1. Иегован южо служитлышыже-влак могай шижмаш дене кучедалыт?

 ИЕГОВАЛАН тудын калыкше келша манын, ме сайын палена. Библийыште каласыме: «Господь поро шке калыкше деке» (Пс. 149:4, У Сугынь, 1986). Но южгунам иктаж-кӧ шӱлыкаҥын шоналта: «А мый Иеговалан келшыше улам мо?» Библийыште Юмын шуко ӱшанле служитлышыже нерген возымо. Туге гынат нунынат южгунам тыгаяк шонымаш лийын (1 Сам. 1:6—10; Иов 29:2, 4; Пс. 50:13).

2. Иеговалан келшыше лияшлан мом ыштыман?

² Языкан еҥ-влак Иеговалан келшыше лийын кертыт манын, Библий раш ончыкта. Тидлан мом ыштыман? Мыланна Иисус Христослан ӱшанымашым кушташ да тынеш пураш кӱлеш (Иоан. 3:16). Тиде ошкыл ончыкта: ме шке сулыкым ыштымылан ӧкыненна да Юмылан тудын эрыкшым шукташ сӧренна (Ап. паш. 2:38; 3:19, УТ). Кунам ме Иегован йолташыже лияшлан тыгай ошкыл-влакым ыштена, тудо чот куана. Иеговалан ӱшанле лияш сӧрымашым шукташ тыршена гын, тудлан келшыше лийына да тудо мемнам шке лишыл йолташыжлан шотла (Пс. 24:14).

3. Могай кум йодыш нерген мутланен налына?

³ Молан тугеже южыштын тыгай шижмаш лектеш, пуйто нуно Иеговалан келшыше огытыл? Ме Юмылан келшыше улына манын, тудо мемнам кузе ӱшандара? Тидлан могай доказательстве-влак улыт?

МОЛАН ЮЖЫШТЛАН ИЕГОВАЛАН КЕЛШЫШЕ УЛЫТ МАНЫН ӰШАНАШ ЙӦСӦ

4, 5. Шкем йӧрдымылан шотлышо еҥ-влакым мо лыпландарен кертеш?

⁴ Мемнан гыч южышт изи годсек йӧрдымӧ улам манме шонымаш дене кучедалыт (Пс. 87:16). Адриа́н лӱман ик иза ойла: «Изинек мый шкем кӱлдымылан да йӧрдымылан шотленам. Йоча лиймем годым лишылем-влак райыште илышт манын кумалынам.  Но мый шкеже тушто илаш йӧрдымӧ улам манын шоненам». То́ни, кудыжын ача-аваже Иегован Таныкше лийын огытыл, каласкала: «Ача-авам, тыйым йӧратена да тый денет кугешнена манын, нигунамат ойлен огытыл. Кеч-мом ыште — нунылан эре шагал. Икманаш, нунылан келшыше от лий».

⁵ Нимолан йӧрдымӧ улына манын, мыланна чучеш гын, тунам шкаланна шарныкташ кӱлеш: Иегова мемнан нерген тыге ок шоно, вет тудо шке мыланна тудын йолташыже лияш темлен (Иоан. 6:44). Очыни, ме шкеат она пале, могай сай улына, но Иегова шӱмнам ужеш (1 Сам. 16:7; 2 Лет. 6:30). Кунам тудо мыланна тыйым йӧратем да аклем манын ойла, тудлан ӱшанаш огыл манын, мемнан амал уке (1 Иоан. 3:19, 20, УТ).

6. Ончыч ыштыме сулык-влак верч апостол Павелын могай шижмашыже лийын?

⁶ Чыным пален налме деч ончыч южышт шуко йоҥылышым ыштеныт, да тидлан кӧра нуным кызытат совесть индыра (1 Пет. 4:3). Ӱшанле христиан-влакланат удам ышташ кумыл дене кучедалаш логалеш. А тендан нерген мом каласаш лиеш? Иегова тендам проститлен огыл манын, тыланда южгунам чучеш мо? Туге гын, тендам тыгай шонымаш лыпландарен кертеш: Иегован вес ӱшанле служитлыше-влакынат тыгай шонымаш лийын. Мутлан, апостол Павел йоҥылышым ыштыме верч ойгырен да шкем пиалдыме айдеме манын (Рим. 7:24). Мутат уке, Павел сулыкым ыштыме верч ӧкынен да тынеш пурен. Туге гынат тудо шкенжым «эн языкан» айдемылан да апостол-влак кокла гыч «эн изижлан» шотлен (1 Тим. 1:15; 1 Кор. 15:9).

7. Сулыкым ыштенна гын, мо нерген шарнаш кӱлеш?

⁷ Кавасе Ачана ӧкынышӧ еҥ-влакым проститлаш сӧрен (Пс. 85:5). Тугеже сулыкым ыштыме верч чынжымак ӧкынена гын, Иеговалан ӱшанен кертына: тендам проститленам манын, тудо каласен гын, тиде чынжымак туге (Кол. 2:13).

8, 9. Ме Иеговалан шагал ыштена манын шонымаш деч утлаш мо полша?

⁸ Иеговалан служитлымаште уло вийым пыштымына шуэш. Но южыштлан чучеш, пуйто нуно Иеговалан шагал ыштат да нуно нигунамат тудлан келшыше огыт лий. Ама́нда лӱман ака ойла: «Чӱчкыдын мыйын тыгай шонымаш лектеш: Иеговалан эн сайжым пуынем гын, тугеже мылам шукырак да шукырак ышташ кӱлеш. Южгунам мый шке ончылнем шукташ лийдыме цель-влакым шындем да ыштен кертдымым ышташ тӧчем. А кунам тиде огеш лек, мый чот шӱлыкаҥам да Иеговат тидымак шижеш манын шонем».

⁹ Иеговалан шагал пуэна манын шонымаш деч утлаш мо полша? Шарныза, Юмо торжа огыл да мемнан деч ышташ лийдымым тудо нигунамат ок вучо. Мом ыштен кертына, тидым ыштена гын, тудо чот куана. Тыгак Иегован тыршыше служитлыше-влакын примерышт нерген шонкалыза. Мутлан, Павелын примержым ончалына. Тудо шуко ий служитлен да тидым уло вий ден ыштен. Тудо тӱжем дене километрым эртен да шуко погынымашым чумырен. Но южгунам илышыштыже вашталтыш-влак лийыныт, да тудо ончычсо семынак шуко таныклен кертын огыл. Туге гынат Павел Иеговалан келшыдыме лийын манын, тиде ончыктен мо? Уке. Павел мом кертын, тудым ыштен, да Юмо тудым суапландарен (Ап. паш. 28:30, 31). Мемнан нергенат тидымак каласаш лиеш. Южгунам ме шагалрак, южгунам шукырак ыштена, но тиде тӱҥ огыл. Иеговалан эн тӱҥжӧ — могай цель дене ме тудлан служитлена. А кызыт айста ончен лектына, кузе Иегова мемнам тудлан келшыше улына манын ӱшандара.

ИЕГОВАЛАН КЕЛШЫШЕ УЛЫНА МАНЫН, ТУДО МЫЛАННА КУЗЕ ОНЧЫКТА?

10. Иегова деч поро мутым кузе «колын» кертына? (Иоаннын 16:27).

¹⁰ Мемнан дене Библий гоч мутлана. Иегова шке служитлышыж-влаклан нуным йӧратыме  да аклыме нерген ойлашлан тӱрлӧ йӧным кучылтеш. Библийыште кок случайым возымо, кунам Иегова Иисусым йӧратыме Эрге манын да Иисус мылам келшыше улеш манын каласен (Матф. 3:17; 17:5). Иегова тыландат тыгай поро мутым каласыже манын, кумылда уло мо? Мутат уке, таче тудо мемнан дене кава гыч огеш мутлане, но тидым Библий гоч ышта. Кунам ме Евангелийыште лудына, кузе Иисус шке тунемшыж-влакым йӧратымаште ӱшандарен, тунам ме пуйто Иегован мыланна каласымыжым колына. (Иоаннын 16:27 лудын лекса.) Иисус Ачаж гаяк лийын да эре тудын семынак ыштен. Тудын ӱшанле тунемшыж-влак языкан лийыныт гынат, Иисус нунын нерген порын ойлен да нуным моктен. Тугеже, кунам ме Иисусын тунемшыж-влаклан каласыме мутым лудына, ме шонен кертына, пуйто Иегова тиде мутым лачак мыланна ойла (Иоан. 15:9, 15).

11. Тергымаш ден тӱкнена гын, Иегова мемнан деч савырнен манын, молан тиде огеш ончыкто? (Иаковын 1:12).

¹¹ Мо кӱлеш, чылажымат пуа. Иегова мыланна эре полша. Мутлан, мыланна илышлан мо кӱлеш, чылажымат пуа. Тунамак тудо мемнам чыла нелылык деч огеш арале, да мемнан Иовын семынак ойго лийын кертеш (Иов 1:8—11). Тергымаш ден тӱкнена гын, Иегова мемнан деч савырнен манын, тиде огеш ончыкто. Тергымашлан кӧра ме ончыктен кертына, мыняр чот ме Иеговам йӧратена да тудлан ӱшанена. (Иаковын 1:12 лудын лекса.) Тыгак неле жап годым ме Иеговам эше сайрак пален налын кертына. Ме ужына, мыняр чот тудо мемнам йӧрата да чылажымат чытен лекташлан вийым пуа.

12. Дмитрийын историйже мемнам мо́лан туныкта?

¹² Дмитрий изан историйжым ончен лектына. Икана тудо пашам йомдарен да шуко жап у пашам муын кертын огыл. Тудо Иеговалан тӱрыснек ӱшана манын ончыктынеже ыле. Садлан шукырак служитлаш шонен пыштен. Но шуко тылзе эртымеке, паша садак лийын огыл. Вара Дмитрий чот черланен да эре кроватьыште киен. Тудо уда ача да марий улеш да туддеч нимогай пайда уке манын шонен. Дмитрий тургыжланен да шонен, пуйто тудо Иеговаланат огеш келше. Икана кастене пӧлемышкыже ӱдыржӧ пурен да тудлан кагазым шуялтен. Тушто Исайя 30:15 гыч мут-влак возымо лийыныт: «Шкендам умбакыжат тынысын кучыза да мылам ӱшаным пыштыза, тыгела те виян лийыда». Тудо кагазым кровать тӱрыш пыштен да каласен: «Ачаем, кунам тыланет йӧсӧ, нине мут-влакым шарналте». Тунам Дмитрий умылен:  Иегова ешыж верч тырша. Нунын кочкыш, вургем, илаш вер уло. Тудо шарналтен ойла: «Чылажат, мом мылам ышташ кӱлын, — тиде тургыжланаш огыл да Иеговалан ӱшанаш». Те тыгаяк ситуацийыште улыда гын, Иеговалан ӱшаныза. Тудо тыланда полша да чылажымат чытен лекташ вийым пуа.

13. Ме Иеговалан келшыше улына манын, тудо кузе ончыктен кертеш?

¹³ Иза-ака-влак гоч ӱшандара. Иеговалан келшыше улына манын, тудо иза-ака-влак гоч ончыкта. Мутлан, тудо погынымаш гыч иктаж-кӧм мыланна кӱлеш жапыште поро мутым каласаш таратен кертеш. Азий гыч ик ака тидым шке ужын. Тудо пашажым йомдарен да чот черланен. Вара марийже кугу сулыкым ыштен да кугурак иза семын уже служитлен кертын огыл. Ака ойла: «Мый умылен кертын омыл, молан мый денем чыла тиде лийын. Ала мый иктаж-могай йоҥылышым ыштенам да Иегова мыйым суапландараш чарнен?» Акан палымыже шуын: тудо Иеговалан келшыше улеш але уке. Тудо Иегова деч тидым ончыкташ сӧрвален йодын. Кузе Юмо тудлан вашештен? Ака каласен: «Кугурак иза-влак мыйым лыпландареныт да Иегова мыйым йӧрата манын ӱшандареныт». Жап эртымеке, Иегова тудлан угыч йӧратымашыжым ончыктыжо манын, кумылжо лектын, да тудо тидын нерген кумалын. Тудо манеш: «Ту кечынак погынымаш гыч иза-ака-влак деч серыш толын. Кунам нунын поро мутыштым лудынам, мый ужынам: Иегова кумалмемым колын». Тиде случай мемнам мо́лан туныкта? Весе-влакын поро мутышт гоч Иегова мыланна ончыкта: ме тудлан келшыше улына (Пс. 9:38).

14. Иеговалан келшыше улына манын, кузе тудо эше ончыкта?

¹⁴ Иеговалан келшыше улына манын, тудо эше теве кузе ончыкта: кӱлеш годым иза-ака-влак кокла гыч иктаж-кӧм мыланна каҥашым пуаш таратен кертеш. Мутлан, икымше курымышто апостол Павел Юмын шӱлыш  кумылаҥдыме почеш иза-ака-влаклан 14 серышым возен. Нине серыш-влакыште тудо туран, но тунамак порын каҥаш-влакым пуэн. Молан Иегова Павелым нуным возаш таратен? Молан манаш гын, Иегова — сай Ача. Тудо шке йочаж-влакым йӧрата да нуным туныкта (Прит. 3:11, 12). Тугеже, кунам мыланна Библий почеш каҥашым пуат, мыланна ойгыраш огыл, а куанаш кӱлеш, вет тиде ончыкта: ме Иеговалан келшыше улына (Евр. 12:6). Иеговалан йӧрышӧ улына да тудо мемнам йӧрата манын, мо эше мемнам ӱшандарен кертеш?

ИЕГОВАЛАН КЕЛШЫШЕ УЛЫНА МАНЫН, МО ЭШЕ МЕМНАМ ӰШАНДАРЕН КЕРТЕШ?

15. Иегова мыланна святой шӱлышым пуа гын, тиде мом ончыкта?

¹⁵ Иегова тудлан йӧрышӧ еҥ-влаклан святой шӱлышым пуа (Матф. 12:18). Тиде шӱлыш мыланна сылне койыш-влакым кушташ полша. Шке деч йодаш лиеш: «Нине койыш-влак гыч могайжым мый уже ончыктем?» Библийым шымлаш тӱҥалме годым могай лийында, шарналтыза. Кызыт чытымаш койышым сайрак ончыкташ тӱҥалында мо? Жап эртымеке, Юмын шӱлыш саскам сайрак ончыктен кертына, да тиде Иеговалан келшыше улына манын ӱшанаш шукырак амалым пуа. ( «Юмын святой шӱлышыжӧ могай койыш-влакым кушташ полша?» манме рамкым ончыза.)

16. Поро уверым каласкалаш Иегова кӧлан ӱшанен пуэн, да тиде шотышто могай шижмашда лектеш? (1 Фессалоникысе-влаклан 2:4).

¹⁶ Иегова тудлан йӧрышӧ еҥ-влаклан поро уверым каласкалымаш пашам ӱшанен пуэн. (1 Фессалоникысе-влаклан 2:4 лудын лекса.) Айста ончалына, кузе Джо́селин лӱман ака тидым шке ужын. Икана эрдене тудо кынелын, да нимом ыштымыжат шуын огыл. Тудо ойла: «Шижмашем лийын: мыйын нимогай вием уке да весе-влаклан нимом пуэн ом керт. Но мый пионер лийынам да служымашыш каяш уже кутырен келшенам. Сандене мый кумалынам да таныклаш каенам». Ту эрдене Джоселин ака Мэри лӱман сай ӱдырамашым вашлийын, кудыжо Библийым шымлаш келшен. Икмыняр тылзе эртымеке, Мэри каласен: «Кунам тый омсашкем тӱкалтенат, мый лачак Юмылан полыш нерген кумалынам». Тиде случайым шарналтен, Джоселин ойла: «Мыйын тыгай шижмашем лийын, пуйто Иегова мылам каласен: „Молодец! Тый мылам йӧрышӧ улат“». Конешне, служымаште мемнан тыгай случай-влак эре огыт лий. Но таныклымаште уло кумылын тыршена гын, пеҥгыдын  ӱшанен кертына: ме Иеговалан келшыше улына.

17. Тӱлен налме нерген шонкалыме годым Виктория мом умылен? (Псалом 5:13).

¹⁷ Тӱлен налмашлан кӧра Иегова йӧрышӧ еҥ-влакын сулыкыштым проститла (1 Тим. 2:5, 6). Те тынеш пуренда гынат, шӱмда тендам ӱшандарен кертеш, пуйто те садак Иеговалан йӧрышӧ огыдал. Туге гын, шарныза: шӱмна мемнам ондален кертеш, а Иеговалан эре ӱшанаш лиеш. Тӱлен налмашлан ӱшаныше-влакым тудо чын ыштышылан шотла да нуным суапландараш сӧра. (Псалом 5:13 лудын лекса; Рим. 3:26). Теве Викториян случайже. Икана тудо тӱлен налмаш нерген шонкален да умылен: «Иегова тынар кужу жап мыйым чыта, а мый тудлан пуйто ойленам: „Тый мыйым чотак от йӧрате. А Эргетын надырже мыйын сулыкемым нигунамат тӱлен налын огеш керт“». Виктория умылен: тӱлен налмаш — тиде посна тудлан Иегован пуымо пӧлекше. Тыге Иегова тудым чот йӧрата манын, тудо ужын. Меат тӱлен налмаш нерген шонкалена гын, тунам ужына: Иеговалан келшыше улына да тудо мемнам йӧрата.

18. Кавасе Ачанам йӧратена гын, мо́лан пеҥгыдын ӱшанен кертына?

¹⁸ Тиде статья гыч каҥаш-влакым кучылташ тыршена гынат, южгунам кумылна волен кертеш да Иеговалан йӧрышӧ огынал манын шонен кертына. Тыгай лиеш гын, шарныза: Иегова йӧрышылан шотла тыгай еҥ-влакым, кӧ тудым йӧрата (Иак. 1:12). Сандене умбакыжат Иегова дек лишемза да ужаш тыршыза, кузе тудо те тудлан йӧрышӧ улыда манын ончыкта. Нигунамат ида мондо: «Юмо мемнан кокла гыч икте дечат тораште огыл» (Ап. паш. 17:27).