥалына, мыняр чот ик чын Юмылан кумалаш кӱлешан. Чыла тидым ыштена гын, тудо мемнам чын ыштышылан шотлаш тӱҥалеш.