1, 2. Цадок кӧ лийын? (1 Летопись 12:22, 26—28).

 ШОНАЛТЫЗА, кузе 340 000 утла пӧръеҥ Хеврон воктенысе кӱ курыкан верыште погынен. Нуно Давидым Израиль кугыжалан шогалташлан тушко толыныт. Тушто кум кече мучко нуно куаненыт, мутланеныт да моктымаш муро-влакым муреныт (1 Лет. 12:39). Нине пӧръеҥ-влак коклаште Цадок лӱман рвезе лийын. Тудо весе-влак деч, очыни, нимо дене ойыртемалтын огыл. Но Иегова тудым ужын да мыланнат тудын нерген палдарынеже ыле. (1 Летопись 12:22, 26—28 лудын лекса.) Цадок кӧ лийын?

² Цадок священник лийын. Тудо Авиафар первосвященник дене пырля служитлен. Тыгак Юмо Цадоклан шуко уш-акылым да тудын эрыкшым умылаш моштымашым пуэн (2 Сам. 15:27). Сандене еҥ-влак Цадок дене тӱрлӧ йодыш шотышто каҥашеныт. А эше тудо лӱддымылык дене ойыртемалтын. Тиде статьяште ме лач тиде койыш нерген мутланен налына.

3. а) Молан Иегован служитлышыже-влаклан лӱддымӧ лияш кӱлеш? б) Мом ме тиде статьяште ончен лектына?

³ Тиде пытартыш кечылаште Сатана эше чотрак Иеговалан ӱшанымашнам лушкыдемдаш тырша (1 Пет. 5:8). Ме чот вучена тыгай жапым, кунам Иегова Сатаналан да тудын осал тӱняжлан мучашым пышта. Но тиде жап толмешке, мыланна лӱддымӧ лийман (Пс. 30:25). Айста кум йӧным ончен лектына,  кузе ме Цадок деч лӱддымылык шотышто примерым налын кертына.

ЮМЫН КУГЫЖАНЫШЫН МОГЫРЫШТЫЖО ШОГЕНА

4. Юмын Кугыжанышын могырыштыжо шогашлан молан лӱддымылык кӱлеш? (Тыгак сӱретым ончыза.)

⁴ Ме, Иегован служитлышыже-влак, уло шӱм дене Юмын Кугыжанышын могырыштыжо шогена (Матф. 6:33). Но тиде южгунам куштылго огыл. Мутлан, Сатанан осал тӱняштыже Иегован нормыжо почеш илаш да Юмын Кугыжанышын поро уверже нерген каласкалашлан лӱддымылык кӱлеш (1 Фес. 2:2). Тыгак тиде тӱняште политический ӱчашымаш шукемеш веле. Сандене нимогай политикын могырыш шогалаш огыл манын, мыланна лӱддымӧ лийман (Иоан. 18:36). Иегован Таныкше-влак армийыш огыт кай да политикыш огыт пуро. Сандене нунын гыч шукышт материальный нелылык дене тӱкнат, нуным кырат але казаматыш шындат.

5. Давидлан полшаш манын, молан Цадоклан лӱддымылык кӱлын?

⁵ Цадок Хевроныш Давидын кугыжаланаш тӱҥалмыжым пайремлаш гына толын огыл. Пеленже тудо сарӱзгарым конден да кучедалаш ямде лийын (1 Лет. 12:38). Давидын могырыштыжо шоген, тудо Израильым тушманже-влак деч аралаш кумылаҥдыме лийын. Цадок священник семын служитлен, сандене, очыни, кучедалмаште тудын кугу опытшо лийын огыл. Но тудо чот лӱддымӧ айдеме лийын.

6. Молан Давид лӱддымылык шотышто Цадоклан сай пример лийын? (Псалом 137:3).

⁶ Цадоклан лӱддымӧ лияш мо полшен? Пеленже виян да лӱддымӧ еҥ-влак лийыныт. Мутат уке, тудо нунын деч шукылан тунемын. Мутлан, Давид. Тудо лӱддымӧ сарзе да войскам вуйлатыше лийын. Сандене израильтян-влак тудым кугыжалан шогалтынешт ыле (1 Лет. 11:1, 2). Тушман-влак дене кучедалме годым Давид эре Иеговалан  ӱшаным пыштен (Пс. 27:7; Псалом 137:3 лудын лекса). Тыгак Цадок вес лӱддымӧ пӧръеҥ-влак деч тунемын — Иодай ден сарзе улшо Беная эргыж деч, тыгак вес 22 вуйлатыше деч тунемын (1 Лет. 11:22—25; 12:26—28). Чыла нине еҥ-влак уло шӱм дене Давидым кугыжалан шогалташ да тудын кугыжанышыжым аралаш ямде лийыныт.

7. а) Мемнан жапыште лӱддымылык шотышто сай примерым кӧ ончыкта? б) Видеороликым ончалын, мо́лан те Нси́лу иза деч тунемыда?

⁷ Кунам ме шонкалена, кузе весе-влак Иеговалан да тудын Кугыжанышыжлан ӱшанле кодашлан лӱддымӧ лийыныт, тиде мемнамат лӱддымӧ лияш тарата. Эн сай примерым Иисус Христос Кугыжана ончыктен. Мландыште лиймыж годым тудо Сатанан тӱнян политикышкыже пурен огыл. Тиде шотышто тудо пеҥгыде лийын (Матф. 4:8—11; Иоан. 6:14, 15). Тыгак Иисус шке вийлан гына ӱшанен огыл, а эре Иегова деч полышым кычалын. Мемнан жапыштат шуко сай пример уло. Самырык пӧръеҥ-влак армийыш огыт кай да политикыш огыт пуро. Нунын историйыштым jw.org сайтыште пален налаш лиеш a.

ИЗА-АКА-ВЛАКЛАН ПОЛШЫЗА

8. Кугурак иза-влаклан лӱддымылык кунам кӱлын кертеш?

⁸ Иегован служитлышыже-влаклан икте-весылан полшаш чот келша (2 Кор. 8:4). Южгунам тидлан лӱддымылык кӱлеш — мутлан сар годым. Иза-ака-влак Библий, публикацийна-влак, кочкыш да вургем деч посна кодын кертыт. Кугурак-иза-влак иза-ака-влакым йӧратат, сандене йӧсӧ годымат нунылан чыла кӱлешаным намиен пуаш тыршат (Иоан. 15:12, 13). Тыге нуно лӱддымӧ Цадок семын ыштат.

9. Могай заданийым Давид Цадоклан пуэн? (2 Самуила 15:27—29). (Тыгак сӱретым ончыза.)

⁹ Икана Авессалом Давид ачажым пушташ да тудын олмеш кугыжа лияш шонен пыштен  (2 Сам. 15:12, 13). Давидлан вигак Иерусалим гыч куржаш кӱлын. Тудо шке тарзыж-влаклан каласен: «Погыныза, куржаш кӱлеш, уке гын, мемнан гыч иктат Авессалом деч огеш утаралт!» (2 Сам. 15:14). Кунам Давид йолташыж-влак дене пырля ола гыч каяш тарванен, тудо умылен налын: Иерусалимыште ӱшанле еҥ-влакым кодаш кӱлеш, кудышт тудлан Авессаломын шонымыжо нерген ойлаш тӱҥалыт. Тиде заданийым Давид Цадоклан да вес священник-влаклан пуэн. (2 Самуила 15:27—29 лудын лекса.) Нунылан чотак тӱткӧ лийман ыле. Авессалом тидын нерген пален налеш ыле гын, нуным пуштеш ыле. Вет тудо шкем гына йӧратыше, ӱчым шуктышо да пеш уда айдеме лийын. Шоналтыза гына, Цадок ден вес священник-влакын шпион улмыштым пален налмеке, мом тудо ышта ыле!

10. Кузе Цадок да тудын йолташыже-влак Давидын илышыжым утареныт?

¹⁰ Давид планым шонен луктын да Цадок ден Хушай лӱман вес ӱшанле йолташыжым тудлан полшаш йодын (2 Сам. 15:32—37). Тиде план почеш Хушай Авессаломлан ончыктышаш ыле, пуйто тудын могырыштыжо улеш, да кузе Давид ӱмбак кержалташ каҥашым пуышаш ыле. Варажым Хушай Цадок ден Авиафарлан каласен, могай каҥашым Авессаломлан пуэн (2 Сам. 17:8—16). А весышт Давидлан тидын нерген каласеныт (2 Сам. 17:17). Тыге Иегован полшымыж дене Цадок да вес священник-влак Давидын илышыжым утареныт (2 Сам. 17:21, 22).

11. Иза-ака-влаклан полшымо годым, кузе те Цадок семын лӱддымӧ лийын кертыда?

¹¹ Нелылыкыш логалше иза-ака-влаклан полшаш тендам йодыт гын, кузе те Цадок семын лӱддымӧ лийын кертыда? 1) Кӱштымаш-влак почеш ыштыза. Йӧсӧ годым иктылыкым аралаш чотак кӱлешан. Верысе филиал деч инструкцийым кучылтса (Евр. 13:17, УТ). Кугурак иза-влаклан эре инструкцийым лончылаш кӱлеш, кузе пӱртӱс вий ден лийше эҥгеклан да вес эҥгеклан ямдылалташ да тыгай эҥгек годым мом ышташ. Тунам  нуно погынымашлан полшен кертыт (1 Кор. 14:33, 40). 2) Лӱддымӧ, но тунамак тӱткӧ лийза (Прит. 22:3). Иктаж-мом ыштыме деч ончыч шоналтыза. Эҥгекыш логалаш огыл манын, шке могыр гычын чылажымат ыштыза. 3) Иеговалан ӱшаным пыштыза. Иза-ака-влаклан полшымо годым шарныза: нунын гына огыл, тенданат чыла сай лийже манын, Иегован кумылжо уло. Тудо тыланда иза-ака-влаклан полшашлан эн сай йӧным муаш полша.

12, 13. Виктор ден Виталийын каласкалымышт тендам мо́лан туныкта? (Тыгак сӱретым ончыза.)

¹² Виктор ден Виталий, кок кугурак иза, Украиныште илыше иза-ака-влаклан кочкыш ден вӱдым намиен шогеныт. Виктор каласкала: «Ме кочкышым чыла вере кычалынна. Чӱчкыдын тидым лӱйкалымаш годым ышташ логалын. Икана ик иза шке запасше гыч иза-ака-влаклан шуко кочкышым пуэн. Тидлан кӧра нуно икмыняр жап шужен шинчен огытыл. Кунам ме машинаш тиде кочкышым оптенна, мемнан деч 20 метр наре тораште ракет волен возын. Иза-ака-влаклан умбакыжат полшашлан ту кече мучко мый Иеговам лӱддымылык нерген сӧрвален йодынам».

¹³ «Шуко лӱддымылык кӱлын, — ойла Виталий. — Икымше корно 12 шагат шуйнен. Корно мучко мый эре Иегова дене мутланенам». Виталий лӱддымӧ да тӱткӧ лийын. Умбакыже тудо ойла: «Мый эре уш-акыл да ӱҥышылык нерген кумалынам. Мый вуйлатыше-влакын ойырымо корнышт дене веле машина дене коштынам. Кунам мый ужынам, кузе иза-ака-влак пырля тыршен пашам ыштат, ӱшанымашем чот пеҥгыдемын. Иктышт мыланна маршрутым ыштеныт, весышт гуманитарный полышым погеныт да машинаш оптеныт, кумшышт мемнам пукшеныт да уналыкеш пуртеныт. Тидлан кӧра ме каналтен кертынна».

ИЕГОВАЛАН ӰШАНЛЕ КОДСА

14. Кунам йӧратыме айдеме Иеговам коден кая, могай шижмашна лектын кертеш?

¹⁴ Кунам йолташна але родына Иеговам коден кая, тиде мыланна кугу ойго лийын кертеш (Пс. 77:40; Прит. 24:10). Тиде айдемым чот йӧратымылан кӧра тыгай ойгым сеҥаш йӧсӧ лийын кертеш. Те тыгай дене тӱкненда гын, ӱшанле Цадокын примерже тыланда вийым пуэн кертеш.

15. Иеговалан ӱшанле кодашлан Цадоклан молан лӱддымылык кӱлын? (1 Царей 1:5—8).

¹⁵ Кунам Цадокын Авиафар лишыл йолташыже Давидлан ӱшанле лиймым чарнен, Цадок Иеговалан ӱшанле кодын. Тиде Давидын вуйлатымыжын мучаштыже лийын. Давид уже чот шоҥгемын, да Адония эргыже тудын олмеш кугыжа лияш тӧчен, кеч тиде властьым Иегова Соломонлан пуаш сӧрен ыле (1 Лет. 22:9, 10). Авиафар Адониян могырышкыжо куснен. (1 Царей 1:5—8 лудын лекса.) Тыге тудо Давидлан гына огыл, Юмыланат ӱшанле лиймым чарнен. Шоналтыза гына, могай шӱм-чон корштымашым тиде Цадоклан конден! 40 ий утла тудо Авиафар дене пырля священник семын служитлен да чын Юмын ковчегше дене кылдалтше пашам шуктен (2 Сам. 8:17; 15:29). Тиде жап мучко нуно коктынат Давидын кугыжанышын могырыштыжо пеҥгыдын шогеныт да Иеговалан служитлымаште шуко тӱрлӧ пашам шуктеныт (2 Сам. 19:11—14).

16. Цадоклан Иеговалан ӱшанле кодаш мо полшен?

¹⁶ Авиафарын решенийжым ончыде, Цадок Иеговалан ӱшанле кодын. Давид пален: Цадоклан эре ӱшанаш лиеш. Кунам Адониян шонен пыштымыже пален налме лийын, Давид Цадоклан, Нафанлан да Бенаялан Соломоным кугыжалан шӱраш кӱштен (1 Цар. 1:32—34). Нине еҥ-влакын примерышт Цадокым чот кумылаҥден да Иеговалан ӱшанле  кодаш полшен (1 Цар. 1:38, 39). Кугыжа лияш тӱҥалмеке, Соломон Цадокым Авиафар олмеш первосвященниклан шогалтен (1 Цар. 2:35).

17. Йолташда але родыда Иеговам коден каен гын, кузе те Цадок деч примерым налын кертыда?

¹⁷ Кузе те Цадок деч примерым налын кертыда? Йолташда але родыда Иеговам коден кая гын, Иеговалан ӱшанле кодса (Иис. Н. 24:15). Юмо тыланда чын ышташ вийым да лӱддымылыкым пуа. Тудлан ӱшаным пыштыза. Тудлан кумалза да Юмылан ӱшанлын служитлыше-влак дене кылым кучыза. Иегова ӱшанле улмыдам акла да тендам чынжымак суапландара (2 Сам. 22:26).

18. Марко ден Сидсе деч те мо́лан тунемыда?

¹⁸ Теве Ма́ркон да Си́дсе ватыжын примерышт. Нунын кушкын шуышо кок ӱдырыштат Иеговам коден каен. Марко ойла: «Кунам тый икымше гана икшыветым кидышкет налат, уло кӧргет йӧратымаш дене темеш, да тый палет: тудым арален кодашлан тый кеч-момат ыштет. Сандене, кунам ӱдырна-влак Иеговам коден каеныт, тиде мыланна кугу ойго лийын». Марко умбакыже ешарен ойла: «Но Иегова эре пеленна лийын. Тудын полшымыжлан кӧра ме ватем дене икте-весым кумылаҥден кертынна. Кунам мыйын вием лийын огыл, Сидсын вийже лийын, а кунам тудо шкем вийдымыла шижын, тудым кумылаҥдашлан мыйын ситышын вий лийын». А Сидсе манеш: «Иегован полшымыж деч посна ме тидым сеҥен она керт ыле. Мыланем чот йӧсӧ лийын да, ӱдырем-влак Иеговалан служитлаш чарненыт манын, мый шкем титаканлан шотленам. Тидын нерген мый Иеговалан каласкален пуэнам. Икмыняр кече эртымеке, мый Вашлиймаш залыште ик акам вашлийынам, кудыжым шуко ий ужын омыл. Тудо мыйым ӧндалын да шинчашкем ончен каласен: „Сидсе, шергаканем, тый титакан отыл“. Иегова мыйым огеш кодо да служитлымаште куаным йомдараш огыл полша».

19. Тиде статьям шымлыме деч вара те шкаланда могай цель-влакым шынденда?

¹⁹ Иегова шке служитлышыж-влак деч Цадок семынак лӱддымӧ лиймыштым вуча (2 Тим. 1:7). Но тиде огеш ончыкто, пуйто мыланна шке вийналан гына ӱшанаш кӱлеш. Мемнан Юмына тудлан ӱшанымашым пыштымынам ужнеже. Тыланда лӱддымылык огеш сите гын, тудым Иегова деч йодса да, тудо тыланда Цадок семын лӱддымӧ лияш полша! (1 Пет. 5:10).