1, 2. Кугурак иза-влак могай пашам шуктен шогат?

 ТЫЙ ик жап служебный полышкалыше семын служитлет гын, кугурак иза лияшлан йодмаш-влак гыч шукыштлан тый уже келшен толат докан. Тиде «поро пашам» шуктымет шуэш мо? (1 Тим. 3:1, УТ).

² Тиде пашаш мо пура? Кугурак иза-влак погынымаш дене пырля тыршен таныклат, духовный шотышто полшат, туныктат, ойлымышт дене да примерышт дене иза-ака-влакын ӱшанымашыштым пеҥгыдемдат. Теве молан Библий кугурак иза-влакым пӧлеклан шотла (Еф. 4:8, УТ).

 3. Кугурак иза лияшлан изалан мом ыштыман? (1 Тимофейлан 3:1—7, УТ; Титлан 1:5—9, УТ).

³ Кугурак иза лияшлан мо кӱлеш? Тидлан иктаж-могай моштымаш-влак гына огыт сите. Мутат уке, таныклен да туныктен моштышо лийман, но эше тыгай айдеме лияш кӱлеш, кудыжо нерген 1 Тимофейлан 3:1—7, УТ да Титлан 1:5—9, УТ почеламутлаште возымо (лудын лекса). Тиде статьяште ме икмыняр тыгай йодмашым лончылена. Ме мутланен налына, мо полша изалан сай репутацийым налаш, сай еш вуй лияш да иза-ака-влаклан уло кумылын служитлаш.

САЙ РЕПУТАЦИЙ

 4. Шылталаш лийдыме айдеме могай улеш?

⁴ Кугурак иза лияшлан тыланет «шылталаш лийдыме» лийман. Вес семынже, тыгай айдеме лияш кӱлеш, кудыжо нерген иза-ака-влак сайым ойлат да кудыжым удам ыштымылан титаклен огыт керт. Тыгак тыйын «ӧрдыж-влак коклаште...  сай репутациет лийшаш». Мутат уке, Иеговалан служитлыдыме еҥ-влак тыйын ӱшанымашетым критиковатлен кертыт, но нуно тыйым честный да сай айдеме семын палышаш улыт (Дан. 6:4, 5). Шке дечет йод: «Иза-ака-влак да Танык огыл еҥ-влак мыйым сай айдемылан шотлат мо?»

 5. Порым йӧратыше айдеме могай улеш?

⁵ «Порым йӧратыше» айдеме весе-влакын сай койышыштым ужеш да нуным тидлан мокта. Тыгак тудо весе-влаклан порым ышта, эсогыл туддеч вучымо деч шукырак ышта (1 Фес. 2:8). Молан кугурак иза-влаклан тидым ышташ кӱлешан? Молан манаш гын, иза порым йӧрата гын, тунам тудо иза-ака-влак верч тыршымылан да заданийже-влакым шуктымылан жапшым огеш чамане (1 Пет. 5:1—3). Тидлан тудын шуко вийже кая гынат, весе-влаклан служымаш тудлан кугу куаным конда (Ап. паш. 20:35).

 6. Уначе айдеме могай улеш? (Еврей-влаклан 13:2, 16; тыгак сӱретым ончыза.)

⁶ «Уначе» айдеме весе-влаклан порым ышта. Тудо тидым лишыл йолташ-влаклан гына огеш ыште (1 Пет. 4:9). Уначе айдеме нерген ик библейский справочникыште ойлалтеш: «Тудын пӧртшын омсаже да тудын шӱмжӧ йот еҥ-влаклан эре почмо». Шке дечет йод: «Мыйым тыгай айдеме семын палат мо, кудыжо погынымашыш толшо-влак дене уначе?» (Еврей-влаклан 13:2, 16 лудын лекса.) Уначе айдеме кеч-могай еҥ-влакым унала ӱжеш: нужна еҥ-влакымат, чот тыршыше служитлыше-влакымат, мутлан, районым эскерыше иза-влакым да ойлымаш дене лекташ толшо докладчик-влакым (Тӱҥ. 18:2—8; Прит. 3:27; Лук. 14:13, 14; Ап. паш. 16:15; Рим. 12:13).

 7. «Оксам йӧратышаш огыл» манмым кузе умылаш?

⁷ «Оксам йӧратышаш огыл». Тиде теве мом ончыкта: тый илышыштет оксам эн тӱҥлан шотлышаш отыл. Кеч поян, кеч нужна улат, Юмын Кугыжанышыжым икымше верыш шынде (Матф. 6:33). Иегован эрыкшым шуктымылан, ешет да погынымаш верч тыршымылан жапым, вийым да оксам ит чамане (Матф. 6:24; 1 Иоан. 2:15—17). Шке дечет йод: «Окса шотышто ончалтышем могай? Мо улмем дене серлагем мо? Але илышыштем эн тӱҥ цель — тиде шукырак оксам ыштен налаш да у арвер-влакым эре налаш?» (1 Тим. 6:6, 17—19).

 8. Чыла шотыштат шкем кучен моштымаш мом ончыкта?

 ⁸ Кугурак иза «чыла шотыштат шкем кучен моштышо» лийшаш. Тудо утыжым кочшаш да йӱшаш огыл, канымаш шотышто чын решенийым лукшаш да тӱжвал тӱсшӧ шотан лийже манын эскерышаш. Тыгак кугурак иза тиде тӱнясе еҥ-влак семын, кудышт Иеговалан огыт служитле, огеш иле (Лук. 21:34; Иак. 4:4). Эше кунам тудын шыдыжым лукташ тӧчат, тудо тыматле кодшаш. Кугурак иза «аракам йӱаш... йӧратыше лийшаш огыл» да тудым чот шуко йӱын кертше айдеме семын палышаш огытыл. Шке дечет йод: «Чыла шотыштат шкем кучен моштем манын, илышем гыч коеш мо?»

 9. «Айык шонымашан» да «организованный» айдеме могай улеш?

⁹ «Айык шонымашан» айдеме решений-влакым лукмыж годым библийысе принцип-влакым кучылтеш. Тыгай айдеме нине принцип-влак нерген келгын шонкала да тыге ужын моштышо лияш тунемеш. Тудо иктешлымашым ышташ огеш вашке, а чыла кӱлешан факт-влакым шотыш налеш (Прит. 18:13). Тудын решенийже-влак уш-акылан улыт, да нуно Иегован шонымашыж дене негызлалтыт. «Организованный» айдеме чылажымат шке жапыштыже шукта. Тыгай айдемылан эре ӱшанаш лиеш. Тудо чыла инструкций почеш ышта. Тый тыгай йодмаш-влаклан келшен толат гын, кудыж нерген ме ойленна, тыйын сай репутациет лиеш. А кызыт айста еш вуй улшо кугурак иза-влаклан икмыняр йодмашым лончылен налына.

ЕШ ВЕРЧ ТЫРШЫМАШ

10. Шке ешым ончен моштымаш мом ончыкта?

¹⁰ Тыйын ешет уло гын да тый кугурак иза лийнет гын, тунам ешыштет чылаштынат сай репутаций лийшаш. Сандене тый «шке ешетым моштен кучышаш» улат. Лектеш, тыланет ешетым йӧратен ончыман да ешлан пайдам кондышо решений-влакым лукман. Тыланет еш шымлымашым эртарыман. Ватет ден йочат-влак погынымашыш коштын кертышт манын, чылажымат ыштыман да нунын гыч кажныжлан таныклаш полшыман. Молан тиде кӱлешан? Апостол Павел возен: «Айдеме шке ешыжым кучен ок мошто гын, кузе Юмын погынымашыже верч тыршен кертеш?» (1 Тим. 3:5, УТ).

11, 12. Молан йоча-влакын койышышт деч шога: ачашт кугурак иза лиеш але уке? (Тыгак сӱретым ончыза.)

¹¹ Тыйын 18 ийым темше огыл йочат-влак улыт гын, нуно «мут колыштшо да шкеныштым сайын кучышо лийшаш улыт». Тыланет нуным йӧратымаш дене туныкташ кӱлеш. Мутат уке, йоча-влаклан модаш да воштылаш келша. Но нуным ача-авам колышташ, еҥ-влакым пагалаш да шкем сайын кучаш туныкташ кӱлеш. А эше йочат-влаклан Юмын йолташыже лияш да библийысе принцип-влак почеш илаш, тыгак тынеш пураш цельым шындаш да тудым шукташ полшашлан тыланет уло вийым пыштыман.

¹² «Юмылан ӱшаныше йочаже-влак, кудыштым шала илышым вӱдымылан да мутым колыштдымылан титаклаш огеш лий». Тынеш пурышо але тынеш пураш цельым шындыше йоча кугу языкым ышта гын, ачажын погынымаште шуктымо обязанностьлан тиде кузе влиятлен кертеш? Тудо йочажым туныктен да тӧрлатен огыл гын, очыни, кугурак иза семын служитлен огеш керт. (1996 ийын 15 октябрьысе «Орол башньым» ончыза, 21 стр., 6, 7 абз.)

ПОГЫНЫМАШ ВЕРЧ ТЫРШЫМАШ

13. Уш-акылан айдеме могай улеш? Ӱскырт огыл айдеме могай улеш?

¹³ Иза-влак, кудышт христиан койыш-влакым ончыктат, погынымашлан чынжымак пӧлек улыт. «Уш-акылан» айдеме весе-влак  дене тыныс кыл кучымашыжым аралашлан вийым пышта да тиде шотышто весе-влакланат полша. Тыгак тудо, еҥ-влакым тӱткын колыштын, нунын шонымыштым умылаш тырша. Мутлан, тый уже кугурак иза улат. И вот икана кугурак иза-влакын советышт погына, да иза-влак гыч шукышт тыгай решенийым луктыт, кудыжо тыланет огеш келше. Тиде решений библийысе принциплан ваштареш огыл гын, тый иза-влак гыч шукышт дене келшет мо? Кугурак иза лияш шонышо иза «ӱскырт» лийшаш огыл. Чылажат тудын шонымо почеш ышталтме лийже манын, тудо темдышаш огыл. Тудо умыла, мыняр чот весе-влак дене каҥашаш кӱлеш (Тӱҥ. 13:8, 9; Прит. 15:22). Кугурак иза «келшыдымаш деч кораҥшаш» да «вашке шыдешкыше» лийшаш огыл. Тудо весе-влакым пагалышаш да нунын дене ӱчашышаш огыл. Тидын олмеш тудо нунын дене поро лийшаш. Тугодым эн проста огыл ситуацийыштат тынысым аралашлан уло вийым пыштыман (Иак. 3:17, 18). Поро мут еҥ-влакым лыпландарен кертеш, поснак тыгай еҥ-влакым, кӧлан Иегован Таныкше-влак огыт келше (Суд. 8:1—3; Прит. 20:3; 25:15; Матф. 5:23, 24).

14. «Шукерте огыл тынеш пурышо лийшаш огыл» манмым кузе умылаш? Ӱшанле лиймаш мом ончыкта?

¹⁴ Кугурак иза лияш шонышо иза «шукерте огыл тынеш пурышо лийшаш огыл». Конешне, тудлан шуко ий тынеш пурышо лияш огеш кӱл. Но кушкын шушо христиан лияшлан, мутат уке, жап кӱлеш. Иисус деч примерым нал. Тиде тыланет ӱҥышӧ лияш, погынымаште кеч-могай заданийым шукташ ямде лияш да ту жапым, кунам Иегова тыланет у обязанностьым шукташ пуа, вучаш полша (Матф. 20:23; Флп. 2:5—8). Эше кугурак изалан «ӱшанле» лияш кӱлеш. Вес семынже, тудо Юмын чын нормыжо почеш илышаш да Юмын организацийже гоч пуымо кӱштымаш-влак почеш ыштышаш (1 Тим. 4:15, УТ).

15. Кугурак иза идеальный докладчик лийшаш мо? Умылтарыза.

¹⁵ Кугурак иза «туныктен моштышо лийшаш» манын, Библийыште раш возымо. Ончыкта мо тиде, пуйто тыланет идеальный докладчик лияш кӱлеш? Уке. Кугурак иза-влак  гыч чылашт огыл моткоч сай докладчик улыт. Туге гынат кунам кугурак иза таныкла але кунам иза-ака-влаклан кумылаҥдыше визитым ышта, нуным туныкташ да пеҥгыдемдашлан тудо Библийым моштен кучылтшаш. (1 Коринфян-влаклан 12:28, 29 почеламут-влакым Ефесян-влаклан 4:11 дене таҥастарыза.) А эше туныктен моштымашым эре саемден шогаш кӱлеш. Тидым ышташ тыланет мо полшен кертеш?

16. Кузе сай туныктышо лияш? (Тыгак сӱретым ончыза.)

¹⁶ Кугурак иза «Юмын чын мутшо дене келшышын веле туныктышаш». Сандене сцене гыч туныктымет годым але иктаж-кӧлан каҥашым пуымет годым шарне: тыйын мутет эре Священный Возымаш дене негызлыме лийшаш. Библийым да мемнан литературнам тыршен шымле (Прит. 15:28; 16:23). Шымлымаш годым ончо, кузе библийысе почеламут-влак умылтаралтыт. Тунам тый нуным чын кучылтын кертат. Весе-влакым туныктен, нунын шӱмыштым тарваташ тырше. Моштен туныкташлан опытан кугурак иза-влак деч йод, мом тыланет эше саемдаш кӱлеш, да нунын каҥашышт почеш ыште (1 Тим. 5:17). Кугурак иза-влаклан иза-ака-влакым «кумылаҥдаш» кӱлеш. Но южгунам кугурак иза-влаклан нунылан каҥашым пуаш да нуным «шылтален тӧрлаташ» логалеш. Но тидым нуно порын ыштышаш улыт. Тый весе-влак дене поро да йӧратыше лият гын да тыйын каҥашет-влак эре Библий дене негызлыме лийыт гын, тунам тый мемнан Кугу Туныктышына деч, Иисус Христос деч, примерым налмым ончыктет (Матф. 11:28—30; 2 Тим. 2:24).

УМБАКЫЖАТ ЦЕЛЬЫШ ШУАШ ТЫРШЫЗА

17. а) Кугурак иза лияш шонышо служебный полышкалышылан мом эше ышташ сайрак лиеш ыле? б) Изам кугурак изалан шогалташ шонымо годым кугурак иза-влаклан мо нерген шарнаш кӱлеш? (« Кугурак иза-влак, уш-акылан лийза» рамкым ончыза.)

¹⁷ Южо служебный полышкалыше-влак шонат, пуйто нуно нигунамат кугурак иза лийын огыт керт. Нунылан чучеш, пуйто тиде статьяште ончен лекме йодмаш-влак шукташ лийдыме улыт. Но шарне: тый чыла тиде йодмашлан тӱрыснек келшен толшаш улат  манын, ни Иегова, ни тудын организацийже огыт вучо (1 Пет. 2:21). Тыгак ит мондо: Иегова тыйым нигунамат огеш кодо, тудо тыланет полшашлан святой шӱлышыжым пуа (Флп. 2:13, УТ). Чыла тиде йодмашым шотыш налын, мо шотышто тыланет эше саемаш кӱлеш? Тунам тидын нерген Иеговалан кумал. Мемнан литературыштына тиде темылан шукырак информацийым кычал му да кугурак иза-влак деч йод, мо шотышто тыланет саемаш кӱлеш.

18. Служебный полышкалыше-влаклан могай цельым шындаш кӱлеш?

¹⁸ Тиде статьяште палдарыме йодмаш коклаште тыгайжат уло, мом мемнан гыч кажныжлан, кугурак иза-влакланат, шукташ кӱлеш (Флп. 3:16). Тый служебный полышкалыше улат гын, тунам погынымашлан шукырак ышташ цельым шынде. Иза-ака-влаклан эше сайрак полшашлан Иеговам тыйым туныкташ йод (Ис. 64:8). Пеҥгыдын ӱшане: Иегова кугурак иза лияш тыршыметым суапландара.