1, 2. Иегован ӱшанле служитлышыже-влаклан могай чапым пуымо?

 ИЕГОВА тыланда кӧ улеш? Очыни, те вашештеда: «Тудо мыйын Ачам, мыйын Юмем да мыйын Йолташем». Те Иегован вес титулжо-влакымат паледа докан. Но тудо уна-влакым йӧратыше Оза улеш манын, иктаж-кунам шоненда мо?

² Давид кугыжа Иеговам оза дене таҥастарен, а тудын ӱшанле служитлышыже-влакым — уна-влак дене. Тудо йодын: «Иегова, тыйын шатёрыштет кӧ уна лийын кертеш? Тыйын святой курыкыштет кӧ илен кертеш?» (Пс. 14:1). Тиде почеламут-влак гыч ужаш лиеш: айдеме Иегован унаже, тудын йолташыже, лийын кертеш. Тиде кугу чап!

ИЕГОВА УНАЖЕ-ВЛАКЫМ ЙӦРАТА

3. а) Иегован икымше унаже кӧ лийын? б) Иегова ден икымше унаже, пырля жапым эртарен, мом шижыныт?

³ Ончыч Иегова шкетын лийын. Но вара тудо Эргыжым ыштен, кудыжо шатёрыштыжо икымше уна лийын. Иеговалан оза рольым шукташ чот келшен. Библий дене келшышын, Иеговалан Эргыж дене пырля жапым эртараш чот келшен. Эргыжланат Ачаж дене пырля жапым эртарымаш шуко куаным конден (Прит. 8:30).

4. Кӧм эше Иегова шке шатёрышкыжо ӱжын?

 ⁴ Варажым Иегова вес суксо-влакым ыштен да нунымат шатёрышкыжо ӱжын. Юмо воктен лиймылан нине Юмын эргыже-влак чот пиалан лийыныт (Иов 38:7; Дан. 7:10). Ончыч Иегован унаже-влак тудын дене пырля каваште илыше-влак веле лийыныт. Но варажым тудо еҥ-влакым ыштен. Юмо нунымат шке шатёрышкыжо ӱжын. Мутлан, Иегован унаже-влак коклаште Енох, Ной, Авраам да Иов лийыныт. Нуно Юмын эрыкше почеш иленыт, сандене тудо нуным шке йолташлан шотлен (Тӱҥ. 5:24; 6:9; Иов 29:4; Ис. 41:8).

5. Иезекииль 37:26, 27 почеламут-влакыште возымо ончылгоч каласымаш гыч ме мом пален налына?

⁵ Уже шуко курым Иегова шкеж дек унала у йолташ-влакым ӱжеш. (Иезекииль 37:26, 27 лудын лекса.) Иезекиильын ончылгоч каласымашыж гыч ме ужына: Юмо ӱшанле служитлышыже-влакын тудын дене лишыл кыл кучымашым ужнеже. Юмо «нунын дене тыныс нерген сугыньым» ышташ сӧрен. Тиде ончылгоч каласымаш ончыкта: ончыкыжым шӱрымӧ христиан-влак да мландыште илаш ӱшаныше еҥ-влак «ик кӱтӱштӧ» лийыт да тудын шатёрыштыжо пырля илаш тӱҥалыт (Иоан. 10:16). Тиде жап уже толын шуын!

ЮМО ЧЫЛА УНАЖЕ ВЕРЧ ТЫРША

6. Айдеме Иегован шатёрыштыжо кунам уна лияш тӱҥалеш, да кушто тиде шатёрым верландарыме?

⁶ Библий жапыште шатёр тиде тыгай вер лийын, кушто каналташ да йӱр але мардеж деч шылаш лиеш ыле. Оза тудын шатёрышкыжо толшо еҥым сайын ончен. Кунам ме Иеговалан ӱшанле лияш сӧрымашым пуэна, ме тудын шатёрыштыжо уна лияш тӱҥалына (Пс. 60:5). Мемнам тушто духовный кочкыш дене темше ӱстел да вес уна-влак дене сай мутланымаш вуча. Иегован шатёржо — тиде ала-могай буквальный вер огыл. Тудын шатёржо тушто, кушто тудын служитлышыже-влак (Почм. 21:3). Те вес эл-влакыш, мутлан, специальный конгрессыш, миенда гын, очыни, тушто тендан гаяк Иеговалан служитлыше иза-ака-влакым вашлийында. Нунат тудын шатёрыштыжо уна улыт.

7. Иегован колышо служитлышыже-влак тудын шатёрыштыжо алят уна улыт манын, молан каласаш лиеш? (Тыгак сӱретым ончыза.)

⁷ А Иегован ӱшанле колышо служитлышыже-влак нерген мом каласаш лиеш?  Нуно тудын шатёрыштыжо алят уна улыт манын шонаш лиеш мо? Лиеш. Молан тыге каласаш лиеш? Нуно Иегован ушыштыжо илыше улыт. Тидым Иисусын мутшо-влак пеҥгыдемдат: «Колышо-влакын ылыжмыштым Моисеят йӱлышӧ вондер нерген ойлымаште ончыктен. Моисей Господьым Авраамын Юмыжо, Исаакын Юмыжо да Иаковын Юмыжо манын. Юмо колышо-влакын Юмышт огыл, а илыше-влакын, Тудлан чылан илыше улыт» (Лук. 20:37, 38).

ИЕГОВА ШКЕ УНАЖ-ВЛАКЛАН МОГАЙ АРАЛТЫШЫМ ПУА, ДА ТУДО НУНЫН ДЕЧ МОМ ВУЧА?

8. Иегован шатёрыштыжо улшо-влак мо деч аралыме улыт?

⁸ Буквальный шатёрышто каналташ да йӱр деч але мардеж деч шылаш лиеш. А кӧ Иегован шатёрыштыжо улеш, тудо духовный эҥгек деч аралалтеш да ончыкылыклан пеҥгыде ӱшаным налеш. Иегова дене пырля лиймына годым Сатана мыланна нимогай эҥгекым ыштен огеш керт (Пс. 30:24; 1 Иоан. 3:8). У тӱняште Иегова шке ӱшанле служитлышыже-влакым духовный лӱдыкшӧ деч гына огыл, тыгак колымаш дечат аралаш тӱҥалеш (Почм. 21:4).

9. Мом Иегова шке унаже-влак деч вуча?

⁹ Иегован шатёрыштыжо уна лияш кугу чап, вет тиде Юмын йолташыже лиймым ончыкта. Тиде йолташ лиймаш курымеш шуйнен кертеш. Тыгай уналыкеш пуртымылан кузе таум ышташ лиеш? Мутлан, кунам мемнам унала ӱжыт, ме вет тушто шкенан правилна-влакым она шынде. Омса воктене йолчиемым кудашман гын, ме тыгакак ыштена. Тидын семынак мыланна палаш кӱлеш, мом Юмо шке унаже-влак деч вуча. Ме Иеговам йӧратена, сандене мемнан «чыла шотыштат Тудлан йӧрышын» ыштымына шуэш (Кол. 1:10). Мутат уке, тудо мемнан Йолташна. Но тыгак тудо Юмына да Ачана, кудыжым пагалыман (Пс. 24:14). Мыланна тидын нерген шарнаш да эре тудын деч пагалымаш дене лӱдаш кӱлеш. Тиде мыланна шкенам эскераш да койышна дене тудым шӱктараш огыл полша. Вет мемнан цельна — Юмына ончылно ӱҥышӧ лияш (Мих. 6:8).

ОЖНАТ ИЕГОВА ЕҤ-ВЛАКЫМ ИК СЕМЫН ОНЧЕН

10, 11. Синай ир мландыште Иегова чыла израильтяным ик семын ончен манын, молан каласаш лиеш?

¹⁰ Иегова чыла унажым ик семын онча (Рим. 2:11). Тидым Иегован Синай ир мландыште шке калыкшым ончымыж гыч ужаш лиеш.

¹¹ Израильтян-влакым Египет гыч лукмеке, Иегова нунылан священный шатёрым чоҥаш кӱштен да тушто служитлаш священник ден левит-влакым шогалтен. Кӧ священный шатёрышто служитлен але воктенже илен, нуным Иегова чотрак йӧратен манын каласаш лиеш мо? Иегова нуным весе-влак деч сайрак ончен мо? Уке. Иегова чылаштым ик семын ончен.

12. Иегова шке калыкыштыже чылаштымат ик семын ончен манын, кушеч коеш? (Исход 40:38). (Тыгак сӱретым ончыза.)

¹² Кажне израильтян еҥ лагерьын кеч-могай верыште илен да кеч-могай заданийым шуктен гынат, Иегован йолташыже лийын кертын. Юмо уло калыкше верч тыршен. Мутлан, израильтян-влак  священный шатёр ӱмбалне лийше пыл ден тулан меҥгым ужын кертыныт. (Исход 40:38 лудын лекса.) Кунам корнышко тарванашлан пыл нӧлталалтын, тидым лагерьын тӱрыштыжӧ илыше-влакат ужыныт. Тидлан кӧра нуно, весе-влак деч вараш кодаш огыл манын, шке арверыштым поген, корныш лекташ ямде лийыныт (Чис. 9:15—23). Тыгак чыланат кок ший пучын кугу йӱкшым колыныт, кудыжо корныш тарванаш кӱлмӧ нерген палдарен (Чис. 10:2). Иктаж-кӧ шатёр воктенрак илен гын, тиде ончыктен огыл, пуйто тудын весе-влак дене таҥастарымаште Иегова дене лишылрак кыл кучымашыже лийын. Тиде калыкыште кажныже Юмын унаже лийын кертын да тудын азапланымыжым да аралымыжым вучен кертын. Тачат тыге. Кеч-кушто илена гынат, ме пеҥгыдын ӱшанен кертына: йӧратыше Юмына мыланна виктарымашым пуаш да мемнам аралаш тӱҥалеш.

ТАЧАТ ИЕГОВА ЕҤ-ВЛАКЫМ ИК СЕМЫН ОНЧА

13. Иегова таче еҥ-влакым ик семын онча манын, кушеч коеш?

¹³ Таче Юмын южо служитлышыже-влак Иегован Таныкше-влакын тӱҥ виктемышт але иктаж-могай филиал воктене илат. Весышт эсогыл тушто служитлат. Сандене тыгай иза-ака-влак Вефильын тӱрлӧ отделыштыже полшат да нунын виктарымаш пашам шуктышо иза-влак дене мутланаш йӧнышт уло. Тыгай-влакат улыт, кӧ районым эскерымаш пашаште але вес специальный служитлымаште тырша. Те шуко иза-ака семын тыгай служитлымаште ода тырше гын, киддам ида волто. Вет тӱҥжӧ — те Иегован унаже улыда, а тудо чылаштымат, кӧм шкеж дек ӱжын конден, йӧрата. Тудо кажныжым пала да эн кӱлешанжым тудлан пуа (1 Пет. 5:7). Иегова калыкыштыже кажныжлан духовный кочкышым пуа, тудым виктара да арала.

14. Иегова чыла еҥым ик семын онча манын, эше ик примерым кондыза.

 ¹⁴ Иегова чыла еҥым ик семын онча манын, теве эше ик пример. Таче еҥ-влак, кеч-могай верыште илен, Библийым лудын кертыт. Ондак Библий еврей, арамей да грек йылме дене возымо лийын. Но тыге шонаш чын мо, пуйто оригинал йылме дене лудын моштышо еҥ-влакын Иегова дене кыл кучымашышт лишылрак? Уке (Матф. 11:25).

15. Иегова тӱрлӧ еҥ-влаклан тудын дене йолташ лияш темла манын, кушеч коеш? (Тыгак сӱретым ончыза.)

¹⁵ Ме акрет йылме-влакым она пале да мемнан кӱшыл образованийна уке гынат, ме Иегован йолташыже лийын кертына. Библийым умылашлан профессор лияш огеш кӱл. Иегова еҥ-влакым Библийым тӱжем йылме дене кусараш таратен. Сандене тӱня мучко еҥ-влакын Юмым сайрак пален налаш да тудын уш-акылан каҥашыже-влакым кучылташ йӧнышт уло (2 Тим. 3:16, 17).

ИЕГОВАН ШАТЁРЫШТЫЖО КОДСА

16. Апост. пашашт 10:34, 35 дене келшышын, Иегова шке унаж-влак деч мом вуча?

¹⁶ Иегова мемнам шке шатёрышкыжо ӱжын конден. Тидлан ме тудым чот тауштена. Тудо эн поро, эн азапланыше да уна-влакым чот йӧратыше оза. А эше тудо чыла еҥым ик семын онча. Иегова шкеж дек тӱрлӧ еҥым ӱжеш да огеш ончо, кушто нуно илат, могай калык гыч нуно улыт, могай нунын образованийышт, ийготышт, ондакысе илышышт, да огеш ончо: ӱдырамаш нуно улыт але пӧръеҥ. Но тудо унаж-влак деч тудым колыштмым вуча. (Апост. пашашт 10:34, 35 лудын лекса.)

17. Мом ме вес статьяште лончылен лектына?

¹⁷ Псалом 14:1 почеламутышто Давид йодын: «Иегова, тыйын шатёрыштет кӧ уна лийын кертеш? Тыйын святой курыкыштет кӧ илен кертеш?» Варажым Давид Юмын шӱлышын полшымыж дене нине йодыш-влаклан вашмутым возен коден. Вес статьяште ме 14-ше Псаломым келгынрак ончен лектына да эше шукырак пален налына, мом Иегова шке унаже-влак деч вуча.