Иеговам куандарашлан мемнан ӱшанымашна лийшаш. Туге гынат Библийыште ойлалтеш: «Чылаштын огыл ӱшанымашышт уло» (2 Фес. 3:2). Апостол Павел тидым «йӧрдымӧ, осал еҥ-влак» нерген ойлен, кудышт тудым поктылыныт. Но тидым вес еҥ-влак нергенат каласаш лиеш. Мутлан, таче южышт чылажымат Юмо ыштен манын огыт ӱшане (Рим. 1:20). А весышт ала-могай вий уло манын ӱшанат. Но Иеговам куандарашлан тидлан гына ӱшанаш огеш сите.

Иегова уло да тудым кычалше-влаклан тудо «суапым пуа» манын, ме пеҥгыдын ӱшанышаш улына (Евр. 11:6). Ӱшанымаш святой шӱлышын саскашкыже пура. А тиде шӱлышым налашлан мыланна тудым Иегова деч йодман (Лук. 11:9, 10, 13). Тыгак шӱлышым налашлан Библийым лудаш кӱлеш. Тиде книга Юмын шӱлышын кумылаҥдымыже почеш возымо лийын. Вара лудын лекме нерген шонкалаш да пален налмым илышыш пурташ кӱлеш. Тунам Иегован шӱлышыжӧ илышналан влиятлаш тӱҥалеш да мыланна Юмым куандарыше ӱшанымашым кушташ полша.