Никола́ ден Сели́на вес нелылык дене тӱкненыт. Француз филиал нуным у погынымашыш куснаш йодын. Нуно каласкалат: «Куснымылан ме чот куаненна. Но варажым йолташна-влак верч йокрокланаш тӱҥалынна. А верысе иза-ака-влак дене ме эше тынар чот сайын палыме лийын огынал» a. Лийын кертше нелылыкым шотыш налын, у погынымашлан тунемаш тыланда мо полшен кертеш? Кузе верысе иза-ака-влак полшен кертыт? Куснымаш тыландат, у погынымашландат куаным кондыжо манын, мом ышташ лиеш?

ПОЛШЕН КЕРТШЕ НЫЛ ПРИНЦИП

1. Иегован полшымыжлан ӱшаныза (Пс. 36:5). Кадзу́ми, Японий гыч акана, погынымаштыже 20 ий лийын. Но вара марийжын пашаже верч тудлан вес вере куснаш логалын. Кузе тудо шке «корныжым Иеговалан ӱшанен пу[эн]»? Тудо каласкала: «Южгунам мый тургыжланенам да шкет кодмыла шкем шижынам, а южо годым мом ышташат пален омыл. Но мый чылажымат Иеговалан каласкаленам, да кажне гана тудо мыланем вийым пуэн шоген».

У ситуацийыште Иегован полшымыжлан ӱшанаш тыланда мо полшен кертеш? Кузе кушкыллан кушкашлан вӱд ден рок гыч пайдале вещества-влак кӱлыт, тыгак ӱшанымашлан образный вӱд ден пайдале вещества-влак кӱлыт. Уже палемдыме Никола иза Авраам, Иисус да Павелын илышыштым шымлен лектын. Нине пӧръеҥ-влак шке кумылыштым огыл, а Юмын эрыкшым шукташлан илышыштым вашталтеныт. Нунын примерышт изанам пеҥгыдемден. Иегова тудланат полша манын, тудо эше чотрак ӱшанаш тӱҥалын. Кажне арнян эртаралтше Библийым шке  вуя шымлымаш тыланда илыш вашталтышлан тунемаш полша. Тыгак тудо тендан ӱшанымашдам пеҥгыдемда да те эре у погынымаш гыч иза-ака-влакым иктаж-могай духовный шонымаш дене кумылаҥден кертыда.

2. Ида таҥастаре (Эккл. 7:10). Кунам Жюль иза Бенин гыч Ушымо Штат-влакыш илаш куснен, тудо йӧршынак вес культур дене тӱкнен. «Мый йодыш-влак деч ноенам. Мыйын тыгай шижмаш лийын, пуйто чылаштат мыйын нерген чылажымат пален налнешт», — шарналтен ойла тудо. Жюль тыгайлан тунемын огыл да садлан иза-ака-влак деч кораҥаш тӱҥалын. Но нуным сайрак пален налмеке, тудын шонымыжо вашталтын. Жюль манеш: «Ындыжым мый умылем: еҥ-влак чынже денак чыла вере икгай улыт. Нуно просто шижмашыштым тӱрлӧ семын ончыктат. Сандене могай улмышт дене келшаш кӱлеш». Тугеже у погынымашдам тошто дене ида таҥастаре. Теве мом А́нна-Ли́за лӱман пионер ака каласен: «У погынымаште тошто погынымаште гаяк чылажат лиеш манын, мый вучен омыл. Мый вет лачак иктаж-мом уым почашлан кусненам».

Кугурак иза-влакланат кодшо погынымаш дене таҥастарыме деч кораҥман. У погынымаште иза-влак иктаж-мом вес семын ыштат гын, тиде эше огеш ончыкто, пуйто нуно тидым йоҥылыш ыштат. Сандене нуным тӧрлатыме деч ончыч сайрак лиеш ыле умылаш, молан нуно тыге ыштат (Эккл. 3:1, 7б). Шке шонымет почеш ышташ иза-влакым таратыме олмеш, лучо нунылан сай примерым ончыкташ (2 Кор. 1:24).

3. У погынымаштыда шуко тыршыза (Флп. 1:27). Куснымаш шуко жап ден вийым налеш гынат, верысе погынымашын вашлиймашкыже кошташ тӱҥалаш чотак кӱлешан. Кертме семын видеосвязь гоч лекташ огыл, а тушко толаш тыршыза. Вет иза-ака-влак тендам нигунам але шагал ужыныт гын, кузе нуно тыланда полшат? Люси́нда, кудыжо кок ӱдыржӧ дене пырля Кечывалвел Африкыште кугу олаш илаш куснен, шарналтен ойла: «Йолташ-влак вашкерак погынымашын пашашкыже вуйге пураш мемнам таратеныт: весе-влак дене пырля таныклаш да вашлиймаште комментарийым пуаш. А эше ме пӧртыштына таныклымашлан вашлиймашым эртараш темленна».

У погынымаш гыч иза-ака-влак дене тӱрлӧ духовный пашаште тыршыза. Тиде тыландат, нуныланат вийым пуа. Кугурак иза-влак Анна-Лизам кажне уверзе дене таныклаш кумылаҥденыт. Лектышыже могай лийын? Ака ойла: «Мый вашке умыленам: лачак тидлан кӧра тый у духовный еш дене йолташ лият». Вашлиймаш залым эрыктымаште да ончымаште тыршыза. Тыге те у погынымашым шкендан погынымашланда вашкерак шотлаш тӱҥалыда. У погынымаште шукырак тыршеда гын, тунам вашкерак у погынымаш гыч иза-ака-влак тыланда еш семын лийыт.

4. У йолташ-влакым кычал муза (2 Кор. 6:11—13). Весе-влаклан нунын верч азапланымыдам ончыктеда гын, тунам тыланда нунын  дене йолташ лияш куштылгырак лиеш. Вашлиймаш тӱҥалме деч ончычрак толаш тыршыза да вашлиймаш пытыме деч вара вигак ида кай. Тунам иза-ака-влак дене мутланаш да нунын дене сайрак палыме лияш жапда лиеш. Лӱмыштым шарнен кодаш цельым шындыза. Еҥ-влаклан келша, кунам нуным лӱмышт дене ойлат. Поро да мутланаш ямде лийза. Тиде весе-влакым тендан деке лишемда, да, очыни, лишыл жапыште тендан у йолташ-влак лийыт.

Уло вийым пыштен, весе-влаклан келшаш ида тырше. У иза-ака-влаклан тендам пален налаш пуыза. Теве мом Люсинда ойла: «Ме шке декна иза-ака-влакым ӱжынна. Тыге ме сай йолташ-влакым муынна».

«ПРИНИМАТЛЫЗА ИКТЕ-ВЕСЫМ»

Южышт Вашлиймаш залыш каяш лӱдыт, вет нуно тушто иктымат огыт пале. Кузе мемнан гыч кажныже погынымашкына куснышо-влаклан полшен кертеш? Апостол Павел возен: «Приниматлыза икте-весым, кузе и Христос тендам приниматлен» (Рим. 15:7, У Сугынь, 1986). Христосын примерже почеш кугурак иза-влак куанат, кунам у иза-ака-влак погынымашышкышт куснат, да тидым паша дене ончыктат. (« Куснымаш сайын эртыже манын, мом ыштыман?» рамкым ончыза.) Но у иза-ака-влаклан шкеныштым ешыште гай шижаш кугурак иза-влак гына огыл полшен кертыт. Тидым погынымаште чылаштат, йоча-влакат, ыштен кертыт.

Кузе ме у иза-ака-влакым приниматлен кертына? Нуным унала ӱжаш лиеш. А эше полышым темлен кертына. Мутлан, ик ака вес олаш илаш куснен. Ту верысе пионер ака тудлан экскурсийым ыштен да умылтарен, кузе общественный транспортым кучылташ. Тиде полыш у акан шӱмжым чот тарватен да тудлан вашкерак у олаште илаш тунемаш полшен.

КУШКАШ ЙӦН

Шудо шырчык чоҥештен кертше манын, тудын шулдыржо вияҥшаш. А тидын деч ончыч тудо коваштыжым икмыняр гана кудалта. Кузе тиде  пример вес погынымашыш куснышо-влаклан пайдале лийын кертеш? Тыланда чыла тургыжланымаш деч утлаш кӱлеш, кудыжо тыланда шулдырдам шаралташ да уло вийын Иеговалан служитлаш мешая. Никола ден Селина ойлат: «Куснымаш — тиде сай тренажёр. У ситуацийыште да у еҥ-влак дене мыланна у койыш-влакым кушташ логалын». Жан-Шарль ойла, кузе куснымаш уло ешыжлан влиятлен: «Мемнан йочана-влак у погынымаште пеледыш семын тӱзланаш тӱҥалыныт. Уже икмыняр тылзе эртымеке, ӱдырна арня покшелне вашлиймаште заданий-влак дене лекташ тӱҥалын, а эргына тынеш пурыдымо уверзе лийын».

Таныклашлан вес верыш илаш куснымыда шуэш, но тидым ыштен ода керт гын, кузе лийман? Тунам тиде статья гыч каҥаш-влакым шкендан погынымаште кучылташ тыршыза. Тиде тыланда шке погынымаштыда шукырак куаным налаш полша! Ӱшанымашдам умбакыжат пеҥгыдемдыза. Погынымаште полышдам темлыза. Тӱрлӧ иза-ака-влак дене таныклыза. У йолташ-влакым кычалза да тошто йолташ-влак нерген ида мондо. Шоналтыза, кӧлан те погынымаште полшен кертыда. Христиан йӧратымашым ончыктен, те Иегова дене эше лишылрак лийыда да тудлан йӧрышӧ улмыдам шижыда (Иоан. 13:35). Вет «тыгай надыр Юмылан келша» (Евр. 13:16).

Чынак, вес верыш куснышо-влак тӱрлӧ нелылык дене тӱкнат. Но иза-ака-влак гыч шукышт нуным сеҥен кертыныт да у верыште пиалан улыт. Тенданат чылажат лектеш! «Вес верыш куснымылан кӧра мый ужынам: шӱмыштем чылаштланат вер ситышын уло — у йолташ-влакланат, тошто-влакланат», — каласкала Анна-Лиза. Кадзуми ойла: «Куснымаш мыланем Иеговам вес могыр гыч пален налаш йӧным пуэн. Кызыт мый тудлан чотрак ӱшанем». А Жюль манеш: «Мый йолташ-влакым муынам да шкем мӧҥгыштӧ гай шижам. Тиде погынымаш мыланем еш семын лияш тӱҥалын. Ындыжым тиде погынымашым кодаш мыланем йӧсӧ лиеш».