1. Псалом 17:47 дене келшышын, Давид Иеговам мо дене таҥастарен?

 МЕ ТЫГАЙ тӱняште илена, кушто вучыдымо нелылык-влак илышнам нелемден але тӱрыснек вашталтен кертыт. Но пиалешна, ме шкетын огынал, Юмына эре пеленна. Кузе ме кодшо статьяште лончыленна, Иегова — илыше Юмо да тудо мыланна полшаш эре ямде улеш. Тудын полшымыжым налын, ме ужына: Иегова чынжымак илыше Юмо. (Псалом 17:47 лудын лекса.) Оҥайже теве мо: Давид Иеговам илыше Юмо манын, но тугодымак тудым чондымо кӱ курык дене таҥастарен. Тидын дене тудо мом каласынеже ыле?

2. Тиде статьяште ме мом лончылен налына?

² Тиде статьяште ме ончен лектына, молан Иегова кӱ курык дене таҥастаралтеш да могай тудын койышыж-влакым тиде палдара. Тыгак ме пален налына, кузе Юмо мемнан кӱ курыкна лийын кертеш, да лончылен налына, кузе ме Иегова деч примерым налын кертына.

МОЛАН ИЕГОВА КӰ КУРЫК ДЕНЕ ТАҤАСТАРАЛТЕШ

3. Могай библийысе почеламут-влакыште Иегова кӱ курык дене таҥастаралтеш да молан? (Сӱретым ончыза.)

³ Иеговам чапландарыме годым служитлышыже-влак гыч шукышт тудым кӱ курык дене таҥастареныт. Молан Библийыште тыгай таҥастарымашым кучылтмо? Тудо Юмын южо ӧрыктарыше койышыж-влакым ужаш полша. Икымше гана Иегова кӱ курык семын Второзаконие 32:4 почеламутышто палдарыме лийын. Пророк Аввакум Иегова мыйын кӱ курыкем манын каласен (Авв. 1:12). 72-шо Псаломын авторжат Юмо нерген каласен: «Шӱмемын кӱ курыкшо» (Пс. 72:26). Иеговат шкенжым кӱ курык манын (Ис. 44:8). Айста лончылен налына Юмын кум койышыжым, кудыжлан кӧра тудым кӱ курык дене  таҥастараш лиеш, да пален налына, кузе тудо мемнан кӱ курыкна лийын кертеш (Втор. 32:31).

4. Молан Иеговам аралтыш дене таҥастараш лиеш? (Псалом 93:22).

⁴ Иегова мемнан аралтышна. Кузе кӱ курык тӱтан мардеж деч арален кертеш, тыгакак Иегова нелылык ден тӱкнымына годым мемнам аралаш тӱҥалеш. (Псалом 93:22 лудын лекса.) Тудо мыланна тудын дене йолташ кодаш полша да мемнам ӱшандара: нигӧ да нимо мыланна тыгай эҥгекым огеш ыште, кудыжым Юмо тӧрлатен огеш керт. А ончыкыжым Иегова мыланна эше шукырак ышта — мо мемнам тургыжландара да орландара, чылажымат кораҥда (Иез. 34:25, 26).

5. Кузе Иегова мыланна аралтыш лийын кертеш?

⁵ Иегова мыланна аралтыш лийже манын, мом ыштыман? Кумалаш кӱлеш. Кунам ме тудлан кумалына, Иегова шӱм ден ушнам аралыше тыныслыкшым пуа (Флп. 4:6, 7). Теве Артёмын примерже, кудыжым Юмылан ӱшанымыжлан кӧра казаматыш шынденыт. Кажне гана допрос деч ончыч тудо чот тургыжланен, вет следователь тудым темден да мыскылен. Артём мом ыштен? Тудо шарналта: «Мый Иеговалан кумалынам, уш-акылым да шӱм-чон тыныслыкым йодынам. Следовательын темдымыжым ончыде, мый тыматле кодынам. Иегова мыланем кӱ пырдыж семын лийын».

6. Молан ме эре Иеговалан ӱшаннам пыштен кертына? (Исайя 26:3, 4).

⁶ Иегова ӱшанле. Кузе кӱ курык эре ик верыште гына шога, тыгакак Иегова эре пеленна. Ме тудлан ӱшаннам пыштен кертына, вет тудо «курымашлык Кӱ курык». (Исайя 26:3, 4 лудын лекса.) Иегова эре лиеш. Сандене кумалмынам колыштмым да мыланна полшымым тудо нигунамат огеш чарне. Тыгак тудо чыла сӧрымашыже-влакым шуктен кертеш. Эше ик амал, молан ме Иеговалан ӱшаннам пыштен кертына, — тудо шке служитлышыже-влаклан ӱшанле (2 Сам. 22:26). Тудо нигунамат поро пашанам огеш мондо да суап деч посна мемнам огеш кодо (Евр. 6:10; 11:6).

7. Иеговалан ӱшаным пыштена гын, тиде могай пайдам конда? (Тыгак сӱретым ончыза.)

⁷ Кунам ме Иеговалан тӱрыснек ӱшаным пыштена, тудо мыланна кӱ курык лияш тӱҥалеш. Ме пеҥгыдын ӱшанена: чыла тудын каҥашыже-влак мыланна пайдам гына кондат. Сандене ме тудым йӧсӧ годымат колыштына (Ис. 48:17, 18). Кунам ме тудын полшымыжым ужына, тудлан эше чотрак ӱшанаш тӱҥалына. Тиде мыланна ончыкылык нелылыклан ямдылалташ полша, кудыжым ме Иегова деч посна сеҥен она керт. Тыгай нелылыкыштына, кунам мыланна иктат полшен огеш керт да Иеговалан веле ӱшаным пыштен кертына, ме умылена, мыняр чот Иегова ӱшанле. Теве мом Владимир СИЗО-што шинчыме пагыт нерген шарналта: «Чынжымак тиде Юмо дене кыл кучымаш шотышто эн сай пагыт лийын. Мый Иеговалан эше шукырак ӱшанаш тунемынам, вет тиде ситуацийыште мый шкетын лийынам да Иегова веле мыланем тиде нелылыкым чытен лекташ полшен кертын».

8. а) Иеговам кӱ курык дене молан эше таҥастараш лиеш? б) Иегова мемнан кӱ курыкна улеш манын, молан ме куанена? (Псалом 61:7, 8).

⁸ Иегова огеш вашталт. Кугу кӱ курыкым  налаш гын, тудым ни жап, ни уда кече вашталтен огеш керт. Юмат тыге: тудо шкежат, шонен пыштымыжат нигунам огеш вашталт (Мал. 3:6). Кунам Эдем садыште Адам ден Ева Иегова ваштареш шогалыныт, тиде айдеме тукым шотышто тудын шонен пыштымыжым вашталтен кертын огыл. Апостол Павелын возымыж дене келшышын, Иегова «Шкеж деч Шке кораҥын огеш керт» (2 Тим. 2:13). Тиде теве мом ончыкта: кеч-мо лиеш гынат, кеч-мом весе-влак ыштат гынат, Иегова тыгаяк кодеш, тудо шке шонымашыжым да нормыжо-влакым нигунамат огеш вашталте. Тиде эре вашталт шогышо жапыште ме Иеговалан тӱрыснек ӱшаным пыштен кертына. Тудо мемнан утарымашна да эҥертышна. (Псалом 61:7, 8 лудын лекса.)

9. Татьянан историйже тендам мо́лан туныкта?

⁹ Ме Иегован койышыж-влак нерген да тудын шонен пыштымашыже нерген шонкалена гын, тунам тудо мемнан кӱ курыкна лиеш. Тиде мыланна йӧсӧ жапыште эмоциональный шотышто пеҥгыде кодаш полша (Пс. 15:8). Тидым Татьянан случайже пеҥгыдемда. Тудо Юмылан ӱшанымыжлан кӧра мӧҥгысӧ арестыште шинчен. Тудо манеш: «Пеленем иктат лийын огыл. Мый шкетын лийынам. Ончычын мыланем йӧсӧ лийын. Мый чӱчкыдын ойгыренам». Вара тудо Иегова нерген да айдеме тукым шотышто тудын шонен пыштымашыже нерген шонкалаш тӱҥалын да умылен, молан тудлан тиде нелылыкым чытен лекташ кӱлеш. Тиде тудлан шӱм-чон тынысым арален кодаш полшен да ӱшанле кодаш вийым пуэн.

10. Иегова мыланна кӱ курык лийже манын, мом кызытак ыштыман?

¹⁰ Ончыкыжым мемнам чот неле жап вуча. Тугодым мыланна Иеговалан пеҥгыдын ӱшанаш кӱлеш лиеш. Иегова мыланна кеч-могай ситуацийыште тудлан ӱшанле кодаш полша манын ӱшанымашнам пеҥгыдемдашлан кызыт эн келшен толшо жап. Тидлан мом ыштыман? Лудса, кузе Юмо шке служитлышыже-влаклан акрет жапыште полшен да кузе тудо тидым таче ышта. Шонкалыза, кузе Юмо нунылан аралтыш да эҥертыш лийын. Тунам Иегова тыландат кӱ курык лиеш.

ИЕГОВА ДЕЧ ПРИМЕРЫМ НАЛЗА

11. Молан мыланна Иегова деч примерым налман? (Тыгак  «Самырык иза-влаклан цель» рамкым ончыза.)

¹¹ Ме пален налынна, мо шотышто Иегова кӱ курык семын. А кызыт лончылен налына, кузе ме тудын деч примерым налын кертына. Уло вийым пыштен, Иегова деч примерым налына гын, тунам из-ака-влаклан сайрак полшен кертына. Мутлан, Иисус Симонлан Кифа лӱмым пуэн (грекла «Петр»), кудыжо «кӱ курык катышым» ончыкта (Иоан. 1:42). Петр иза-ака-влакым лыпландараш да нунылан ӱшанымаште пеҥгыде лияш полшаш тӱҥалеш манын, Иисус ойлен. Библий дене келшышын, кугурак иза-влак «кугу кӱ курык ӱмыл» семын улыт, вет нуно погынымашым аралат (Ис. 32:2). Конешне, кугурак иза-влаклан гына огыл, мемнан гыч кажныжлан Иегова деч примерым налаш да икте-весыланна кӱ курык семын лияш кӱлеш (Еф. 5:1).

12. Кузе ме иза-акана-влаклан йӧсӧ жапыште полшен кертына?

¹² Иза-ака-влаклан йӧсӧ жапыште полшыза.  Южгунам иза-акана-влаклан пӱртӱс вий ден лийше эҥгеклан, пуламырлан але сарлан кӧра пӧртыштым коден каяш логалеш. Тунам ме нуным шке декна пуртен кертына, да мемнан пӧртна нунылан аралтыш семын лиеш. Тиде «пытартыш кечылаште» тӱняште илыш начаремеш веле (2 Тим. 3:1). Сандене ончыкыжым икте-весыланна эше шукырак полшаш кӱлеш лиеш. Тыгак ме иза-ака-влаклан эмоциональный да духовный шотышто полшен кертына. Кузе тидым ышташ лиеш? Мутлан, кунам нуно вашлиймашыш толыт, ме нунын дене мутланен да нуным лыпландарен кертына. Тунам вашлиймашна йӧратымашна дене да порылыкна дене темеш. Тиде тӱняште шукышт икте-весе дек торжа улыт. Тидын верч иза-акана-влак йӧратымашым огыт шиж да эре стрессыште илат. Сандене нуным кумылаҥдымына да нунылан йӧратымашнам ончыктымына шуэш.

13. Кузе кугурак иза-влак иза-ака-влаклан йӧсылыкыштышт полшат? (Тыгак сӱретым ончыза.)

¹³ Кугурак иза-влак иза-ака-влаклан тӱрлӧ йӧсылыкыштышт полшат. Кунам пӱртӱс вий ден лийше эҥгек-влак лиедат але иктажшылан вашке медицинысе полыш кӱлеш, кугурак иза-влак жапым шуйкалыде полшат. Тыгак нуно Библийым кучылтын кумылаҥдат да лыпландарат. Иза ден ака-влаклан кугурак иза-влак деч полышым йодаш куштылгырак лиеш, кунам нуно ужыт, кузе весышт нуным умылаш тыршат, тӱткын колыштыт да порын мутланат. Кунам ме кугурак иза-влакын йӧратымыштым шижына, мыланна Библий негызеш пуымо каҥашыштым колышташ куштылгырак (1 Фес. 2:7, 8, 11).

14. Весе-влак мыланна ӱшаным пыштен кертышт манын, мом ыштыман?

¹⁴ Тыгай айдеме лийза, кӧлан ӱшанаш лиеш. Весе-влак мемнан ответственный лиймынам палышт манын кумылна уло. Тунам нунылан мемнан деч полышым йодаш куштылгырак лиеш, поснак нелылыкышт годым (Прит. 17:17). Весе-влак мыланна ӱшаным пыштен кертышт  манын, мом ыштыман? Тидлан южгунам огыл, а эре христиан койыш-влакым ончыктыман. Мутлан, пуымо сӧрымашым шукташ да тидым сӧрымӧ жапыште ышташ кӱлеш (Матф. 5:37). Тыгак ӧрдыжтӧ кодман огыл, кунам иктажшылан практический полыш кӱлеш. А мыланна иктаж-могай заданийым пуымо гын, тудым инструкций да кӱштымаш почеш шуктыман.

15. Погынымаш ӱшанле кугурак иза-влакым молан акла?

¹⁵ Ӱшанле кугурак иза-влак погынымашлан кугу пӧлек улыт. Молан тыге каласаш лиеш? Иза-ака-влак кугурак иза деч (мутлан, таныклымаш группым эскерыше иза деч) кеч-могай жапыште полышым йодаш лиеш манын палат гын, тидым ышташ нуно огыт лӱд. Тыге нуно кугурак иза-влакын йӧратымашыштым шижыт. Кугурак иза-влак каҥашыштым Библиеш да ӱшанле тарзын публикациеш негызлат гын, тунам иза-ака-влаклан нунылан ӱшанаш куштылго. А эше ме кугурак иза-влакым аклена, вет нуно мемнан нерген информацийым нигӧланат огыт ойло да сӧрымӧ мутыштым шуктат.

16. Иеговалан ӱшанле кодмына мыланна да весе-влаклан могай пайдам конда?

¹⁶ Иеговалан ӱшанле лийза. Кунам ме Иеговам чыла шотыштат колыштына да тудын Мутшо дене келшышын решений-влакым луктына,  тунам весе-влаклан сай примерым ончыктена. Библийым шымлен да Иеговалан ӱшанымашнам пеҥгыдемден, ме тудлан да тудын нормыжо-влаклан ӱшанле кодын кертына. Ме умылаш тӱҥалына, могай туныктымаш шоя да могай шонымаш Иегован шонымыжлан келшен ок тол, да нуно мемнам огыт ондале (Еф. 4:14; Иак. 1:6—8). Иеговалан да тудын сӧрымашыж-влаклан ӱшанена гын, тунам уда увер-влакым ончыде, чоныштына тыныс лиеш (Пс. 111:7, 8). Тыгак ме полшен кертына тыгай иза-ака-влаклан, кӧ нелылык ден тӱкна (1 Фес. 3:2, 3).

17. Кузе кугурак иза-влак погынымашым пеҥгыдемдат?

¹⁷ Иегова кугурак иза-влак деч чыла шотыштат шкем кучен моштышо, шотан, организованный да уш-акылан лиймыштым вуча. Кугурак иза-влак Юмын Мутшо почеш илат да тыге иза-ака-влаклан шӱм-чон тыныслыкым аралаш да погынымашым пеҥгыдемдаш полшат (1 Тим. 3:1—3; Тит. 1:9). Нине азапланыше кӱтӱчӧ-влак иза-ака-влаклан шарныктат, мыняр чот погынымашыш кошташ, служитлымаште тыршаш да шкевуя шымлымашым эртараш кӱлеш. Нуно шкештат тиде шотышто примерым ончыктат. А кунам иза-ака-влак тӱрлӧ нелылык ден тӱкнат, кугурак иза-влак нунылан Иеговам икымше верыш шындаш да тудын сӧрымашыже-влакым мондаш огыл полшат.

18. Иеговам чапландараш да тудын дене йолташ лиймым пеҥгыдемдаш мемнам мо тарата? (Тыгак  «Иегова дене эше лишылрак йолташ лийза» рамкым ончыза.)

¹⁸ Тиде статья мыланна Юмын южо койышыж-влакым эше сайрак пален налаш полшен. Ме Давид кугыжа семынак каласен кертына: «Тек Иеговам, мыйын Кӱ курыкемым, чапландарат» (Пс. 143:1). Иегова — ӱшанле Юмо. Тудо тыгай лийын, тыгай улеш да тыгаяк кодеш. Иегова эре пеленна лиеш, да ме тудын дене ӱмыр мучкына йолташ лийнена. Кеч-мыняр ияш улына гынат, каласен кертына: «Тудо мыйын кӱ курыкем» (Пс. 91:15, 16).