1. Нелылыкым ончыде, Иеговалан служитлаш мыланна мо полша?

 «НЕЛЕ жап». Тыге мемнан жап нерген Библий ойла (2 Тим. 3:1). Уло тӱня мучко еҥ-влак нелылык дене тӱкнат. Но Иегован калыкше эше шыгыремдымаш да поктылмаш дене тӱкна. Нелылыкым ончыде, Юмылан умбакыжат служитлаш мыланна мо полша? Ме шке ӱмбалне Иегован полшымыжым шижынна да палена: тудо «илыше Юмо» (Иер. 10:10; 2 Тим. 1:12).

2. «Иегова — илыше Юмо» манмым кузе умылаш?

² Иегова — тиде чынжымак улшо личность. Тудо чыла нелылыкнам пала да мыланна полшашлан эре йӧным муэш (2 Лет. 16:9; Пс. 22:4). Иегова илыше Юмо улеш манын шарнена гын, тунам кеч-могай нелылыкым чытен кертына. Айста ончалына, кузе Давид кугыжан примерже тидым пеҥгыдемда.

3. «Иегова — илыше Юмо» манмыж дене Давид мом каласынеже ыле?

³ Давид Иеговам пален да тудлан чыла шотыштат ӱшанен. Саул кугыжа да вес тушман-влак деч шылын коштмо годым тудо Иегова деч полышым кычалын (Пс. 17:7). Кунам Юмо Давидлан вашмутым пуэн да тудым утарен, тудыжо каласен: «Иегова — илыше Юмо!» (Пс. 17:47). Тидын дене Давид мом каласынеже ыле? Ик справочник дене келшышын, Давид пеҥгыдын ӱшанен: Иегова — тиде «илыше юмо, кудыжо служитлышыже-влаклан эре полшен шога». Чынак, Давид шке ӱмбалне ужын: тудын Юмыжо — илыше. Тудо умбакыжат Иеговалан служитлаш да тудым чапландараш кумылаҥдыме лийын (Пс. 17:29, 30, 50).

4. Иегова илыше Юмо улеш манын умылымаш мыланна могай пайдам конда?

 ⁴ Иегова илыше Юмо улеш манын пеҥгыдын ӱшанена гын, тиде мыланна тудлан тыршен служитлаш полша. Нелылыкым чыташ вийна лиеш, да тудлан умбакыжат служитлаш кумылна вияҥеш. Тыгак ме шкенам Иегова деч кораҥдаш нимоланат она пу.

ИЛЫШЕ ЮМО ТЫЛАНДА ВИЙЫМ ПУА

5. Молан мыланна нелылык деч лӱдаш огеш кӱл? (Филиппысе-влаклан 4:13, УТ).

⁵ Иегова — илыше Юмо да тудо мыланна полшаш эре ямде улеш манын шарнена гын, тунам кеч-могай нелылыкым — изижымат, кугужымат — чытен лектын кертына. Вет тудлан сеҥаш лийдыме ик нелылыкат уке. Тудо Чылакертше Юмо, сандене тудо мыланна чытен лекташ вийым пуэн кертеш. (Филиппысе-влаклан 4:13, УТ лудын лекса.) Тугеже, нелылык-влак деч лӱдаш амална уке. Кунам ме ужына, кузе Иегова мыланна изи нелылыкыштына полша, тунам ме эше чотрак ӱшанена: тудо мемнам кугу нелылыкна годымат огеш кодо.

6. Давид дене рвезыж годым лийше могай случай-влак Иеговалан ӱшанымашыжым пеҥгыдемденыт?

⁶ Шарналтена кок случайым, кудышт Давидын Иеговалан ӱшанымашыжым пеҥгыдемденыт. Самырык лиймыж годым тудо ачажын кӱтӱжым кӱтен. Икана лев ик шорыкым наҥгаен, а вес ганажым маска кӱтӱ ӱмбак кержалтын. Кок случайыштат Давид шорык-влакым лӱдде утарен. Туге гынат Давид шке вий дене ир янлык-влакым сеҥен манын шонен огыл. Тудо пален: тудлан Иегова полшен (1 Сам. 17:34—37). Давид нигунамат монден огыл, кузе Иегова тудлан полшен. Тидын нерген шонкален, тудо эше чотрак ӱшанаш тӱҥалын: илыше Юмо тудлан ончыкыжымат вийым пуа.

7. Давид мо нерген шонен, да кузе тиде тудлан Голиаф ваштареш лекташ полшен?

⁷ Вараракшым Давид изаж-влак деке израиль военный лагерьыш толын. Тунам тудо 20 ияшат лийын огыл. Тудо ужын, мыняр чот сарзе-влак пешак кугу капан филистим Голиаф деч лӱдыныт, кудыжо Израильын войскажым игылтын (1 Сам. 17:10, 11). Нуно лӱдыныт, молан манаш гын, кугу тушманышт нерген да тудын игылтме мутшо нерген гына шоненыт (1 Сам. 17:24, 25). А Давид весе нерген шонен. Тудо умылен: Голиаф израиль сарзе-влакым гына огыл, а илыше Юмын войскажым игылтеш (1 Сам. 17:26). Давид Иегова нерген шонен. Тудо пеҥгыдын ӱшанен: Юмо, кудыжо тудлан кӱтӱчӧ лиймыж годым полшен, тиде ситуацийыштат тудым огеш кодо. Иеговалан ӱшаным пыштен, Давид Голиаф ваштареш лектын да тудым сеҥен (1 Сам. 17:45—51).

8. Иегова мыланна полшаш тӱҥалеш манын ӱшанымашнам мо пеҥгыдемден кертеш? (Тыгак сӱретым ончыза.)

⁸ Меат нелылыкым сеҥен кертына, кунам шарнена: илыше Юмо мыланна полшаш эре ямде (Пс. 117:6). Кузе тыгай пеҥгыде ӱшанымашым кушташ? Библийыште лудса, кузе Иегова ожно служитлышыже-влакым утарен (Ис. 37:17, 33—37). Тыгак jw.org сайтыштына чынжымак лийше историй-влакым муаш лиеш, кузе Юмо таче служитлышыже-влаклан полшен шога. Тыгак эше случай-влакым шарналтыза, кузе Иегова лач тыланда полшен да тендам утарен. Те шонен кертыда: «Мый лев ден маска-влак дене кучедалын омыл». Но  тӱҥжӧ тиде огыл, а кузе Иегова тыланда илышыштыда полшен. Тудо тыланда йолташыже лияш темлен (Иоан. 6:44). Кызытат тудо тыланда тудлан умбакыжат служитлаш полша. Иеговам тыгай случай-влакым шарныкташ йодса, кунам тудо кумалмыланда вашмутым пуэн, эн кӱлешан жапыште полшен да йӧсылыкда годым воктенда лийын. Тидын нерген шонкаледа гын, Иегова тендам огеш кодо манын ӱшанымашдам пеҥгыдемдеда.

9. Нелылык дене тӱкнымына годым мо нерген шарныман? (Притчи 27:11).

⁹ Нелылыкна годым мыланна эн кӱлешан нерген шарныман. Диавол ойла, пуйто ме, нелылыкыш логалын, Иеговам кодена. Тугеже нелылыкыштына шкенам кузе кучымына Иегован шижмашыжлан влиятла (Иов 1:10, 11; Притчи 27:11 лудын лекса). Иеговалан ӱшанле кодын, ме тудым йӧратымынам да Сатанан шояче улмыжым ончыктена. Могай нелылык дене те кызыт тӱкнеда? Можыч, те тыгай элыште иледа, кушто вуйлатыше-влак Иегован служитлышыже-влакым шыгыремдат, окса шотышто нелылыкда уло, еҥ-влак поро уверым огыт колышт але тыланда иктаж-могай вес нелылыкым чыташ логалеш. Тыге гын, шарныза: ситуацийда тыланда Иегован шӱмжым куандараш йӧным пуа. Тыгак ида мондо: тудо тыланда кеч-могай нелылыкым чытен лекташ полша (1 Кор. 10:13). Тидлан Иегова тыланда вийым пуа.

ИЛЫШЕ ЮМО ТЕНДАМ СУАПЛАНДАРЫМАШ ДЕЧ ПОСНА ОГЕШ КОДО

10. Кузе илыше Юмо шке служитлышыже-влакым ончыкыжым суапландара?

¹⁰ Иегова шке служитлышыже-влакым эре суапландара (Евр. 11:6). Уже кызытак тудо мыланна тынысым пуа да мыланна пиалан лияш полша, а ончыкыжым курымашлык илышым пӧлекла. Ме Юмын сӧрымашыж-влаклан пеҥгыдын ӱшанена, вет тудын нуным шукташ кумылжат, вийжат  уло. Тидын нерген шарнена гын, тиде мыланна Юмылан уло чон дене служитлаш да тудлан эн сайжым пуаш тарата. Лач тыге ожно илыше Юмын служитлышыже-влак ыштеныт. Мутлан, нунын коклаште Тимофей лийын (Евр. 6:10—12).

11. Молан Тимофей погынымаште чот тыршен? (1 Тимофейлан 4:10).

¹¹ 1 Тимофейлан 4:10 лудын лекса. Тимофей илыше Юмылан ӱшаным пыштен да сандене погынымаште чот тыршен. Мом тудо ыштен? Апостол Павелын каҥашыже почеш тудо служымаште да погынымаште туныктышо семын кушкаш тыршен. Тыгак Тимофей иза-ака-влаклан — самырык-влакланат, кугурак-влакланат — чыла шотыштат сай примерым ончыктен. Тудын проста огыл заданий-влакат лийыныт. Мутлан, кӱлеш годым тудо чын корно деч кораҥше-влаклан туран, но йӧратымаш дене каҥаш-влакым пуэн (1 Тим. 4:11—16; 2 Тим. 4:1—5). Южгунам еҥ-влак Тимофейын пашажым ужын огытыл да аклен огытыл. Но тудо пален: Иегова тудым суапландара (Рим. 2:6, 7).

12. Погынымаш верч чот тыршаш кугурак иза-влакым мо тарата? (Тыгак сӱретым ончыза.)

¹² Шергакан кугурак иза-влак, палыза: Иегова поро пашадам ужеш да чот акла. Те кӱтӱчӧ, туныктышо да таныклыше гына огыдал. Тендан гыч шукышт чоҥымаш проектыште тыршат да пӱртӱс вий дене лийше эҥгекыш логалше-влаклан полшат. Южышт черле-влак деке коштмо группышто але больнице-влак дене кылым кучышо комитет-влакыште служитлат. Кугурак иза-влак палат: погынымаш Иегован, а еҥ-влакын огыл. Сандене нуно уло кумылын заданийыштым шуктат да пеҥгыдын ӱшанат: Иегова нуным суапландара (Кол. 3:23, 24).

13. Служымаште тыршымынам Иегова акла мо? Умылтарыза.

¹³ Кажнына кугурак иза семын служитлен  огеш керт. Но ме чыланат Иеговалан мом-гынат пуэн кертына. Тудлан служымаште эн сайжым пуымынам тудо пеш чот акла. Уло тӱнямбалысе пашалан окса надырым пуымынам, эсогыл шагал пуымынам, Юмо ужеш. Тудо куана, кунам ме погынымаште, вожылмынам сеҥен, киднам нӧлтена да вашмутым пуэна. Тудын шӱмжӧ чот куана, кунам ме ӧпкем кучаш она вашке да весе-влакым проститлена. Те Иеговалан мынярым ыштымыда шуэш, тынарым ыштен ода керт гын, пеҥгыдын ӱшаныза: тудо чыла тыршымыдам акла. Тудо тендам йӧрата да суапландарымаш деч посна огеш кодо (Лук. 21:1—4).

ИЛЫШЕ ЮМО ДЕЧ ИДА КОРАҤ

14. Кузе Иегова дене лишыл йолташ лиймына мыланна тудлан ӱшанле кодаш полша? (Тыгак сӱретым ончыза.)

¹⁴ Иегова дене лишыл йолташ улына гын, тунам мыланна тудлан ӱшанле кодаш куштылгырак лиеш. Иосифын примерже тидым пеҥгыдемда. Тудо яжарланаш темлымым кораҥден. Тудо Иегован шижмашыже нерген шонен да тудым ынеж шӱлыкаҥде ыле (Тӱҥ. 39:9). Мыланна Иегова дене лишыл йолташ лияш манын, кумалмылан да тудын Мутшым шымлымылан жапым ойырыман. Иосиф семын Иегова дене йолташ лиймым аклена гын, тунам тудым шӱлыкаҥдыше паша деч кораҥына (Иак. 4:8).

15. Израильтян-влак дене ир мландыште лийше случай мемнам мо́лан туныкта? (Еврей-влаклан 3:12).

¹⁵ Иегован илыше Юмо улмыжо нерген мондышо-влак тудын деч вашке кораҥын кертыт. Шарналтена, мо израильтян-влак дене ир мландыште лийын. Нуно Иегован улмыжо нерген паленыт. Но тудо нунын верч азапланен кертеш манын, кокыте шонаш тӱҥалыныт. Нуно эсогыл йодыныт: «Иегова мемнан дене але уке?» (Исх. 17:2, 7). Чыла тиде уда лектышым конден: нуно Юмо ваштареш шогалыныт. Нунын дене лийше случай мемнам шекландарышаш. Мутат уке, нунын уда примерышт почеш  ыштымына ок шу! (Еврей-влаклан 3:12 лудын лекса.)

16. Ӱшанымашнам мо терген кертеш?

¹⁶ Тиде тӱня мемнам Иегова деч кораҥдашлан чылажымат ышта. Шукышт Юмын улмыж дене огыт келше. Тудын законжо почеш илыдыме еҥ-влак чӱчкыдын пиалан айдемыла койыт. Чыла тиде ӱшанымашнам терген кертеш. Юмын улмыжлан ӱшанена гынат, тудо мемнан верч тырша манын кокыте шонаш тӱҥалын кертына. 72-шо Псаломым возышынат тыгай шижмашыже лийын. Тудо ужын, кузе йырваш улшо еҥ-влак Юмын законжо-влак нерген йӧршынак огыт шоно да куанен илат. Тидлан кӧра тудо кокыте шонаш тӱҥалын, Иеговалан умбакыжат служитлаш кӱлеш але уке (Пс. 72:11—13).

17. Мыланна Иегова деч кораҥаш огыл мо полшен кертеш?

¹⁷ Псаломым мурышылан шонымыжым вашталташ мо полшен? Тудо шонкален, мо лиеш нунын дене, кӧ Иеговам монда (Пс. 72:18, 19, 27). Тыгак тудо чыла сай нерген шонен, мо Иегован служитлышыже-влакын уло (Пс. 72:24). Меат шонен кертына, кузе Иегова илышнам сай могырыш вашталтен. Шоналтыза гына, могай илышда Иегова деч посна лиеш ыле. Тиде тыланда тудлан ӱшанле кодаш да тудым нигунамат кодаш огыл полша. Псаломым мурышо семынак каласена: «Мыланемже Юмо дене ушнымо... сай» (Пс. 72:28).

18. Молан лийшаш событий-влак деч лӱдаш огеш кӱл?

¹⁸ Ме она пале, могай нелылык дене тиде пытартыш кечылаште тӱкнена. Но ме нуным сеҥен кертына, вет «илыше, чын Юмылан» служитлена (1 Фес. 1:9). Тудо служитлышыже-влакым йӧрата да нунылан эре полшен шога. Тыге ожно лийын. Тачат тудо вашталтын огыл. Вашке эн кугу орлык лиеш, кудыжо тӱняште эше нигунамат лийын огыл. Но ме шкетын она код — Иегова пеленна лиеш (Ис. 41:10). Сандене ме пеҥгыде ӱшанымаш дене ойлена: «Господь мыланем полшышо, ом лӱд»! (Евр. 13:5, 6).