1. Иегова шке служитлышыже-влаклан могай пӧлек-влакым пуэн?

 ТӰНЯШТЕ илыш йӧсырак да йӧсырак лиеш. Но Иегова мыланна полшашлан иза-ака-влакым пуэн (Пс. 132:1). Тыгак тудо ешыште кыл кучымашым вияҥдаш полша (Еф. 5:33—6:1). Эше тудо мемнам туныкта, кузе чон тынысым налаш.

2. Молан южгунам Иеговалан служитлаш куштылго огыл?

² Но Иеговалан служитлаш южгунам куштылго огыл. Мутлан, иза-ака-влак ойлымышт але ыштымышт дене мемнам шӱлыкаҥден кертыт. Але ме ик йоҥылышымак угыч да угыч ыштена да тидын верч шӱлыкаҥына. Но мыланна кидым волтыман огыл. Мыланна Иеговалан умбакыжат служитлыман, 1) кунам мемнам иза але ака обижатла, 2) кунам пелаш вучымына семын ок ыште але 3) кунам шке йоҥылышна верч чот шӱлыкаҥына. Ончалына, кузе тыгайрак ситуацийыште библий жапыште илыше Юмын кум служитлышыже шкем кучен, да пален налына, мо́лан ме нунын деч тунемын кертына.

ИЗА АЛЕ АКА ТЕНДАМ ОБИЖАТЛА ГЫНАТ, ИЕГОВАЛАН ӰШАНЛЫН СЛУЖИТЛЫЗА

3. Юмын служитлышыже-влак могай нелылык дене тӱкнат?

³ Нелылык. Южгунам мемнам иза-ака-влак шӱлыкаҥдат. Молан? Нунын койышышт мемнам сырыктарен кертеш, але нуно мемнам шоныде ойлымышт але ыштымышт дене обижатлат. А южо годым кугурак иза-влак йоҥылышым ыштат. Тидын верч южышт шонен кертыт: тыге погынымаште ышталтеш гын, тугеже тиде Юмын организацийже огыл. Иза-ака-влак дене «иктыш ушнен» Юмылан служитлыме олмеш нуно тыгай иза-ака-влак деч кораҥаш тӱҥалыт, кӧ нуным обижатлен, але йӧршынак вашлиймашыш коштмым чарнат  (Соф. 3:9). Но тыге ышташ уш-акылан мо? Библийыште ик айдеме нерген ойлалтеш, кӧ тыгайрак нелылык дене тӱкнен. Айста пален налына, мом тудо ыштен.

4. Апостол Павел могай нелылык дене тӱкнен?

⁴ Библий гыч пример. Апостол Павел сайын умылен: иза-ака-влак сулыкан улыт. Мутлан, кунам тудо христиан корныш шогалын гына, Иерусалимысе погынымаш гыч южышт тудо чынжымак Иисусын тунемшыже улеш манын ӱшанен огытыл (Ап. паш. 9:26). Вара репутацийжым амырташлан южо еҥ-влак тудын нерген манеш-манешым шаркаленыт (2 Кор. 10:10). Павел ужын, кузе ик кугурак иза уда решенийым луктын да тидын дене весе-влакын ӱшанымашыштым лушкыдемден кертын (Гал. 2:11, 12). Павел дене пырля тыршыше еҥ-влак гыч иктыже, Марк, тудым чот шӱлыкаҥден (Ап. паш. 15:37, 38). Кажне ситуацийыштыже Павел нине еҥ-влак дене нимогай кылым кучаш огыл решитлен кертын. Но тудо иза-ака-влакын сай койышыштым ужаш тыршен да Иеговалан умбакыжат ӱшанлын служитлен. Мо тудлан полшен?

5. Иза-ака-влак деч кораҥаш огыл Павеллан мо полшен? (Колоссян-влаклан 3:13, 14). (Тыгак сӱретым ончыза.)

⁵ Павел иза-ака-влакым йӧратен. Нуным йӧратымылан кӧра тудо йоҥылышыштым огыл, а сай койышыштым ужаш тыршен. Тыгак йӧратымаш Павелым тыгайым ышташ таратен, мом тудо шкежак Колоссян-влаклан 3:13, 14 возен (лудын лекса). Тудо иза-влакым икте-весым проститлаш туныктен. Ончалза, кузе Павел шкежак Маркым проститлен. Кеч Марк икымше миссионер путешествий годым Павелым коден каен, Павел тудлан ӧпкем кучен огыл. Вара Павел Колоссышто илыше иза-ака-влаклан поро мут-влакым возен. Тиде серышыште тудо Маркым полышыжлан мокталтен да тудым аклымыже нерген каласен (Кол. 4:10, 11). Римысе казаматыште шинчымыж годым Павел тудын дек Маркым кондаш Тимофейым йодын (2 Тим. 4:11). Тышечын раш коеш: Павел иза-ака-влакым проститлен да нунын деч кораҥын огыл. Ме Павел деч мо́лан тунемын кертына?

6, 7. Иза-ака-влакым йоҥылышыштым ончыде йӧраташ мыланна мо полшен кертеш? (Еврей-влаклан 13:1).

⁶ Урок. Иегован кумылжо почеш ме иза-ака-влакым йӧратымым чарнышаш огынал. (Еврей-влаклан 13:1 лудын лекса.) Нуно мемнам мутышт дене сусыртеныт гын, шонаш огеш кӱл, пуйто тидым лӱмын ыштеныт (Прит. 12:18). Ӱшаныза: нуно чын ышташ тыршат, но южгунам тыге ышташ куштылго огыл. Юмо ӱшанле служитлышыже-влакым  огеш кодо да, йоҥылышыштым ончыде, нуным йӧрата. Библийыште возымо: «[Юмо] курымеш огеш сыре» (Пс. 102:9). Мыланна кавасе Ачана деч примерым налаш да весе-влакым проститлаш кӱлеш! (Еф. 4:32—5:1).

⁷ Тыгак шарныза: тиде тӱнян мучашыже лишемеш, сандене мыланна иза-ака-влак дене эше лишылрак лийман. Очыни, поктылмаш эше чотрак лиеш. Мемнам ӱшанымашланна кӧра эсогыл казаматыш шынден кертыт. Тунам иза-ака-влак мыланна поснак кӱлеш лийыт (Прит. 17:17). Теве мо Испаний гыч Хосе́п a лӱман кугурак иза дене лийын. Тудо да вес иза-влак нейтралитетым кучымылан верч казаматыш логалыныт. Тудо манеш: «Казаматыште ме пырля иленна, сандене южгунам келшыдымаш лектын кертын. Икте-весынан йоҥылышыштым ужын, мыланна нуным вашкерак проститлаш тунемаш кӱлын. Тиде мемнам ушен да арален. Вет казаматыште мемнан дене пырля тыгай еҥ-влакат шинченыт, кӧ Иеговалан служитлен огыл. Икана мый кидемым сусыртенам, да мыланем повязкым пыштеныт. Тунам мыланем весе-влакын полышышт кӱлын. Сандене ик иза мыланем тӱрлӧ семын полшен, мутлан, мыйын вургемым мушкын. Мый шке ӱмбалнем шижынам, мо тыгай чын йӧратымаш». Айста уже кызыт весе-влак дене сӧрасаш тунемына!

ПЕЛАШДА ТЕНДАМ ШӰЛЫКАҤДА ГЫНАТ, ИЕГОВАЛАН ӰШАНЛЫН СЛУЖИТЛЫЗА

8. Еш мужыр-влакын могай нелылык лийын кертеш?

⁸ Нелылык. Кажне ешыште шке нелылыкше уло. Библийыште раш каласыме: мужыраҥше «еҥын илышыштыже нелылык лиеш» (1 Кор. 7:28). Молан? Молан манаш гын, марий ден вате — кок языкан айдеме, кажныжын шке ойыртемже да ончалтышыже уло. Нуно тӱрлӧ калык гыч лийын кертыт да тӱрлӧ ешыште кушкыныт. Жап эртымеке, марий ден ватын тыгай койышышт-влак лектын кертыт, кудышт сӱан деч ончыч койын огытыл. Тиде келшыдымашым конден кертеш, да нелылыкым сеҥаш тыршыме олмеш южо марий ден вате-влак икте-весе дек пижедылаш тӱҥалын кертыт. Нунын эсогыл тыгай шонымаш лектын кертеш, пуйто эн сайже — тиде посна илаш але ойырлаш. Но тиде нунылан пиалым конда мо? b Айста библий жапыште илыше ик ӱдырамашым шарналтена. Тудын еш илышыже куштылго лийын огыл. Тудын примерже мемнам мо́лан туныкта? Айста пален налына.

9. Авигеян ешыштыже могай нелылык лийын?

⁹ Библий гыч пример. Авигеян марийже Навал лийын. Тудо торжа да осал айдеме лийын манын, Библийыште возымо (1 Сам. 25:3). Авигеялан, очыни, тыгай пӧръеҥ дене илаш неле лийын. Авигея тиде мужыраҥмаш деч утлен кертын мо? Кертын. Тыгай йӧн лектын, кунам Давид, Израильын лийшаш кугыжаже, тудын марийжым пушташ шонен пыштен. Навал Давидым да сарзыже-влакым мыскылен, садлан Давид тыгай решенийым луктын (1 Сам. 25:9—13). Авигея мӧҥгӧ гыч куржын кертеш ыле, да тунам Давид Навалым пушташ шке шонымыжым шукта ыле. Но Авигея тыге ыштен огыл да, марийжым пушташ огыл манын, Давидым ӱшандарен (1 Сам. 25:23—27). Молан тудо тыге ыштен?

10. Шуко нелылыкым ончыде, шке ешыжым аралаш Авигеям, очыни, мо таратен?

¹⁰ Авигея Иеговам йӧратен да ешлан пуымо нормыжо-влакым пагален. Тудо, очыни,  пален, икымше ешым чумырымо годым Иегова Адам ден Евалан могай кӱштымашым пуэн (Тӱҥ. 2:24). Иегова мужыраҥмашым священныйлан шотла манын, Авигея умылен. Тудо Юмым куандарынеже ыле, садлан шке мӧҥгысӧ-влакым, марийжымат, утарашлан чылажымат ыштен. Авигея, жапым шуйкалыде, Давид ваштареш лектын да тудлан Навалым пушташ пуэн огыл. Тудо шкеже нимогай осалым ыштен огыл гынат, прощенийым йодаш ямде лийын. Мутат уке, Иегова тиде ӱдырамашым йӧратен, вет тудо лӱддымӧ лийын да шкем чаманен огыл. Марий ден вате-влак Авигея деч мо́лан тунемын кертыт?

11. a) Иегова пелаш-влак деч мом вуча? (Ефесян-влаклан 5:33, УТ). б) Шке ешым аралаш Карменын тыршымыже тендам мо́лан туныкта? (Тыгак сӱретым ончыза.)

¹¹ Урок. Марий ден ватылан пырля илаш куштылго огыл гынат, Иегова нунын деч пырля лиймыштым вуча. Кунам пелаш-влак пырля нелылыкым сеҥаш тыршат да икте-весылан чын йӧратымашым да пагалымашым ончыктат, Юмо чот куана. (Ефесян-влаклан 5:33, УТ лудын лекса.) Теве Карменын примерже. Сӱан деч вара иктаж 6 ий эртымеке, тудо Иегован Таныкше-влак дене Библийым шымлаш тӱҥалын да вара тынеш пурен. Кармен ойла: «Мариемлан тиде келшен огыл. Тудо мыйым Иегова дек ушкалаш тӱҥалын, мыйым игылтын да тый дечет каем манын лӱдыктен». Тидым ончыде, Кармен шке ешыжым аралашлан чылажымат ыштен. Тудо 50 ий мучко марийжылан йӧратымашым да пагалымашым ончыкташ тыршен. Кармен ойлымыжым шуя: «Жап эртымеке, мый мариемым сайрак умылаш да, шижмашыжым шотыш налын, тудден мутланаш тӱҥалынам. Мый паленам: Иегова мужыраҥмашнам святойлан шотла. Сандене ешнам аралашлан чыла вийым пыштенам. Мый Иеговам йӧратем, садлан мариемым коден каяш шонымашемат лийын огыл» c. Ешыштыда нелылык лектеш гын, Иеговалан ӱшаныза: тудо тендам лыпландара да чылажымат сеҥен лекташ полша.

ШКЕ ЙОҤЫЛЫШЛАН КӦРА ШӰЛЫКАҤЫДА ГЫНАТ, ИЕГОВАЛАН ӰШАНЛЫН СЛУЖИТЛЫЗА

12. Кугу языкым ыштыше айдемын могай нелылык лектеш?

¹² Нелылык. Кугу языкым ыштымеке, айдемылан шкем пагалаш чот йӧсӧ. Библийыште возымо дене келшышын, языкым ыштыше айдеме чот ойгыра (Пс. 50:19). Робе́рто лӱман ик иза погынымаште служебный полышкалыше лияшлан шуко ий саемаш тыршен.  Но вара тудо кугу сулыкым ыштен да тидын ден Иеговам ондален манын умылен. Тудо каласкала: «Ыштымем верч совесть мыйым чот индырен, да чонемлан пеш йӧсӧ лийын. Мый шкем йӧрдымылан шотленам, чот шортынам да Иеговалан кумалынам. Тунам шоненам: Иегова мыйым уже нигунамат колышташ ок тӱҥал, вет мый тудым ондаленам». Ме языкым ыштенна гын, кидна волен кертеш. Тыгай годым шӱмна ӱшандара: Иегова мемнан деч савырнен да тудлан служитлаш уже огешат кӱл (Пс. 37:5). Тендан тыгаяк шижмаш лектеш гын, икымше курымысо ик христиан нерген шоналтыза, кудыжо кугу языкым ыштен гынат, Иеговалан служитлымым чарнен огыл.

13. Петр могай кугу сулыкым ыштен, да могай йоҥылыш-влаклан кӧра тиде лийын?

¹³ Библий гыч пример. Иисусын колымыжо вашеш йӱдым апостол Петр икмыняр йоҥылышым ыштен, да чыла тиде Петрым неле языкым ыштымашке конден. Эн ончыч Петр шкаланже утыжден ӱшанен да весе-влак Иисусым коден каят гынат, тудо ӱшанле кодеш манын моктанен (Мар. 14:27—29). Варажым Гефсиман садыште тудо икмыняр гана мален колтен (Мар. 14:32, 37—41). Жап эртымеке, кунам калык Иисусым кучен наҥгаяш толын, Петр куржын каен (Мар. 14:50). Мучашлан тудо, Иисусым ом пале манын, кум гана каласен да тиде шоякым товатлыме мут дене пеҥгыдемден (Мар. 14:66—71). Кунам Петр ужын, могай кугу сулыкым ыштен, тудо шкем кучен кертын огыл да чот шортын колтен. Очыни, тунам тудо йоҥылыш ыштымыжым умылен (Мар. 14:72). Икмыняр шагат эртымеке, Иисус йолташыжым казнитленыт. Шоналтыза гына, тидлан кӧра Петр мыняр чот орланен! Очыни, тудо шкенжым йӧрдымӧ еҥлан шотлен.

14. Иеговалан умбакыжат служитлаш Петрлан мо полшен? (Тыгак сӱретым ончыза.)

¹⁴ Но Петр кидым волтен огыл да Иеговалан умбакыжат служитлен. Мо тудлан полшен? Петр весе-влак деч кораҥын огыл. Тудо шке духовный изаж-влак дек каен, да нуно тудым лыпландареныт (Лук. 24:33). Тыгак Петрлан ылыжше Иисус кончен да тудым, очыни, пеҥгыдемдаш тыршен (Лук. 24:34; 1 Кор. 15:5). Варажым Иисус Петрым шылтален огыл, а мӧҥгешла тудлан шукырак пашам ӱшанен пуэн (Иоан. 21:15—17). Петр кугу языкым ыштен манын умылен, но умбакыжат чын ышташ тыршен. Молан? Тудо пален: Иисус тудым алят йӧрата. Тыгак Петрын духовный изаже-влак тудлан умбакыжат полшен шогеныт. Петрын примерже мемнам мо́лан туныкта?

15. Иегова мемнам мо шотышто ӱшандара? (Псалом 85:5; Римлян-влаклан 8:38, 39). (Тыгак сӱретым ончыза.)

 ¹⁵ Урок. Иегова мемнам ӱшандарынеже: тудо мемнам чот йӧрата да проститлаш эре ямде. (Псалом 85:5; Римлян-влаклан 8:38, 39 лудын лекса.) Кунам сулыкым ыштена, мемнам совесть индыра. Тиде тыгакак лийшаш. Но мыланна шонаш огеш кӱл, пуйто Иегова мемнам огеш йӧрате да нигунам огеш проститле. Сайрак лиеш вигак полышым кычалаш. Роберто иза, кудыжо нерген уже ойленна, каласен: «Мый шкаланем утыжден ӱшаненам да алгаштарымашым шке вием дене сеҥен кертам манын шоненам, садлан сулыкым ыштенам». Тудлан кугурак иза-влак дене мутланаш кӱлеш манын, тудо умылен. Роберто ойлымыжым шуя: «Кугурак иза-влак гоч Иегова мыйым йӧратымаште ӱшандарен. Иза-влакат мыйым чот аклат манын ужынам. Нуно мылам умылаш полшеныт: Иегова мыйым коден огыл». Иегова мемнам йӧрата манын, меат пеҥгыдын ӱшанен кертына. Ме ӧкынена, полышым кычалына да йоҥылышым угыч ышташ огыл вийым пыштена гын, Иегова мемнам чынжымак проститла (1 Иоан. 1:8, 9). Тугеже, сулыкым ыштена гынат, Иегова мемнам йӧрата манын, пеҥгыдын ӱшанена гын, умбакыжат служитлен кертына.

16. Иеговалан умбакыжат чарныде служитлаш молан кумылда уло?

¹⁶ Тиде неле пытартыш кечылаште тыршен служитлымынам Иегова чот акла. Ӱшанлын служитлаш куштылго огыл, вет ме шке йоҥылышлан кӧра але весе-влакын ыштымыштлан кӧра шӱлыкаҥын кертына. Но Иегован полшымыж дене ме чылажымат сеҥен кертына. Иза-ака-влак деке йӧратымашым пеҥгыдемден кертына, да нуно мемнам обижатлат гын, нуным проститлена. Пелаш-влак ешыште лекше нелылыкым пырля сеҥен кертыт. Тыге нуно ешлан пуымо Иегован нормыжо-влакым йӧратат да пагалат манын ончыктат. Тыгак языкым ыштена гын, Иегова деч полышым кычалына. Тудо мемнам йӧрата да проститлаш ямде манын ӱшанена да умбакыжат тудлан служитлена. Нимом ончыде, поро пашам ышташ тыршена гын, Иегова мемнам чот суапландара манын, пеҥгыдын ӱшанен кертына (Гал. 6:9).